MWAZI G’OKUYIGA 17
OLWIMPO 111 Empanvu z’Omwishingo Gwerhu
Orhahira Okarhenga omu Paradizo y’Ekiroho
“Muchishinge munagwarhe obusime esiku n’amango omu bintu nalemere.”—ISA. 65:18.
EBIRHWAYIGA
Rhwayiga gurhe rhwakayunguka n’eparadizo y’ekiroho na nka gurhe rhwakalerha mw’abandi.
1. Eparadizo y’ekiroho bye bichi, na bichi rhukwanene kuhigirira kujira?
HALI eparadizo y’omufano eli oku gulu zene eli mu bantu banene bagwerhe bintu binene binja by’okujira. Eyola paradizo eli mw’amaliyoni m’abantu bali basimira omurhula g’obukweri. Abali mw’eyola paradizo bahigirire oku barhakachifa bayirhengeremo. Banalonzeze bantu banene nk’oku byakanagalikana, nabo bayinje babe haguma nabo mw’eyola paradizo y’ekiroho. Eparadizo y’ekiroho bye bichi? a
2. Bichi bili mw’eyola paradizo y’ekiroho bisimisize bwenene?
2 Omu njira esomeze, Yehova ahebereho ahantu h’omufano, ah’abantu bali bagwerhe omurhula n’obuguma chiro akaba balamire omu gulu lya Shetani libi linali m’obuhanya. (1 Yo. 5:19; Ufu. 12:12) Mungu werhu w’obuzigire ali abona gurhe linola gulu libi lili lyarhubabaza, aliko ali arhabala abakozi bage bayorhe omu bulanzi na ntyo bagenderere kumukolera omu busime. Echinwa cha Mungu chiderhere okw’eparadizo y’ekiroho eli nka hantu “h’okulibirhira” hali omurhula hanali nka “bustani emimirwe bwinja.” (Isa. 4:6; 58:11) Kugerera emigisho ya Yehova, abola balamire mw’eyola paradizo bali bachiyunva bagwerhe obusime banali omu bulanzi mu chinola chihe chikomere ch’esiku z’obuzinda.—Isa. 54:14; 2 Ti. 3:1.
3. Gurhe obulebi buyandikirwe omu Isaya sura ya 65 bwaliyenere omu mango m’Abaizraeli ba mira?
3 Yehova alikoleseze omulebi Isaya, omu kuyerekana gurhe akalamo kakabere omu paradizo y’omufano. Rhwakabona amafasiriyo m’obola bulebi omu Isaya sura ya 65, bwayeneraga burhanzi omu mwaka gwa 537 M.K.Y. Mw’agola mango, Abayahudi balihungamire, balirhengere buhungiro Ebabiloni n’okugaluka omu chihugo chabo. Yehova aligishire abantu bage anabarhabala bakwize evile ye Yerusalemu yabaga yalimbwirwe, n’okushuba kuyumbaka ehekalu ahantu baliri baharamizya Yehova omu Izraeli.—Isa. 51:11; Zek. 8:3.
4. Gurhe obulebi buli omu Isaya sura ya 65 buli byayenera zene?
4 Obula bulebi bwa Isaya bwashubaga kuyenera obwakabiri omu mwaka gwa 1919 N.K.Y., amango abakozi ba Yehova bapata orozo l’okurhenga omu buja bwa Babiloni Mukulu. Enyuma w’ahola eparadizo y’ekiroho yarhondera kugaluka kubuyabuya kubuyabuya oku gulu lyoshi. Abahubiri b’Obwami bagwerhe obushiru barhonderesa bibaga binene, banaliri bayerekana engeso ze Chikristu. Abalume n’abakazi bali gwerhe engeso z’obubandi, banaliri bajira ebijiro bili nk’eby’enyama burhanzi, balikwanene “kuyambala oborhere buhyahya bupatene n’obulonza bwa Mungu.” (Efe. 4:24) Kweri, minene omu migisho Isaya alilebere, nji yayenera bwinja bwinja omu gulu lihyahya. Aliko chiro na zene rhulirhwayunguka mu njira zinene n’okuba rhuli omu paradizo y’omufano. Rhwaganira nka gurhe eyola paradizo y’ekiroho erhulolere na bulagurhe rhurhakwanene kuyirhengamo habanakatyu.
