1. Bichi Yesu aliderhere oku bilolere obuhirhi b’omu mbingu?

ARHALI obuhirhi boshi b’obwakabonekana ko. S’ahubwe, obuhirhi buherhe akachiro kanene bwenene burhabonekana ko. Oku mahubiri mage m’oku Musozi, Yesu aliderhere eju y’obuhirhi bw’embingu buherhe akachiro kanene bwenene kulusha obukungu bwerhu. Na ntyo ayongera obula bukweri: “Ah’obuhirhi bwawe buli, han’omurhima gwawe nago gwaba.” (Mt. 6:19-21) Omurhima gwerhu gwarhushunika rhukulikiranye ebintu birhusimisize, changwa by’akachiro bwenene. Rhunachihakira “obuhirhi omu mbingu” omu kugwarha erenge likwirire, changwa omu kubera haguma na Mungu. Oku bilolere obola buhirhi, Yesu alifasiriye oku burhakaharabiswa changwa kuyibwa.

2. a) Nk’oku olwandiko lwa 2 Wakorinto 4:17, 18 luderhere, bichi Paulo alirhuhebere omurhima rhuchiseze ko? b) Bichi rhwaganirira mu gunola mwazi?

² Entumwa Paulo erhuhebere omurhima “rhuseze amasu merhu . . . oku bintu birhakabonekana ko.” (Osome 2 Wakorinto 4:17, 18.) Ebyola bintu birhakabonekana ko buli buhirhi buheberwe mw’emigisho nji rhwasimira omu gulu lihyahya. Mu gunola mwazi, rhwaganirira buhirhi bune (4) burhabonekana ko rhwakayunguka nabo kurhangira zene; k’okuderha, obwira haguma na Mungu, oluhembo lw’esala, oburhabale bw’eroho lichesibwa lya Mungu, n’oburhabale burhengerere embingu omu kasi kerhu k’okuhubiri. Rhwashuba kubona gurhe rhwakayerekana oku rhusimisizwe n’obola buhirhi burhakabonekana ko.

3. Buhirhi buhe buherhe akachiro bwenene, na gurhe byakagalikana yi rhubupata?

³ Obuhirhi burhabonekana ko buherhe akachiro bwenene, buli  bwira haguma na Yehova. (Zb. 25:14) Gurhe byakagalikana oku Mungu ajire obwira haguma n’abantu barhashinganene anagenderere kubera muchesibwa? Akajira ntyo bulala enterekero y’enchungu ya Yesu “yamalire ebyaha oku gulu lyoshi” by’abantu ba buli lubero. (Yoh. 1:29) Chiro n’embere Yesu afe, Yehova abaga amenyere oku Yesu akayorhere mwimana kugera okufa kwage na ntyo akachungwire abantu ba buli lubero. Echola che chakarhumire Yehova aba mwira w’abantu balilamire embere y’okufa kwa Kristu.​—Ro. 3:25.

4. Lerha omufano gw’abantu balilamire embere ya Kristu baliri bera ba Mungu.

⁴ Waza oku bantu balilamire embere ya Kristu baliri bera ba Yehova. Abrahamu aliri mulume waliyerekene obwimana bukomere. Myaka erhalwise 1 000 yahwere Abrahamu amalire kufa, Yehova amuyirika “mwira wani.” (Isa. 41:8) Kumbe, chiro n’olufu lurhakahemula Yehova oku bera bage. Abrahamu ayibukirwe omu bwenge bwa Yehova. (Lu. 20:37, 38) Ogwindi mufano guli gwa Yubu. Amango habaga embuganano ya bamalayika boshi omu mbingu, Yehova aganira oku bwizere eju ya Yubu. Yehova amuyirika “ muntu mwinja na mwimana, oyubaha Mungu n’olekana n’amabi.” (Yob. 1:6-8) Gurhe si Yehova aliri achiyunva oku bilolere Danieli, waliri akolera Mungu oku bwimana omu chihugo ch’abapagani mu myaka 80 ntya? Bamalayika baliyemezeze oyola mulume oshajire mu turu esharhu oku “asimirwe bwenene” emwa Mungu. (Da. 9:23; 10:11, 19) Rhwakayemera bwinja-bwinja oku Yehova ali alingiriza olusiku nj’afula mw’abera bage bazigirwa bafire.​—Yob. 14:15.

