1-2. Gurhe bantu baguma banachiyunva oku bilolere okushambazana?

 OKUSHAMBAZANA kakaba kasanzi k’omwishingo, kanasimisize. Akaba yiwashambazana na muntu mulebe, olonzeze ogwarhe obusime mw’echola chihe. Na kubanene bali bashambazana, akola kali kasanzi k’obusime. Mwali-werhu Tsion, a w’omu chihugo ch’Ethiopie aderhere ntya: “Kaguma omu kasanzi kalinsimisize bwenene omu kalamo kani, maliri mango nyono nabani rhwaliri rhwashambazana. Rhwaliri rhwaganira ebintu by’akamaro bwenene n’okusheka. Naligwerhe obusime amango narhegeraga oku namabona omuntu onzigire eyi nani muzigire.”

² Aliko, mwene-werhu Alessio w’omu Pays-Bas aderhere ntya: “Byalisimisize okumenyana na mukani amango rhwaliri rhwashambazana, aliko obwira bwerhu bwaliri mw’ebibazo.” Mu gunola mwazi, rhwaganira ku bibazo biguma bikomere na makanuni maguma me Biblia makarhabala abali bashambazana bahikire omuhigo gwabo. Rhwashuba ganira gurhe abandi omu chibaga bakarhabala abali bashambazana.

OMUHIGO G’OKUSHAMBAZANA

3. Omuhigo g’okushambazana guli guhe? (Mezali 20:25)

³ Chiro akaba ok’okushambazana kakaba kasanzi kasimisize, omusole n’omunyere bakwanene kubona akola kasanzi oku kali k’akamaro bulala obola bwira bwakabahisa oku buhya. Olusiku l’obuhya, omulume n’omukazi banahana echilagane emwa Yehova oku basimana n’okukengana esiku zoshi baba balamire haguma. Embere y’okuhana echilagane choshi-choshi, rhukwanene kurhanga kurhola akasanzi k’okuchiwazako bwenene. (Osome Mezali 20:25.) Intyo kon’oko kurhukwanene kujira oku bilolere echilagane ch’obuhya. Okushambazana kunarhuma omusole n’omunyere bamenyana bwinja, n’echola chanabarhabala barhole esimikiro nyinja. Hali amango eyola simikiro yakabahisa oku buhya; n’amandi mango, yakamala  obwira bwabo. Akaba obwira bwahwere, okola kurhali kuderha oku hali echintu chibi bajirire. S’ahubwe, okola kushambazana kwabarhabere bamenye akaba bakwanene kushabana changwa nanga.

4. Bulagurhe rhukwanene kugwarha amawazo menja oku bilolere okushambaza?

⁴ Bulagurhe kuli kwinja okugwarha amawazo menja oku bilolere okushambaza? Echola chilonzeze kuderha ok’omusole arhakwanene kushambaza muntu mulebe anamenyere okw’arhakamushaba. Aliko, arhali abalamba bonyine babakenere kugwarha amawazo menja oku bilolere echola. Rhweshi rhukwanene kuyibuka omuhigo g’okushambaza. Omufano, baguma banawaza ok’omusole n’omunyere bali bashambazana bakwanene kushabana. Gurhe amola mawazo manahuma oku Bakristu bachili balamba? Melissa, ochili mulamba, w’omu Etats-Unis, aderhere ntya: “Amango mwene-werhu na mwali-werhu bali bashambazana, Bahamirizi baguma baba balangalire oku bashabana. Oku binaja byaba, bantu baguma bali bashambazana banafunda kumala obola bwira bwabo chiro akaba babwene oku burhali bwagenda bwinja. Abandi balamba bowe banava baleka loshi loshi kushambaza. Echola chakalerha milago minene.”

