1-2. Nk’oku biyerekenwe omu Zaburi 40:5, mpembo zihe Yehova arhuhere, na bichi rhwaganira ko mu gunola mwazi?

YEHOVA ali Mungu ohana bwenene. Ba nka wawaza ku ziguma omu mpembo arhuhere: ahamwerhu hakwirire, egulu; obonko bwerhu bukolerwe omu bulyo busomeze; n’Echinwa chage ch’akamaro bwenene, Ebiblia. Kugerera ezila mpembo esharhu, Yehova arhuhere ahantu h’okulama, arhuhere obuhashe b’okuwaza n’okuganira, kandi ashubize ku bibazo binene rhwakachibaza.​—Osome Zaburi 40:5.

² Mu gunola mwazi rhwaganira oku bugeke eju y’ezola mpembo esharhu. Oku rhuli rhwaziwaza ko, ku rhwanasimiswa nazo, ku n’enyorha yerhu y’okusimisa Omulemi werhu w’obuzigire Yehova yaluga. (Ufu. 4:11) Rhwashuba kugwarha bushiru bunene b’okurhabala balala bashumikirwe n’enyigirizo y’obubeshi y’empindamuko.

3. Nkagurhe egulu lili tofauti n’ezindi planete?

³ Obwengehe bwa Mungu bubonekana wazi kugerera obulyo ajirire ahamwerhu, egulu. (Ro. 1:20; Ebr. 3:4) Arhali mpu yonyine y’eplanete ezunguluka oku zuba, s’aliko egulu lisomeze bulala liyeneze byoshi bihemerwe omu kugendereza akalamo k’abantu.

4. Bulagurhe rhwakaderha oku egulu lili linja kulusha ebote ekolerwe n’omuntu?

⁴ Mu njira ziguma, egulu omu chalege lili kuguma n’ebote eliyagera omu nyanja nene egalihire. S’aliko hali etofauti nene eli ahakagarhi k’ebote yoshi-yoshi yakolwaga n’omuntu eyunjwire bantu, n’egulu lyerhu. Omufano; kasanzi kangana chi abali omu bote nya bote bakamala nka bonyine babali bachiha omuka g’okuyisa, ebilyo, n’amenji na nka barhalemere bakula obuchafu?  Abantu bali mw’eyola bote barhakalegama kufa. Tofauti n’echola, egulu lyowe lili lyarhabala omu kugendereza akalamo k’emiliyoni y’ebilemwa. Linarhengereza omuka goshi rhunayisa, ebilyo, n’amenji rhukenere, n’ebyola bintu birhabulwa. Ntaho obuchafu bwalyo bukabulwa; chiro akaba ntyo, egulu ligenderere kukwira n’okuba malamiro menja. Gurhe bigalikene ntyo? Yehova alemere egulu omu kuntu obuchafu bwakahinduka n’okuba chintu ch’akachiro chakashuba kukoleswa. Rhwaganira gurhe rhwakabona obwengehe bwa Yehova oku bilolere omugenderano g’omuka g’okuyisa n’omugenderano gw’amenji.

5. Omugenderano g’omuka g’okuyisa che chichi, na bichi gupatene na cho?

⁵ Omuka g’okuyisa eli gaze ekoleswa na bintu biguma-biguma bilamire, kurhuheba ho nerhu. Bibonekene oku ebilemwa bilamire binayisa am’amamiliyoni m’amatoni m’omuka mu mwaka muguma. Ebyola bilemwa byen’ebyola binageza egaze [omuka guzingire] eyirikwa dioxyde de carbone. Chiro akaba ntyo, ebilemwa bilamire birhakamala omuka goshi g’okuyisa, na nta lusiku ehewa yahuba “n’obuchafu” bw’egaze, [dioxyde de carbone]. Bulagurhe? Bulala Yehova ashubire kulema embero zinene z’emirhi kurhenga oku mizibu-zibu kugera oku mityunguni yakagala kuhindula ogola muka guzingire [dioxyde de carbone] m’omuka g’okuyisa. Mu njira zinene, omugenderano g’omuka g’okuyisa gupatene bwinja n’ebinwa bili omu Matendo 17:24, 25 biderhere ntya: “Mungu . . . anaha abantu boshi akalamo n’omuka.”

