1. Bichi Yehova abalonzeze rhujirage?

 OKUBURHA omwana chili chihe chiguma omu bihe binasimisa omulume n’omukazi. Chiro akaba abazere bakaba bazigire oyola mwana wabo waburhirwe, barhakasima okw’agenderere kubera mwana esiku zoshi. Amango omwana wabo arhagenderere kukula, abazere bakayubaha bwenene. Ntyo konoko, chiro akaba oku Yehova anayunva asimire amango rhwamahwanza kuyiga oku bimulolere, arhab’alonzeze oku rhubere balugarha changwa baluzingo. (1 Ko. 3:1) S’aliko abalonzeze rhube Bakristu “bakulire” ekiroho.—1 Ko. 14:20.

2. Bichi rhwaganirako mu gunola mwazi?

² Okuba Mukristu okulire ekiroho k’okuderha gurhe? Bichi rhukwanene kujira yi rhuba Bakristu bakulire ekiroho? Ebilyo bikomere by’ekiroho bigwerhe kamaro kahe omu hali yerhu y’okukula? Na bulagurhe rhurhakwanene kuwaza oku rhukala rhukulire omu kuntu rhurhakachigala kugenderera kugwarha obwira bukomere haguma na Yehova? Mu gunola mwazi, rhwaganira oku bishubizo by’ebyola bibazo.

OKUBA MUKRISTU OKULIRE EKIROHO K’OKUDERHA GURHE?

3. Okuba Mukristu okulire ekiroho k’okuderha gurhe?

³ Omu Biblia, echinwa che Chigiriki chitafsiribwe “kukula” chakashuba kuderha omuntu “okulire” ekiroho, “oshinganene,” “onayenere.” a (1 Ko. 2:6) Bobola, kuguma n’ok’omwana anagenderera kukula, nerhu rhukwanene kugendereza kukuza obwira bwerhu haguma na Yehova. Omu njira eli nk’eyola rhwanaba Bakristu bakulire ekiroho. Nechi, chiro akaba rhwahikire ogola muhigo, rhurhakwanene kuleka kugenderera kukula ekiroho.  (1 Ti. 4:15) Kweri, rhweshi kuhebamo na balala bachili misole, rhwakaba Bakristu bakulire ekiroho. Aliko si, gurhe rhwakamenya akaba rhuli Bakristu bakulire ekiroho?

4. Bichi binayerekana Omukristu okulire ekiroho?

⁴ Omukristu okulire ekiroho, anajira buli choshi Yehova amuhemere ajire, arhafachakujira ebintu nk’okw’alonzeze yewe yenyine. Nechi, bulala arhashinganene akajira amagosa. Aliko, buli lusiku anajira okwage koshi y’awaza n’okujira ebi Yehova alonzeze. Ayambere oborhere buhyahya n’okuchihangana kuwaza nk’oku Yehova anawaza. (Efe. 4:22-24) Ayigire kukolesa amakanuni n’esheriya za Yehova omu kurhola esimikiro z’obwengehe, bobola birhamuhemere amenye sheriya zinene bwenene y’amenya bichi akwanene kujira. Amango amarhola esimikiro, anajira okwage koshi y’ajira nk’okw’achishogaga.—1 Ko. 9:26, 27.

5. Bichi byakahikira Omukristu orhakulire ekiroho? (Waefeso 4:14, 15)

⁵ Aliko, biba biyorohere okurhebeka Omukristu orhakulire ekiroho, “anarhebekwa n’amayeri” omu kuyemera emyazi y’obubeshi baderhere, emyazi yaba mpu mpu n’engani z’obubeshi z’oku Enterenete, changwa akarhebekwa n’emyazi y’ebigamba by’obwemere. b (Osome Waefeso 4:14, 15.) Akayunvira abandi obongwa n’okurhayunvikana nabo, changwa akahwanza kukwazikira busha n’ahanene akajira ebintu bibi amango amageregezwa.—1 Ko. 3:3.