MUMENYANE BWINJA BULI MUGUMA N’OWINDI

5-6. Bichi omusole n’omunyere bakwanene kumenyanako buli muguma n’owindi amango bali bashambazana? (1 Petro 3:4)

⁵ Akaba muli mwashambazana, bichi byakabarhabala mumenye akaba mwakashabana changwa nanga? Bihemere mumenyane bwinja buli muguma n’owindi. Nkabaga walimenyere bintu biguma oku bilolere muntu mulebe embere orhondere kumuganiza. Aliko lero, ogwerhe orozo l’okumenya “obumuntu bubishirwe omu murhima.” (Osome 1 Petro 3:4.) Amango oli washambaza, wakamenya bintu binene oku bilolere obwira bukomere agwerhe haguma na Yehova, oborhere bwage, n’okuntu anawaza. Okw’ebisanzi yibyanagera, wakaja wagala kushubiza oku bibazo bili nk’ebila: ‘Oyula muntu, aba mulume mwinja changwa mukazi mwinja si?’ (Mez. 31:26, 27, 30; Efe. 5:33; 1 Ti. 5:8) ‘Ka rhwazigirana n’okuyerekana oku rhulageneko buli muguma n’owindi oku bilolere ebi rhukenere? Ka nagala kulama naye n’okulembera obuzamba bwage?’ b (Ro. 3:23) Oku munali mwamenyana buli muguma n’owindi, oyibuke okw’ech’akamaro arhali mpu mugwarhe engeso zili kuguma, s’aliko okwanene kukoomera engeso z’owenyu.

⁶ Bichi bindi okwanene kumenya oku bilolere  ey’oli washambazana naye? Embere ohwanze kuchiyunva osimire bwenene omuntu, mukwanene kuba eyi mwamalire kuganira ku bintu biguma by’akamaro nk’emihigo ya buli muguma. Aliko si, gurhe oku bilolere ebibazo bya buli muguma nk’ebilolere amagala, efuranga, changwa ebintu bibi byahikire omuntu? Birhakashobokana oku muganire oku myazi yoshi oku murhondero g’obwira bwenyu. (Huzanya na Yohana 16:12.) Akaba obwene oku karhaza kuba kasanzi k’okushubiza ku bibazo biguma-biguma bikulolere bwawe-bwawe, okwanene kumenyesa owenyu. Aliko, okw’ebisanzi yi byanagera, owenyu akenera kumenya eyola myazi y’arhola esimikiro nyinja. Bobola, hahika akasanzi mukwanene kubwirana byoshi buzira kubisha.

7. Gurhe abali bashambazana bakamenyana buli muguma n’owindi? (Olole n’echisanduku “ Amango Oli Washambazana n’Omuntu Olamire Hale.”) (Olole n’efoto.)

⁷ Nka gurhe wakahikira kumenya omuntu bwinja-bwinja? Njira nguma omu njira zinja bwenene, kuli kuganira buzira kubishana, okubwirana obukweri, okubazana ebibazo, n’okuyunviriza bwinja amango wenyu y’aganira. (Mez. 20:5; Yak. 1:19) Nkabaga mwakachishoga kukola haguma, okujira ntyo kwakabarhabala mugale kuganira; kwakaba kusangira akalyo, okulambagira haguma ahantu hali bantu banene, n’okuhubiri haguma. Kandi, mwakahikira kumenyana bwinja amango muli mwageza akasanzi haguma n’abera, n’abantu b’omulala. Oku bwindi, opange ebi mwakakola haguma byakuyereka gurhe anajira omu hali zilengene n’amango ali mu chigusho ch’abantu. Lola bichi mwene-werhu Aschwin w’omu chihugo che Pays-Bas achihanganire kujira. Aderhere ntya oku bilolere obwira bwage haguma na Alicia: “Rhwalilonzeze eby’okujira byakarhurhabere rhumenyane buli muguma n’owindi. Ahanene, byaliri byazigana kuba eyi bintu birhakomere, nk’okuvuya haguma changwa okukola haguma orhwindi rhwasi rhw’omu nju. Kugerera orhola rhwasi, buli muguma aliri abona engeso zinja z’owabo n’obuzamba bwage.”

