1. Bwizere buhe rhugwerhe?

 RHWABO bantu ba Yehova, rhumenyere oku arhuzigiire analonzeze rhugwarhe akalamo kenja nk’oku byakanagalikana. (Ro. 8:35-39) Kandi rhuchizerere oku amakanuni me Biblia manarhulerhera enyungu buli mango, amango rhwamamakolesa. (Isa. 48:17, 18) Aliko si, gurhe rhwakajira amango rhwamahurana ebibazo rhurhaliwazize?

2. Bibazo bihe nkabaga yirhwahurana, na bichi byakarhuma rhwachibaza?

² Abakozi ba Yehova boshi banahurana ebibazo. Omufano, omuntu w’omulala akarhugayisa mu njira nguma changwa eyindi. Rhwakahurana echibazo ch’amagala chikomeere n’echola chanarhuma rhurhachikola binene omu kasi ka Yehova. Hali amango echinjira chakarhulibuza bwenene. Changwa rhwakalibuzwa eju y’obwemere bwerhu. Amango rhwamahurana ebibazo bili nk’ebyola, hali oku rhwakachibaza ntya: ‘Bulagurhe ebila bili byampikira? Ka hali chintu chibi najirire? K’ebila biyerekene oku Yehova arhali ampa emigisho?’ Wachigerere kuwaza ntyo si? Akaba ntyo ku bili, omenye wavunika omurhima. Banene omu bakozi bemana ba Yehova, bachigerere kuchiyunva ntyo.​—Zb. 22:1, 2; Hab. 1:2, 3.

3. Bichi olwandiko lwa Zaburi 34:19 lwakarhuyigiriza?

³ Osome Zaburi 34:19. Hala bintu bibiri by’akamaro bili mw’eyila zaburi: 1) Abanya-kunali banahurana ebibazo. 2) Yehova anarhuyokola omu bibazo byerhu. Nka gurhe Yehova anarhuyokola? Njira nguma kuli kurhurhabala rhugwarhe amawazo makwirire oku bilolere akalamo mu linola gulu libihire. Chiro akaba oku Yehova arhulaganyize akalamo k’omwishingo amango rhuli rhwamukolera, arhaderhere oku nta bibazo rhwakahurana zene. (Isa. 66:14) Arhuhebere omurhima rhuseze  obwenge bwerhu oku mango mayinjire, amango nji rhwagwarha akalamo alonzeze rhusiimire esiku n’amango. (2 Ko. 4:16-18) Aliko oku amola mango manahika, arhurhabala rhugenderere kumukolera.​—Omb. 3:22-24.

4. Bichi rhwaganirako mu gunola mwazi?

⁴ Rhuganirage oku mifano y’abantu bemana baliri baharamya Yehova b’omu mango ma mira n’ab’omu siku zerhu. Nk’oku rhwabona hali amango rhwakahurana ebibazo rhurhaliwazize. Aliko amango rhwamalangalira Yehova, arhakafa alekere kurhurhabala haba n’akatyu. (Zb. 55:22) Oku rhunali rhwaganira kw’eyola mifano, ochibaze ntya: ‘Gurhe nakajirire nka nyono nyenaliri omu hali eli nk’eyila? Nka gurhe eyila mifano ekomeze obwizere bwani mu Yehova? Bintu bihe nayigire nakakolesa omu kalamo kani?’

5. Bibazo bihe Yakobo alihurene eju ya Labani? (Olole efoto eli oku chiganda.)

⁵ Abakozi ba Yehova b’omu mango ma mira, balihurene ebibazo barhaliwazize oku byakabahikira. Waza oku mufano gwa Yakobo. Eshe alimubwirire oku aje kurhola omukazi omu banyere ba Labani, muchi wabo waliri aharamya Mungu, analimurhabere achizere oku Yehova akamuhere migisho minene. (Mwa. 28:1-4) Bobola Yakobo ajira echintu chisimisize. Arhenga omu chihugo che Kanaani n’okubalamira emwa Labani, waligwerhe banyere babiri, Leya na Raheli. Yakobo asiima Raheli, munyere mudorho wa Labani, anayemera kukolera Labani myaka mushanvu y’ashaba oyola munyere. (Mwa. 29:18) Aliko ebintu birhajirikaga nk’oku Yakobo alilangalire. Labani amulyalihira, omu kumushabisa Leya, omunyere wage mukulu. Enyuma wa boso liguma, amushabisa Raheli naye, aliko alikwanene kumukolera yindi myaka mushanvu. (Mwa. 29:25-27) Labani kandi arhaliri akenga ebi bayunvikanaga na Yakobo. Labani akolera Yakobo oku bulyalya myaka 20 yoshi!​—Mwa. 31:41, 42.

