1. Gurhe bantu baguma banachiyunva amango bali baganira n’abantu omu mahubiri? (Olole n’efoto.)

 RHUNAHUBIRI abandi bulala rhuzigire Darha w’embingu Yehova, rhunalonzeze kurhabala abaturanyi berhu bamumenye. Kweri bahubiri banene banasimira akasi k’okuhubiri. Aliko abandi bowe binabakomerera kugwarha obusime omu kasi k’okuhubiri. Bulagurhe? Baguma bakachiyunva oku bagwerhe eshoni bwenene, n’oku barhali balimu benja. N’abandi banachiyunva kubi okuja oku milyango y’abantu barhabahamagere ahamwabo. Baguma bakayubaha okw’abantu babayunvira oburhe. N’abandi bayigirizwe oku bakwanene kuchilanga yibarhalerhera abandi oburhe. Chiro akaba oku bazigiire Yehova bwenene, abola bene-berhu na bali-berhu banabona oku bibakomerere kuganira oku bilolere emyazi minja n’abantu barhamenyere. Aliko, bamenyere okw’akola kasi kali k’akamaro bwenene n’echola chinarhuma bakakola buli mango. Yehova anabasima bwenene!

2. Akaba mango maguma onachiyunva orhasimire akasi k’okuhubiri, bulagurhe orhakwanene kuvunika omurhima?

² Mango maguma onachiyunva orhagwerhe obusime omu kasi k’okuhubiri eju y’amawazo mali nk’amola si? Akaba ntyo kubili, omenye wavunika omurhima. Okurhachilangalira kwawe kwakayerekana ok’oli mwirhohye, n’ok’orhalonzeze abandi bakuseze k’obwenge bwenene. Kandi kuyerekene ok’orhalonzeze kujira obuhaka n’abandi. Kandi nta muntu n’omuguma wakasima kugayisa abandi ahanene amango ali achihangana kujirira abantu ebintu binja. Yisho w’embingu amenyere bwinja bwinja okuntu oli wachiyunva, analonzeze kukuhereza oburhabale okenere. (Isa. 41:13) Mu gunola mwazi, rhwaganira oku mawazo  marhano makarhurhabala rhulwise enkengero zili nk’ezola n’okuntu rhwakagwarha obusime omu kasi k’amahubiri.

OLEKE ECHINWA CHA MUNGU CHIKUHE EMISI

3. Bichi byarhabalaga omulebi Yeremiya ahubiri abandi?

³ Chiro n’omu mango ma mira, oburhumwa burhengere omu Chinwa cha Mungu bwalirhabere abakozi bage bagwarhe emisi amango baligwerhe engabane zikomere balikwanene kuyeneza. Rhuganire oku mufano g’omulebi Yeremiya. Aligwerhe engangane amango Yehova amuhereza engabane y’okuhubiri. Yeremiya aderha ntya: “Ntenji kuderha, bulala ndi murhabana konyine.” (Yer. 1:6) Bichi byamurhabalaga agwarhe obushiru b’okuhubiri? Ebinwa Yehova amubwiraga byamuheba emisi. Aderhere ntya: “Byaba nka muliro gufungirwe omu mavuha mani gwaliri gwa gulumira, na nagambwa kuguzimya.” (Yer. 20:8, 9) Chiro akaba oku byalikomerere Yeremiya kuhubiri abantu b’omu eneo yage, oburhumwa alihabirwe bwalimuhere emisi alikenere y’akola akola kasi.

4. Bichi binarhengerera amango rhwamasoma Echinwa cha Mungu n’okuchikengerako? (Wakolosai 1:9, 10)

⁴ Abakristu banagwarha emisi erhengere omu Chinwa cha Mungu. Omu maruba ayandikiraga echibaga che Kolosai, entumwa Paulo aliderhere okw’amango bamagwarha obumenyi burhagwerhe magosa, bwarhabala bene-babo “balambagire omu kuntu kukwanene embere za Yehova” oku banali bagenderera “kuyana amalehe oku bilolere buli kasi kenja.” (Osome Wakolosai 1:9, 10.) Akola kasi kenja kaheberemo akasi k’okuhubiri emyazi minja. Bobola amango rhwamasoma Echinwa cha Mungu n’okuchikengerako, rhwanakomeza obwemere bwerhu mu Yehova, n’okuyunva bwinja bulagurhe kuli kw’akamaro bwenene okuhubiri oburhumwa b’Obwami bwa Mungu.