6. Bulagurhe rhwakahuzanya okukula kwerhu kw’ekiroho n’ok’omwana oli wakula? (Olole n’efoto.)

⁶ Nk’oku rhwanabiganiragako embere, Amandiko mahuzenye okukula kw’ekiroho n’okuntu omwana anagenda akula kugera ahabera muntu mukulu. Hali bintu binene omwana arhaba amenyere, bobola abakenere omuntu mukulu w’okumulanga n’okumuyerekeza. Omufano, omuzere w’omukazi akabwira omwali mudorho, amufarhe efune embere bayambuke ebarabara. Aliko, ok’oyola mwana yanakula, haly’amango nyina akahwanza kumuleka ayambuke yenyine, aliko anamuyibusa okw’embere y’okuyambuka, agende alola eyi n’eyi. Amango amaba muntu mukulu, akanamenya gurhe akachilanga obuhanya bwakarhengerera. Kuguma n’ok’omwana ab’akenere  oburhabale b’omuntu okulire y’ayaka obuhanya, Abakristu barhakulire ekiroho nabo baba bakenere oburhabale bw’Abakristu bakulire ekiroho yibagala kuchilanga oku bintu byoshi byakabihya obwira bwabo haguma na Yehova, n’okuntu bakagala kurhola esimikiro z’obwengehe. Aliko, amango Abakristu bakulire ekiroho bamarhola esimikiro banarhanga kuwaza bwenene bichi Ebiblia ederhere yibagala kumenya bichi Yehova awazize, na buzinda banakolesa ebi bayigaga.

7. Omukristu okulire ekiroho akenere naye oburhabale bw’abandi si?

⁷ Rhwakaderha ok’Omukristu okulire ekiroho arhabakenere oburhabale bw’abandi si? Nanga. Hali amango Abakristu bakulire ekiroho nabo baba bakenere oburhabale. Aliko, omukristu orhakulire ekiroho akalonza okw’abandi bamubwire bichi ajirage changwa bamurholere esimikiro alikwanene arhole yenyine. S’aliko omuntu okulire ekiroho yewe, amango amahema oburhabale oku bandi bagwerhe obwengehe banagerere mu binene, ab’amenyere bwinja bwinja okw’engabane y’okurhola esimikiro, eli yage yewe yenyine bulala amenyere bwinja oku nj’aheka “omuzigo gwage yenyine.”—Gal. 6:5.

8. Mu njira zihe omuntu okulire ekiroho arhali kuguma n’orhakulire ekiroho?

⁸ Nk’okw’abantu bakulire boshi barhaba kuguma, ku n’Abakristu bakulire ekiroho nabo barhajira engeso zili kuguma. Omufano, hali echihe baguma bakaba bengehe bwenene, abandi eyibagwerhe obushiru bwenene, hali n’abandi nabo banahaana bwenene, n’abandi bakaba eyi bajira akababaro kanene bwenene. Omu kuyongera, Bakristu babiri bakulire ekiroho bakaba yibahurana ehali zili kuguma, hali amango bakarhola esimikiro zirhali kuguma aliko ey’ezola sikimiro zombi zipatene n’amakanuni me Biblia. Ahanene ebyola binabonekana amango Abakristu bamarhola esimikiro ziyumangire oku zamiri zabo. Che chirhumire barhakwanene kuchirana olubanja amango esimikiro zabo zirhali kuguma. Aliko, banachihangana yi bagenderera kubera omu buguma.—Ro. 14:10; 1 Ko. 1:10.

BICHI RHUKWANENE KUJIRA YI RHUBA BAKRISTU BAKULIRE EKIROHO?

9. Omuntu akafachakukula ntya ntya ekiroho si? Fasiriya.

⁹ Omwana yewe akafachakukula nk’oku esiku zili zagenda, aliko ntaye wakakuza obwira bwage haguma na Yehova ntya ntya buzira kujira chintu chilebe. Omufano, bene-berhu na bali-berhu m’omu Korinto baliyemerere emyazi minja, babatizwa, bapata eroho lichesibwa, banaliyigire binene kugerera eby’entumwa Paulo abayigirizaga. (Mdo. 18:8-11) Aliko, enyuma w’emyaka minene babatizwe, banene bali chili bana ekiroho. (1 Ko. 3:2) Bichi rhukwanene kujira y’ebyola birharhuhikira?

10. Bichi rhukwanene kujira yi rhuba bantu bakulire ekiroho? (Yuda 20)

¹⁰ Yi rhuba bantu bakulire ekiroho, rhukwanene kurhanga kugwarha enyorha y’okukula ekiroho. Balala “barhalonza kumenya,” banalonza kubera nk’oku bali, k’okuderha, bana barhakafa bakulire ekiroho. (Mez. 1:22) Rhurhalonzeze kuba nka balala banabonekena nka bakulire, aliko eyi bachili balolera byoshi oku bazere babo, mpu babarholeragebo esimikiro. Ahali hantyo, rhulonzeze kukola byoshi n’okuchizera ok’obwira bwerhu na Yehova yi bwagenderera kukula. (Osome Yuda 20.) Akaba oli wajira okwawe koshi y’okula ekiroho, osalire Yehova “akuhe enyorha n’emisi y’okujira ntyo.”—Flp. 2:13.

