1-2. Bichi rhukenere kujira oku rhunali rhwalingiriza egulu lihya-hya lyayinjire?

 RHUGWERHE eshukrani bwenene oku chilagane cha Yehova ch’okuhindamula linola gulu libi libe egulu lihya-hya ly’okunali. (2 Pe. 3:13) Chiro akaba oku rhurhenji mangochi elyola gulu lihya-hya lyayinja, ebintu rhulirhwabona byarhengerera mu linola gulu zene, biyerekene oku rhurhachilingiriza bisanzi binene.​—Mt. 24:32-34, 36; Mdo. 1:7.

² Oku akola kasanzi kanahika, chiro akaba rhwamalegama omu kuli changwa nanga, rhweshi rhukenere kukomeza obwemere bwerhu mw’echola chilagane. Bulagurhe? Bulala chiro na balala bagwerhe obwemere bukomeere hakagera amango bwazamba. Che charhumaga entumwa Paulo aderha oku, okubula obwemere chili chaha “chinarhugwanyanya juba-juba.” (Ebr. 12:1) Yirhulanga obwemere bwerhu bumenye bwanoka, birhuhemere rhugenderere kulolereza buli mango ebintu birhuyemezeze oku hano hofi egulu lihya-hya lyayinja.​—Ebr. 11:1.

3. Bichi rhwaganirako mu gunola mwazi?

³ Mu gunola mwazi, rhwaganira oku njira zakarhurhabala kukomeza obwemere bwerhu omu chilagane cha Yehova ch’egulu lihya-lihya: 1) okukengeera bwenene oku nchungu, 2) okukengeera bwenene oku bilolere obuhashe bwa Yehova, n’echa 3) okukola ebintu byarhuma rhwayegerea Yehova. Naho, rhwabona nka gurhe oburhumwa Yehova ahaga Habakuki bwakakomeza obwemere bwerhu zene. Aliko rhurhange, rhuganire oku hali ziguma rhwakabugana nazo zene, zihemere rhuyerekane obwemere bukomere omu chilagane cha Yehova ch’egulu lihya-hya lyayinjire.

 EHALI ZIHEMERE RHUGWARHE OBWEMERE BUKOMERE

4. Simikiro zihe zihemere obwemere bukomeere?

⁴ Buli lusiku binahema rhurhole esimikiro zihemere obwemere bukomeere. Omufano, rhunarhola esimikiro oku bilolere abera rhunachishoga, eby’okuchisimisa, obuhya, abana, amasomo, n’akasi k’omubiri rhwakola. Kuli kwinja rhuchibaze ntya, ‘K’ebindi nachishoga kujira biyerekene oku linola gulu libi lirhagenderera kubaho oku na hano hofi egulu lihya-lihya lya Mungu lyaligombola? Changwa ndi nachishoga kujira ebintu bili kuguma n’ebya balala barhagwerhe obulangalire b’okulama esiku n’amango?’ (Mt. 6:19, 20; Lu. 12:16-21) Rhwarhola esimikiro zinja bwenene akaba, rhukomeze obwemere bwerhu oku egulu lihya-hya lili hofi bwenene.

5-6. Bulagurhe rhukenere obwemere bukomeere omu mango m’ebibazo? Lerha omufano.

⁵ Kandi yirhwahurana ebibazo bihemere obwemere bukomere. Nkabaga byakarhuhema rhulembere amalibuko, ubulwala bukomeere, changwa ebindi bintu byakarhuma rhwavunika omurhima. Burhanzi rhwakachiyunva nka rhwakagala kulwisa ebibazo byerhu. Aliko ebibazo bili nk’ebyola binazigana kumala esiku zinene. Bobola bihemere rhugwarhe obwemere bukomeere yi rhugala kulembera, n’okugenderera kukolera Yehova n’omwishingo.​—Ro. 12:12; 1 Pe. 1:6, 7.

⁶ Amango rhuli rhwahurana echigeregezo, hali amango rhwakawaza oku, egulu lihya-hya lya Yehova lirhakafa lyayinjire chiro. K’okuderha oku obwemere bwerhu bunokere si? Nkabaga nanga. Waza k’ogula mufano. Amango rhuli omu chanda chikalihire bwenene, hali amango rhwakawaza oku envula erhakarhoga chiro. Aliko hanagera amango yarhoga. Konakuguma, amango rhuvunikire omurhima bwenene, rhwakawaza oku egulu lihya-hya lirhakafa lyayinjire chiro. Aliko, nk’obwemere bwerhu bukomeere, rhwayemera oku ebilagane bya Mungu nji byayenera. (Zb. 94:3, 14, 15; Ebr. 6:17-19) Kugerera obwizere buli nk’obola, rhwakagenderera kuheba obuharamye bwerhu emwa Yehova oku nafasi y’oburhanzi omu kalamo kerhu.