OKUNTU ABALI OMU PARADIZO Y’EKIROHO BANACHIYUNVA
5. Nk’ok’olwandiko lwa Isaya 65:13 luderhere, bichi yi rhwasimira omu paradizo y’ekiroho?
5 Bagwerhe amagala m’enja banaluhukire. Obulebi bwa Isaya buyerekene okw’akalamo kabali omu paradizo y’ekiroho n’abarhayilimo karhali kuguma chiro. (Osome Isaya 65:13.) Yehova anaha abakozi bage buli choshi bakenere yi bagenderera kuyorha hofi naye. Rhugwerhe eroho lyage lichesibwa, Ebiblia, n’ebindi bikoleso binene biyumangire oku Biblia, yi rhugala “kulya, . . . kunywa, . . . [n’oku] chisimisa.” (Ohuzanye na Ufunuo 22:17.) Aliko, ehali y’abantu bali omu paradizo y’ekiroho na barhayilimo elekene bwenene. Abarhali mw’eyola paradizo y’ekiroho “bali nzara . . . , bagwerhe enyorha . . . , [banali] balibuka.” Na nta bwira bagwerhe haguma na Mungu.—Amo. 8:11.
6. Gurhe olwandiko lwa Yoeli 2:21-24 lufasiriye miguma omu migisho Yehova anarhuha, na gurhe rhwakayunguka nayo?
6 Omu bulebi bwage, Yoeli aderhere ebintu by’akamaro nk’embeke, edivayi n’amavurha m’omuzabibu, omukuyerekana oku Yehova anarhuhereza buli choshi rhukenere kuhebamo n’obwerekezi burhengere omu Biblia y’obwemere bwerhu bugenderera kuyorha eyi bukomere. (Yoe. 2:21-24) Omufano, arhuhere Ebiblia, ebitabu biyumangire oku Biblia, esite yerhu ye Enternete, embuganano z’echibaga, n’embuganano zikulu. Rhwakayunguka buli lusiku n’ebyola bikoleso, naho rhwanagwarha amagala menja, n’okuchiyunva rhuhumukire loshi.
7. Bichi binarhuma rhwagwarha “ehali nyinja y’omu murhima”? (Isaya 65:14)
7 Bagwerhe obusime banatoshekere. Abantu ba Mungu “bakabanda empundu z’obusime” bulala bagwerhe eshukrani emwa Yehova. (Osome Isaya 65:14.) Obwemere b’okuli buhebere omurhima, ebilagane by’omu Chinwa cha Mungu, n’obulangalire rhugwerhe bwa mango mayinjire buyumangire oku nterekero y’enchungu ya Kristu birhuhere “ehali nyinja y’omu murhima.” Okuganira kw’ebyola haguma na bene-berhu na bali-berhu binarhusimisa bwenene!—Zb. 34:8; 133:1-3.
8. Bintu bihe bibiri by’akamaro biba omu paradizo y’ekiroho?
8 Obuzigire n’obuguma biba omu bantu ba Yehova, by’ebintu bibiri by’akamaro biba omu paradizo y’ekiroho. Ebyola “che chifundo ch’obuguma” chinarhurhabala rhumenye gurhe akalamo nji kaba omu gulu lihyahya, omw’abakozi ba Yehova nji basimira bwenene obuzigire n’obuguma kulusha obubagwerhe zene. (Kol. 3:14) Mwali-werhu muguma afasiriye ebyachiboneraga amango abuganana n’Abahamirizi ba Yehova ob’oburhanzi. Aderhere ntya: “Ntalimenyere gurhe omuntu akagwarha obusime, chiro n’omu mulala gwani. Oburhanzi n’abonaga gurhe abantu yi bayerekana obuzigire b’okuli buli muguma n’owindi, galiri amango mbuganana n’Abahamirizi ba Yehova.” Buli yeshi olonzeze kugwarha obusime b’okuli n’okutosheka bimuhemere abe omu paradizo y’ekiroho. Chiro eby’abantu ba mu linola gulu bakawaza oku birhulolere rhwabo bakozi ba Yehova, rhugwerhe ezino changwa erenge linja haguma na Yehova na haguma na balala boshi bali bamuharamya.—Isa. 65:15.
9. Bichi olwandiko lwa Isaya 65:16, 17 lulaganyize oku bilolere ebintu rhulirhwahurana zene bili byarhulerhera amalumwa n’amalibuko?
