1. Bulagurhe rhunahaana ebishubizo oku mbuganano?

 BULAGURHE rhunaja oku mbuganano z’echibaga? Ech’oburhanzi kuli kukuuza Yehova. (Zb. 26:12; 111:1) Kandi rhunajako yi rhuhebana omurhima buli muguma n’owindi mu binola bisanzi bikomeere. (1 Te. 5:11) Amango rhuli rhwahaana ebishubizo oku mbuganano, rhunaba eyi rhuli rhwajira ebyola bintu byombi.

2. Mangochi rhwakahaana ebishubizo oku mbuganano zerhu?

² Buli boso, rhunagwarha orozo l’okuhaana ebishubizo oku mbuganano zerhu. Omufano, oku buzinda bw’eboso rhwakahaana ebishubizo oku Funzo ly’Omunara g’Omulanzi. Oku mbuganano z’ahagarhi k’eboso, rhwakahaana ebishubizo oku chigabi ch’Obuhirhi b’omu Chinwa cha Mungu, Efunzo ly’Ebiblia ly’Echibaga, n’oku bindi bigabi bihemere abonviriza bahaane ebishubizo.

3. Bichi byakarhuma byarhukomerera kuhaana ebishubizo, na nka gurhe olwandiko lwa Waebrania 10:24, 25 lwakarhurhabala?

³ Rhweshi rhulonzeze kukuuza Yehova n’okuheba omurhima bene-berhu na bali-berhu. Aliko hali ebintu byakarhuma byarhukomerera kuhaana ebishubizo: Rhwakachiyunva rhuyubahire amango rhuli rhwalonza kushubiza, changwa rhwakasiima kweri kushubiza kanene, aliko mango maguma bene-berhu barharhubwira rhushubize amango rhwamaheba okuboko enyanya. Bichi bayakarhurhabala kulwisa ebyola bibazo? Amaruba entumwa Paulo ayandikiraga Abaebrania makarhurhabala kupata echishubizo. Amango aliri ashambala oku kamaro k’okuhika oku mbuganano, Paulo aderha oku rhukwanene kuseza obwenge bwerhu omu “kuhebana omurhima buli muguma n’owindi.” (Osome Waebrania 10:24, 25.) Amango  rhwamarhegera oku rhwakahebana omurhima chiro na kugerera ebinwa bigeke biyerekene obwemere bwerhu, rhurhayubaha bwenene amango rhwamaheba okuboko enyanya yi rhushubiza. Na nka bene-berhu barhali barhubwira oku rhushubize buli mango, rhwakagwarha obusiime bulala abandi bapatire orozo l’okuhaana ebishubizo.​—1 Pe. 3:8.

4. Bintu bihe bisharhu rhwakaganirako mu gunola mwazi?

⁴ Mu gunola mwazi, rhwarhanga kubona okuntu rhwakahebana omurhima buli muguma n’owindi omu chibaga chigeke chirhali mu bantu banene b’okuhaana ebishubizo. Naho, rhwaja rhwaganira nka gurhe rhwakahebana omurhima buli muguma n’owindi omu chibaga chizibu-zibu omu bantu banene banaheba okuboko enyanya yi bashubiza. Buzinda, rhwashambala okuntu rhwakaheba abandi omurhima kugerera ebirhuli rhwaderha amango rhuli rhwahaana ebishubizo.

5. Nka gurhe rhwakahebana omurhima buli muguma n’owindi amango bantu bageke bali oku mbuganano?

⁵ Omu chibaga chigeke changwa omu chigusho, murhaba bantu banene, mwene-werhu oli wageza chigabi chilebe akachishoga abahaana ebishubizo. Mango maguma, byakamuhema arhange alindire embere muntu muguma ehebe okuboko enyanya y’ashubiza. Embuganano yakabonekana nk’eli yalerha obolokazi, n’echola chirhakaheba abantu omurhima chiro. Bichi wakajira? Obe tayari buli mango kuheba okuboko kwawe enyanya y’oshubiza. Amango wamajira ntyo, wakaheba abandi omurhima nabo bashubize kanene.

6-7. Nka gurhe rhwakamala obuba rhugwerhe oku bilolere okuhaana ebishubizo?