5. Bichi bihemerwe y’omuntu asimira obwira bwa hofi-hofi haguma na Yehova?

⁵ Gurhe bantu banene mu zinola siku yibasimira obwira bwa hofi-hofi haguma na Yehova? Zene, hali emiliyoni y’abantu bali bera ba hofi-hofi haguma na Yehova. Rhumenyere ntyo bulala balume banene, abakazi, n’abana oku gulu lyoshi bali bayerekana kugerera oborhere bwabo oku balonzeze babe bera ba Mungu. Yehova “anajira obwira bwa hofi-hofi haguma n’abenja.” (Mez. 3:32) Bigalikene okugwarha obola bwira kugerera obwimana baherhe omu nterekero y’enchungu ya Yesu. Kugerera eyola nchungu, Yehova ayemerere oku bushagaluke rhuchihane emwage n’okubatizwa. Amango rhwamarhola eyila ntambu y’akamaro, rhwanaba baguma b’omu mamiliyoni m’abakiristu bachihanire n’okubatizwa bali basimira “obwira bwa hofi-hofi” haguma n’Omuntu mukulu bwenene omu mahanga moshi!

6. Gurhe rhwakayerekana eshukurani yerhu oku bwira haguma na Mungu?

⁶ Gurhe rhwakayerekana oku rhusimisizwe n’obwira haguma na Mungu? Kuguma na Abrahamu na Yubu, baligenderere kubera bimana embere za Mungu mu myaka erhalwise 100, rhwakayorha bimana, chiro akaba obule bw’emyaka rhwakolere Yehova mu linola egulu libihire. Kuguma na Danieli, rhwakabona obwira bwerhu haguma na Mungu oku buli bw’akamaro bwenene kulusha akalamo kerhu. (Da. 6:7, 10, 16, 22) Kugerera oburhabale bwa Yehova, rhwakalembera ebibazo rhwahurana nabyo nantyo rhwanagendereza obwira bwerhu bukomere haguma naye.​—Flp. 4:13.

7. a) Nk’oku biyerekenenwe omu Mezali 15:8, gurhe Yehova anachiyunva oku bilolere amasala merhu? b) Gurhe Yehova anashubiza oku masala merhu?

⁷ Esala, buli bwindi buhirhi burhakabonekana ko. Abera ba hofi-hofi banasima kubwirana amawazo mabo n’okuntu bali bachiyunva. Intyo ku n’obwira huguma na Yehova bunali si? Nechi da! Yehova anaganira nerhu kugerera Echinwa chage, n’okurhufunulira amawazo mage n’okuntu ali achiyunva. Rhunaganira naye omu sala, rhwakanabwirana naye amawazo merhu ma ndani n’okuntu rhunazigana kuchiyunva. Yehova achiyunva bwinja eyi  ashubiza oku masala merhu. (Osome Mezali 15:8.) Yewe nka Mwira muzigirwa, Yehova arhafachakuyunviriza amasala merhu konyine, s’ahubwe anamashubiza ko. Hali amango echishubizo chinayinja juba-juba. Omu kandi kasanzi, byakarhuhema rhugenderere kusalira. Kandi, rhwakanihira oku echishubizo chayinja omu kasanzi n’omu njira ekwanene. Kweri, Mungu akarhushubiza omu kuntu kurhali nk’okurhwaliwazize. Omufano, ahali h’okumala echibazo, akarhuha obwengehe n’emisi “y’okuchilembera.”​—1 Ko. 10:13.