5. Gurhe rhwakayunguka bwenene omu kusoma n’okuyiga Echinwa cha Mungu?

⁵ Yirhuyunguka bwenene n’Echinwa cha Mungu, rhurhakwanene kuchisoma, kuchiyiga n’okuchikengerako juba-juba. Orhole ebisanzi bitosheze by’okujira ntyo. Akaba wamasoma olwandiko lwe Biblia lukomere kuyunva, omenye walubalala. Ahali h’okujira ntyo okolese Index des publications des Témoins de Jéhovah changwa Musaada wa Kutafuta Habari kwa Ajili ya Mashahidi wa Yehova (Oburhabale oku Bahamirizi ba Yehova b’Okulonza Emyazi) y’obona amafasiriyo oku bilolere olola lwandiko. Nk’orholere ebisanzi binene amango oli wayiga, wachizera bwenene okw’ebye Biblia ederhere  bili by’okuli. (1 Te. 5:21) Amango wamachizera bwenene ebi wayigire, kuwanagwarha obusime bunene b’okubibwira abandi.

OCHIRHEGANYE BWINJA EMBERE Y’OKUJA OKU MAHUBIRI

6. Bulagurhe rhukwanene kuchirheganya bwinja embere y’okuja omu kasi k’amahubiri?

⁶ Akaba wachirheganyize bwinja embere y’okuja omu kasi k’amahubiri, wachiyunva orhagwerhe obuba amango oli waganira n’abandi. Yesu alirhabere abanafunzi bage bachirheganye embere baje omu kasi k’amahubiri. (Lu. 10:1-11) Bulala balikoleseze ebi Yesu ababwiraga, baligalire kujira bintu binene binja, n’ebyola byabalerhera obusime bunene bwenene.—Lu. 10:17.

7. Nka gurhe wakachirheganya eju y’akasi k’amahubiri? (Olole n’efoto.)

⁷ Nka gurhe wakachirheganya eju y’akasi k’amahubiri? Birhuhemere rhuwaze oku birhulonzeze kuderha, naho rhwanaja rhwabiderha omu bulyo buyunvikene n’omu byerhu byerhu binwa. Echola charhurhabala kandi rhuwaze ku njira ziguma abantu bakayemeramo oburhumwa. Naho amango rhuli rhwaganira n’abantu rhwakachihangana kuyorha rhurhulerere, kunyinyula, n’okuganira nka bera b’abola bantu.

8. Mu njira ehe Abakristu bahuzenywe n’ebintu bikolerwe n’obudaka entumwa Paulo akolesaga omu mufano gwage?

⁸ Entumwa Paulo alibwirire bene-babo na bali-babo b’Abakristu ntya: “Rhugwerhe obula buhirhi omu bintu bikolerwe n’obudaka.” (2 Ko. 4:7) Obola buhirhi bobuhe? Kali kasi k’okuhubiri oburhumwa b’Obwami k’okuyokola akalamo. (2 Ko. 4:1) Ebintu bikolerwe n’obudaka bye bichi? Bishushanyize abakozi ba Mungu banabwira abandi emyazi minja. Omu siku za Paulo, abachuruzi bagendaga bakolesa ebintu bikolerwe n’ebumba, omu kuheka obuchuruzi bw’akachiro, nk’ebilyo, edivayi, n’efuranga. Intyo konoko, Yehova arhuhere oburhumwa bw’akachiro bw’emyazi minja. Kugerera oburhabale bwa Yehova rhwakagwarha emisi rhukenere yirhugenderera kuhubiri.

RHUSALIRE YI RHUGWARHA OBUSHIRU

9. Nka gurhe rhwakahima okuyubaha abantu changwa okuwaza oku barharhuyunviriza? (Olole n’efoto.)

⁹ Mango maguma rhwakayubaha abantu, changwa rhwanayubaha oku barharhuyunviriza. Nka gurhe rhwakalwisa echola chibazo? Rhuganire oku sala entumwa zaderhaga amango  bababuza kuhubiri. Barhayunvaga obuba n’okuleka kuhubiri. Ahali h’okujira ntyo bahema Yehova abarhabale “bagenderere kuderha echinwa [chage] n’obushiru boshi.” Yehova ashubiza ahohan’aho amasala mabo. (Mdo. 4:18, 29, 31) Akaba okuyubaha abantu kunarhuma rhwagwarha emilago oku bilolere okuhubiri, nerhu rhwasalira Yehova arhurhabale. Oheme Yehova akomeze obuzigire bwawe ogwerhe oku bantu y’orhayubaha kubabwira emyazi minja.

