MWAZI G’OKUYIGA 15
OLWIMPO 124 Bemana Esiku Zoshi
Okomeze Eshukrani Yawe oku Lubaga lwa Yehova
“Muyibuke balala bali babayerekeza, balala bababwirire Echinwa cha Mungu.”—EBR. 13:7.
EBIRHWAYIGA
Rhwabona bichi rhwakajira yi rhugenderera kulangalira n’okukenga olubaga lwa Yehova.
1. Gurhe olubaga lwa Yehova l’omu kagana ka burhanzi lwalipangirwe?
AMANGO Yehova amaha abantu bage akasi k’okukola, ab’alonzeze bakakole omu njira epangirwe bwinja. (1 Ko. 14:33) Omufano, Mungu alonzeze emyazi minja ehubiribwe oku bantu boshi balamire oku gulu. (Mt. 24:14) Yehova ahere Yesu engabane y’okuyerekeza akola kasi. Na Yesu y’ajira okwage koshi y’akola kasi kakolwa omu njira epangirwe bwinja. Omu kagana ka burhanzi, chiro akaba okw’ebibaga byaliri omu fasi zilengene, abashamuka balichishogerwe yibahaana obwerekezi. (Mdo. 14:23) Omu Yerusalemu, ebaraza lirhambwire ly’abashamuka, lyaliheberwe mw’entumwa n’abalume bakulire, baliri barhola simikiro zilebe oku bilolere ebibaga byoshi, n’ebyola bibaga byalikwakanene kukenga ezola simikiro. (Mdo. 15:2; 16:4) Bulala bene-berhu na bali-berhu balikengere obwerekezi bali habirwe, “ebibaga byagenderera kusera omu bwemere n’oluganjo lwabyo lwagenderera kuluga.”—Mdo. 16:5.
2. Kurhangira omu mwaka gwa 1919, gurhe Yehova ayerekeze abantu bage n’okubaha ebilyo by’ekiroho?
2 Chiro na zene, Yehova agenderere kuyerekeza abantu bage. Kurhangira omu mwaka gwa 1919, kugerera obwerekezi bwa Yehova, Yesu y’akolesa echigusho chigeke ch’abalume bashigwa yibayerekeza akasi k’amahubiri n’okuha abanafunzi bage ebilyo by’ekiroho. a (Lu. 12:42) Bibonekene bwinja oku Yehova aly’agisha akasi k’echola chigusho.—Isa. 60:22; 65:13, 14.
3-4. a) Lerha omufano guyerekene nka gurhe rhunapata enyungu bulala rhuba rhupangirwe bwinja. b) Bichi rhwaganirako mu gunola mwazi?
3 Nka rhurhalipangirwe bwinja, rhurhakagalire kuyeneza akasi Yesu arhuhere. (Mt. 28:19, 20) Omufano, nka bene-berhu barharhupangiraga e eneo y’echibaga cherhu rhwahubirimo, buli muguma akalemere ahubiri ah’alonzeze. Ma eneo maguma makahubirirwemo bwenene, n’amandi marhakahikirwemo chiro. Wakawaza oku zindi nyungu rhunapata bulala rhuba rhupangirwe bwinja si?
4 Kuguma n’oku Yesu aliri apanga abanafunzi bage amango aliri oku gulu, ntyo kw’anachigenderere kupanga abantu ba Mungu zene. Mu gunola mwazi, rhwabona omufano Yesu arhulekere, na gurhe olubaga lwerhu luli lwagenderera kukulikira ogola mufano. Rhwashuba kuganira nka gurhe rhwakayerekana oku rhusimisizwe n’olubaga lwa Yehova.
OLUBAGA LWERHU LUNAKULIKIRA OMUFANO GWA YESU
5. Mu njira ehe nguma rhunakulikira m’omufano gwa Yesu? (Yohana 8:28)
5 Kugerera Eshe w’embingu, Yesu aliyigire eby’alikwanene kuderha n’okujira. Olubaga lwa Yehova lunakulikira omufano gwa Yesu omu kukolesa Echinwa cha Mungu yi chirhurhabala rhumenye echinja n’echibi, n’okurhuha obwerekezi omu kalamo kerhu. (Osome Yohana 8:28; 2 Ti. 3:16, 17) Buli mango banarhuyibusa rhuleme rhwasoma Echinwa cha Mungu n’okukolesa ebi rhwasomere. Nyungu zihe rhunapata omu kukulikira elyola hano?