8. Gurhe rhwakayerekana eshukurani yerhu oku luhembo lw’esala?

⁸ Gurhe rhwakayerekana eshukurani yerhu k’olola luhembo lw’akachiro lw’esala? Enjira nguma kuli kukenga erhegeko lya Yehova “ly’okugenderera kusalira.” (1 Te. 5:17) Yehova arhakarhuheba mw’akamba rhusalire. Ahali h’okujira ntyo, anakenga obuhuru bwerhu n’okurhuheba omurhima “rhugenderere omu sala.” (Ro. 12:12) Na ntyo, rhwakayerekana eshukurani yerhu omu kusalira oku kahunda buli lusiku. Berhu we, rhukwanene okuheba emyazi y’okusima n’okuharamya Yehova omu masala merhu.​—Zb. 145:2, 3.

9. Gurhe mwene-werhu muguma achiyunvaga oku bilolere esala, na gurhe nawe onachiyunva eju yalyo?

⁹ Oku rhuli rhwagenderera kukolera Yehova n’okuchibonera enjira anashubiza mw’amasala merhu, ku n’omurhumambo g’okuyerekana eshukurani yerhu oku luhembo lw’esala gwanaluga. Rhola omufano; Chris, mwene-werhu waliri omu kasi k’ebisanzi by’oshi myaka 47, aderhere ntya: “Binasimisa bwenene okugwarha akasanzi k’emiseke k’okuganira na Yehova omu sala. Kweri, bihebere emisi bwenene okuganira na Yehova eyi ezuba lirhengerera n’okuhanza kuyumya olume n’okukwiza ebintu byoshi!” Echola chinanshunika imusime oku mpembo zage zoshi, kuheba han’olukengwa lw’esala. Kandi, enyuma y’okusalira oku buzinda b’olusiku, buli busime bungana gurhe b’okuja kulyama n’entimanya echere!”

10. Bulagurhe rhukwanene kusimiswa n’eroho lichesibwa lya Mungu?

¹⁰ Emisi Mungu akolesa, luli lwindi luhembo  lurhakabonekana ko rhukwanene kusimiswa nalo. Yesu alirhuhebere omurhima rhugendere kuhema eroho lichesibwa. (Lu. 11:9, 13) Kugerera eroho lyage lichesibwa, Yehova anarhuha “emisi erhalwise olugero.” (2 Ko. 4:7; Mdo. 1:8) Rhwakalembera buli chibazo rhwahurana nacho kugerera oburhabale bw’eroho lichesibwa lya Mungu.

11. Mu njira nchi eroho lichesibwa lyakarhurhabala mo?

¹¹ Eroho lichesibwa lyakarhurhabala yirhugala kukola akasi rhwahabirwe omu kasi ka Mungu. Eroho lya Mungu lyakarhurhabala rhugale kukolesa bwinja empano n’obuhashe bwerhu. Rhumenyere bwinja oku amalehe menja rhunapata omu kasi ka Mungu marharhengerere oku misi yerhu rhwenyine, s’ahubwe bulala eroho lichesibwa linarhurhabala.

12. Nk’oku olwandiko lwa Zaburi 139:23, 24 luderhere, rhwakasalira eroho lichesibwa lirhurhabale rhugale kukola bichi?

¹² Eyindi njira rhwakayekana mo oku rhubwene eroho lichesibwa lya Mungu oku lirhuherhere akamaro, kuli kuhema Yehova arhurhabale rhugale kumenyerera buli mawazo changwa enyifinjo zibi zili omu murhima gwerhu. (Osome Zaburi 139:23, 24.) Nka rhusalirire ntyo, kugerera eroho lyage lichesibwa, Yehova akarhujira rhumenyerere amawazo changwa enyifinjo zerhu zibi. Na nka rhwamamenyerera amawazo changwa enyifinjo zibi rhuherhe, rhukwanene rhusalire eroho lya Mungu lirhuhe emisi y’okuhima amola mawazo changwa enyifinjo zibi. Nka rhujirire ntyo, Yehova abona oku kweri rhurhalonzeze kujira echintu chakarhuma aleka kurhurhabala n’eroho lyage lichesibwa.​—Efe. 4:30.

