“Imba muntu w’eshoni bwenene omu bumuntu bwani,” Sara * oyola oli washambala “Intanava nayunva inchichizerere. Che chirhuma intachiyunva bwinja amango indi haguma n’abantu bashagaluka bwenene n’abaguruguru. Aliko inanchiyunva bwinja amango indi haguma n’abantu banachirhonda n’okulemba. Nakagala kuchifungula ku mene abola bantu, okubabwira okuntu inchuyunvirhe, n’okubabwira ebibazo byani. Bene abola bantu ba baba bera bani.

Ebi Sara aderhere biyerekene ok’obwirhonzi bwakarhuma abandi bagala kurhuyegera. Obwirhonzi bunasimisa Yehova naye. Echinwa chage chirhuhanwire intya: “Muyambale . . . obwirhonzi.” (Kol. 3:12) Obwirhonzi che chichi? Gurhe Yesu aliyerekene obwirhonzi? Na gurhe eyola ngeso yakarhulerhera obusime omu kalamo?

Obwirhonzi buli borhere b’omurhula b’omu ndani. Omwirhonzi anakola n’abandi omu bulyo bwinja busimisize, kandi anagala kulwisa ebigayisize omu kalamo eyi anarhuzize n’okuchigala.

Obwirhonzi buyerekana oku omuntu akomere. Echinwa ch’Echigriki chikolesezwe omu Biblia omu kuderha obwirhonzi chagendaga chakoleswa omu kuderha efarasi y’elubala yarhungirwe. Eyola farasi enayorha eyi enachigwerhe emisi, aliko yanaba eyi ekala ekomezwe kukolesa emisi yayo bwinja. Konakuguma, amango rhwamayerekana obwirhonzi, rhwanakabulira obumuntu bwerhu buli nka bw’elubala, n’okugala kukola n’abandi omu murhula.

Hali oku rhwakawaza mpu; ‘intaba muntu ochirhonda omu borhere bwani.’ Rhulamire omu gulu liyalire m’obukali n’okurhalembera, nantyo rhwakabona nka chibazo okugala kuyerekana obwirhonzi. (Ro. 7:19) Che chirhumire, bihemere okuchihangana y’omuntu aba mwirhonzi, aliko eroho lichesibwa lya Yehova lyarhurhabala rhugwarhe emisi y’okugala kuhikira omuhigo gwerhu. (Gal. 5:22, 23) Aliko, bulagurhe rhukwanene rhuchihangane kugwarha obwirhonzi?

Obwirhonzi eli ngeso enasimisa abantu. Nk’oku Sara rhwaderhaga enyanya aderhere, rhunachiyunva bwinja amango rhuli haguma n’abantu baba berhonzi omu borhere bwabo. Yesu ali lwiganyo lwinja bwenene l’obwirhonzi n’obumuntu bwinja. (2 Kor. 10:1) Chiro akaba oku abana barhasima kuva bayegera abantu barhenji, aliko Yesu aliri mwirhonzi omu kuntu abana baliri basima kuba haguma naye, chiro baba barhamuyinji.​—Mk. 10:13-16.

 Obwirhonzi bunarhulanga n’okulanga abaturanyi berhu. Nka rhuli berhonzi, rhurhakalema rhwayunva oburhe n’okugaya juba-juba. (Mez. 16:32) Rhurhakachiyunva ba busha amango hali omuntu rhwavunire omurhima; ahanene omuntu rhunasima. Kandi obwirhonzi bunalanga balala barhuzungulukire barhababalaga eju y’okubula kuchigala kwerhu.

Chiro akaba oku aliherhe makasi manene marhayoroheze n’okubula ebisanzi, Yesu aliri mwirhonzi oku bantu boshi. Bantu banene b’omu chihe chage baliri bantu bayunvirhe bahwererwe, bakenere echirhulirizo. Waza kangana gurhe bakachiyunvirhe barhulirizwe amango Yesu ababwiraga: “Muyinje emunda ndi, . . . Bulala indi mwirhonzi na mulembu omu murhima”!​—Mt. 11:28, 29.