9 Baluhukire banarhulerere. Olwandiko lwa Isaya 65:14 luderhere oku balala boshi bachishogere kubera embuga w’eparadizo y’ekiroho “bali balira eju y’amalumwa m’omu murhima [n’oku] lira eju y’okuvunika omurhima.” Aliko si, gurhe oku bilolere ebintu byoshi bili byarhuma abantu ba Mungu bagwarha amalumwa n’okulibuka? Buzinda, ebyola bintu “nji byayibagirwa [n’okukulwa] embere z’amasu ma [Mungu].” (Osome Isaya 65:16, 17.) Yehova nj’amala ebibazo byerhu byoshi, na buzinda rhurhakachiyibuka chiro n’amalumwa moshi byaliri byarhulerhera.
10. Bulagurhe ogwerhe eshukrani y’okubona oli haguma na bene-benyu na bali-benyu? (Olole n’efoto.)
10 Zene naho rhunachiyunva rhurhulerere amango rhuli oku mbuganano zerhu ze Chikristu, rhunachiyunva rhuhumukire n’okurhulera. Rhurhanachiseza oku bintu bya linola gulu libi binarhulerhera emilago. Kandi rhunarhabala bene-berhu na bali-berhu bachiyunve barhulerere amango rhwamabayereka obuzigire, obushagaluke, omurhula, olukogo, n’obwirhonzi bili chigabi ch’etunda ly’eroho lya Mungu. (Gal. 5:22, 23) Rhugwerhe eshukrani nene bwenene y’okuba omu lubaga lwa Mungu! Abachishogere kubera omu paradizo y’ekiroho nji babona amango Mungu ayeneza bwinja bwinja echilagane chage “ch’embingu mpyahya n’egulu lihyahya.”
Okuba chigabi ch’omulala gwa Yehova omu paradizo y’ekiroho kunarhulerhera migisho minene rhunasimira (Olole echifungo che 10) c
11. Nk’ok’olwandiko lwa Isaya 65:18, 19 luderhere, bichi rhunajira bulala Yehova ahebere h’eparadizo y’ekiroho, na bulagurhe?
11 Bagwerhe eshukrani n’obusime. Buzinda Isaya afasiriye bulagurhe rhugwerhe empanvu zinene z’okugwarha “eshukrani n’obusime” omu paradizo y’ekiroho. Yehova yiwahebagaho eyola paradizo y’omufano. (Osome Isaya 65:18, 19.) Bobola, biyunvikene okubona Yehova ali arhukolesa yi rhurhabala abantu barhenge omu madini ma linola gulu, marhali mabayigiriza obukweri oku bilolere Mungu, n’okubarhabala babe chigabi ch’eparadizo y’omufano nyinja bwenene! Rhugwerhe busime bunene oku bilolere emigisho rhuli rhwasimira, bulala rhuli omu bukweri kandi rhugwerhe enyorha nene y’okubwira abandi oku bilolere obola bukweri.—Yer. 31:12.
12. Gurhe ebilagane biderherwe omu lwandiko lwa Isaya 65:20-24 birhumire wachiyunva, na bulagurhe?
12 Kandi rhugwerhe eshukrani n’obusime bunene oku bilolere obulangalire rhugwerhe eju y’obwira bwerhu b’omurhula haguma na Yehova. Ba nka wawaza oku bintu byoshi nji rhwabona n’okujira omu gulu lihyahya lya Mungu! Ebiblia elaganyize ntya: “Harhakachibaho omwana mudorho . . . nji walama siku zigekeke, changwa omushaja orhakalama esiku zage zoshi.” Nji ‘rhwayumbaka enju n’okuzilamamo [n’oku] byala emizabibu rhunalye amalehe mayo.’ ‘Rhurhakachiluhira busha’ bulala nji rhwaba ‘rhwagishirwe na Yehova.’ Arhulaganyize akalamo kakwirire, kanagwerhe echikamalire. “Chiro n’embere bahamagale,” nj’aba ey’amenyere echi buli muntu akenere, kandi “nj’ayeneza enyifinjo za buli chintu chilamire.”—Isa. 65:20-24; Zb. 145:16.