11. Bichi Yehova arhuhere by’okurhurhabala rhube Bakristu bakulire ekiroho? (Waefeso 4:11-13)

¹¹ Yehova arhabalangalire oku rhwakakula ekiroho oku misi yerhu rhwenyine. Arhuhere  abangeri n’abalimu omu chibaga che Chikristu banarhurhabala kugwarha obwira bukomere haguma naye “n’okuhikira echipimo chiyenere ch’okukula cha Kristu.” (Osome Waefeso 4:11-13.) Kandi Yehova anarhuhereza eroho lyage lichesibwa yi lirhurhabala rhugwarhe “obwenge bwa Kristu.” (1 Ko. 2:14-16) Oku bwindi, Mungu aliyerekeze abayandikaga bitabu bine bye enjili birhuyereke okuntu Yesu aliri awaza, aderha, n’okujira amango aliri hanola oku gulu omu kasi kage k’okuhubiri. Omu kuyiganya enkengero n’ebijiro bya Yesu, wakahikira omuhigo gwawe g’okukula ekiroho.

AKAMARO K’EBILYO BY’EKIROHO BIKOMERE

12. Enyigirizo “z’omusinji oku bilolere Kristu” z’ezihe?

¹² Yirhuba bantu bakulire ekiroho, birhuhemere rhuyige “binene kulusha enyigirizo z’oburhanzi rhwamenyaga oku bilolere Kristu.” Ziguma omu nyigirizo z’omusinji rhwayigaga zaliganirire oku bilolere okuhungama, obwemere, obubatizo n’obufuke bw’abafire. (Ebr. 6:1, 2) Ezola zili ziguma omu nyigirizo z’omusinji Abakritu boshi baba bayemerere. Bobola, amango Petro aliri ahubiri abantu oku Pentekoste aliderhere oku bilolere ezola nyigirizo. (Mdo. 2:32-35, 38) Yi rhuba banafunzi ba Kristu, rhukwanene kuyemera ezola nyigirizo z’omusinji. Omufano, Paulo aliyerekene oku nka rhurhagwerhe obwemere omu bufuuke rhurhakaderha oku rhuli Bakristu b’okuli. (1 Ko. 15:12-14) Aliko, rhukwanene kuyiga binene olekere enyigirizo z’omusinji yi rhuba Bakristu bakulire ekiroho.

13. Bichi rhukwanene kujira yi rhuyunguka n’ebilyo by’ekiroho bikomere biganirirwe omu lwandiko lwa Waebrania 5:14? (Olole n’efoto.)

¹³ Enyigirizo z’omusinji zirhali kuguma n’ebilyo bikomere by’ekiroho. Ebilyo bikomere by’ekiroho byowe birhali mw’esheriya za Yehova zonyine, si muli n’amakanuni manarhurhabala kumenya amawazo mage. Yi rhuyunguka n’ebyola bilyo by’ekiroho, rhukwanene kuyiga Ebiblia, okuwaza bwenene oku birhuli rhwasoma n’okuja rhwajira okwerhu koshi omu kukolesa ebi rhwayigire. Nka rhujirire ntyo, rhwanaba eyi rhuli rhwayiga kurhola esimikiro zisimisize Yehova. c—Osome Waebrania 5:14.

14. Nka gurhe Paulo alirhabere Abakristu be Korinto bakule ekiroho?

¹⁴ Binakomerera Abakristu barhakulire ekiroho kurhola esimikiro nyinja amango nta sheriya ye Biblia eli wazi eliho. Nka harhali  esheriya ye Biblia, baguma bakawaza oku bakwanene kujira choshi balonzeze. Abandi bakahema esheriya oku bilolere bintu bilebe nobo nta sheriya eliho. Omufano, Abakristu be Korinto balibazize Paulo akaba hali erhegeko oku bilolere okulya ebilyo byahanirwe nterekero oku bishushanyo changwa esanamu. Ahali h’okubabwira bichi bakwanene kujira, Paulo alibayerekere akachiro k’ezamiri n’okubayereka oku buli muguma agwerhe “ehaki y’okuchishoga.” Paulo aliderhere oku makanuni maguma me Biblia makabarhabere barhole esimikiro zakarhumire ezamiri zirhagenderera kubaluma, zirhakanakwazize n’abandi (1 Ko. 8:4, 7-9) Paulo aliri arhabala Abakristu b’omu Korinto bakule ekiroho omu kuntu bagale kukolesa obuhashe bwabo b’okuwaza ahali h’okulindira amarhegeko changwa owindi ye babwirage buli choshi bakwanene kujira.