⁶ Gurhe wakajira akaba onayunva oyubahire kuhaana echishubizo oku mbuganano? Omenye oku banene banachiyunva ntyo. Aliko, y’oheba omurhima bwenene bene-benyu na bali-benyu, wakawaza okuntu wakalwisa obuba bwawe oku bilolere okuhaana ebishubizo. Nka gurhe wakajira ntyo?

⁷ Okagalukira mahano manene mahaanirwe omu magazeti m’Omunara g’Omulanzi, kwakakurhabala. b Omufano, orheganye bwinja. (Mez. 21:5) Ok’onali wamenya bwinja omwazi mwaganirako, kuwanachiyunva bikuyorohere kuhaana ebishubizo. Kandi, ochihangane kuhaana ebishubizo biyufuhire. (Mez. 15:23; 17:27) Wachiyunva orhayubahire kuhaana echishubizo chiyufuhire, nk’oku wakachiyunvirhe nka wahaanaga echilehere. Echishubizo chiyufuhire, nkabaga wakachiderha omu musemwa muguma, changwa ebiri, chakayorohera chiro na bene-berhu na bali-berhu kuyunva, kulusha echishubizo chilehere, chiganirire ku mawazo manene. Amango wamahaana echishubizo chiyufuhire omu binwa byawe wenyine, wayerekana oku walichirheganyize bwinja, n’oku waliyunvirhe bwinja omwazi muli mwashambalako.

8. Gurhe Yehova anabona amango wajirire okwawe koshi y’ohaana echishubizo?

⁸ Rhuderhe oku wamakolesa mahano malebe mw’amola, aliko ochili wayunva oyubahire kuhaana chishubizo chiguma changwa bibiri. Ochizere oku Yehova asimisizwe n’obushiru bwawe oli wayerekana y’ojira nk’oku wakanagala. (Lu. 21:1-4) Yehova arharhuhemere rhujire ebintu bichubukire obuhashe bwerhu. (Flp. 4:5) Orhegere bichi wakajira, ochihebereho omuhigo g’okuchikola, onasalire Yehova akuhe omurhima gurhulerere. Burhanzi wakachiheberaho omuhigo g’okuhaana echishubizo chiyufuhire.

9. Chibazo chihe wakahurana omu chibaga chizibu-zibu?

⁹ Akaba omu chibaga chenyu muli bahubiri banene, wakahurana bibazo bilebe. Nkabaga bene-benyu na bali-benyu banazigana kuhaana ebishubizo n’echola chanarhuma mwene-werhu oli waongoza arhabona okuboko kwawe. Omufano, mwali-werhu muguma oyirikirwe Danielle, aliri ahaana ebishubizo buli mango oku mbuganano. c Aliri abona oku, okujira ntyo chili chigabi ch’obuharamye, eli njira y’okuheba bene-babo na bali-babo omurhima, kandi enali njira y’okukomeza obwemere bwage omu nyigirizo ze Biblia. Aliko amango ahamira omu chibaga chizibu-zibu, barhaliri bazigana kubona okuboko kwage ahebere enyanya, n’amango maguma arhaliri ashubiza chiro n’eliguma oku mbuganano yoshi. Aderhere ntya: “Naliri nayunva ngayire. Naliri nachiyunva nka nahezeze olukengo. Amango ebyola byamakuhikira mango oku mandi, wakaja wachibaza akaba bali bajira ntyo oku bulonza.”