6. Nyungu zihe z’akamaro rhunapata omu kuyiga Ebiblia kugerera ebitabu byerhu?
6 Rhunayunguka bwenene amango rhwamayiga Ebiblia omu kukolesa ebitabu byerhu. Omufano, rhwakagala kuhuzanya enyigirizo ze Biblia n’obwerekezi rhunapata burhengere oku lubaga lwa Yehova. Bulala rhunabona ok’obwerekezi olubaga lwerhu lunarhuha buba buyumangiire oku Biblia, echola chinarhuma rhwalangalira bwenene olola lubaga.—Ro. 12:2.
7. Burhumwa buhe Yesu aliri ahubiri, na gurhe olubaga lwa Yehova lunakulikira omufano gwage?
7 Yesu aliri ahubiri “emyazi minja y’Obwami bwa Mungu.” (Lu. 4:43, 44) Kandi, Yesu alihere abanafunzi bage erhegeko ly’okuhubiri oku bilolere Obwami. (Lu. 9:1, 2; 10:8, 9) Zene, boshi bali omu lubaga lwa Yehova, bali bahubiri oburhumwa b’Obwami chiro akaba balamire ngahe na ngabane zingana gurhe bakaba bagwerhe.
8. Lukengo luhe rhugwerhe?
8 Rhugwerhe olukengo l’okubwira abandi oku bilolere Obwami bwa Mungu! Arhali buli yeshi y’egwerhe olola lukengo. Amango Yesu aliri hanola oku gulu, arhaliyemerere abazimu bahaana obuhamirizi oku bimulolere. (Lu. 4:41) Zene naho, embere omuntu arhondere kuhubiri haguma n’abantu ba Yehova, bihemere abe ey’alamire nk’oku Yehova asimire. Rhunayerekana kangana gurhe rhusimisizwe n’olola lukengo l’okuhubiri omu kuganira n’abandi oku bilolere Obwami bwa Mungu hoshi rhwakaba rhuli na koshi rhwakagala. Kuguma na Yesu, omuhigo gwerhu gukwanene kuba g’okubyala n’okumimira emburho z’obukweri b’Obwami omu mirhima y’abantu.—Mt. 13:3, 23; 1 Ko. 3:6.
9. Nka gurhe olubaga lunamenyesa ezino lya Mungu?
9 Yesu alimenyeseze abantu ezino lya Mungu. Yesu alisalirire Eshe w’embingu omu kuderha ntya: “Nabamenyeseze ezino lyawe.” (Yoh. 17:26) Olubaga lwa Yehova lunayiganya omufano gwa Yesu omu kujira koshi lugalire yi lurhabala abandi bahikire kumenya ezino lya Mungu. Tafsiri ya Ulimwengu Mupya ya Maandiko Matakatifu (Etafsiri y’Egulu Lihyahya y’Amandiko Machesibwa) yajirire ntyo omu kugalula ezino lya Mungu buli hoshi lyaliri. Eyola Tafsiri ye Biblia ekala eliho yoshi eyenere changwa omu bigabi mu ndimi zirhalukire 270. Nk’ololere oku Nyongeza A4 na A5 y’eyola tafsiri, wakayiga binene oku bilolere bulagurhe na gurhe ezino lya Mungu lyagalwirwe omu Biblia. Kandi, E enyongeza A5 eli omu Biblia, eyemezeze bwinja bwinja gurhe ezino lya Mungu likwanene kugalulwa omu Mandiko me Chigiriki me Chikristu kali 237.
10. Bichi ebi mukazi muguma olamire omu Myanmar agereremo birhuyigirize?
10 Kuguma na Yesu, rhulonzeze kurhabala abantu banene nk’oku byakanagalikana bahikire kumenya ezino lya Mungu. Amango mukazi muguma wa myaka 67 w’omu Myanmar amenya oku Mungu ajira ezino, arhondera kulira. Abwira mwalimu wage we Biblia ntya: “Zene bob’oburhanzi nayunva okw’ezino lya Mungu ye Yehova. . . . Wanyigirize echintu ch’akamaro bwenene ntaliza kuyiga.” Nk’oku rhwamabona m’ogula mufano, amango abantu bamayiga oku bilolere ezino lya Mungu, echola chakahindamula akalamo kabo.
OGENDERERE KUYEREKANA ESHUKRANI OKU LUBAGA LWERHU
11. Gurhe abashamuka bakayerekana eshukrani oku lubaga lwa Yehova? (Olole n’efoto.)
11 Mu njira ehe nguma abashamuka bakayerekanamo oku bagwerhe eshukrani oku lubaga lwa Mungu? Amango olubaga lwerhu lwamaha abashamuka obwerekezi, bihemere babusome bwinja bwinja n’okujira okwabo koshi yi babukolesa. Omufano, banapata obwerekezi arhali okuntu bakageza bigabi bilebe by’embuganano changwa okuntu bakasalirira echibaga konyine, si n’okuntu bakashishikala entama za Kristu. Amango abashamuka bamakolesa obwerekezi boshi bahabirwe n’olubaga, bene-babo na bali-babo bachiyunva oku Yehova abazigire n’okw’anali abashishikala.