8. Bunguke buhe abali bashambazana bakapata amango bali bayiga haguma Echinwa cha Mungu?

⁸ Mwakashuba kuhikira kumenyana bwinja, omu kuyiga haguma myazi milebe ye Biblia. Akaba mwashabene, nji byabahema muchihebere h’akasanzi k’okukola obuharamye b’omulala, yi Mungu aba w’akamaro omu buhya bwenyu. (Muh. 4:12) Bobola, kuli kwinja muchihebere h’akasanzi k’okuhwanza kuyiga haguma Echinwa cha Mungu amango muli mwashambazana. Kweri, omusole n’omunyere bali bashambazana, barhaza kuba mulala, n’oyola mwene-werhu arhaza kuba rhwe ly’oyola mwali-werhu. Aliko, omu kuyiga haguma  oku kahunda, buli muguma akamenya ehali y’owabo y’ekiroho. Hali eyindi nyungu Max na Laysa b’omu États-Unis, babwene. Max aderhere ntya: “Amango rhwarhonderaga kushambazana, rhwahwanza kuyiga emyazi eli omu bitabu byerhu ederhere oku bilolere okushambazana, obuhya, n’akalamo k’omulala. Bulala rhwaliri rhwayiga ebyola bitabu, rhwakaganirire oku bilolere bintu binene by’akamaro byakarhukomerere kuhwanza ganirako.”

EBINDI BINTU MUKWANENE KUGANIRAKO

9. Bintu bihe abali bashambazana bakwanene kuganirako amango bamachishoga eyi babwira oku bilolere obwira bwabo?

⁹ Inde mukwanene kubwira oku bilolere obwira bwenyu? Mwembi mwenyine mwemukwanene kuchishoga inde mwabwira. Oku murhondero g’obwira bwenyu, nkabaga mwakabona oku mubwire bantu bageke bonyine. (Mez. 17:27) Omu kujira ntyo, mwachilanga nkabaga oku kahidiko n’oku bibazo birhaherhe echi bimalire. Aliko, akaba ntaye n’omuguma mwabwirire, mwakahwanza kuchibisha omu kuyubaha okw’abandi bamenya oku bilolere obwira bwenyu. Echola chakabalerhera ebibazo. Bobola, byakaba by’obwengehe okubwira abantu bakakuha amahano menja n’okukurhabala omu zindi njira. (Mez. 15:22) Omufano, wakabwira bantu baguma b’omu mulala, abera bakulire ekiroho, changwa abashamuka b’echibaga.

10. Bichi abali bashambazana bakajira y’olugenzi lwabo lugenderera kusimisa Yehova? (Mezali 22:3)

¹⁰ Nka gurhe mwakajira yi mugenderera kugwarha olugenzi lukengeseze Yehova amango muli mwashambazana? Ok’obwira bwenyu buli bwakomera, kumwanagenderera kuzigirana bwenene buli muguma n’owindi. Bichi byakabarhabala mugenderere kuchilanga yimurhajira echintu choshi-choshi chakagayisa Yehova? (1 Ko. 6:18) Muyake enganiro zirhachere, okuba mwembi mwenyine, n’okunywa kukabya. (Efe. 5:3) Ebyola bintu byakayongera enyifinjo z’obubaraga n’echola chanarhuma murhagala kujira ebili binja. Byakaba by’obwengehe okuganira oku kahunda oku bilolere bichi mwakajira yimuyerekana obukenge buli muguma n’owindi, n’okukenga amakanuni ma Yehova. (Osome Mezali 22:3.) Yunva ebyarhabalaga Dawit na Almaz b’omu chihugo ch’Ethiopie. Baderhere ntya: “Rhwaliri rhwageza akasanzi ahantu hali bantu banene changwa eyi rhuli haguma na bera berhu. Rhurhachigeraga rhwaba rhwenyine omu nju changwa omu mutugari. Kweri, echola chaliri charhuma rhwachilanga oku byakarhuma rhwarhogera omu mashumi mabi.”