10. Gurhe Yehova anarhurhabala rhuhane obuhamirizi eju yage? (Isaya 43:10-12)

¹⁰ Yehova arhushimikire yirhuba Bahamirizi bage, anarhulaganyize okw’arhurhabala rhugwarhe obushiru. (Osome Isaya 43:10-12.) Rhuganire ku njira ene zonyine anajiramo ntyo. Ey’oburhanzi, Yesu anaba ali haguma nerhu amango moshi rhuli rhwahubiri emyazi minja. (Mt. 28:18-20) Eyakabiri, Yehova ashimikire bamalayika yi barhurhabala. (Ufu. 14:6) Eyakasharhu, Yehova anarhuhereza eroho lyage lichesibwa yi lirhurhabala kuyibuka ebi rhwayigire. (Yoh. 14:25, 26) Eyakane, Yehova arhuhere bene-berhu na bali-berhu yi rhuyinja rhwahubiri haguma. Kugerera oburhabale bwa Yehova n’obwa bene-berhu na bali-berhu bazigirwa, rhugwerhe buli choshi rhukenere yi rhugwarha obushiru n’okugenderera kuhubiri.

OMENYE EBY’ABANTU BALAGIRIRE ONAGENDERERE KUGWARHA AMAWAZO MENJA

11. Amango oli omu mahubiri, gurhe wakajira y’opata bantu banene? (Olole n’efoto.)

¹¹ Onachiyunva ovunikire omurhima amango wamabugana bantu bageke ahamwababo? Bulagurhe orhakachibaza ntya: ‘Ngahe abantu b’omu eneo yani bali mw’eno saa?’ (Mdo. 16:13) ‘Bajire oku kasi changwa bajire kugula ao kuguza ebintu si?’ Akaba ntyo ku bili, kawakapata bantu banene omu kuja kuhubiri omu barabara? Mwene-werhu muguma oyirikirwe Joshua aderhere ntya: “Napatire orozo l’okuhubiri ahantu banagulira ebintu, n’efasi bantu banene banazigana kupatikana.” Yewe na mukage, Bridget, kandi baliri bapata bantu banene amango baliri babalambagirira egolo, n’omu Lwamungu enyuma w’emidi.—Efe. 5:15, 16.

12. Nka gurhe rhwakamenya eby’abantu baba bayemerere changwa ebibalazize?

¹² Akaba okuburhanzi omuntu oli waganira naye arhayemerere oburhumwa oli  wamubwira, ochihangane kumenya nyigirizo zihe ayemerere changwa ebimulazize. Joshua na Bridget banakolesa echibazo chili oku murhondero gw’etrakte omu kurhondera enganiro. Omufano, baliri bakolesa etrakte ederhere ntya: Gurhe Onabona Ebiblia? Banabaza ntya: “Bantu baguma banabona okw’Ebiblia chili chitabu charhengaga emwa Mungu, abandi arhali ntyo kubanayibona. Gurhe woyo owazize?” Ahanene okujira ntyo kwaliri kwabarhabala kurhonderesa enganiro.

13. Bulagurhe rhunayunva rhusimire amango rhuli rhwahubiri chiro n’amango abantu barhali barhuyunviriza? (Mezali 27:11)

¹³ Chiro akaba abantu barhali barhuyunviriza amango rhuli rhwahubiri rhunagenderera kuyeneza omuhigo gwerhu. Bulagurhe? Bulala rhwakolere ebi Yehova n’omugala balonzeze rhukole, k’okuderha, okuhana obuhamirizi. (Mdo. 10:42) Chiro n’amango rhurhabwene omuntu w’okuganira naye, changwa barhayunvirize oburhumwa bwerhu, rhwakagwarha obusime bulala rhumenyere oku rhwasimisize Darha w’embingu.—Osome Mezali 27:11.