6. Omugenderano gw’amenji che chichi, na bichi guyerekene? (Olole n’echisanduku “ Oluhembo lwa Yehova l’Omugenderano gw’Amenji.”)

⁶ Amenji manasuka, mabonekene oku gulu bulala eplanete yerhu eheberwe oku bule bukwanene n’ezuba. Nk’egulu lyayegeraga ezuba hityu kurhenga ahaliba, amenji moshi makakamukire, echola chakarhumire egulu lyadagarha kukabya na nta kalamo kakabonekene ko. Kandi, nk’egulu lyaliri hale bwenene hindi hityu busha n’ezuba, amenji moshi makanagire n’okuhindula egulu mw’echibumbuli chizibu-zibu ch’olubula. Bulala Yehova ahebere egulu ahola hantu hakwanene, omugenderano gw’amenji moshi m’oku gulu gwakagendereza akalamo. Ezuba linadagasya amenji m’omu nyanja zizibu-zibu [océan] n’am’omu charagati ch’egulu, n’amola menji manayehuka n’okuja kuhinduka bichu. Buli mwaka, ezuba linayehula hofi bilometere kibe 500 000 by’amenji. Amola menji manamala siku 10 omu chalege embere marhoge nka nvula changwa nka lubula. Amenji manaluha manashuba kuhwera omu nyanja zizibu-zibu n’omu zindi mbero z’enyinji, n’ahola omugenderano gwanashuba kuhwanza. Ogola mugenderano gunajirika oku kahunda, guyerekene oku Yehova ayengehere anagwerhe emisi.​—Yobu 36:27, 28; Muh. 1:7.

7. Njira zichi rhwakayerekana mo oku rhuherhe eshukurani oku luhembo luyerekenwe omu Zaburi 115:16?

⁷ Gurhe rhwakakuza eshukurani kuyerekera eplanente yerhu esomeze n’ebintu binja biyili mo? (Osome Zaburi 115:16.) Enjira nguma, kuli kuwaza bwenene oku bintu Yehova ajirire. Echola charhuma rhwalema rhwabwira Yehova koko buli lusiku oku bintu binja arhuhere. Kandi rhunayerekana oku rhusimisizwe n’egulu, omu kuchesa ehyerhu higabi higeke hyalyo rhulamire ko.

8. Bulagurhe rhwakaderha oku obonko bwerhu bwajirirwe omu bulyo busomeze?

⁸ Obonko bw’omuntu bwajirirwe omu bulyo busomeze. Amango waliri omu nda ya nyoko, obonko bwawe bwaliri bwakula nk’oku bwanapangirwe bukwanene bukule, n’amagana m’eselile zihyahya z’obonko zaliri zakolwa buli muniti! Abalolerezi banagerereza oku obonko b’omuntu mukulu buherhe miliyoni 100 by’amaselile  maminuzize mayirikirwe nerone. Ezola selile zigushirwe bwinja omu chirhu chakapima chilo 1 n’echichira (1,5 kg). Jaga walola buhashe buguma-buguma busomeze b’obonko.

9. Bichi biyerekene oku obuhashe b’okuderha luli luhembo lurhengerere emwa Mungu?

⁹ Obuhashe bwerhu b’okuderha chili chisomerene. Ba nka wawaza oku binajirika amango rhuli rhwaderha. Oku bilolere buli mwazi goshi onaderha, obonko bukwanene burhegeke okuchishaganya kwa misi (muscles) 100 y’olulimi, y’egosi, y’obunu, y’emishaya n’ey’echifuba. Eyola misi yoshi enachishaganya omu kasanzi kakwanene omu kuchiyemeza akaba omwazi gwayunvikana bwinja. Oku bilolere obuhashe b’okuderha endimi, omwazi gwachapiswaga omu mwaka gwa 2019 gwaliyerekene oku omwana wachiyusa burhwa, akagala kuchishoga yenyine ebinwa. Ogola mwazi gupatene n’ebi abalolerezi banene bayemerere; k’okuderha oku rhunaburhwa n’obuhashe b’okurhegera n’okuyiga endimi. Okuderha okuli, obuhashe bwerhu b’okuderha luli luhembo lurhengerere emwa Mungu.​—Kut. 4:11.