11. Bichi abali bashambazana bakwanene kuganirako amango bali bachishoga kuyerekana ebijiro by’obuzigire?

¹¹ Gurhe abali bashambazana bakayerekana ebijiro by’obuzigire? Ok’obuzigire bwenyu buli bwagenderera kukula, mwakachishoga kuyerekana bijiro bilebe by’obuzigire omu njira ekwanene. Aliko, akaba enyifinjo z’echijiro ch’obuhya zamaba zinene, byakakukomerera kurhola esimikiro y’obwengehe oku bilolere owenyu. (Wim. 1:2; 2:6) Kandi, amango muli mwayerekana ebijiro by’obuzigire, hali oku mwakabula engeso y’okuchigala n’echola chanarhuma mwajira echintu chirhasimisize Yehova. (Mez. 6:27) Bobola, oku murhondero g’obwira bwenyu, muganire oku bilolere amakanuni ma Yehova n’oku bintu mwajira n’ebi murhakwanene kujira amango muli mwayerekana obuzigire. c (1 Te. 4:3-7) Mwabo muli mwashambazana, muchibaze ntya: ‘Gurhe abantu b’aharhulamire babona ebijiro by’obuzigire rhuli rhwayerekana? K’ebyola bijiro byazusa enyorha y’echijiro ch’obuhya ku muguma mu rhwembi?’

12. Akaba abali bashambazana barhali bayunvikana, bichi bakwanene kujira?

¹² Gurhe mwakamala ebibazo n’okurhayunvikana? Gurhe si akaba murhayunvikana buli mango? Echola chiyerekene ok’obwira bwenyu burhagenderera si? Nanga chiro; abanashambazana boshi, mango maguma binahika eyi barhayunvikana.  Obunyumpa bukomere buba bwa bantu babiri balonzeze kukola haguma omu kulwisa ebibazo byakarhengerera. Bobola, okuntu muli mwajira yi mumala ebibazo byenyu zene, kwakayerekana akaba obunyumpa bwenyu nji bwaba bwinja. Mwembi mwakachibaza ntya: ‘Ka rhwakaganira oku bibazo eyi rhurhulerere n’omu njira eyerekene obukenge? Ka rhunayemera oku bulonza amagosa merhu n’okuchihangana kurhamagalukira? Ka namba juba-juba kuyemera amawazo m’owerhu, okuhema obonjo, n’okubabalira?’ (Efe. 4:31, 32) Aliko, akaba buli mango murhayunvikana, changwa akaba munajira obuhaka amango muli mwashambazana, orhawazaga okw’ehali nji yakwira hanola nji mushabana. Akaba wamarhegera oku murhakayunvikana n’oyola muntu, mwakamala obola bwira bwenyu, n’eyola yakaba simikiro nyinja ku mwembi. d

13. Bichi byakarhabala omusole n’omunyere bachishoga bisanzi bingana gurhe bamala eyi bali bashambazana?

¹³ Okushambazana kwenyu kukwanene kumala bisanzi bingana gurhe? Amango rhurharholere akasanzi katosheze k’okuganira oku simikiro zerhu, ahanene ebintu birhazigana kugenda bwinja. (Mez. 21:5) Bobola mukwanene kumala siku zinene z’okuganizana yi muhikira kumenyana bwinja. Aliko, murhwanene kumala siku zenene bwenene kukabya eyi muli mwashabazana akaba birhahemere okujira ntyo. Ebiblia ederhere ntya: “Ech’omuntu alingirize chirhahikire oku kasanzi, chakarhuma omurhima gwalwala.” (Mez. 13:12) Oku bwindi, oku muli mwageza akasanzi mwembi haguma, hali oku byakabakomerera bwenene kuchilanga oku mashumi m’okujira eby’obubaraga. (1 Ko. 7:9) Bobola, ahali h’okuchibaza oku bilolere bisanzi bingana gurhe mwamala eyi muli mwashambazana, buli muguma wenyu akwanene kuchibaza ntya: ‘Bichi bindi inchinkenere kumenya oku bilolere owerhu yingala kurhola esimikiro?’

NKA GURHE ABANDI BAKARHABALA ABALI BASHAMBAZANA?