13. Gurhe olwandiko lwa Isaya 65:25 luderhere oku bilolere abantu banajira ebi bahindamula omu kalamo kabo amango bamarhondera kukolera Yehova?
13 Bagwerhe omurhula n’obulanzi. Kugerera oburhabale bw’eroho lichesibwa lya Mungu, bantu banene baligwerhe ob’orhere b’obubandi n’ebijiro by’obulyalya, bahindamwire bintu binene omu kalamo kabo. (Osome Isaya 65:25.) Bajirire okwabo koshi yi balekana n’engeso zabo zibi. (Ro. 12:2; Efe. 4:22-24) Kweri, abantu ba Mungu barhaza kuba bashiganyanya, bobola rhwachigenderera kujira amagosa. Aliko, Yehova ahebere haguma “abantu ba buli lubero” bamuzigire, n’okuzigirana buli muguma n’owindi, n’echola charhumire bagwarha omurhula n’obuguma. (Tit. 2:11) Echola chili chisomerene chirhakajirwa n’owindi olekere Mungu yenyine ogala byoshi!
14. Nka gurhe ebyahikiraga mwene-werhu muguma biyerekene ok’olwandiko lwa Isaya 65:25 luderhere obukweri?
14 Kweri si abantu bakahindamula oborhere bwabo? Waza k’ogula mufano. Murhabana muguma wa myaka 20 walishwekerwe turu zinene omu prizo, analilamire akalamo k’obubandi n’okujira eby’eshoni. Balimushwekere eju y’okuyiba omutugari, okurherana, n’ebindi bijiro by’obubandi bikomere. Aliri tayari kuhwanzisa entambala n’abuli muntu yeshi yeshi. Amango ayunva obukweri bwe Biblia eturu y’oburhanzi n’okurhondera kuja oku mbuganano za Bahamirizi ba Yehova, ayemera okw’abwene echintu ch’akachiro omu kalamo kage k’okuderha okuharamya Yehova omu paradizo y’ekiroho. Enyuma y’okubatizwa aligenderere kukengera okuntu olwandiko lwa Isaya 65:25 lwalihumire oku kalamo kage. Alilekene n’oborhere b’okunigana nka simba, ayambala oborhere bwinja buli nka bw’entama.
15. Bulagurhe rhulonzeze kuhamagala abandi bayinje haguma nerhu omu paradizo y’ekiroho, na nka gurhe rhwakajira ntyo?
15 Olwandiko lwa Isaya 65:13 lurhondere omu kuderha ntya: “Ebila bi Nyin’Amahanga Waliha Yehova aderhere.” Omustari gwa 25 gumalirize omu kuderha binola binwa: “Intyo ku Yehova aderhere.” Buli mango ebilagane byage binayenera. (Isa. 55:10, 11) Eparadizo y’ekiroho ekola eliho zene. Kweri Yehova alemere omulala gunamuharamya guli kwago kwago. Bulala rhuli chigabi ch’ogola mulala, rhugwerhe murhula gunene zene nk’oku byakanagalikana, rhunali rhwachiyunva omu bulanzi mu linola gulu libihire. (Zb. 72:7) Eju y’eyola mpanvu, rhulonzeze kurhabala luganjo lunene lw’abantu nk’oku byakanagalikana, bayinje m’ogola mulala gwe Chikristu. Rhwakajira ntyo amango rhwamachiseza oku kasi k’okujira abanafunzi.—Mt. 28:19, 20.
OKUNTU RHWAKARHABALA ABANDI BAYINJE OMU PARADIZO Y’EKIROHO
16. Bichi byakarhabala abantu bayinje omu paradizo y’ekiroho?
16 Buli muguma werhu akwanene kujira chintu chilebe y’eparadizo y’ekiroho esimisa abandi. Yi rhugala kujira ntyo, rhukwanene kuyiganya Yehova. Arhaseza abantu mpu bayinje babe chigabi ch’olubaga lwage. Ahali h’okujira ntyo “analerha” emwage abantu kubuyabuya. (Yoh. 6:44; Yer. 31:3) Abantu berhonzi banayiga oku bilolere obuzigire bwa Yehova n’oborhere bwage, kweri anabalerha emwage. Gurhe rhwakalerha abantu omu paradizo y’ekiroho kugerera engeso zinja n’olugenzi lwerhu lwinja?
