1. Bichi obulebi bwe Biblia burhumenyeseze?

BICHI esiku zayinjire hanola hofi zalerhera abantu ba Yehova? Birhali bya kushiba rhwafola. Obulebi bwe Biblia burhuyerekere ebintu by’engenzi bwenene byaba hanola hofi n’okurhuhumako rhweshi. Bulebi buguma mubo ahanene, burhurhabere okubona bichi amarhegesi makulu m’elila gulu nji majira. Eyola ngani eyandikirwe omu Danieli sura 11, eshambere eju ya bami babiri bahangene, n’abola bami bayirikirwe mwami w’enoro na mwami w’eside. Echigabi chinene ch’obola bulebi chamalire kuyenera, che chirhumire rhwakachizera oku echiyorhere kubo nacho chayenera.

2. Nk’oku biyerekenwe omu Mwanzo 3:15 n’omu Ufunuo 11:7; 12:17, bintu bihe by’akamaro bwenene rhukwanene rhuyibuke amango rhuli rhwayiga obulebi bwa Daniyeli?

² Yi rhuyunva obulebi buli omu Danieli sura 11, birhuhemere rhwanayibuka oku buderhere abami changwa abarhegesi balijirire echi bachimaza oku bantu ba Mungu. Echindi, chiro akaba oku abantu ba Mungu bali bageke bwenene omu kubahuranya n’abantu boshi bali oku gulu, aliko bowe babakanirwe n’abandi boshi. Aliko si, bichi birhumire abarhegesi b’elila gulu bahigirira abantu ba Mungu? Bulala Shetani haguma n’egulu lyage baherhe omuhigo guguma gukulu​—okusisibuliza balala bali bakolera Yehova na Yesu. (Osome Mwanzo 3:15 na Ufunuo 11:7; 12:17.) Echindi, obulebi buli omu Danieli bukwanene kubuganana n’amandi malebi me Biblia. K’okuderha oku rhwakahikira kuyunva obulebi buli omu Danieli omu kubuhuzanya n’ebindi bigabi by’Amandiko.

3. Bichi rhwaganira ko mu gunola mwazi n’omu gukulikireho?

 ³ Omu kuba rhuherhe amola mawazo omu bwenge, rhwashambala oku lwandiko lwa Danieli 11:25-39. Rhwabona inde waliri mwami w’enoro nande waliri mwami w’eside kurhangira omu mwaka gwa 1870 kugera omu 1991, kandi rhwabona bula gurhe rhuherhe empanvu z’okuhindamula okuntu rhwaliyunvirhe echila chigabi ch’obulebi. Omu mwazi gukulikireho, nji rhwashambala ku Danieli 11:40–12:1, n’okujira okuntu rhuyunve bwinja bichi echola chigabi ch’obulebi chirhuyigirize oku bikwanene bibe omu chihe cha kurhenga omu mwaka gwa 1991 kugera oku vita lye Armagedoni. Amango oli wayiga eyila myazi ebiri, okulola omuchoro “Bami Babiri Bahangene omu Chihe ch’Obuzinda” kwakakurhabala. Aliko ech’oburhanzi, bihemere rhurhange rhumenye abola bami babiri ba bande.

