MWAZI G’OKUYIGA 20
OLWIMPO 67 “Hubiri Echinwa cha Mungu”
Oleke Obuzigire Bukushunike Ogenderere Kuhubiri!
“Bihemere emyazi minja erhange ehubiribwe omu mashanja moshi.”—MK. 13:10.
EBIRHWAYIGA
Rhwabona gurhe obuzigire bunarhushunika rhugwarhe obushiru n’okuchiseza oku kasi k’amahubiri n’omurhima gwerhu goshi.
1. Bichi rhwaliyigire oku mbuganano ya buli mwaka y’omu 2023?
OKU mbuganano nkulu ya buli mwaka ya mwaka gwa 2023, a rhwalipatire amafasiriyo mahyahya masimisize oku bilolere obwemere bwerhu, n’etangazo lisimisize oku bilolere akasi kerhu k’amahubiri. Omufano, rhwali rhuyigire okw’enyuma y’okulimbulwa kwa Babiloni mukulu, chiro n’abantu baguma nji bakapata orozo l’okuja omu lubaga lw’abantu ba Yehova. Kandi rhwaliyigire ok’omu Mwezi gwe 11, 2023, abahubiri b’Obwami barhachiyinja bahemwa bahane eraporo ya byoshi bajirire omu kasi k’amahubiri. K’ebyola bintu byahindamwirwe byarhuma akasi kerhu k’amahubiri kabonekana nka karhachigwerhe kamaro changwa karhachili k’akukolwa juba-juba nk’oku byaliri mira? Kweri arhali ntyo ku bili!
2. Bulagurhe rhukwanene kukola juba-juba akasi kerhu k’okuhubiri nk’okw’esiku zinali zagera? (Marko 13:10)
2 Okw’esiku yi zanagera rhukwanene kukola akasi kerhu k’okuhubiri juba-juba. Bulagurhe? Bulala obuzinda bukala buli hofi bwenene. Rhuganire oku bi Yesu alebaga oku bilolere akasi k’amahubiri omu siku z’obuzinda. (Osome Marko 13:10.) Nk’okw’engani ya Matayo eyerekene, Yesu aliderhere okw’emyazi minja yakahubiribwe omu gulu lyoshi abantu balamireko embere “obuzinda” buhike. (Mt. 24:14) Obola buzinda Ebiblia ederhere, kuli kumala loshi egulu libi lya Shetani. Yehova ahebere “h’olusiku n’esa” oku bilolere ebyola bihe byarhengerera hanola hofi-hofi. (Mt. 24:36; 25:13; Mdo. 1:7) Buli kucha rhunaba eyi rhuli rhwayegera olola lusiku. (Ro. 13:11) Okurhunali rhwalingiriza gurhe obuzinda bwahika, byarhuhema rhugenderere kuhubiri.
3. Bichi binarhushunika kuhubiri?
3 Hanola hali echibazo ch’akamaro rhweshi rhukwanene kuwazako: Bichi binarhuma rhwahubiri emyazi minja? Omu binwa bigeke, obuzigire b’obunarhushunika rhuhubiri. Amango rhuli rhwahubiri, rhunayerekana oku rhusimire emyazi minja, rhuzigire abantu n’echakamaro bwenene rhuzigire Yehova n’ezino lyage. Lekaga rhuganire ku buli mpanvu.
RHUNAHUBIRI BULALA RHUSIMIRE EMYAZI MINJA
4. Gurhe rhunajira amango rhwamayunva emyazi minja?
4 Ochiyibukire okuntu wachiyunvaga amango opata emyazi minja, nkabaga oku hali omwana waburhirwe omu mulala gwenyu changwa amango opata akasi walikenere bwenene si? Ntangangane waliyunvirhe ogwerhe enyorha y’okubwira abantu b’omu mulala gwawe n’abera bawe k’ogola mwazi. Ka walichiyunvirhe ntyo amango oyunva emyazi minja kulusha eyindi yoshi k’okuderha emyazi minja y’Obwami bwa Mungu?