13. Gurhe rhwakakuza eshukurani yerhu oku roho lichesibwa?

¹³ Rhwakakuza eshukurani yerhu oku roho lichesibwa omu kukengera oku by’elyola roho lili lyakola omu siku zerhu. Embere Yesu agaluke embingu, abwira abanafunzi bage ntya: “Nji mwapata emisi amango eroho lichesibwa nji lyabayandagalira, nji mwanaba bahamirizi bani . . . kugera omu ntambi za hale bwenene z’egulu.” (Mdo. 1:8) Ebila binwa yibyayenera omu bulyo busomeze. Kugerera oburhabale bw’eroho lichesibwa, hofi miliyoni munane n’enusu y’abaharamye ba Yehova egushirhwe  kurhenga omu ntambi zoshi z’egulu. Kandi, yirhwasimira eparadizo y’ekiroho bulala eroho lya Mungu lili lyarhurhabala rhuyerekane engeso zinja nk’obuzigire, obusime, omurhula, okulembera, olukogo, obwinja b’omurhima, obwemere, obwirhonzi, n’okuchigala.” (Gal. 5:22, 23) Eroho lichesibwa luli luhembo lwinja bwenene berhu!

14. Burhabale buchi rhuherhe burhakabonekana ko amango rhuli omu mahubiri?

¹⁴ Rhuherhe obwindi buhirhi burhakabonekana ko “bw’okukola haguma” na Yehova n’echigabi ch’embingu ch’olubaga lwage. (2 Ko. 6:1) Rhunajira ntyo amango moshi rhuli omu kasi k’okujira abanafunzi. Paulo aliderhere ntya eju yage n’eju ya balala banakola kw’akala kasi: “Rhuli bakozi haguma na Mungu.” (1 Ko. 3:9) Amango rhuli omu kasi k’amahubiri, rhwanaba nerhu bakozi haguma na Yesu. Oyibuke oku achimala kuha abanafunzi bage erhegeko “ly’okujira abanafunzi kurhenga omu bantu b’amashanja moshi,” Yesu aderha ntya: “Indi haguma nenyu.” (Mt. 28:19, 20) Gurhe si bili oku bilolere bamalayika? Kweri, eli migisho minene okukola ahaburhambi bwa ba malayika amango “rhuli rhwamenyesa emyazi minja y’esiku n’amango . . . ku balala balamire oku gulu”!​—Ufu. 14:6.

15. Lerha omufano gwe Biblia guyerekene echi Yehova amalire omu mahubiri.

¹⁵ Kugerera obola burhabale bw’embingu, bichi bili byayenera? Bulala rhuli rhwarhwera oburhumwa b’Obwami, mburho ziguma yizarhogera omu mirhima eli tayari n’okukula. (Mt. 13:18, 23) Inde oli warhuma ezola mburho z’okuli zakula n’okuba malehe mayerere? Yesu alifasiriye oku nta muntu wakaja emunda ali “buzira kukululwa . . . n’Eshe.” (Yoh. 6:44) Ebiblia erhuhere omufano guli wazi g’okujira ntyo. Yibuka ebyabaga amango Paulo aliri aha echigusho ch’abakazi obuhamirizi embuga w’evile ye Filipi. Lola ebi Ebiblia ederhere eju ya muguma wabo, omukazi oyirikirwe Lidiya: “Yehova afungula wazi omurhima gwage ayunvirize bwinja byoshi Paulo aliri aderha.” (Mdo. 16:13-15) Kuguma na Lidiya, amamiliyoni m’abandi bakulwire na Yehova.