14. Mu njira zihe abandi bakarhabala abali bashambazana? (Olole n’efoto.)

¹⁴ Akaba hali abarhumenyere bali bashambazana, nka gurhe rhwakabarhabala? Rhwakabahamagala bayinje rhusangire nabo akalyo, rhube haguma nabo oku buharamye b’omulala, changwa rhuchisimise haguma nabo. (Ro. 12:13) Omu hali zili nk’ezola, bakahikira kumenyana bwinja-bwinja. Ka bakenere ow’okubaherekeza (shaperon), changwa ow’okuba haguma nabo ahantu bakaganirira harhali bantu banene? Akaba ntyo kubili, rhwakaba tayari kubarhabala si? (Gal. 6:10) Alicia, rhwabaga rhwaderhereko embere, ayibukire ebi yewe n’eba Aschwin balisimire. Aderhere ntya: “Rhwaliri rhwayunva rhusimire bwenene  okubona bene-berhu na bali-berhu baguma baliri barhubwira oku rhwakabalambagirira akaba rhukenere ahantu rhwabuganana, aliko aharhali bwihunze.” Akaba abali bashambazana bakuhemere ogeze akasanzi haguma nabo, obone oku kali kasanzi kenja bwenene k’okurhabala bera bawe. Omenye waleka abali bashambazana babe bowe bonyine bwihunze, aliko orhegere mangochi bakaba bakenere akasanzi k’okuganira ebibalolere bowe bonyine.—Flp. 2:4.

15. Bichi bindi abera bakajira yibarhabala abali bashambazana? (Mezali 12:18)

¹⁵ Rhwakashuba kurhabala abali bashambazana kugerera ebi rhuli rhwaderha changwa ebi rhurhali rhwaderha. Hali amango byakarhuhema rhugwarhe engeso y’okuchigala n’okurhaderha chintu chilebe. (Osome Mezali 12:18.) Omufano, byakarhuhema okusira rhurhabwira abandi oku bantu balebe bali bashambazana, aliko abali bashambazana bakasima bowe bonyine babaderhage. Rhurhakwanene kuderha-derha oku bilolere abali bashambazana changwa kuderha kubi oku bibazo birharhulolere. (Mez. 20:19; Ro. 14:10; 1 Te. 4:11) Kandi, rhurhakwanene kuderha ebinwa changwa kubaza ebibazo byakarhuma abali bashambazana bachiyunva bashunikirwe kushabana juba-juba. Mwali-werhu oyirikirwe Elise n’eba bayibukire ntya: “Rhwaliri rhwayunva birhulazize amango abandi baliri barhubaza ebibazo oku bilolere emipango yerhu y’obuhya n’obo rhurhaza yiganirako.”

16. Gurhe rhwakajira amango abaliri bashambazana bamayirha obwira bwabo?

¹⁶ Gurhe byakaba nk’abaliri bashambazana bamabona oku bayirhe obwira bwabo? Rhurhakwanene kubaza ebibazo birharhulolere changwa kuvumagula owayirhaga obwira. (1 Pe. 4:15) Mwali-werhu oyirikirwe Lea aderhere ntya: “Naliyunvirhe okw’abandi barhondere kuyeneza emyazi oku bilolere bulagurhe nyono na mwene-werhu rhwayirhire obwira bwerhu. Kweri, ebyola byalinderhere omugayo.” Akaba omusole n’omunyere bachishogere kumala obwira bwabo, rhurhakwanene kuderha okubarholere esimikiro ebihire. Ahanene, rhwakaderha oku bahikire omuhigo g’okushambaza, k’okuderha okw’echola charhabere buli muguma arhole esimikiro nyinja. Aliko, nkabaga eyola simikiro yakaba eyi yabalekere bavunikire omurhima n’echola chanarhuma buli muguma achiyunva ali yenyine. Bobola, rhwakalola mu njira zihe rhwakabarhabalamo.—Mez. 17:17.

17. Bichi abali bashambazana bakagenderera kujira?

¹⁷ Nk’okurhwabaga rhwabwene, abali bashambazana bakagwarha ebibazo, aliko kandi bakagwarha n’obusime. Jessica ayibukire ntya: “Okuderha okuli, okushambazana kaliri kasi kanene. Aliko naligwerhe obusime bulala rhwalikoleseze akasanzi n’emisi yirhugala kumenyana bwinja.” Akaba muli mwashambazana, mugenderere kujira okwenyu koshi yimugala kumenyana bwinja. Mukajira ntyo, obwira bwenyu bwakomera, nantyo, mwagala kurhola esimikiro y’obwengehe.