5. Gurhe walichiyunvirhe amango oyiga ob’oburhanzi obukweri b’omu Chinwa cha Mungu? (Olole n’efoto.)
5 Ba nka washuba kuwaza okuntu walichiyunvirhe amango oyiga b’oburhanzi obukweri b’omu Chinwa cha Mungu. Wamenya oku Yisho w’embingu akuzigire, alonzeze obe muguma w’omu mulala gw’abanamuharamya, akulaganyize oku nj’amala amalumwa, amalibuko, n’oku wakalangalira kubona abazigirwa bawe bafire amango bafuka omu gulu lihyahya n’ebindi n’ebindi. (Mk. 10:29, 30; Yoh. 5:28, 29; Ro. 8:38, 39; Ufu. 21:3, 4) Ebyola wayigaga byalikuhumire oku murhima bwenene. (Lu. 24:32) Walisimire ebyola wayigaga wanachiyunva olonzeze obibwire buli yeshi wabuganene naye!—Ohuzanye na Yeremia 20:9.
Amango rhuyiga b’oburhanzi obukweri bw’Ebiblia, rhwalisimire rhwanalilonzeze kububwira buli yeshi! (Olole echifungo cha 5)
6. Bichi wakayiga kugerera omufano gwa Ernest na Rose?
6 Rhuganire k’ogula mufano. Mwene-werhu oyirikirwe Ernest b aligwerhe hofi myaka ekumi amango eshe afa. Ernest aderhere ntya: “Naliri nachibaza: ‘Ajire omu mbingu si? Changwa afire loshi si?’ Naliri nachifija abandi bana balichiherhe b’eshe.” Ernest agendaga azigana kuja ah’abanahamba abantu, anafukama oku shinda y’eshe anasalira ntya: “Mungu wekalamawe ndonzeze menye ngahe darha ali.” Hagerere nka myaka 17 eshe afire, Abahamirizi ba Yehova bahema Ernest ahwanze kuyiga Ebiblia haguma nabo naye ayemera hanaho. Asima bwenene kumenya okw’abafire ntacho baba bayinji, bali nk’abahondoberere omw’iro oku ne Biblia elaganyize oku nji haba obufuuke omu mango mayinjire. (Muh. 9:5, 10; Mdo. 24:15) Buzinda apata ebishubizo by’ebibazo byabaga byamuhangayisize mu myaka minene bwenene! Ernest ayunva busime bunene oku bilolere obukweri bwe Biblia aliri ayiga. Mukage Rose, naye ahwanza kuyiga Ebiblia anayerekana okw’asimisizwe n’oburhumwa b’Obwami. Yewe n’eba babatizwa omu mwaka gwa 1978. Baliri bahubiri n’obushiru obola bukweri bw’akamaro bayigaga oku bantu b’emilala yabo, bera babo, n’okubandi bantu baliri babayunviriza. Oku byalijire byaba, Ernest na mukage Rose balirhabere bantu barhalukire 70 kumenya Yehova banabatizwa.
7. Gurhe binaba amango rhwamasima bwenene obukweri buli omu Biblia? (Luka 6:45)
7 Kweri, amango rhwamasima obukweri buli omu Biblia, rhunachiyunva oku birhuhemere rhububwire oku bandi. (Osome Luka 6:45.) Rhunachiyunva kuguma n’abanafunzi ba Yesu b’omu myaka egana ya burhanzi baderhaga ntya: “Rhurhakagala kuleka kuderha oku bilolere ebintu rhwachibwenere n’ebi rhwayunvirhe.” (Mdo. 4:20) Rhuba rhusimire obukweri bwenene omukuntu rhuba rhulonzeze rhubuganireko n’abantu banene oku byakanagalikana.
RHUNAHUBIRI BULALA RHUZIGIRE ABANTU
8. Bichi binarhushunika kuganira n’abantu oku bilolere emyazi minja? (Olole echisanduku “ Obuzigire Bukushunike—Ojire Abanafunzi.”) (Olole n’efoto.)