4. Bintu bihe bisharhu rhukwanene rhulole amango rhuli rhwalonza rhumenye omwami w’enoro n’omwami w’eside?

⁴ Amazino m’obukulu “mwami w’enoro” na “mwami w’eside” mahabwaga burhanzi oku marhegesi m’epolitike maliri engambo z’enoro n’engambo z’eside ye Izraeli. Chirhumire rhwaderha ntyo? Eju y’ebi malaika walerherega Danieli oburhumwa aderhaga: “Inyinjire kukubwira bichi nji byabera abantu bawe [abantu ba Mungu] omu siku zizinda.” (Da. 10:14) Kugera oku Pentekose y’omu mwaka 33 N.K.Y., eshanja lye Izraeli y’omubiri lyelyaliri shanja ly’abantu ba Mungu. Aliko kurhangirira ahola Yehova ayerekana oku abantu bayemerere Yesu, baliri abona oku b’abali bantu bage. K’okuderha, obulebi bunene buli omu Danieli 11 burhaderhere eshanja lye Izraeli s’ahubwe enkulikizi za Kristu. (Mdo. 2:1-4; Ro. 9:6-8; Gal. 6:15, 16) Kandi abaliri bamenyikana oku zino lya mwami w’enoro na mwami w’eside balemere bahindamuka oku esiku yi zagera. Chiro akaba ntyo, hali bintu biguma abola bami boshi baliri bazungulukako. Ech’oburhanzi, abola barhegesi baliri bakulikirana abantu ba Mungu balamire ahabali barhegeka omu bulyo bubonekene. Echa kabiri, echi baliri bakolera abantu ba Mungu chiyerekene oku bashombere Yehova, Mungu w’okuli. N’echa kasharhu, abola bami bombi baliri bahangana.

5. Rhwakaderha oku haliri omwami w’enoro n’omwami w’eside omu chihe cha kurhenga mwaka gwe 100 kugera omu mwaka gwa 1870 si? Ofasiriye.

⁵ Kugera mango maguma enyuma y’omwaka gwe 100, abakristu b’obubeshi banene bwenene baja omu bakristu b’okuli. Bahwanza kuyigiriza amawazo m’echidini m’obubeshi, na ntyo bahubya obukweri buli omu chinwa cha Mungu. Kurhangira echola chihe kugera omu mwaka gwa 1870, nta chigusho ch’olubaga chaliri chaharamya Mungu oku gulu. Omusihe gw’abakristu b’obubeshi gwashishagira n’okubisha abakristu b’obukweri. (Mt. 13:36-43) Bulagurhe echola chili chintu ch’akamaro rhukwanene rhumenye? Chiyerekene oku ebi rhunasoma kuyerekera omwami w’enoro n’omwami w’eside, birhakaba eyi bilolere abarhegesi baliri barhegeka kurhenga mwaka gwe 100 kugera mwaka gwa 1870; bulala nta chigusho chalipangirwe nka lubaga lwa Mungu bakarherere. * Aliko chiro akaba ntyo, siku zigeke enyuma w’omwaka gwa 1870, byakashubire kushobokana okumenya omwami w’enoro n’omwami w’eside. Nka gurhe byakaba ntyo?

6. Mango chi abantu ba Mungu bashubaga kuba chigusho chipangirwe omu lubaga? Ofasiriye.

 ⁶ Kurhangira mwaka gwa 1870 kugenderera, abantu ba Mungu bashuba kuhwanza kupangwa omu chigusho. M’ogola mwaka yi Charles Taze Russell n’abandi aliri akola nabo barhonderesaga echigusho ch’okuyiga Ebiblia. Mwene-werhu Russell n’abola bera bage aliri nabo, bakola nk’olala murhumwa waliri waba ‘wachesa enjira’ embere Obwami bwa Masiya buyime. (Mal. 3:1) Ahola kandi echigusho ch’abakozi ba Yehova bapangirwe omu lubaga chakashubire bonekana! Haliri oburhegesi bwalijirire echi bwajira oku bilolere akasi k’abakozi ba Mungu kandi si? Leka rhulole.

7. Kugera oku vita lirhanzi ly’egulu lyoshi, inde waliri mwami w’eside?

⁷ Omu mwaka gwa 1870, omwimo gwe Angletere gwava gwaganza bwenene kulusha amandi mami moshi oku gulu, yagwarha n’abasoda baherhe emisi loshi. Obola bwami bwalishushanyizwe n’akahembi katyuli kahimaga mandi mahembi masharhu. Akola kahembi katyuli kashushanyize angletere n’amola mandi mahembi masharhu mashushanyize​—Efrance, Espanye, ne Olande. (Da. 7:7, 8) Nantyo Angletere yaba eyi ye mwami w’eside kugera oku Vita lirhanzi ly’egulu. Mw’amola mango man’amola, États Unis ye Amérique yaba eyi y’egerere nka chihugo chirhanzi oku bukungu n’okuhwanza kuyunvikana bwenene n’Angletere.

