1-2. Bibazo bihe Bahamirizi banene bali bahurana?

ENTUMWA PAULO alihebere Timoteo omurhima, n’ahanene Abakristu boshi bayeneze bwinja akasi kabo. (2 Ti. 4:5) Bobola, rhunakolesa ehano lya Paulo, n’okujira okwerhu koshi rhugalire omu kasi ka Mungu. Aliko mango maguma binarhukomerera kujira ntyo. Bene-berhu na bali-berhu banene banayubaha amahubiri. (2 Ti. 4:2) Omufano, waza oku bene-berhu balamire omu bihugo balahize m’okukolera mu makasi merhu maguma-maguma changwa omw’akasi kerhu koshi kalahizwe. Bali bakola akasi k’okuhubiri chiro akaba bamenyere oku bakashwekwa!

² Abantu ba Yehova bali balembera ebibazo bya buli lubero byakabavuna omurhima. Omufano, banene bali bakola bwenene yi bapata ebintu by’akamaro omulala gwabo gukenere. Bakasima nabo okukola binene omu kasi k’okuhubiri, s’aliko banaba eyi barhamire oku buzinda bw’eboso. Abandi barhakagala kujira binene eju y’obulwala bwa siku zinene changwa obushaja; nkabaga bakanaba eyi barhachirhenga ahambuga. Chiro n’abandi bali balwisa amawazo m’okuchibona nka ntacho bamalire. Mwali-werhu oyirikirwe Mary, * olamire omu Asie, aderhere ntya: “Nkwanene kuchihangana bwenene omu kulwisa amawazo m’okuvunika omurhima marhuma nachiyunva nduhire bwenene. Nanaja nachiyunva nchikire enungwe bulala ntagwerhe akasanzi n’emisi y’okuja omu mahubiri.”

3. Bichi rhwaganirako mu gunola mwazi?

³ Chiro akaba rhuli mu bibazo bihe, Yehova arhuha emisi rhukenere yi rhubihima n’okugenderera kumukolera nk’okurhwakanagala. Embere rhubone okuntu Yehova akarhurhabala, rhurhange rhushambale okuntu ahebaga Paulo na Timoteo emisi yi bayeneza akasi kabo chiro akaba balihurene ebibazo.

4. Bibazo bihe Paulo alihurene?

⁴ Paulo alihurene bibazo binene. Ahanene aliri akenera okuhebwa emisi amango baliri bamukobola, bamushurha amabale, n’okumushweka. (2 Ko. 11:23-25) Paulo yenyine aliderhere oku haliri hagera amango alwisa ehali y’okuvunika omurhima. (Ro. 7:18, 19, 24) Analigwerhe echibazo ch’amagala chaliri nka “mushaki omu mubiri” analisimire bwenene Mungu amukule mugo.​—2 Ko. 12:7, 8.

5. Bichi Paulo aligalire kukola chiro akaba okw’aliri ahurana ebibazo?

⁵ Yehova alihere Paulo emisi y’okugenderera kukola akasi k’okuhubiri chiro akaba oku alihurene bibazo binene. Waza oku byoshi Paulo ajiraga. Omufano, amango alishwekerwe omu Roma, ahubiri n’obushiru embere y’abakulu b’Abayahudi, nkabaga n’embere y’abakulu b’emwa leta. (Mdo. 28:17; Flp. 4:21,22) Alishubire kuhubiri banene omu Balanzi ba Mwami, anahaana obuhamirizi kubalala baliri bayinja kumurhangula. (Mdo. 28:30, 31; Flp. 1:13) Mwa’amola mango man’amo, Paulo ayandika amaruba mayerekezwe n’eroho lichesibwa, mali barhabala n’Abakristu b’okuli zene. Kandi, omufano gwa Paulo gwalihebere echibaga che Roma emisi, n’okola kwarhuma bene-berhu ‘bagwarha bushiru bunene b’okuderha echinwa cha Mungu buzira buba.’ (Flp. 1:14) Chiro akaba oku Paulo arhakagalire kukola byoshi alilonzeze, alijirire okw’agalire koshi, n’okola “kwalirhabere omu kugendereza emyazi minja.”​—Flp. 1:12.