8 Kuguma na Yehova n’Omugala, rhuba rhuzigire abantu. (Mez. 8:31; Yoh. 3:16) Rhunayunvira obonjo bunene abantu “barhamenyere Mungu” barhanagwerhe “obwemere.” (Efe. 2:12) Eju y’ebibazo by’akalamo, bali nkabarhogere omu chishimu chilehere, aliko rhwewe rhugwerhe akamba kakabarhabala kurhengamo, k’okuderha emyazi minja y’Obwami bwa Mungu. Bulala rhubazigire, rhunabagwerhe kw’akababaro, rhulonzeze rhujire okwerhu koshi rhwakagala yirhubahisa kw’emyazi minja. Eyola myazi minja y’akamaro, yakayunjuza omu mirhima yabo obulangalire, yakabarhabala bapate akalamo kenja zene, n’okubaha obulangalire “bw’akalamo k’okuli” k’okuderha akalamo k’esiku n’amango omu gulu lihyahya lya Mungu.—1 Ti. 6:19.
Obuzigire bwerhu n’akababaro oku bantu bwarhushunika rhujire okwerhu koshi rhwakagala yirhubabwira emyazi minja (Olole echifungo cha 8)
9. Mukonge guhe rhunahana oku bilolere amango mayinjire na bulagurhe? (Ezekieli 33:7, 8)
9 Obuzigire oku bantu bunarhushunika rhubahe omukonge oku bilolere obuzinda bwalinola gulu libi lya Shetani. (Soma Ezekieli 33:7, 8.) Rhunayunvira obonjo abantu boshi kuhebamo ab’omu milala yerhu barhakolera Yehova. Banene yibachiseza oku kalamo kabo ka buli lusiku, buzira kumenya ebyarhengerera, k’okuderha, “amalibuko makulu marhasaga kubaho kurhenga oku murhondero gw’egulu kuhika zene marhakanachishuba kubaho.” (Mt. 24:21) Rhulonzeze bamenye bichi byarhengerera omu mango m’okucha olubanja, k’okuderha, edini ly’obubeshi lyalimbulwa, n’egulu libi lyoshi lya Shetani lyanalimbulwa oku vita ly’Armagedoni. (Ufu. 16:14, 16; 17:16, 17; 19:11, 19, 20) Rhuli rhwasalira yi bantu banene nk’oku byakanagalikana bayunvirize ebi rhuli rhwababwira banachishoge kukolera Yehova haguma nerhu zene. Gurhe si oku bilolere balala barhali barhuyunviriza zene, kuhebamo n’abantu bazigirwa b’emilala yerhu?
10. Bulagurhe kuli kw’akamaro bwenene rhugenderere kuhereza abantu omukonge oku bilolere ebyarhengerera hanola hofi hofi?
10 Nk’ok’omwazi gurere gwalifasiriye, obulonza bwa Yehova kuli kulonza kuyokola abantu nji bahindamula omurhima gwabo amango nji babona Babiloni Mukulu alimbulwa. Obola ntyo ku bili, birhuhemere rhubone oku bili by’akamaro bwenene kugenderera kubahubiri zene. Waza kw’echila: Ebirhuli rhwababwira zene nkabaga nji byakarhuma bayibuka chintu chilebe agola mango. (Huzanya na Ezekieli 33:33.) Nkabaga nji bayibuka omukonge rhwabahaga n’echola chanabashunika bayinje omu buharamye buchere akasanzi kachiliho. Kuguma n’omulanzi w’epirizo y’omu Filipi ya mira wahindamulaga omurhima gwage amala kubona “omusisi gunene gwagera.” Nkabaga bantu baguma barhali barhuyunviriza zene, nji kabahindamula emirhima yabo enyuma y’okubona gurhe Babiloni Mukulu alimbulwa hano hofi hofi.—Mdo. 16:25-34.