8. Inde wabere mwami w’eside omu chihe ch’esiku z’obuzinda?

⁸ Omu mango m’evita lirhanzi ly’egulu, États Unis d’Amérique ne Angletere byachihira haguma nantyo byaba eyi bye bihugo biherhe emisi bwenene kulusha byoshi omu gulu. Nk’oku Daniyeli analebaga, oyula mwami agusha “abasoda kamama baherhe emisi bwenene.”  (Da. 11:25) Omu siku z’obuzinda, Endagano ye Angletere ne Amerique egenderere kuba mwami w’eside. * Inde si yewe ojire aba mwami w’enoro?

9. Mango chi omwami w’enoro ashubaga kurhengerera, na gurhe Danieli 11:25 yayeneraga?

⁹ Omu mwaka gwa 1871, omwaka gwakulikiraga ogu Russell n’ababo bakolaga mw’echigusho chabo ch’okuyiga Ebiblia, omwami w’enoro ashuba kurhengerera. Ogola mwaka Otto von Bismarck chaba chikoleso omu kushuba kuyimanza Obwami bwe Alemanye. Wilhelm I ava aba mwami w’oburhanzi w’obola Bwami, n’okushimika Bismarck nka mukulu murhanzi w’obola burhegesi. * Enyuma w’emyaka yakulikiragaho, Alemanye yagwarha emisi n’okuhira bihugo binene by’omu Afrika n’ebizimba by’omu nyanja nkulu ye Pasifike omu buja, n’okuhanza kulonza egwarhe emisi kulusha Angletere. (Osome Danieli 11:25.) Obwami bwe Alemanye bwachigushira abasoda banene bwenene n’okuba chihugo cha kabiri omu gulu chiherhe ebyombo n’abasoda b’okulwira omu menji. Amango m’evita lirhanzi ly’egulu lyoshi, Alemanye yashumuliza abola basoda bayo oku banzi babo boshi.

10. Gurhe obulebi bwa Danieli 11:25b, 26 bwayeneraga?

¹⁰ Kandi Daniyeli alibere aderha ebyakahikire Obwami bwe Alemanye n’abola basoda boshi bwachigushiraga. Obulebi bwaliderhere oku omwami w’enoro “arhakalegama.” Bulagurhe? “Bulala nji bamujir’enama. Na balala bali balya oku bununu bwage boshi banji banamuhenya.” (Da. 11:25b, 26a) Burhanzi omu siku za Daniyeli, abaliri balya “obununu bwa mwami” bahirirwe mw’abagingi boshi “baliri bakolera mwami.” (Da. 1:5) Inde obula bulebi bwaliderhere? Bwaliderhere abagingi bakulu b’omu bwami bwe Alemanye, bahirirwe mu babigorho ba mwami, abasoda, abahanuzi babo boshi. Ebi abola boshi bajiraga byarhuma mwami aheza oburhwali bwage, n’ahola obwindi buko b’oburhegesi bwahwanza omu Alemanye. * Obulebi burhaliderhere ebinji byabera obola bwami konyine, si n’ebyakabere bayusa kulwa n’omwami w’eside. Oku bilolere omwami w’enoro, obulebi bwaderha ntya: “Oku bilolere abasoda bage, nji bachibirwa hale, na banene nji bayirhwa.” (Da. 11:26b) Omu vita lirhanzi ly’egulu lyoshi, nk’oku byanabaga byaderherwe, abasoda be Alemanye “bachibirwa hale” n’abanene “bayirhwa.” Elyola vita lyahakanwa oku ly’abantu banene bwenene bafire mo omu ngani y’abantu yoshi kugera amola mango.