6. Nk’oku olwandiko lwa 2 Wakorinto 12:9, 10 luderhere, bichi byarhabalaga Paulo ayeneze bwinja akasi kage?

⁶ Paulo alimenyere oku buli chintu aliri akola omu kasi ka Yehova, kwaliri kugerera emisi ya Mungu, s’arhali oku misi yage yenyine. Aliderhere oku emisi ya Mungu “yaliri yajirwa mishinganyanya omu buzamba.” (Osome 2 Wakorinto 12:9, 10.) Kugerera eroho lyage lichesibwa, Yehova ahereza Paulo emisi y’okuyeneza bwinja-bwinja akasi kage chiro akaba oku aliri alibuzwa, aliri ashwekwa, n’ebindi bibazo byoshi aliri ahurana.

7. Bibazo bihe Timoteo alikwanene kuhima y’akola bwinja akasi kage?

⁷ Timoteo, musole wayinjaga akola haguma na Paulo, naye alikwanene alangalire emisi ya Yehova y’akola bwinja akasi kage. Timoteo aliri abalama haguma na Paulo omu lugenzi lulehere lw’akasi k’obumisyonere. Kandi Paulo aliri amurhuma agende kurhangula ebibaga  n’okubiheba omurhima. (1 Ko. 4:17) Timoteo akachiyunvirhe oku arhakagala kujira ntyo. Nkabaga che charhumaga Paulo amuhanula ntya: “Orhayemeraga chiro n’omuntu muguma asuzagura obusole bwawe.” (1 Ti. 4:12) Kandi amola mango, Timoteo naye aligwerhe omushaki omu mubiri, k’okuderha, “malwala ma ngasi mango.” (1 Ti. 5:23) Aliko Timoteo alimenyere okw’eroho lichesibwa lya Yehova lyakamuhebere emisi alikenere y’agenderera kuhubiri emyazi minja n’okukolera bene-babo.​—2 Ti. 1:7.

8. Gurhe Yehova ali aheba abantu bage emisi zene?

⁸ Zene, Yehova ali ahereza abantu bage “emisi echubwise ey’olugero” yi bagenderera kumukolera oku bwimana. (2 Ko. 4:7) Rhushambalage ku njira ene Yehova anakolesa omu kurhuheba emisi n’okurhurhabala rhugenderere kuba bimana: esala, Ebiblia, okuba haguma n’aberhu Bakristu, n’akasi kerhu k’okuhubiri.

9. Nka gurhe okusalira kwakarhurhabala?

⁹ Esala linarhuheba emisi. Omu lwandiko lwa Waefeso 6:18, Paulo arhuhebere omurhima rhusalire Mungu “mu buli kasanzi.” Mungu ashubiza oku masala merhu, omu kurhuheba emisi. Jonnie, olamire omu Bolivie, alibwene gurhe Yehova amurhabala amango aliri ahurana ebibazo bya buli lubero. Abazere bage na mukage balwalira bwenene chaligumira. Byalikomerere bwenene Jonnie okujira buli chintu alikwanene kujira y’abashishikala boshi. Nyina afa, hanagera siku zinene embere mukage n’eshe bafume. Jonnie aderhere ntya oku bilolere echola chihe ch’ebibazo: “Amango naliri nayunva mpwererwe, echaliri chantabala buli mango, kwaliri kuba wazi omu masala mani.” Yehova aliri ahereza Jonnie emisi y’alembera. Ronald, mushamuka muguma olamire omu Bolivie, aliyunvirhe oku nyina alwere akansere. Enyuma ya mwezi muguma, nyina afa. Bichi byamurhabalaga kulembera? Aderhere ntya: “Okusalira Yehova kwalintabere kumubwira byoshi bindi oku murhima n’okuntu ndinachiyunva. Imenyere okw’anyinji bwinja kulusha okuntu omuntu yeshi-yeshi anyinji, chiro na kulusha oku nchimenyere.” Mango maguma rhwakachiyunva rhuhwererwe, changwa rhwanahaba bichi rhwakaderha omu sala. Aliko Yehova arhubwirire rhumusalire chiro akaba rhwakabula ebinwa by’okuderha oku rhuli rhwachiyunva.​—Ro. 8:26, 27.

10. Nk’oku olwandiko lwa Waebrania 4:12 luderhere, bulagurhe kuli kw’akamaro bwenene rhusome Ebiblia n’okukengeera oku birhwasomere?