10. Nka gurhe rhwakayongera orozo lwerhu l’okuhaana echishubizo?

¹⁰ Ka nawe wachigerere kuchiyunva kuguma na mwali-werhu Danielle? Akaba ntyo kubili, wakaleka kushubiza n’okuyunviriza embuganano konyine. Aliko omenye waleka kuchihangana kuhaana ebishubizo. Bichi wakajira? Wakabona oku kuli kwinja oyinje warheganya bishubizo binene ku buli mbuganano. Naho, amango wamaja wabona barhakubwirire oshubize oku chigabi chirhanzi-rhanzi, wanaba ey’ochigwerhe orozo l’okushubiza oku bindi bigabi oku mbuganano yoshi. Amango oli warheganya Efunzo ly’Omunara g’Omulanzi, olole nka gurhe buli chifungo chifarhene n’ewazo likulu ly’omwazi muli mwashambalako. Okajira ntyo, nkabaga wapata echishubizo chilebe wakahaana amango muli mwaganira k’ogola mwazi. Oku bwindi, wakarheganya bwinja y’ohaana echishubizo oku bifungo biganirire oku nyigirizo zirhayorohere kufasiriya. (1 Ko. 2:10) Bulagurhe? Bulala bantu banene barhaheba okuboko enyanya amango muli mwashambala kw’echola chigabi. Gurhe si akaba enyuma y’okukolesa amala mahano, wanabona oku hamagera mbuganano zinene orhanapata  orozo l’okuhaana echishubizo? Wakaganira n’oli wageza chigabi chilebe embere w’embuganano n’okumubwira oku wakasiima oyinje kushubiza oku chibazo chilebe.

11. Bichi olwandiko lwa Wafilipi 2:4 lurhuhebere omurhima rhujire?

¹¹ Osome Wafilipi 2:4. Eroho lichesibwa lyaliyerekeze entumwa Paulo ahire Abakristu omurhima bayinje balonza enyungu z’abandi. Nka gurhe rhwakakolesa elyola hano amango rhuli oku mbuganano? Amango rhuli rhwayibuka oku kuguma nerhu, abandi nabo balonzeze kuhaana ebishubizo oku mbuganano.

12. Njira ehe nyinja rhwakahebamo abandi omurhima oku mbuganano? (Olole n’efoto.)

¹² Waza kw’echila. Amango oli waganira nabera bawe, ka waderha binene naho nabo banaja bagwarha rozo lugeke l’okuderha? Nanga chiro! Olonzeze nabo basangire oku nganiro. K’onakuguma rhulonzeze bantu banene bahaane ebishubiszo nk’oku byakagalikana. Kweri, njira nguma rhwakahebamo bene-berhu na bali-berhu omurhima, kuli kubahereza orozo baderhe oku bilolere obwemere bwabo. (1 Ko. 10:24) Rhujage rhwaganira oku kuntu rhwakajira ntyo.

13. Nka gurhe rhwakaleka abandi nabo basangire oku bishubizo?

¹³ Njira nguma, kuli kuhaana ebishubizo birhalehere y’abandi nabo bagwarha akasanzi k’okushubiza. Abashamuka n’abandi bahubiri bagerere mu binene, bakayereka abandi olwiganyo lwinja. Chiro amango wamahaana echishubizo chiyufuhire, omenye waderha binene ku buli wazo. Nka wamaderha ku buli chintu chili omu chifungo, abandi barhachigwarha echibaderha. Omufano, mu chinola chifungo, muli mahano mabiri k’okuderha, ohaane ebishubizo biyufuhire, orhanaganiraga oku mawazo moshi mali omu chifungo. Akaba woyo we w’oburhanzi bachishogere oku ohaane echishubizo ku chinola chifungo, ochihangane kuganira ku wazo liguma mu chinola chifungo.

14. Bichi byakakurhabala omenye kangana gurhe waheba okubo enyanya? (Olole n’efoto.)

¹⁴ Okolese obwengehe amango wamachishoga kanga waheba okuboko enyanya y’oshubiza.  Nka rhuli rhwaheba okuboko kwerhu enyanya buli mango, rhwakarhuma mwene-werhu oli waongoza chigabi chilebe, achiyunva ashunikirwe kurhubaza buli mango nabo abandi barhaza kugwarha orozo l’okushubiza. Okujira ntyo kwakavuna abandi omurhima barhachihebaga okuboko enyanya.​—Muh. 3:7.

15. a) Nka gurhe rhukwanene kujira amango barharhubwirire oku rhuhaane echishubizo? b) Nka gurhe bene-berhu banageza bigabi bilebe bakayerekana oku balagire ku buli muntu? (Olole echisanduku “ Amango oli Wageza Chigabi Chilebe.”)