6. Bindi bibazo bihe Yakobo alihurene?

⁶ Yakobo alilembeere ebindi bibazo. Aligwerhe omulala guzibu-zibu, aliko bagala bage barhaliri bayunvikana buli mango. Chiro banaguza Yosefu, mwene-wabo, omu buja. Bagala babiri ba Yakobo, Simeoni na Lawi, bakoza eshonyi omulala gwabo n’okuzingisa ezino lya Yehova. Oku bwindi, omukazi muzigirwa wa Yakobo y’ekala Raheli, afa amango aliri aburha omwana wabo wa kabiri. N’amango enzara ekalihire yarhengereraga omu chihugo chabo, byahema Yakobo ahamire omu chihugo che Misri ey’anakola mushaja.​—Mwa. 34:30; 35:16-19; 37:28; 45:9-11, 28.

7. Nka gurhe Yehova aliyerekere Yakobo oku amuyemerere?

⁷ Chiro akaba Yakobo alihurene ebyola bibazo byoshi, arhahezaga obwemere bwage mu Yehova n’omu bilagane byage. Na Yehova naye ayerekana oku amuyemerere. Omufano, chiro akaba oku Labani aliri akolera Yakobo oku bulyalya, Yehova ahereza Yakobo bikulo binene. Na Yakobo akwanene kuba ey’aligwerhe shukurani nene ku Yehova amango ashuba kubona omugala Yosefu ey’aliwazize oku afaga mira! Obwira bukomere Yakobo aligwerhe haguma na Yehova bwalimurhabere ahime ebibazo byage. (Mwa. 30:43; 32:9, 10; 46:28-30) Amango nerhu rhugenderere kugwarha obwira bukomere haguma na Yehova, ahola rhwanagala kuhima ebibazo rhurhaliwazize oku byakarhuhikira.

8. Bichi Mwami Daudi alilonzeze kujira?

⁸ Mwami Daudi arhajiraga ebintu byoshi alilonzeze kukola omu kasi ka Yehova. Omufano, alilonzeze bwenene kuyumbakira Mungu wage ehekalu. Abwira omulebi Natani oku alilonzeze kujira ntyo. Natani amushubiza ntya: “Ojire  choshi-chosi chili omu murhumira gwawe, Mungu w’okuli ali haguma nawe.” (1 Ny. 17:1, 2) Rhwakawaza konyine oku ebyola binwa byalikwanene kusimisa Daudi. Nkabaga hanaho ahwanza kuchirheganya okuntu akola akola kasi.

9. Nka gurhe Daudi alijirire amango bamubwira omwazi guvunire omurhima?

⁹ Buzira kulegama, omulebi wa Yehova ashuba kugaluka kulola Daudi ey’anagwerhe oburhumwa buvunire omurhima. “Obola budufu bon’obola” Yehova abwira Natani oku arhali Daudi yiwakayumbakire ehekalu; aliko muguma omu bagala bage yi wakakolere akola kasi. (1 Ny. 17:3, 4, 11, 12) Gurhe Daudi alijirire amango ayunva obola burhumwa? Daudi ahindamula omuhigo gwage. Aseza obwenge bwage omu kurhondera kugusha efuranga n’ebikoleso omugala Sulemani akakenere y’akola akola kasi.​—1 Ny. 29:1-5.

10. Nka gurhe Yehova aligishire Daudi?

¹⁰ Aho han’aho Daudi amalire bwirwa oku arhali yewe yiwakayumbakire ehekalu, Yehova ajira endagano haguma naye. Yehova amulaganya oku muguma w’omu luburho lwage akarhegekere esiku n’amango. (2 Sa. 7:16) Omu gulu lihyahya amango m’Oburhegesi bwa Myaka Chihumbi bwa Yesu, Daudi nj’agwarha busiime bunene bwenene b’okumenya oku Omwami Yesu Kristu ali muguma w’omu luburho lwage! Enola ngani erhurhabere rhumenye oku chiro akaba rhurhakagala kukola byoshi rhwalilonzeze kukola omu kasi ka Yehova, nkabaga Mungu werhu akaba ey’arhubikiire eyindi migisho minene rhurhalilangalire haba n’akatyu.