Abashamuka barhurhabala rhulangalire obwerekezi rhuli rhwahabwa n’olubaga lwa Yehova (Olole echifungo che 11) b
12. a) Bulagurhe rhukwanene kukenga balala bali barhuyerekeza? (Waebrania 13:7, 17) b) Bulagurhe rhukwanene kuchiseza oku ngeso zinja z’abali barhuyerekeza?
12 Amango rhwamapata obwerekezi burhengere oku bashamuka b’echibaga, rhukwanene kubukulikira oku bulonza. Omu kujira ntyo, akasi kayorohera abola bali barhuyerekeza. Ebiblia erhuhebere omurhima rhukenge balala bali barhuyerekeza rhunachichimye. (Osome Waebrania 13:7, 17.) Mango maguma byakarhukomerera kujira ntyo. Bulagurhe? Bulala abola balume barhashinganene. Aliko, nka rhwamachiseza oku ngeso zabo zibi ahali h’okuchiseza oku ngeso zabo zinja, kweri rhwanaba eyi rhwamarhabala abanzi berhu. Bulagurhe rhuderhere ntyo? Rhuderhere ntyo bulala abanzi berhu balonzeze rhugwarhe engangane oku Mungu ali akolesa olubaga lwage omu kurhuyerekeza. Bobola, amango rhwamagwarha amawazo mabi oku bilolere abashamuka b’echibaga, rhwakahwanza kuwaza kubi oku bilolere olubaga lwa Mungu nalo, eyi rhurhanachigenderera kululangalira. Gurhe rhwakajira yirhumenya obubeshi bw’abanzi berhu n’okubukabulira?
ORHAZIGAGA ABANDI BARHUMA WALEKA KULANGALIRA OLUBAGA LWERHU
13. Gurhe abanzi ba Mungu banalonza kuyerekana ok’olubaga lwa Mungu lurhali lwinja?
13 Abanzi ba Mungu banalonza okuntu ebintu binja bili omu lubaga lwa Yehova bibonekane nka bili bibi. Omufano, Yehova alonzeze omubiri n’olugenzi lwerhu bigenderere kubera bichere, analonzeze rhumuharamye omu njira ayemerere. Kandi Yehova aderhere oku balala boshi bagenderere kujira ebintu bibi, barhanalonzeze kuhindamula olugenzi lwabo bakwanene kuchibwa omu chibaga. (1 Ko. 5:11-13; 6:9, 10) Rhunakenga elyola rhegeko liyumangire oku Mandiko. Aliko bulala rhunakenga elyola rhegeko, abanzi berhu banaderha oku rhurhasima abantu, oku rhunabachira olubanja, n’oku rhunabola abantu barhali kuguma nerhu.
14. Inde oli shoko y’obubeshi oku bilolere olubaga lwerhu?
14 Rhumenye oli warhurhera. Ibilisi ali ayeneza obubeshi oku bilolere olubaga lwerhu. Yewe “y’eshe w’obubeshi.” (Yoh. 8:44; Mwa. 3:1-5) Bobola, rhukwanene kuyorha eyirhumenyere oku Shetani akolesa abanzi berhu yi bayeneza obubeshi oku bilolere olubaga lwa Yehova. Ebyola bye byahikiraga Yesu n’Abakristu b’omu kagana ka burhanzi.
15. Bichi abakulu b’amadini balijirire Yesu n’abanafunzi bage?
15 Chiro akaba oku Mugala wa Mungu, Yesu, aliri mushinganyanya analijirire n’ebisomerene binja bwenene, Shetani alikoleseze bantu balebe omu kuyeneza obubeshi oku bimulolere. Omufano, abakulu b’amadini bali bwirire abantu ok’obuhashe Yesu agwerhe b’okufukuza abazimu, abuhabwaga “n’omukulu w’abazimu.” (Mk. 3:22) Amango Yesu aliri alibuzwa, abakulu b’amadini bamusidaka okw’adukangire Mungu banashumika abantu baderhe okw’akwanene kuyirhwa. (Mt. 27:20) Buzinda, amango abanafunzi ba Yesu baliri bahubiri emyazi minja, abashombanyi babo baliri babapinga omu “kushumika abantu” balibuze abola Bakristu. (Mdo. 14:2, 19) Okubilolere olwandiko lwa Matendo 14:2, Omunara g’Omulanzi gwa Lusiku 1, Mwezi gwe 12, 1998, gwalifasiriye ntya: “Balala boshi baliri bashigikira Shetani balema balahira oburhumwa Abakristu baliri bahubiri, banalema baderha ebintu bibi oku bilolere abola Bakristu y’abantu barhabayunviriza banabashombe.”