¹⁵ Amango abahubiri banene bamaheba okuboko enyanya, hali oku birhakagalikana oku oshubize kanene nk’oku walilonzeze. Mango maguma mwene-werhu oli wageza echola chigabi arhakarhubona haba n’akatyu. Ebyola byakarhuvuna omurhima, aliko rhukwanene kuchihangana rhurhagayaga amango barharhubwirire rhushubize.​—Muh. 7:9.

16. Nka gurhe rhwakaheba omurhima abahanire ebishubizo?

¹⁶ Akaba birhagalikene oku ohaane ebishubizo nk’oku walilonzeze, bulagurhe orhakayunviriza bwinja-bwinja ebishubizo abandi bali bahaana n’enyuma w’embuganano okaja wababwira koko oku bishubizo byabo? Bene-benyu na bali-benyu bakabona oku, okubabwira koko oku bishubizo bahaanire kwabahebere omurhima kuguma nk’oku ebishubizo wakahaanire byakajirire. (Mez. 10:21) Okubwira abandi koko nayo eli yindi njira rhwakahebanamo omurhima buli muguma n’owindi.

17. a) Nka gurhe abazere bakarhabala abana babo kurheganya ebishubizo bikwanene? b) Nk’oku evideo eyerekene, bintu bine bihe rhwakajira amango rhuli rhwarheganya echishubizo? (Olole nʼamahugulo mʼeshishi.)

¹⁷ Bichi bindi rhwakajira yi rhuhebana omurhima buli muguma n’owindi oku mbuganano? Akaba oli muzere, orhabale abana bawe barheganye ebishubizo nk’oku emyaka yabo enali. (Mt. 21:16) Mango maguma, rhwakaba eyi rhuli rhwayiga omwazi gukomeere, nk’oguderhere oku bibazo omu mulala, changwa ebilolere okuntu rhunachigendesa, aliko hakaba eyi hali chifungo chiguma changwa bibiri eby’omwana naye akashubizako. Kandi, orhabale abana bawe kurhegeera oku, arhali buli mango baheba okuboko enyanya ku babwira bashubize. Okubafasiriya ebyola, kwabarhabala barhavunikaga omurhima amango oli wageza chigabi chilebe amachishoga abandi oku babashubizage.​—1 Ti. 6:18. d

18. Nka gurhe rhwakaleka kuchisazeko obwenge amango rhuli rhwashubiza? (Mezali 27:2)

¹⁸ Buli muguma werhu akarheganya ebishubizo bihere Yehova olukengo n’okuhira omurhima bene-berhu na bali-berhu. (Mez. 25:11) Chiro akaba oku mango maguma rhwakaderha omu binwa bigeke ebirhwagereremo, rhurhakwanene kuderha binene oku birhulolere. (Osome Mezali 27:2; 2 Ko. 10:18) Ahali h’okujira ntyo, rhwanachihangana kuseza obwenge bwerhu ku Yehova, Echinwa chage, n’olubaga lwage loshi. (Ufu. 4:11) Kweri, rhukwanene kujira ntyo akaba echibazo ch’echifungo chirhuyemerere rhuderhe oku birhwagereremo. Omufano guli ntyo rhwagubona omu chifungo chikulikireho cha gunola mwazi.

19. a) Nyungu zihe rhwakagwarha amango rhwamayerekana oku rhulagire ku buli muguma n’owindi oku mbuganano? (Waroma 1:11, 12) b) Bichi onasiima bwawe-bwawe oku bilolere okuhaana echishubizo oku mbuganano?

¹⁹ Chiro akaba oku nta marhegeko mahanirwe oku bilolere okuntu rhwashubiza, rhwakachihangana kuhebana omurhima buli muguma n’owindi. K’okuderha oku rhuyinje rhwachihangana kuhaana bishubizo bigeke mango oku mandi, amango rhwamahabwa olola rozo. Kandi rhwakagwarha obusiime bulala abandi nabo bapatire akasanzi k’okushubiza. Amango rhwamachiseza oku nyungu z’abandi amango rhuli oku mbuganano z’echibaga, rhweshi rhwakagwarha obusiime omu “kuhebana omurhima buli muguma n’owindi.”​—Osome Waroma 1:11, 12.