11. Nka gurhe Abakristu b’omu kagana kaburhanzi baligishirwe chiro akaba Obwami bwa Mungu burhayinjaga amango baliwazize? (Matendo 6:7)

¹¹ Abakristu b’omu kagana ka burhanzi balihurene bibazo biguma barhaliwazize. Omufano, balilonzeze bwenene Obwami bwa Mungu buyinje, aliko barhalimenyere mangochi bwakayinjire. (Mdo. 1:6, 7) Baja bajira gurhe? Bagenderera kuhubiri bwenene. Oku banaliri bagenderera kuhubiri mu fasi zinene, bachibonera gurhe Yehova ali agisha obushiru bwabo.​—Osome Matendo 6:7.

12. Bichi Abakristu b’omu kagana kaburhanzi balijirire amango enzara erhengerera?

¹² Mango maguma enzara ekalihire yaba “oku gulu lyoshi lilamirweko.” (Mdo. 11:28) Eyola nzara yalihumire n’oku Bakristu b’omu kagana ka burhanzi. Waza okuntu balilibukire eju y’eyola nzara ekalihire bwenene. Kweri, abazere balilagire bwenene nka gurhe bakalisa emilala yabo. Gurhe si eyola hali yalihumire oku misole yalichirheganyize kukola binene omu kasi k’okuhubiri? Nkabaga baliri bachibaza akaba bakwanene kurhanga kulinga eyola nzara ehwe yibagendereza emihigo yabo! Ehali yoshi-yoshi abola Bakristu balirimo, bachihuzanya nayo. Bagenderera kuhubiri omu njira yoshi-yoshi bakanagala, n’okusangira n’obusiime ebi baligwerhe haguma na bene-babo na bali-babo b’omu Yudea.​—Mdo. 11:29, 30.

13. Bintu bihe binja Yehova akoleraga Abakristu omu mango m’enzara?

¹³ Migisho mihe Abakristu balipatire omu mango m’enzara? Abalihabirwe oburhabale, balichibwenere okuntu Yehova ali abarhabala. (Mt. 6:31-33) Bakwanene kuba eyi balichiyunvirhe bayegerere bene-babo na bali-babo babahaga obola burhabale. Na balala bahaanaga enshololo changwa abakolaga oku kasi k’okuhaana oburhabale, balichibwenere obusiime omuntu anagwarha amango amahaana. (Mdo. 20:35) Yehova alibagishire boshi bulala balichihuzenye n’ehali balimo.

14. Bichi byahikiraga Barnaba n’entumwa Paulo, n’echola chalerha nyungu zihe? (Matendo 14:21, 22)

¹⁴ Abakristu b’omu kagana kaburhanzi baliri balibuzwa buli mango, mango maguma bakaba eyi barhaliwazize oku amalibuko  makabahikira. Rhuganire oku byahikiraga Barnaba n’entumwa Paulo, amango baliri bahubiri omu eneo ye Listra. Burhanzi, abantu balibayegereze n’okubayunviriza bwinja. Aliko buzinda, abanzi “bashumika ebigusho by’abantu,” na baguma mubo bakabula Paulo amabale n’okumuleka ali hofi kufa. (Mdo. 14:19) Aliko Barnaba na Paulo bagenderera kuhubiri omu yindi eneo. Byaba gurhe? Bajira “abanafunzi banene” n’ebinwa byabo n’omufano gwabo byakomeza bene-babo na bali-babo. (Osome Matendo 14:21, 22.) Bantu banene balipatire enyungu bulala Barnaba na Paulo barhalilekere kuhubiri chiro akaba baliri balibuzwa. Amango moshi rhurhalekere kukola akasi koshi Yehova arhuhere, rhwagwarha emigisho.