¹⁰ Ebiblia enarhuheba emisi. Nka kula Paulo aliri asoma amandiko y’apata emisi n’echirhulirizo, nerhu rhwakajira ntyo. (Ro. 15:4) Amango rhuli rhwasoma Echinwa cha Mungu n’okuchikengeerako, Yehova akakolesa eroho lyage omu kurhurhabala rhuyunve bwinja Amandiko n’okumakolesa omu hali yerhu. (Osome Waebrania 4:12.) Ronald, rhwashambalagako burhanzi, aderhere ntya: “Nsimire bulala naliri nachihangana kusoma Ebiblia buli budufu. Nayinja nakengeera oku ngeso za Yehova n’okuntu anakolera abakozi bage n’obuzigire. Okujira ntyo kunampeba emisi.”

11. Nka gurhe Ebiblia yalihebere mwali-werhu muguma emisi waligwerhe amaganya?

¹¹ Rhwakagwarha amawazo menja oku bilolere ebibazo byerhu, amango rhuli rhwakengeera oku Chinwa cha Mungu. Tala gurhe Ebiblia yarhabalaga mukana muguma waliri omu mishibo. Mushamuka muguma amubwira oku akayiga ebintu by’akamaro omu kusoma echitabu cha Yubu. Abere ali asoma echola chitabu, aliri juba-juba kukwaranga Yubu eju y’amawazo mabi aligwerhe. Omu bwenge  bwage ayinja ahanula Yubu ntya: “Yubu we! Orhavaga wachiseza oku bibazo byawe mani!” Aliko ayinja rhegeera oku amawazo mage manaliri kuguma n’ama Yubu. Echola chamurhabala ahindamule amawazo mage anagwarha emisi y’okuhima amaganya eju y’okuheza eba.

12. Gurhe Yehova anarhuheba emisi kugerera bene-berhu na bali-berhu?

¹² Okuba haguma n’aberhu Bakristu kunarhuheba emisi. Eyindi njira Yehova anakolesa omu kuheba Abakristu emisi, kuli kugerera bene-berhu na bali-berhu. Paulo ayandikaga oku aligwerhe enyorha “y’okuhebana omurhima” haguma na bene-babo na bali-babo b’ekiroho. (Ro. 1:11, 12) Mwali-werhu Mary, rhwashambalagako burhanzi, alisimire kuba haguma na bene-babo na bali-babo. Aderhere ntya: “Yehova akoleseze bene-berhu na bali-berhu barhanalimenyere chiro ebibazo byani. Baliri baderha echintu chilebe ch’okumpeba omurhima changwa banantumira amaruba, n’ebyola binanalikenere bwenene. Ebyola byanalintabere nshambale na bali-berhu baligwerhe ebibazo bili kuguma n’ebyani, banambwira gurhe nakabihima. Na buli mango abashamuka baliri bantabala inchiyunve oku ngwerhe ech’imalire omu chibaga.”

13. Gurhe rhwakahebana emisi oku mbuganano z’echibaga?

¹³ Haguma omu hantu henja bwenene h’okuhebana omurhima, kuli oku mbuganano z’echibaga. Amango wamaja oku mbuganano, wakachihangana kuheba abandi emisi omu kubabwira ok’obazigiire onasimisizwe n’ebi bali bakola. Omufano, embere wa mbuganano nguma, mushamuka muguma oyirikirwe Peter abwira ntya mwali-werhu muguma oli oku mulume orhali Muhamirizi: “Binaheba omurhima bwenene okukubona hanola. Onazigana kuyinja na bana bawe ndarhu eyi bali tayari, banarheganyizwe kuhaana ebishubizo.” Oyola mukazi ahwanza kushesha emigiza y’obusime n’okushubiza ntya: “Orhakamenya okuntu nalikenere kuyunva ebyola binwa zene.”

14. Nka gurhe akasi k’okuhubiri kanarhurhabala?

¹⁴ Amahubiri manarhuheba emisi. Amango rhwamashambala oku bilolere okuli kwe Biblia haguma n’abandi, rhunachiyunva bwinja n’okurhulera, babe bayunvirize changwa nanga oburhumwa bwerhu. (Mez. 11:25) Mwali-werhu muguma oyirikirwe Stacy alichibwenere nka gurhe akasi k’okuhubiri kanaheba omuntu emisi. Amango muntu muguma w’omulala gwage achibwaga omu chibaga, aligwerhe omugayo bwenene anayinja achibaza ntya, ‘Ka hali echindi chintu nalikwanene kujira y’imurhabala?’ Stacy aligenderere kuwaza bwenene kw’echola chibazo. Bichi byamurhabalaga ahime echola chibazo? Amahubiri! Amango ayinja aja omu mahubiri, ahwanza kuseza obwenge bwage oku bantu b’omu eneo bakenere oburhabale bwage. Aderhere ntya: “Mw’agola mango, Yehova ampa omwanafunzi we Biblia wajiraga amaja-mbere juba-juba. N’echola champeba omurhima bwenene. Echintu chantabere bwenene omu kalamo kani kali kasi k’amahubiri.”