RHUNAHUBIRI BULALA RHUZIGIRE YEHOVA N’EZINO LYAGE
11. Gurhe rhwakahereza Yehova obukuze, olukengo, n’emisi? (Ufunuo 4:11) (Olole n’efoto.)
11 Empanvu y’akamaro bwenene enarhuma rhwahubiri eli bulala rhuzigire Yehova Mungu n’ezino lyage lichesibwa. Rhunabona akasi kerhu k’okuhubiri nka njira y’okukuza Mungu rhuzigire. (Osome Ufunuo 4:11.) Nerhu rhuyemerere n’omurhima goshi ebila binwa biderhere ntya: Okwanene Yehova Mungu kuhaabwa, obukuuze, olukengo, obuhashe changwa emisi kurhenga oku bakozi bawe bemana. Rhunamuhereza obukuze n’olukengo amango rhuli rhwaganira n’abandi bantu oku bintu biyemezeze oku yi “walemaga ebintu byoshi” kandi rhulamire bulala yewarhuhaga akalamo. Rhunahereza Yehova emisi k’okuderha emisi yerhu amango rhuli rhwakolesa akasanzi kerhu, emisi yerhu, n’ebintu rhugwerhe, amango rhuli rhwahubiri nk’oku rhwakanagala. (Mt. 6:33; Lu. 13:24; Kol. 3:23) Omu binwa bigeke, rhusima kuderha oku bilolere Mungu rhuzigire. Kandi rhunayunva rhushunikirwe kubwira abandi oku bilolere ezino lyage n’oku babwira ali Mungu wa nyabachi. Bulagurhe?
Rhunaha Yehova obuhashe bwerhu amango rhuli rhwakolesa akasanzi kerhu, emisi n’ebirhugwerhe omu kukola akasi k’amahubiri mu buli hali nk’oku byakanagalikana (Olole echifungo che 11)
12. Gurhe rhunachesa ezino lya Yehova omu kasi kerhu k’okuhubiri?
12 Obuzigire bwerhu ku Yehova bunarhushunika rhuchese ezino lyage. (Mt. 6:9) Echola chilonzeze kuderha oku rhunalonza kubwira abantu okw’ebi Shetani anaderha oku bilolere Yehova biba by’obubeshi. (Mwa. 3:1-5; Yob. 2:4; Yoh. 8:44) Amango rhuli omu mahubiri, rhuba rhulonzeze kuba oku lunda lwa Mungu werhu, n’okubwira boshi balonzeze kurhuyunviriza obukweri oku bimulolere. Rhulonzeze kumenyesa buli yeshi okw’engeso ya Yehova nkulu buli buzigire, okw’enjira yage y’okurhegeka eli y’okunali kandi y’ehaki, n’oku Obwami bwage hanola hofi bwamala amalibuko n’okulerha omurhula n’obusime oku mulala goshi gw’abantu. (Zb. 37:10, 11, 29; 1 Yo. 4:8) Amango rhuli rhwaderhera erenge lya Yehova omu kasi kerhu k’amahubiri, rhunaba eyi rhuli rhwachesa ezino lyage. Kandi rhunagwarha obusime bulala rhunaba eyi rhwajirire ebi rhwalikwanene kujira rhwewe nka Bahamirizi ba Yehova. Bulagurhe rhuderhere ntyo?