15. Bichi wakayiga kugerera omufano gwa mwene-werhu Macmillan?

¹⁵ Embere y’omwaka gwa 1914, abantu ba Yehova baliri balingiriza oku hali echintu charhengerera. Omufano, rhushambale ku Mwene-werhu Macmillan. Kuguma n’abandi bene-berhu na bali-berhu ba mw’amola mango, Mwene-werhu Macmillan aliri awaza oku akola kuhabwa oluhembo lwage l’okuja embingu aho h’anaho. Omu jambo lyage agezaga omu Mwezi gwa 9, 1914, aderha ntya: “Nkabaga ly’ejambo lyani lizinda ndi nageza.” Aliko kweri, elyola lirhaliri jambo lyage lizinda. Buzinda Mwene-werhu Macmillan ayandika ntya: “Nkabaga baguma mu rhwabo baliwazize juba-juba oku rhukala kuja embingu aho h’anaho.” Ayongera ntya: “Echi rhwalikwanene kujira, kwaliri kugwarha binene by’okujira omu kasi ka Waliha.” Mwene-werhu Macmillan analigenderere kukola binene. Aliri akola akasi k’okuhubiri n’obushiru. Aligwerhe olukengo l’okuheba omurhima bene-berhu na bali-berhu banene baliri omu pirizo bulala balilahire kuja omu chisoda. Analiri ahika oku mbuganano oku bwimana chiro akaba alikala ali mushaja bwenene. Nyungu ehe mwene-werhu Macmillan aliyinjire kugwarha bulala aligenderere kugwarha binene by’okukola omu kasi ka Yehova oku analiri alingiriza oluhembo lwage? Bisanzi bigeke embere afe omu mwaka gwa 1966, ayandika ntya: “Obwemere bwani buchikomere nk’oku bwanaliri mira.” Ogola guli mufano gwinja bwenene rhweshi rhukwanene kuyiganya, ahanene akaba rhwamalembera ebibazo omu bisanzi binene kulusha okuntu rhwaliwazize!​—Ebr. 13:7.

16. Bibazo bihe Mwene-werhu Herbert Jennings na mukage barhaliwazize oku bakahurana nabyo? (Yakobo 4:14)

¹⁶ Banene omu bakozi ba Yehova bali balembera ebibazo by’amagala barhaliwazize oku byakabahikira. Omufano, omu ngani y’akalamo kage, Mwene-werhu Herbert Jennings b aderhere okuntu yewe na mukage baliri basiimira engabane yabo y’obumisiyonere omu chihugo che Ghana. Aliko mango maguma, alwala obulwala bwaliri bwarhuma agaya juba-juba n’okugwarha oburhe juba-juba. Mwene-werhu Herbert Jennings aderha ebinwa bili omu lwandiko lwa Yakobo 4:14, n’okufasiriya oku ehali yage mpyahya yaliri “bintu arhalimenyere oku byakarhengerera ‘omusezi.’” (Osome.) Ayandika ntya: “Byalihemere rhuyemere ehali rhwalikala rhulimo, bobola rhwarhola emipango y’okurhenga e Ghana n’okuleka bera berhu b’oku murhima n’okugaluka e Canada [eju y’amatunzo].” Yehova alirhabere Mwene-werhu Jennings na mukage bagenderere kumukolera oku bwimana chiro akaba bali bahurana ebibazo.

17. Nyungu zihe bene-berhu na bali-berhu bapatire kugerera omufano gwa mwene-werhu Jennings?

¹⁷ Ebinwa bya Mwene-werhu Jennings bili  omu ngani y’akalamo kage, byarhabere abandi bwenene. Mwali-werhu muguma ayandikire ntya: “Ntasaga soma engani yampeba omurhima ntya nk’oku eyila ngani nasomere yajirire. . . . Okusoma okuntu mwene-werhu Jennings alekaga engabane yage n’okuja ku shishikala amagala mage, kwalintabere ngwarhe olugero oku bilolere ehali yani.” Owindi mwene-werhu naye ayandika ntya: “Enyuma y’okukola nka mushamuka w’echibaga mu myaka ekumi, byalihemere ndeke engabane yani bulala nalilwere obulwala b’omu bwenge. Nalichiyunvirhe nka nagambirwe bwenene, n’echola chanderhera mulago gunene omu bwenge amango naliri nasoma engani z’akalamo k’abantu. . . . Aliko okulembera kwa Mwene-werhu Jennings kwampebere omurhima.” Ebyola birhuyibwise oku, amango rhwamalembera ebibazo rhurhaliwazize oku byakarhuhikira, rhwakaheba abandi omurhima. Chiro n’amango akalamo karhabere nk’oku rhwaliwazize, rhwakachigenderera kuba lwiganyo lwinja l’obwemere n’okulembera.​—1 Pe. 5:9.