16. Inde okwanene kuhabwa erenge ly’amalehe menja rhunapata omu mahubiri?

¹⁶ Inde okwanene ahabwe erenge nka rhwapatire amalehe menja omu mahubiri? Paulo alishubize echola chibazo amango ayandikiraga echibaga che Korinto ebila binwa: “Nyono nabyere, Apolo amimira, s’aliko Mungu agenderera kuyikuza, nantyo, owabyalaga ntacho amalire changwa owamimiraga, si Mungu wakuzaga.” (1 Ko. 3:6, 7) Kuguma na Paulo, buli lusiku rhukwanene kuha Yehova erenge oku malehe menja rhwapatire omu mahubiri.

17. Gurhe rhwakayerekana oku rhusimisizwe “n’okukola haguma” na Mungu, Kristu, na bamalayika?

¹⁷ Gurhe rhwakayerekana eshukurani yerhu oku lukengo rhuherhe “l’okukola haguma” na Mungu, Kristu, na bamalayika? Rhwakajira ntyo omu kujira okwerhu koshi rhugalire yirhubwira abandi oku myazi minja y’Obwami. Hali njira zinene z’okujira ntyo, nk’okuhubiri “efasi z’abantu banene na nju oku nju.” (Mdo. 20:20) Banene nabo banasimira amahubiri m’okuganira n’eyi babuganire omu njira. Amango bamabugana omuntu, banamulamusa n’obushagaluke n’okupima kuhwanza ganira naye. Nk’omuntu ayerekene oku ali tayari kuganira, banarhondera kushambala eju y’oburhumwa b’Obwami oku bushagaluke haguma naye.

18-19. a) Nka gurhe rhunamimira emburho z’okuli? b) Lerha omufano guyerekene gurhe Yehova alirhabere mwanafunzi muguma we Biblia.

¹⁸ Rhwabo nka “Bakozi haguma na Mungu,” rhurhafa chakurhwera emburho z’okuli konyine, s’ahubwe n’okuzimimira. Amango omuntu  amayerekana oku asimisizwe, rhulonzeze rhujire oku rhugalire koshi yi rhumugalukira changwa okulonza owindi juba-juba wakabona oyola muntu omu kupima kuhwanzisa enyigirizo ye Biblia haguma naye. Rhunayunva rhusimire bwenene amango rhwamabona Yehova arhabala omwanafunzi we Biblia ahindamule engeso, amawazo n’okuntu anachiyunva.

¹⁹ Rhola omufano gwa Raphalalani, mushake w’omu Afrika ye Side. Alisimire ebi ayigaga kurhenga omu funzo lyage lye Biblia. S’aliko byalimukomerere okuyemera ebi Ebiblia ederhere oku bilolere okuganira na bashokuliza bafire. (Kum. 18:10-12) Kubuya-buya, ayemera Mungu ahindamule amawazo mage. Oku buzinda, aleka okukola eby’obushake, s’aliko okola kwarhuma aheza akasi kaliri kamuha ech’okulya. Raphalalani, okala aherhe myaka 60, aderhere ntya: “Imperhe shukurani nene oku Bahamirizi ba Yehova okubona gurhe bantabalaga mu njira zinene, nk’okupata akasi. Ahanene, Imperhe eshukurani ku Yehova okubona akantabala kuhindamula akalamo kani, nantya bunola inkala nakaja nani oku mahubiri nka muguma w’Abahamirizi obatizizwe.

20. Bichi wahigirire kukola?

²⁰ Mugunola mwazi, rhwaganirire ku buhirhi 4 burhakabonekana ko n’amasu. Buguma mu boshi buherhe akachiro kulusha, kuli kugwarha Yehova nka Mwira werhu wa hofi-hofi. Echola chirhumire byarhugalikira kuyunguka n’obwindi buhirhi burhakaboneka ko; nk’okumuyegera omu sala, okupata oburhabale bw’eroho lichesibwa, n’okupata oburhabale burhengere embingu omu kasi kerhu k’amahubiri. Rhwakahigirira kukuza eshukurani yerhu eju y’obola buhirhi burhakabonekana ko. Kandi, rhurhakafa rhwalekere okusima Yehova okubona akava aba mwira mwinja ntyo.