17. Nka gurhe rhwakarhabala abandi bayinje omu paradizo y’ekiroho?
17 Njira nguma yakarhuma abandi bayinja omu paradizo y’ekiroho kuli kukolera bene-berhu na bali-berhu oku buzigire n’oku bwinja. Amango abantu bahyahya bamayinja oku mbuganano zerhu z’echibaga, rhuba rhulonzeze bachiyunve kuguma n’abaliri bayinja oku mbuganano omu Korinto ya mira bachiyunvaga. Baliderhere ntya: “Kweri Mungu ali ahakagarhi kenyu.” (1 Ko. 14:24, 25; Zek. 8:23) Bobola birhuhemere rhugenderere kukulikira ehano ly’okuba bantu “b’okujira omurhula buli muguma n’owindi.”—1 Te. 5:13.
18. Bichi byakarhuma abantu bayinja omu lubaga lwerhu?
18 Rhukwanene kuchihangana kugenderera kubona bene-berhu na bali-berhu b’Abakristu kuguma n’oku Yehova anababona. Rhunajira ntyo omu kuchiseza oku ngeso zabo zinja, s’arhali okurhashinganana kwabo kwahwa hanola hofi. Rhwakamala okurhayunvikana koshi omu njira y’obuzigire nka rhuli bantu “benja buli muguma n’owindi, nka rhuli rhwayunvirana obonjo bw’akasisi, n’okubabalirana oku bulonza buli muguma n’owindi.” (Efe. 4:32) Na buzinda abantu nabo balonzeze kukolerwa omu njira eli nk’eyola, bayinja omu paradizo y’ekiroho. b
OBERE OMU PARADIZO Y’EKIROHO
19. a) Nk’oku biyerekenwe omu chisanduku “ Baligendere Bashuba Kugaluka,” bichi abandi banaderha enyuma y’okushuba kugaluka omu paradizo y’ekiroho? b) Bichi rhukwanene kuhigirira kujira? (Olole n’efoto.)
19 Rhugwerhe eshukrani nene oku paradizo yerhu y’ekiroho! Eparadizo y’ekiroho eli nyinja bwenene zene kulusha mira enali mu bakozi banene bwenene ba Yehova kulusha echihe chagerere. Rhulonzeze kugenderera kugwarha eshukrani nene oku paradizo y’omufano Yehova arhuhere. Buli yeshi olonzeze kuluhuka, kutosheka, kurhulera n’okuba omu bulanzi akwanene kuyinja omu paradizo y’ekiroho arhanahira akashuba kuyirhengamo! Aliko, rhukwanene kuba merangwe bwenene bulala Shetani ali ajira okwage koshi agalire yarhurhebeka rhurhenge mw’eyola paradizo y’ekiroho. (1 Pe. 5:8; Ufu. 12:9) Rhurhakwanene kumuyemerera arhuhime. Lekaga rhujage rhwajira okwerhu koshi yi rhugala kulanga obwinja, obusafi, n’omurhula by’eyola paradizo y’ekiroho.
Balala bagenderera kubera omu paradizo y’ekiroho nji basimira kandi kuba omu paradizo yayinjire hanola oku gulu (Olole echifungo che 19)
GURHE WAKASHUBIZA?
-
Eparadizo y’ekiroho bye bichi?
-
Migisho ehe rhuli rhwasimira mw’eyola paradizo y’ekiroho?
-
Nka gurhe rhwakarhabala abandi bayinje omu paradizo y’ekiroho?
OLWIMPO 144 Seza Amasu Mawe oku Luhembo!
a AMAFASIRIYO M’EBINWA: Echinwa “paradizo y’ekiroho” eli hali nyinja y’obulanzi balala balibaharamya Yehova balibasimira. Mw’eyola paradizo y’ekiroho rhuli rhwasimira obwira bukomere haguma na Yehova, na buli muguma n’owindi.
b Olole evideo oku jw.org Wako Wapi Sasa? (Ngahe Bali?) Alena Žitníková: Vile Ndoto Yangu Ilitimia. (Okuntu Ebilorho Byani Byayeneraga), wabona emigisho mwali-werhu muguma alipatire eju y’okuba omu paradizo y’ekiroho.
c AMAFASIRIYO M’EFOTO: Amango banene bali bayunguka n’okuba haguma n’abandi oku mbuganano, mwene-werhu muguma achihebere eburhambi.