16. Bichi rhukwanene kuyibuka akaba rhwayunvirize engani z’obubeshi?
16 Shetani agenderere kubesha kugera buno. Na zene, agenderere “kuhabula egulu lyoshi.” (Ufu. 12:9) Akaba oli wayunviriza emyazi mibi oku bilolere olubaga changwa oku bilolere bene-berhu bali bayerekeza, oyibuke gurhe abanzi ba Mungu balikolere Yesu n’abanafunzi b’omu kagana ka burhanzi. Yesu aliderhere okw’abantu nji bapinga balala boshi bali bakolera Yehova n’oku nji bababeshera. Kweri ebyola byebinali byarhengerera zene. (Mt. 5:11, 12) Emyazi y’obubeshi erharhurhebeka akaba rhumenyere ngahe yarhenga n’okujira echirhwakola ahohan’aho. Gurhe rhwakachilanga?
17. Nka gurhe rhwakachilanga y’emyazi y’obubeshi erharhujira kubi? (2 Timoteo 1:13) (Olole n’echisanduku “ Ebi Wakajira Amango Wamayunviriza Emyazi y’Obubeshi.”)
17 Okabulire emyazi y’obubeshi. Paulo aliderhere bwinja bwinja echirhukwanene kujira amango rhwamayunva emyazi y’obubeshi. Abwira Timoteo, “abuze bantu baguma . . . oku bamenye bayunviriza emyazi y’obubeshi” “banalekane n’emyazi ekozeze eshoni y’obubeshi. (1 Ti. 1:3, 4; 4:7) Waza k’ogula mufano: Omwana mudorho akarhola ahashi echintu chizingire n’okuchiheba omu bunu bwage, aliko omuntu mukulu arhakajira ntyo bulala ayinji okw’echintu chizingire chakamulerhera obulwala. Rhunakabulira emyazi y’obubeshi bulala rhumenyere okw’eshoko yayo eli y’obubeshi. Aliko rhunayunviriza “ebinwa bichere” by’obukweri byonyine.—Osome 2 Timoteo 1:13.
18. Nka gurhe rhwakayerekana oku rhugwerhe eshukrani oku lubaga lwa Yehova?
18 Rhwaganirire ku njira esharhu zonyine olubaga lwa Mungu luli lwakolesa omu kuyiganya Yesu. Amango oli wayiga Ebiblia, ochihangane kubona ezindi njira olubaga lwa Yehova luli lwakolesa omu kuyiga omufano gwa Yesu. Orhabale abandi omu chibaga chawe bagenderere kugwarha eshukrani ku byoshi olubaga lya Yehova luli lwabajirira. Kandi bagenderere kuyerekana eshukrani yabo omu kukolera Yehova oku bwimana n’okuyorha hofi n’olubaga lwage ali akolesa omu kuyeneza obulonza bwage. (Zb. 37:28) Rhujage rhwagwarha buli mango eshukrani nene oku lukengo rhugwerhe l’okuba chigabi ch’olubaga lwa Yehova luli mw’abantu bagwerhe obuzigire banali bemana.
GURHE WAKASHUBIZA?
-
Mu njira zihe abantu ba Mungu banayiganya Yesu?
-
Nka gurhe rhwakayerekana eshukrani oku lubaga lwa Yehova?
-
Gurhe rhwakajira amango rhwamachibugana embere y’emyazi y’obubeshi?
OLWIMPO 103 Abangeri; Mpano Mungu Arhuhere
a Olole echisanduku “Juu ya Nini 1919?” (Bulagurhe Omwaka gwa 1919?) omu chitabu Ibada Safi ya Yehova—Inarudishwa Tena! (Obuharamye Buchere bwa Yehova Bwamashuba Kugalulwa) bukurasa 102-103.
b AMAFASIRIYO M’EFOTO: Abashamuka bamamala kuganira oku mupango g’okuhubiri oku prezantoire, omwimangizi w’echigusho ali abwira abahubiri oku bakwanene kuyumanga hofi n’echibambazi omu kuntu ntaye ogerage enyuma zabo.