14. Bulagurhe rhunagwarha obusime amango abandi bahubiri bapatire omuntu osimisizwe omu eneo?

¹⁴ Kandi rhwakagwarha obusime amango owerhu muhubiri amapata omuntu osimisizwe omu eneo. Omunara g’Omulanzi guchizindire kuhuzanya akasi kerhu n’okulonza omwana waherere. Banene bali barhabala kulonza oyola mwana kurhenga omu eneo nguma kuja omu yindi. Amango bamabona oyola mwana, boshi bagwarha obusime, s’arhali olala wamubonaga yenyine. Intyo konoko, buli muguma omu chibaga anarhabala oku kasi k’okujira omuntu abe mwanafunzi wa Yesu. Rhukenere buli muntu omu chibaga y’arhabala oku kasi k’okuhubiri abantu boshi omu eneo, na boshi banagwarha obusime amango omuntu muhyahya amahwanza kuja oku mbuganano ze chibaga.

OCHISEZE OKU BUZIGIRE OGWERHE KU YEHOVA N’OKU BATURANYI BAWE

15. Nka gurhe okukolesa olwandiko lwa Matayo 22:37-39 kunarhurhabala rhugwarhe busime bunene omu kasi k’amahubiri? (Olole n’efoto y’oku chiganda.)

¹⁵ Rhwakayongera obushiru bwerhu omu mahubiri omu kuseza obwenge oku buzigire bwerhu ku Yehova n’oku baturanyi berhu. (Osome Matayo 22:37-39.) Ba nka wawaza gurhe Yehova anayunva asimire amango ali arhubona rhuli rhwajira akasi, n’okuntu abantu banagwarha obusime amango bamahwanza kuyiga Ebiblia!  Kandi oyibuke oku balala banayunviriza oburhumwa bwerhu n’okuchishoga kukolera Yehova bakalama esiku n’amango.—Yoh. 6:40; 1 Ti. 4:16.

16. Nka gurhe rhwakagwarha obusime omukasi kerhu k’amahubiri amango rhurhali rhwarhenga ahamwaberhu? Lerha emifano.

¹⁶ Hali amango mwakaba murhayemererwe kurhenga ahamwabenyu eju ya mpanvu ndebe? Akaba ntyo ku bili, ochiseze oku biwakajira, y’oyerekana obuzigire ku Yehova n’oku baturanyi bawe. Omu mango m’obulwala b’okuyahukira bwe Korona (COVID-19), mwene-werhu Samuel na mukage Dania baliberere ahamwabo buzira kuhuluka. Mw’echola chihe chikomere, baliri bahubiri oku kahunda kugerera etelefone, okuyandika amaruba, n’okuongoza amafunzo me Biblia oku Zoom. Samuel aliri ahubiri boshi aliri abuganana nabo oku bitaro emunda aliri achibukisa obulwala bw’akansere. Aderhere ntya: “Amango rhuli rhwahurana ebihe bikomere, rhwakachiyunva rhugwerhe emilago, changwa kuchiyunva rhuluhire, n’obwemere bwerhu bwakageregezwa. Rhulonzeze kugwarha obusime omu kasi kerhu rhuli rhwakolera Yehova.” Mw’agola mango, Dania ahena (akumbagala) anayorha ali omu buliri mu myezi esharhu. Enyuma waho amala myezi ndarhu ey’ali alambagirira omu kinga ly’ebilema. Aderhere ntya: “Nachihangana kujira byoshi ehali yani yalinyemerere njire. Naligalire kuhubiri mukazi muguma waliri ambuka, kandi naliri naganira naboshi baliri balerha ebintu ahamwaberhu. Kandi naligalire kujira enganiro nyinja oku telefone n’omukazi waliri akola omu kompanyi enaguza ebintu by’okukolesa omu bitaro.” Chiro akaba oku Samuel na Dania barhakachigalire kujira binene nk’oku byaliri mira, baliri bajira ebi bagalire n’echola chaliri chabalerhera obusime.

17. Nyungu zihe wakapata amango wamakolesa amahano mali mu gunola mwazi?

¹⁷ Ochihangane kukolesa mahano marhano moshi mahaanirwe mu gunola mwazi. Buli hano liri kuguma n’obulunge banakolesa omu kuvuya. Amango obulunge boshi bwamahebwa omu kalyo, bwanarhuma kagwarha obununu. Omu kukolesa amahano moshi, rhwagwarha ebikoleso byoshi by’okulwisa amawazo mabi n’okugwarha busime bunene omu kasi k’amahubiri.