11. Bichi omwami w’enoro n’omwami w’eside balijirire?

¹¹ Omu kufasiriya ebyakayerekeze oku vita lirhanzi ly’egulu lyoshi, Danieli 11:27, 28 ederhere oku omwami w’enoro n’omwami w’eside “bakayikere ku meza maguma bali baderha obubeshi.” Kandi ntyo kubyanalibere. Alemanye ne Angletere babwirana mpu balonzeze omurhula, aliko ebyola binwa byabonekana oku bubeshi amango evita lyahwanzaga omu mwaka gwa 1914. Omu myaka yakulikiraga ho Alemanye yava yachira bwenene, chaba chihugo chakabiri oku bukungu omu gulu. Aliko omu kuyeneza obulebi buli omu Danieli 11:29 n’echigabi ch’oburhanzi ch’omustari gwa 30, Alemanye yalwisa omwami w’eside aliko yahimwa.

12. Omu mango m’evita lirhanzi ly’egulu lyoshi, bichi omwami w’enoro n’omwami w’eside balijirire?

¹² Kurhangira omu mwaka gwa 1914 na kugenderera, abola bami bombi bakuza omujinya gwabo ku bowe bonyine n’oku bantu ba Mungu bwenene. Omufano, omu vita lirhanzi ly’egulu lyoshi, Alemanye n’oburhegesi bwe Angletere, barhindibuza abakozi ba Mungu baliri balahira kurhola entwaro n’okuja omu vita. Oburhegesi bwe Etats Unis nabo bwakabula abaliri bayerekeza akasi k’okuhubiri omu pirizo. Okola kubarhindibuza ntyo, kwayeneza obulebi buli omu Ufunuo 11:7-10.

13. Enyuma y’omwaka gwa 1930 n’omu mango m’evita lya kabiri ly’egulu lyoshi, bichi omwami w’enoro alijirire?

¹³ Lero, enyuma y’omwaka gwa 1930 n’ahanene omu vita lya kabiri ly’egulu lyoshi, omwami w’enoro arhera abantu ba Mungu buzira bonjo. Amango echama ch’Abanazi charhonderaga kurhambula Alemanye, Hitler n’abantu bage, balahiza akasi k’abantu ba Mungu, bayirha hofi 1 500 omu bantu ba Yehova, barhuma n’amagana omu nkambi z’amateso. Ebyola byali byaderherwe na Daniyeli. Omwami w’enoro aliherhe obuhashe “b’okuzingisa ahachesibwa” “n’okukula h’enterekero y’okukahunda” ahanene omu kunyega abantu ba Mungu obuhuru b’okugenderera kusingiza Yehova oku mugaro-garo. (Da. 11:30b, 31a) Nantyo omurhambo wabo, Hitler, akana oku asisibuliza abantu ba Mungu boshi omu Alemanye.

14. Evita lya kabiri ly’egulu lyoshi limala kuhwa, inde wajaga waba mwami w’enoro? Ofasiriye.

¹⁴ Enyuma w’evita lya kabiri ly’egulu lyoshi, oburhegesi bw’echikoministe bwe Chinya-buguma che Soviyeti bwahwanza kurhegeka eneo yoshi Alemanye yalirhegekere, n’okuva chaba mwami w’enoro. Nk’oku oburhegesi bw’Abanazi bwachibandaga oku chifuba, Echinya-buguma che Soviyeti nacho chalibuza buli yeshi waliyerekene oku ahebere obuharamye bwa Mungu w’okuli oku nafasi y’oburhanzi omu kalamo kage.