15. Gurhe Paulo alirhabere Abakristu b’Abaebrania kujira amaja-mbere m’ekiroho?

¹⁵ Rhwakayiga echindi chintu oku bilolere amaruba Paulo ayandikiraga Abakristu b’Abaebrania. Baguma balilekere kugenderera kukula ekiroho; kweri baliri “bagalukira amarha, ahali h’ebilyo bikomere [by’ekiroho].” (Ebr. 5:12) Barhalilonzeze kuyiga n’okuyemera ebintu bihyahya Yehova aliri abayigiriza kugerera echibaga. (Mez. 4:18) Omufano, bemezi banene b’Abayahudi bali chili bagendereza Esheriya ya Musa, chiro akaba oku hali hamagera myaka 30 enterekero ya Yesu emalire eyola Sheriya. (Ro. 10:4; Tit. 1:10) Eyola myaka 30 yalihere Abakristu b’Abayahudi bisanzi binene by’okumenya oku barhalichikenere kukulikira eyola Sheriya! Bobola, Paulo aj’achihangana kubarhabala bayemere enyigirizo zikomere aliri abayigiriza. Amaruba mage malibarhabere bamenye enjira mpyahya, ekwirire bwenene Yesu abayerekere y’okuharamya Yehova. Eyola njira yen’eyo yabarhabala bagwarhe obushiru b’okugenderera kuhubiri chiro akaba baliri bahurana n’obupinzani burhengere oku Bayahudi.—Ebr. 10:19-23.

BULAGURHE BIRHUHEMERE KUGENDERERA KUKULA EKIROHO?

16. Olekere okugenderera kukula ekiroho, bichi bindi rhukwanene kujira?

¹⁶ Rhurhakwanene kujira amajambere m’okukula ekiroho n’okuwaza mpu hoshaho rhurhachikwanene kugenderera kujira ntyo. Bobola, rhukwanene kubera merangwe yirhurhawaza mpu rhukala rhukulire ekiroho n’okuwaza  oku birhachirhuhemere rhugenderere kukomeza obwira bwerhu haguma na Yehova. (1 Ko. 10:12) Rhukwanene “kugenderera kuchigeregeza” yirhumenya akaba kweri rhugenderere kujira amaja-mbere.—2 Ko. 13:5.

17. Nka gurhe amaruba Paulo ayandikiraga Abakolosai mayerekene akamaro k’okukula ekiroho?

¹⁷ Omu maruba mage ayandikiraga Abakristu be Kolosai, Paulo aliyerekene akamaro k’okugenderera kukula ekiroho. Chiro akaba okw’Abakristu be Kolosai balikala bakulire ekiroho, Paulo alibayerekere oku bakwanene kuba merangwe yi barharhogera omu mawazo n’ebijiro by’abantu balinola gulu. (Kol. 2:6-10) Na Epafra walimenyere bwinja ababo Bakristu b’omu chibaga che Kolosai, analiri abashishikala bwenene. Kandi aliri abasalirira bwenene “yi buzinda bayorha eyi bayenere,” changwa eyi bakulire ekiroho. (Kol. 4:12) Bichi echola chirhuyigirize? Paulo na Epafra baliyerekene okw’akaba rhulonzeze kuyorha rhukulire ekiroho, rhukenere oburhabale bwa Mungu, binarhuhemere rhumenye bwinja akaba kweri obwira bwerhu haguma naye bunali bwagenderera kukula. Balilonzeze Abakristu be Kolosai bayorhe eyi bakulire ekiroho chiro akaba ebigeregezo baliri bahurana.

18. Bichi byakahikira Omukristu okulire ekiroho? (Olole n’efoto.)

¹⁸ Paulo alibwirire Abaebrania ok’Omukristu okulire ekiroho nk’arhabere merangwe, akaheza obwira bwage haguma na Mungu. Nk’Omukristu alahire kukenga Yehova, echola chakarhuma arhabera hofi naye n’echola chanarhuma arhagala kuhungama n’okupata obubabale bwa Mungu. Ech’okusimisa, Abaebrania barhalirhogere omu murhego guli nk’ogola. (Ebr. 6:4-9) Gurhe si oku bilolere balala baholere changwa abachibirwe omu chibaga na buzinda bahungama? Nka bahungamire n’omurhima goshi, banayerekana oku barhali kuguma na balala Paulo ashambalagako bakahezeze obwira bwabo haguma na Yehova esiku n’amango. Kweri amango bamagalukira Yehova anabahereza oburhabale bakenere. (Eze. 34:15, 16) Abashamuka bakahema mwene-werhu changwa mwali-werhu okulire ekiroho arhabale balala baholere ekiroho bashube bakomeze obwira bwabo bwa hofi haguma na Yehova.

19. Muhigo guhe rhukwanene kugwarha?

¹⁹ Akaba oli wachihangana y’oba Mukristu okulire ekiroho, wakahikira omuhigo gwawe! Ogenderere kuyiga enyigirizo zikomere ze Biblia, n’okugenderera kuwaza bwenene nk’oku Yehova naye anawaza. Akaba okala oli Mukristu okulire ekiroho, ogenderere mw’eyola njira kurhenga zene n’esiku n’amango.