18. Bichi wakayiga kugerera omufano gwa mukana muguma w’omu Nigeria oyerekenwe oku foto?

¹⁸ Ebinjira, nk’obula bulwala b’okuyahukira bwe Korona (COVID-19), byahumire ku bantu banene banakolera Yehova. Omufano, mushumba-kazi muguma w’omu Nigeria aligwerhe lufuranga lugeke na kalyo kageke bwenene. Sezi liguma mwali wage mudorho amubaza bichi nji balya bulala bamavuya echirahuli chabo chizinda ch’omucheri. Mwali-werhu abwira omwali oku nta lufuranga bagwerhe changwa akalyo aliko bakwanene kuyiganya omushumba-kazi we Sarefati. Bavuya akalyo kabo kazinda n’okuja baheba obulangalire bwabo boshi mu Yehova. (1 Fa. 17:8-16) Chiro n’embere bahwanze kuwaza bichi bakalire obola budufu, bapata echabo chirhu ch’akalyo bene-babo na bali-babo babarhumire. Mw’echola chirhu, mwaliri bilyo binene bakalire maboso mabiri na kuchubuka.  Mwali-werhu aderhere oku, arhalirhegerere kangana gurhe Yehova aliri ayunva bwinja-bwinja ebinwa aliri abwira omwali. Kweri amango rhwamalangalira Yehova, ebibazo rhurhaliwazize oku byakarhuhikira omu kalamo byakarhuma rhwayegera Yehova bwenene.​—1 Pe. 5:6, 7.

19. Malibuko mahe mwene-werhu Aleksey Yershov alemberaga?

¹⁹ Omu myaka echizindire kugera, bene-berhu na bali-berhu balilembere amalibuko nkabaga barhaliwazize oku makabahikira. Rhuganire oku mufano gwa mwene-werhu Aleksey Yershov, olamire omu Russie. Abantu ba Yehova balamire mw’eyola eneo baligwerhe omurhula amango mwene-werhu Yershov abatizwa omu 1994. Aliko omu myaka echizindire kugera, ebintu byahindamuka omu Russie. Omu mwaka gwa 2020, barhera enju ya mwene-werhu Yershov n’okuyisaka banashabana bintu byage binene. Hagerere myezi minga ntya, oburhegesi bwamusidaka oku avunire amarhegeko m’echihugo. Ebi bamushobekaga byaliyumangiire oku arejistrema y’evideo ya muntu muguma waliri wachijirisa nk’asimisizwe kuyiga Ebiblia habaga hamagera mwaka muguma. Echola chaliri chintu chibi bwenene oyola muntu ajiraga!

20. Nka gurhe mwene-werhu Yershov alikomeze obwira bwage haguma na Yehova?

²⁰ Ka hali echintu chinja chalirhengerere eju y’amalibuko ma mwene-werhu Yershov? Nechi. Obwira bwage haguma na Yehova bwaja bukomera bwenene. Aderhere ntya: “Nyono na mukani rhwaliri rhwasalira haguma buli mango. Narhegera oku nta kagalire kulembera eyola hali buzira burhabale bwa Yehova.” Ayongerere ntya: “Efunzo lyani-lyani lye Biblia lyalintabere kugala kulwisa echibazo ch’okuvunika omurhima. Naliri nakengeera oku mifano y’abakozi bemana ba mira. Hali ngani zenene zili omu Biblia ziyerekene kangana gurhe kuli kw’akamaro okurhulera n’okugenderera kulangalira Yehova.”

21. Bichi rhwayigire mu gunola mwazi?

²¹ Bichi rhwayigire mu gunola mwazi? Mango maguma, rhunahurana ebibazo rhurhaliwazize mu linola gulu. Chiro akaba ntyo, amango moshi Yehova anarhabala abakozi bage bamulangalire. Nk’oku olwandiko gunola mwazi guyumangireko luderhere, “amalibuko m’omunya-kunali maba malugire, aliko Yehova anamuyokola mumo moshi.” (Zb. 34:19) Rhukwanene kugenderera kuchiseza oku buhashe Yehova agwerhe b’okurhurhabala s’arhali oku bibazo byerhu. Naho kuguma n’entumwa Paulo, nerhu rhwakaderha ntya: “Omu bintu byoshi, njira emisi kugerera olala onampa emisi.”​—Flp. 4:13.