15. Bichi omwami w’enoro alijirire evita lya kabiri lye gulu lyoshi liyusa kuhwa?

¹⁵ Oku evita lya kabiri lye gulu lyoshi lyanayusa kuhwa ntya, omwami muhyahya w’enoro, k’okuderha Echinya-buguma che Soviyeti n’abalimuli omu kuboko, ayerekana oku naye ali mulume omu kurhera abantu ba Mungu. Nko k’obulebi buyerekenwe omu Ufunuo 12:15-17, oyola mwami alahiza akasi kerhu k’okuhubiri anarhuma ebihumbi by’abantu ba Yehova byabunga. Nantyo, kurhangira oku murhondero gw’esiku zizinda, omwami w’enoro aligenderere kulibuza abantu ba Mungu buli mango, aliko arhagwarhaga obuhashe b’okuyumanza akasi kabo. *

16. Gurhe Echinya-buguma che Soviyeti chayenezaga obulebi buli omu Danieli 11:37-39?

¹⁶ Osome Danieli 11:37-39. Omu kuyeneza obola bulebi, omwami w’enoro arhakayerekere “Mungu wa b’eshe” obukenge chiro haba n’ehityu. Nka gurhe afundaga yerekana obukenge? Echinya-buguma che Soviyeti chahigirira okusisibuliza edini, chapima-pima okumaliriza emisi y’emigenzo ebigusho by’echidini yaliherhe. Y’oburhegesi bwe Soviyeti buhikira ogola muhigo, omu mwaka gwa 1918 bwarhonderesa erhegeko ly’okuyigiriza oku masomo oku Mungu arhaba ho. Gurhe oyola mwami w’enoro “ahaga mungu w’ebisenge [ngome] obukuze?” Echinya-buguma che Soviyeti chakolesa furanga zinene omu kukomeza oburungu bwacho n’okukola ebihumbi by’amabombe nikleyere yi  chikomeza oburhegesi bwacho. Omwami w’enoro n’omwami w’eside bombi haguma baluha bagwarha amabombe maherhe misi minene makagala kuyirha emiliyoni y’abantu.

17. Chintu chihe “chishologwese ch’okulerha entambule”?

¹⁷ Omwami w’enoro alikolere haguma n’omwami w’eside omu kujira echintu ch’akamaro bwenene. “Barhonderesa echintu chishologwese ch’okulerha entambule.” (Da. 11:31) Echola “chintu chishologwese” chili Chinya-buguma ch’Amashanja.

18. Bulagurhe Echinya-buguma ch’Amashanja chiderherwe oku chili “chintu chishologwese”?

¹⁸ Olubaga lw’Echinya-buguma ch’Amashanja (ONU) lumenyikene nka “chintu chishologwese” bulala lunachihala oku luherhe obuhashe b’okukola echintu oburhali Bwami bwa Mungu bonyine burhakagala kukola; k’okuderha okulerha omurhula oku gulu. N’obulebi buderhe oku echintu chishologwese chili “cha kulerha entambule”, bulala Echinya-buguma ch’Amashanja chi nji chaba embere omu kurhera n’okuharabisa amadini moshi m’obubeshi.​—Olole omuchoro “Bami Babiri Bahangene omu Chihe ch’Obuzinda.”

19-20. a) Bulagurhe rhukenere okumenya eyila ngani? b) Chibazo chihe nji rhwashubizako omu mwazi gukulikire ho?

¹⁹ Rhukenere okumenya eyila ngani, bulala eyerekene oku kurhenga omu mwaka gwa 1870 kugera 1990, obulebi bwa Daniyeli bulolere omwami w’enoro n’omwami w’eside bwaliyenere mw’amola mango. Na ntyo, rhwakagwarha obwemere oku echigabi chiyorhere ch’obola bulebi nji chayenera nacho.

²⁰ Omu mwaka gwa 1991, Echinya-buguma che Soviyeti chahena. Sasa si, inde oli mwami w’enoro mu zinola siku? Omwazi gukulikire ho nji gwashubiza kw’echola chibazo.