15. Bichi ebinwa Mary aderhere bikuyigirize?

¹⁵ Eju y’ebibazo byabo, bantu baguma bakachiyunva oku barhakagala kukola binene omu kasi k’amahubiri. Akaba ntyo k’oli wachiyunva, oyibuke oku Yehova anasimiswa amango oli wajira nk’oku wakanagala. Shubaga owaze oku mufano gwa Mary. Amango ahamira omu eneo baganira m’olwindi lulimi, ayinja achiyunva nka ntacho avir’amala. Aderhere ntya: “Mango maguma, echinakagalire kujira chonyine, kwaliri kuhana echishubizo chofi, changwa kusoma olwandiko lwe Biblia, changwa kuhereza omuntu etragte omu mahubiri.” Ayinja achiyunva nka ntacho amalire omu kuchihuzanya n’abantu bali baderha bwinja olola  lulimi. Aliko, ahindamula amawazo mage. Ahwanza kurhegeera oku Yehova akamukoleseze chiro akaba arhenji kuderha bwinja olola lulimi. Aderhere ntya: “Okuli kwe Biblia k’okuyokola akalamo, kuyorohere; kwakanahindamula akalamo k’abantu.”

16. Bichi byakarhabala balala barharhenga ahambuga, aliko basimire kuhubiri, bapate emisi?

¹⁶ Yehova anabona n’okusimiswa n’enyorha rhugwerhe y’okuhubiri chiro akaba oku rhurhali rhwarhenga ahabunga. Akarhufungulira enjira y’okuhubiri abalanzi changwa abanganga. Nka rhuhuzenye akasi rhuli rhwakola zene n’akarhwaliri rhwakola omu siku zageraga, rhwakavunika omurhima. Aliko nka rhurhegerere okuntu Yehova ali arhurhabala zene, rhwapata emisi rhukenere y’okulembera buli chigeregezo eyi rhunagwerhe omwishingo.

17. Nk’oku olwandiko lwa Muhubiri 11:6 luderhere, bulagurhe rhukwanene rhugenderere kuhubiri chiro akaba oku rhurhapatire han’ahola amalehe menja?

¹⁷ Rhurhamenyere ehe omu mburho z’okuli rhuli rhwarhwera yakamera n’okuhwanza kukula. (Osome Muhubiri 11:6.) Omufano, Barbara, mwali-werhu oli mu myaka 80 anahubiri oku kahunda kugerera etelefone n’okuyandika amaruba. Mu maguma omu maruba mage, alihebere mw’egazeti y’Omunara g’Omulanzi ya Lusiku 1, Mwezi gwa 3, 2014, yaliri m’omwazi guderhere “Mambo Yenye Mungu Amekufanyia.” Buzira kumenya, arhumira mulume muguma na mukage babaga bachibirwe omu chibaga amola maruba. Basoma eyola gazeti kanene kanene. Omulume achiyunva nka Yehova ye waliri aganira naye bunu oku bunu. Oyo mulume na mukage bashuba hwanza kuhika oku mbuganano, na buzinda bagalukira Yehova, nobo babaga bamamala myaka erhalukire 27 eyi bachibirwe omu chibaga. Jaga wawaza kangana gurhe Barbara aliheberwe omurhima n’emisi okubona malehe mangana ahola marhengereraga kw’amola maruba maguma!

18. Bichi rhwakajira yi Mungu arhuha emisi?

¹⁸ Yehova arhuhere njira zinene z’okupata misi minene. Amango rhwamakolesa ezola njira, nk’esala, Ebiblia, okuba haguma n’aberhu Bakristu, n’amahubiri, rhwanamuyereka oku rhulangalire oburhabale bwage n’oku agwerhe enyorha y’okurhurhabala. Buli mango, rhujage rhwalangalira Darha w’embingu, onasima “kuyerekana emisi yage eju ya balala bagwerhe emirhima eyenere kumuyerekera.”​—2 Ny. 16:9.