Gurhe rhwakayiga kugwarha obwirhonzi kuguma na Yesu? Rhunayiga echinwa cha Mungu omu kuyiga gurhe Yesu aliri akola haguma n’abandi, na gurhe aliri aheka ehali zikomere. Che chirhumire, amango rhwamahurana ehali zakageregeza obwirhonzi bwerhu, rhuchihangane kuyiganya Yesu. (1 Pe. 2:21) Waza ku bintu bisharhu byarhabalaga Yesu kuba mwirhonzi.

Yesu aliri mulembu omu murhima. Yesu aliderhere oku ali “mwirhonzi kandi mulembu omu murhima.” (Mt. 11:29) Ebiblia enayerekana ezola ngeso haguma bulala obwirhonzi buyegerere bwenene n’obulembu. (Efe. 4:1-3) Bulagurhe?

Obwirhonzi bunarhurhabala rhurhavaga rhwachirhola b’akamaro bwenene changwa bantu b’okugayira busha. Gurhe Yesu aliri ajira amango abantu baliri bamuveba oku ali “mudambi” n’oku “azigana kunywa edivayi”? Aleka olwiganyo lwage lwinja luyerekane oku ebi bali bamuderha ko buli bubeshi, kandi aderha n’obwirhonzi oku “obwengehe bunachiyerekana oku buli b’okunali kugerera akasi kabo.”​—Mt. 11:19.

Nk’omuntu amaderha ebirhakwirire oku bilolere erangi ly’omubiri gwawe, okwenge oli mulume changwa mukazi, obumenyi bwawe, chakarhuma orhachihangana kumushubiza n’obwirhonzi? Peter, mushamuka muguma w’omukrisu we Afrike di side aderhere ntya: “Eyi mbona nagayire eju y’ebi omuntu aderhere, inanchibaza, ‘gurhe Yesu akajirire?’” Ayongerere ntya: “Nayigire okurhachibona w’akamaro bwenene.”

Yesu aliri amenya obuzamba bw’abantu. Entumwa za Yesu zaliherhe amawazo makwirire, aliko mango maguma-maguma okurhashinganana kwabo kwaliri kwarhuma barhagala kuyeneza amola mawazo makwirire baliherhe. Omufano, obudufu embere Yesu afe, Petro, Yakobo na Yowane bagambwa kumuyodesa nk’oku alilonzeze bajirage. Yesu aderha oku “nechi, eroho lidugurhire, si omubiri guzambire.” (Mt. 26:40, 41) Eju y’okola kurhegera ntyo, Yesu arhalikwazikire entumwa zage.

Mandy ali mwali werhu wakazaga zigana kuchiyenza oku bandi, aliko bunola anachihangana bwenene kuyiganya obwirhonzi bwa Yesu. Aderhere intya: “Inanchihangana kuyibuka oku abantu barhashinganene n’okuchiseza oku binja banajira, nk’oku Yehova naye anajira.” Okuntu Yesu aliri abona abandi n’olukogo oku buzamba bwabo, kukurhabale nawe kukola n’abandi omu bwirhonzi.

Yesu aliri aleka ebintu omu fune za Mungu. Yesu alilembere ebijiro by’akabonerero amango aliri oku gulu. Yesu arhaliri ayunvibwa, aliri asuzagurwa, anarhindibuzwa. Chiro akaba ntyo, agenderera kuyorha mwirhonzi bulala “alilangalire olala onacha olubanja omu kunali.” (1 Pe. 2:23) Yesu alimenyere oku Eshe w’omu mbingu amulwako n’okumala akabonerero oku kasanzi ka kwanene.

Nka rhwamayunva oburhe n’okulonza rhulwise akabonerero, kwakarhuma rhwakola ebibihire n’okuja rhwabihya ebintu bwenene. Che chirhumire amandiko marhuyibwise intya: “Oburhe bwa mwene omuntu burharhengereza okunali kwa mungu.” (Yak. 1:20) Chiro akaba rhuherhe empanvu y’okuyunva oburhe, okurhashinganana kwakarhuma rhwakola ebibihire.