10. Gurhe rhwakayerekana eshukurani yerhu oku luhembo lwa Mungu l’okuderha?

¹⁰ Enjira nguma rhwakayerekana mo oku rhuherhe eshukurani oku luhembo l’okuderha, kuli kufasiriya obwemere bwerhu mu Mungu ku balala banachibaza bulagurhe rhurhayemera enyigirizo y’empindamuko [mageuzi]. (Zb. 9:1; 1 Pe. 3:15) Balala banayigiriza ntyo, banaderha oku egulu n’akalamo kali mo, birhalemwaga. Nka rhukoleseze Ebiblia na ziguma omu nyibuso rhwaganirire ko mu gunola mwazi, rhwakagala kuderhera Darha w’embingu n’okufasiriya balala bali tayari kuyunviriza bulagurhe rhuyemerere oku Yehova ali mulemi w’embingu n’egulu.​—Zb. 102:25; Isa. 40:25, 26.

11. Bichi biguma biyerekene oku obonko bwerhu busomeze?

¹¹ Obuhashe bwerhu b’okuyibuka busomeze. Omu chihe cha mira, mwandisi muguma aliderhere oku obonko bw’omuntu bugwerhe obuhashe b’okuyibuka emyazi yakayunjuza hofi bitabu miliyoni 20 (20 000 000). Bunola, bibonekene oku obuhashe b’obwenge bwerhu bwalugire, k’okuderha oku rhukala rhwakayibuka binene kulusha. Kugerera obonko bwerhu, buhashe buhe buminuzize rhuherhe?

12. Gurhe obuhashe b’okuyiga esomo ly’obwenge omu kalamo, burhutofautisize n’enyama?

¹² Mu byoshi byalemerwe oku gulu, abantu bonyine babaherhe obuhashe b’okuyiga esomo ly’obwenge omu kuyibuka n’okugerereza ebyagerere. Kugerera echola, rhwakayiga bwinja amarhegeko n’okuhindamula obulyo bwerhu b’okuwaza n’okulama. (1 Ko. 6:9-11; Kol. 3:9, 10) Nantyo, rhwakakomeza ezamiri yerhu kumenya etofauti eli ahakagarhi k’echinja n’echibi. (Ebr. 5:14) Rhwakayiga kuyerekana obuzigire, obonjo n’olukogo. Kandi rhwakagala kuyiganya okunali kwa Yehova.

13. Omukuwaza oku binwa bili omu Zaburi 77:11, 12, gurhe rhukwanene kukolesa oluhembo lwerhu l’obonko?

 ¹³ Njira nguma rhwakayerekana mo oku rhuherhe eshukurani oku luhembo l’obonko, kuli kuchihangana kuyibuka akasanzi koshi Yehova arhurhabere mo n’okurhurhuliriza omu siku zagerere. Echola chakomeza obunihire bwerhu oku nj’ashuba kurhurhabala omu siku zayinja. (Osome Zaburi 77:11, 12; 78:4, 7) Eyindi njira, kuli kuyibuka ebintu binja abandi bantu banarhukolera n’okugwarha eshukurani ku byoshi banarhujirira. Abalolerezi bavumbwire oku abantu b’eshukurani banagenderera kugwarha obusime. Rhunashuba kujira bwinja omu kuyiganya okuntu Yehova anachishoga ebintu by’okuyibagira. Omufano, Yehova aherhe obwenge bushinganene, s’aliko nka rhwahungamire, anabona oku arhubabalire n’okuyibagira amagosa rhwajiraga. (Zb. 25:7; 130:3, 4) Alonzeze rhukolere abandi okola kon’okola amango bababere n’amagosa bajiraga marhugayisize.​—Mt. 6:14; Lu. 17:3, 4.