7. Mawazo mahe rhukwanene kuchilangako?

⁷ Kandi, rhukenere obwemere bukomere yirhugala kukola akasi kerhu k’okuhubiri. Bantu banene rhunahubiri banawaza oku eyila “myazi minja” elolere egulu lihya-hya lya Mungu, kuli kusimisa obunu konyine, si bili bintu birhakaba chiro. (Mt. 24:14; Eze. 33:32) Rhukwanene kuba merangwe yi rhurhagwarha engangane haba n’akatyu oku bilolere ebi Yehova anarhuyigiriza kuguma n’oku abandi banajira. Y’ebyola byoshi birharhuhikira, rhukwanene kugenderera kukomeza obwemere bwerhu. Leka rhuganire oku njira esharhu rhwakajiramo ntyo.

OKENGERE BWENENE OKU NCHUNGU

8-9. Nka gurhe okukengera oku nchungu kwakakomeza obwemere bwerhu?

⁸ Njira nguma rhwakakomezamo obwemere bwerhu, kuli kuwaza bwenene oku nchungu. Enchungu chili chintu chirhuyemezeze oku ebilagane bya Mungu nji byayenera. Amango wamawaza bwenene oku mpanvu yarhumaga enchungu yahaanwa na bingana gurhe Yehova alijirire y’ehaanwa, rhwanakomeza obwemere bwerhu omu chilagane cha Mungu ch’akalamo k’esiku n’amango oku gulu linja bwenene nji chayenera. Bulagurhe rhuderhere ntyo?

⁹ Bichi byajirwaga y’enchungu ehaanwa? Yehova arhuma Omugala muzigirwa, efula yage, mwira wage w’okumurhima, kurhenga embingu n’okuburhwa hanola oku gulu nka muntu mushinganyanya. Amango Yesu aliri oku gulu, aliri alembera ebigeregezo bya mbero zoshi. Naho, alibuzwa n’okufa olufu lwa malumwa manene. Yehova alihaanire echintu ch’akachiro kanene  bwenene! Mungu werhu w’obuzigire arhakayemerere haba nakatyu oku Omugala alibuke n’okufa y’arhuha akalamo kenja aliko karhagenderere. (Yoh. 3:16; 1 Pe. 1:18, 19) Yehova ahaanire Omugala w’akachiro kanene bwenene y’arhurhabala. Kandi nj’ajira okwage koshi yirhulama esiku n’amango omu gulu lihya-hya..

OGENDERERE KUWAZA OKU BUHASHE BWA YEHOVA

10. Nk’oku olwandiko lwa Waefeso 3:20 luyerekene, bichi Yehova akagala kujira?

¹⁰ Enjira ya kabiri y’okukomeza obwemere, kuli kugenderera kuwaza bwenene oku obuhashe bwa Yehova. Agwerhe obuhashe b’okujira buli chintu choshi alaganyize kujira. Zene bantu banene banawaza oku, echilagane ch’okulama esiku n’amango omu gulu lihya-hya chirhakashobokana chiro. Aliko buli mango Yehova analaganya ebintu abantu barhakafa bagalire kuyeneza chiro. Akagala kubiyeneza bulala ali Mungu Mugala-Byoshi. (Yob. 42:2; Mk. 10:27) Bobola echola chirhakarhusomeza amango amayeneza ebilagane bisomeze bwenene!​—Osome Waefeso 3:20.