Mwali-werhu muguma w’omu Alemanye oyirikirwe Cathy agendaga awaza mpu, ‘Nk’orhachilwireko, nta windi wakulwako.’ Aliko amango ayigaga kulangalira Yehova, oborherere bwage bwahindamuka. Aderhere intya: “Intachilonza okuchiholera, inanyunva obuhuru b’okujira byoshi n’obwirhonzi bulala imenyere oku Yehova ali abona bwinja buli chintu oku gulu na kandi nji abikola bwinja.” Akaba wachigerere kubonererwa, okukulikira olwiganyo lwa Yesu l’okulangalira  Yehova kwakurhabala ogenderere kuba mwirhonzi.

Yesu alikazize oku obwirhonzi buli bw’akamaro bwenene omu kuderha oku rhugwarhe obusime. Aderha: “Abasimire bali balala bachirhonda.” (Mt. 5:5) Lola gurhe obwirhonzi bwakarhabala omu hali zikulikireho.

Obwirhonzi bunamala obuhaka omu mulala. “Hali olusiku naderhaga binene bivunire mukani omurhima aliko eyi arhali kunalonzaga.” Mwene-werhu oyirikirwe Robert w’omu Ostrali yeli waderha. “Aliko ebinwa byerhu by’okuhahamuka rhwaderhaga omu bukali birhakachigalulwa. Nalichiyunvirhe kubi bwenene amango nabonaga gurhe namubabeze.”

“Rhweshi rhunagoma mango manene” omu binwa byerhu, n’ebinwa byerhu by’okuhahamuka byakavuruga omurhula g’obuhya bwerhu. (Yak. 3:2) Omu bihe bili nk’ebyola, obwirhonzi bwakarhurhabala rhurhuze n’okugala kurhanga kuzunguza olulimi omu bunu embere rhuderhe.​—Mez. 17:27.

Robert alilwisize bwenene okuderha oku agwarhe obwirhonzi n’okuchigala. Byaja byaba gurhe? Aderhere ntya: “Zene, eyi okurhayunvikana kwarhengerera, inanchihangana bwenene inyunvirize bwinja, inderhe n’obwirhonzi n’okurhayemera nagaya. Obwira bwani na mukani bwakwirire bwenene kulusha oku bwaliri.”

Obwirhonzi bunarhurhabala rhuyorhe bwinja n’abandi. Abantu barhalegama kugaya banazinda eyi barhachiherhe bera banene. Obwirhonzi bowe, bunarhurhabala “kugendereza . . . Obuguma omu chifundo ch’omurhula.” (Efe. 4:2, 3) Cathy, rhwarhangaga kuderha, ashambere: “Obwirhonzi bwantabere injire hofi buli nshimanano n’omuntu esimise bwenene, chiro akaba oku hali abantu biba bikomere okukola nabo.

Obwirhonzi bunalerha omurhula gwa ndani. Ebiblia enahira “obwengehe burhengerere enyanya” haguma n’omurhula. (Yak. 3:13, 17) Omwirhonzi ajira “omurhima gurhuzize.” (Mez. 14:30) Martin, walwisaga bwenene y’agwarha obwirhonzi aderhere ntya: “Nabere muntu orholikire bwenene intanachiwaza oku bihemere ebintu byoshi bibe nk’okunalisimire, n’eju y’echola nkala injira omurhula gwa ndani n’obusime.”

Kweri, hali oku byakarhuhema rhulwise bwenene yi rhugwarha obwirhonzi. Mwene-werhu muguma aderhere ntya: “Omukuderha okuli chiro na muzinola siku, hali okunanyunva echishika n’oburhe.” Aliko Yehova oli warhuhira m’omurhima rhuhigirire obwirhonzi, arhurhabala mw’ogula mulimo. (Isa. 41:10; 1 Ti. 6:11) Akagala ‘kumaliriza amazoezi merhu’; ‘Akarhuha emisi.’ (1 Pe. 5:10) Kuguma n’entumwa Paulo, enyuma w’esiku, rhwakayiganya “obwirhonzi n’obwinja bwa Kristu.”​—2 Ko. 10:1.