14. Gurhe rhwakayerekana eshukurani oku luhembo lwinja l’obonko bwerhu?

¹⁴ Rhwakayerekana eshukurani oku luhembo lwinja l’obonko bwerhu, nka rhubukoleseze omu kukenga Owarhuhaga lo. Baguma banabona oku bakolesa obonko bwabo omu kuchihebera h’amarhegeko m’okuchishoga echinja n’echibi. S’aliko bulala Yehova arhulemere, kuli kwinja okuyemera konyine oku amarhegeko mage mamenja kulusha amarhwakachihebera ho. (Ro. 12:1, 2) Nka rhukulikize amarhegeko mage, rhwagwarha omurhula omu kalamo. (Isa. 48:17, 18) Kandi rhwamenya bwinja ebihemerwe omu kalamo yi rhuyerekana oku rhukengere Omulemi werhu na Darha n’okurhuma achishinga eju yerhu.​—Prov. 27:11.

15. Gurhe oluhembo lwe Biblia luyerekene obuzigire bwa Yehova oku bantu ba buli lubero?

¹⁵ Ebiblia luli luhembo l’obuzigire lurhengerere emwa Mungu. Darha w’embingu ayerekezaga abantu bayiyandike bulala anarhuzigira bwenene. Kugerera Ebiblia, Yehova anashubiza  oku bibazo by’akamaro bwenene rhunachibaza, nka: Ngahe rhwarhengaga? Akalamo kaherhe muhigo guchi? Na bichi nji byaba omu siku zayinja? Yehova alonzeze buli mwana wage yeshi abone ebishubizo kw’ebila bibazo, n’oku emyaka eli yagenderera kugera, ali aongoza abantu batafusiri Ebiblia mu ndimi zinene. Zene, Ebiblia yoshi changwa ebigabi byayo, bibonekene mu ndimi zirhalwise 3 000! Omu ngani y’abantu, Ebiblia chonyine chitabu chitafusiribwe n’okugabwa bwenene omu gulu. Chiro akaba ah’abantu balamire changwa olulimi banaderha, banene baherhe obushobozi b’okuyiga oburhumwa bwe Biblia omu lulimi lwabo lw’akaburhano.​—Olole echisanduku “ Okujira Ebiblia Ebonekane omu Ndimi ze Afrika.”

16. Nk’oku olwandiko lwa Matayo 28:19, 20 luderhere, gurhe rhwakayerekana oku rhusimisizwe ne Biblia?

¹⁶ Rhwakayerekana oku rhusimisizwe ne Biblia omu kuyisoma buli lusiku, omu kuwaza oku by’erhuyigirize, n’omu kujira okurhugalire koshi yirhukolesa ebi rhuli rhwayiga. Omu kuyongera, rhunayerekana eshukurani yerhu ku Mungu omu kujira okurhwakagala koshi yirhubwira abantu oku bye Biblia ederhere.​—Zb. 1:1-3; Mt. 24:14; osome Matayo 28:19, 20.

17. Mpembo nyabachi rhwaganirire ko mu gunola mwazi, na bichi nji byaganirirwa omu mwazi gukulikire ho?

¹⁷ Kugera hanola, rhwabwene empembo Yehova arhuhere; nka: ahamwerhu, k’okuderha egulu; obonko bwerhu bukolerwe omu kuntu kusomeze; n’Echinwa chayerekezwaga na Mungu, Ebiblia. Aliko, hali ezindi mpembo Yehova arhuhere zirhakabonekana ko n’amasu merhu. Obola buhirhi burhakabonekana ko nji bwaganirirwa omu mwazi gukulikire ho.