11. Lerha omufano muguma omu bilagane bya Mungu bisomeze. (Olole echisanduku “ Ebilagane Biguma Bisomeze Byayenere.”)

¹¹ Rhuganire oku bintu biguma Yehova alaganyaga abantu bage ba mira, byalibonekene nka birhakagalikana. Alibwirire Abrahamu na Sara oku bakaburhire omwana w’oburhabana omu myaka yabo y’obushaja. (Mwa. 17:15-17) Kandi, ashuba kubwira Abrahamu oku oluburho lwage lwakashokwere echihugo che Kanaana. Mu myaka minene, oluburho lwa Abrahamu, k’okuderha, Abaizraeli baba baja e Misri, bikwanene kuba eyi byalibonekene oku echola chilagane chirhakayenera haba n’akatyu. Aliko Yehova achiyeneza. Buzinda, Yehova abwira Elizabeti oku akaburhire omwana omu myaka yage y’obushaja. Kandi, abwira Mariya waliri bikira, oku akaburhire Mugala wa Mungu. Okuburhwa kwa Mugala wage kwakayeneze echilagane Yehova ahaanaga omu bustani y’Edeni habaga hamagera ebihumbi by’emyaka!​—Mwa. 3:15.

12. Bichi ebinwa bili omu Yoshua 23:14 n’omu Isaya 55:10, 11 birhuyemezeze oku bilolere obuhashe bwa Yehova?

¹² Amango rhwamawaza oku bilagane byoshi Yehova ahaanire na gurhe abiyeneze, rhwanarhegeera oku agwerhe obuhashe bunene. Naho, obwemere bwerhu omu chilagane chage ch’egulu lihya-lihya bwanakomera. (Osome Yoshua 23:14; Isaya 55:10, 11.) Echola chakarhurhabala rhuchirheganye bwinja n’okurhabala abandi barhegere oku egulu lihya-hya Mungu arhulaganyize birhali bilorho haba n’akatyu. Yehova yewe yenyine aderhere ntya oku bilolere embingu mpyahya n’egulu lihya-hya: “Ebila binwa bili bya kuchizerwa binali by’okuli.”​—Ufu. 21:1, 5.

OKOLE EBINTU BYAKARHUMA WABERA HOFI NA YEHOVA

13. Nka gurhe embuganano zakakomeza obwemere bwerhu? Fasiriya.

¹³ Enjira ya kasharhu rhwakakomezamo obwemere bwerhu kuli kukolesa ebisanzi omu kujira amakasi m’ekiroho. Omufano, rhuganire oku nyungu rhunapata oku mbunganano z’echibaga. Anna, wakolere myaka minene omu makasi malengene m’amango moshi, aderhere ntya: “Embuganano zinantabala y’obwemere bwani bugenderera kukomera. Chiro akaba omwigiriza arhenji kuyigiriza bwinja, changwa nta chintu chihya-hya ayigirize, inanzigana kurhegera echintu chakantabala kuyunva bwinja obukweri bwe Biblia, chinakomeze obwemere bwani.” b Obwemere bwerhu bunakomera amango rhulirhwayunviriza ebishubizo bene-berhu na bali-berhu bali bahaana oku mbuganano.​—Ro. 1:11, 12; 10:17.

14. Nka gurhe akasi k’okuhubiri kanakomeza obwemere bwerhu?

 ¹⁴ Kandi rhunakomeza obwemere bwerhu amango rhuli rhwakola oku kasi k’okuhubiri. (Ebr. 10:23) Barbara, wamakolera Yehova mu myaka erhalukire 70 aderhere ntya: “Amango moshi nabwene oku akasi k’okuhubiri kali kasi k’okukomeza obwemere bwani. Amango moshi naliri nageza akasanzi ndi naganira oku bilolere Yehova, kun’obwemere bwani bwanaliri bwagenderera kukomera.”

15. Nka gurhe efunzo lyawe-lyawe linakomeza obwemere bwawe? (Olole n’amafoto.)

¹⁵ Rhuganire oku chindi chintu chinakomeza obwemere bwerhu: efunzo lyerhu-lyerhu. Susan aderhere oku, okuchiheberaho eprograme y’okujira efunzo lyage-lyage kwamurhabere. Ashubire kuderha ntya: “Olwamungu, inanteganya Efunzo ly’Omunara g’Omulanzi ly’eboso lyayinjire. Lwakwanza na Lwakabiri, inanteganya embuganano y’ahagarhi k’eboso. Omu siku ziyorhere, nanaja nachirheganya oku funzo lyani-lyani.” Bulala buli mango Susan anakenga eprograme y’okuyiga buli boso, echola chinagenderera kukomeza obwemere bwage. Irene wakolere myaka minene oku biro bikulu ­by’Aba­hamirizi ba Yehova, abwene oku, obwemere bwage bwakomere bulala aliri ayiga oku bilolere okuyenezwa k’obulebi bw’Ebiblia. Aderhere ntya: “Nabwene oku bisomeze okubona okuntu obulebi bwa Yehova yi bwayenera chiro n’omu rhuntu rhugeke-geke.” c

“CHIRHABULA BWAYENERA”

16. Bulagurhe ebinwa Yehova abwiraga Habakuki bili by’akamaro emwerhu zene? (Waebrania 10:36, 37)

¹⁶ Baguma omu bakozi ba Yehova, balingirize obuzinda bwa linola gulu libi mu bisanzi binene. Bantu banene banawaza oku obuzinda bwalinola gulu libi bwalegamire bwenene. Aliko Yehova amenyere okuntu abakozi bage bali bachiyunva. Che charhugamaga abwira ntya omulebi Habakuki: “Echola chibonekezi chayenera oku kasanzi kacho kakwanene,  yichangenderera embere oku buzinda bwacho, chirhanaderha obubeshi. Chiro akaba chakalegama, ogenderere kuchilindira! Bulala kweri chirhafunda bwayenere. Chirhacherehwa!” (Hab. 2:3) Echilagane Mungu ahaga Habakuki chakamulerhere enyungu yenyine? Changwa ebyola binwa byage bigwerhe akamaro ku rhwewe zene? Kugerera eroho lichesibwa, Yehova aliyerekeze entumwa Paulo akolese ebyola binwa oku Bakristu baliri balingiriza egulu lihya-hya. (Osome Waebrania 10:36, 37.) Nechi, rhwakachizera oku na chiro echilagane cherhu ch’okuyokolwa chakabonekana nka chalegamire, “Chirhakafunda bwayenera. Chirhacherehwa!”

17. Nka gurhe mwali-werhu muguma akoleseze ehano Yehova ahaga Habakuki?

¹⁷ Bakozi banene ba Yehova bakoleseze ehano lyage ly’okugenderera “kugwarha obulangalire,” chiro na mu myaka minene. Omufano, Louise, wahwanzaga kukolera Yehova omu mwaka gwa 1939. Aderhere ntya: “Mango maguma, naliri nawaza oku evita ly’ Armagedoni lyayinja embere male amasomo makulu. Aliko birhabaga ntyo. Mu myaka minene, nasomere engani z’Ebiblia ziyerekene abantu baliri balingiriza okuyenezwa kw’ebilagane bya Yehova. Okujira ntyo kwalintabere ndingirize oku Yehova ayeneza ebilagane byage. Nasoma okuntu Nowa, Abrahamu, Yosefu n’abandi balilingirize bisanzi binene embere Yehova abahereze oluhembo lwabo. Buli mango okuyemera oku ebilagane byage byayenera, kwalintabere nyono n’abandi rhuchizere oku egulu lihya-hya liri hanola hofi-hofi.” Abandi banene bamakolera Yehova mu myaka minene nabo bayemerere echola!

18. Nka gurhe okulolereza obulemi kwakakomeza obwemere bwawe omu chilagane ch’egulu lyayinje?

¹⁸ Okuderha okuli, egulu lihya-hya lirhaza kuyinja. Aliko, waza ku bintu biguma rhuli rhwabona, k’okuderha, enyenyezi, emirhi, enyama, n’aberhu bantu. Nta muntu yeshi-yeshi wakagwarha engangane oku ebila bintu byoshi birhabaho, chiro akaba oku haliri amango ebyola bintu byoshi birhaliriho. Ebyola byoshi biliho bulala Yehova abilemere. (Mwa. 1:1, 26, 27) Mungu werhu alaganyize oku kandi nj’ajira egulu libe lihya-hya. Nj’ayeneza echola chilagane. Omu gulu lihya-hya abantu nji basiimira akalamo k’esiku n’amango eyi banagwerhe amagala mashinganyanya. Rhwakachizera oku egulu lihya-lihya lyayinja oku kasanzi ka kwanene Mungu achishogere.​—Isa. 65:17; Ufu. 21:3, 4.

19. Nka gurhe wakakomeza obwemere bwawe?

¹⁹ Oku akola kasanzi kanahika, okolese buli rozo loshi omu kukomeza obwemere bwawe. Amango moshi ogwarhe eshukrani oku nchungu. Owaze bwenene oku buhashe bwa Yehova. Oyinje wakola amakasi marhuma wayorha oli hofi-hofi na Yehova. Okajira ntyo, waba mu “balala kugerera obwemere n’okulembera bashokoola echilagane.”​—Ebr. 6:11, 12; Ro. 5:5.