13. Bulagurhe rhunachiyunva rhugwerhe olukengo l’okuyirikwa Bahamirizi ba Yehova? (Isaya 43:10-12)
13 Yehova achishogere kurhuyirika “bahamirizi” bage. (Osome Isaya 43:10-12.) Mu myaka migeke yamagera, amaruba marhengere oku Baraza Lirhambwire mali maderhere ntya: “Olukengo lunene bwenene rhugwerhe luli oku rhuyirikirwe Bahamirizi ba Yehova.” c Bulagurhe ntyo ku bili? Rhuganire k’ogula mufano. Nk’ogwerhe olushinja oku tribinali onalonzeze muntu mulebe akubere muhamirizi, wakachishoga omuntu oyinji, ey’olangalire, omuntu ogwerhe erenge linja lyarhuma aba muntu wakulangalirwa. Omu kurhurhola rhube Bahamirizi bage, Yehova ayerekene okw’arhuyinji bwinja, okw’arhulangalire, yirhubwira abandi oku yenyine ye Mungu w’okuli. Rhunachiyunva rhugwerhe lukengo lunene l’okuyirikwa Bahamirizi bage, n’oku rhunakolesa buli kasanzi koshi rhugwerhe omu kumenyesa ezino lyage omu kuyerekana okw’ebintu bibi byoshi baderhere oku bimulolere bili by’obubeshi. Omu njira eli nk’eyola, rhwaba eyi rhwamajira nk’oku ezino lyerhu liderhere, k’okuderha Abahamirizi ba Yehova!—Zb. 83:18; Ro. 10:13-15.
RHWAGENDERERA KUHUBIRI KUGERA OKU BUZINDA
14. Bintu bihe bisimisize byakarhengerera hanola hofi hofi?
14 Rhugwerhe busime bunene b’okubona ebyakarhengerera hanola hofi hofi! Kugerera emigisho ya Yehova, rhugwerhe obulangalire b’okubona bantu banene bwenene bayemera obukweri embere amalibuko makulu marhengerere. Kandi rhugwerhe busime bunene bwenene okumenya oku chiro n’omu mango m’amalibuko makulu, ebihe bikomere bwenene birhasaga kubaho, nkabaga bantu banene bwenene nji barhenga omu gulu lya Shetani, n’okuyinja kusingiza Yehova haguma nerhu!—Mdo. 13:48.
15-16. Bichi rhwagenderera kujira, na kuhika mango chi?
15 Oku rhunali rhwalindira, rhugwerhe akasi k’akamaro rhuli rhwakola. Akasi rhurhakachifa rhwakolere haba n’eliguma. Rhugwerhe olukengo l’okuhubiri emyazi minja y’Obwami bwa Mungu oku gulu lyoshi. Mw’akola kasanzi k’anako, rhukwanene kuhereza abantu omukonge oku bilolere ebyarhengerera hanola hofi hofi. Abantu bakwanene kumenya oku obuzinda bwalinola gulu libi buli hofi bwenene. Naho amango akasanzi k’okucha olubanja nji kahika, nji bamenya okw’emyazi minja rhwaliri rhwahubiri bwaliri burhumwa burhengere emwa Mungu.—Eze. 38:23.
16 Naho si, bichi rhuhigirire kujira? Omu kushunikwa n’obuzigire, k’okuderha okusima emyazi minja, obuzigire oku bantu, n’echakamaro bwenene obuzigire ku Yehova Mungu n’oku zino lyage, byarhushunika rhuhubiri nanyorha nene, juba-juba n’obushiru boshi kugera aha Yehova aderha ntya, “Hoshaho!”
OLWIMPO 54 “Eyi ye njira”
a Embuganano nkulu ya buli mwaka y’omu Siku 7, Mwezi gwe 10, 2023, yajirwaga omu New York, États-Unis oku Chumbi ly’Embuganano Nkulu ly’Abahamirizi ba Yehova lye Newburgh. Eprograme yoshi yaliheberwe oku JW Télédiffusion—Echigabi cha 1 chahebwako omu Mwezi gwe 11, 2023 n’Echigabi cha 2 omu Mwezi gwa 1, 2024.
b Olole omwazi “Biblia inabadilisha Maisha ya Watu (Ebiblia Enahindamula Akalamo k’Abantu)—Nilifurahia Majibu ya Biblia Yenye Kuwa Wazi na Yenye Kueleweka,” (Nalisimire Amajibu m’Ebiblia Mali Wazi Manayunvikene) omu Munara g’Omulanzi gw’abantu boshi gwa lusiku 1 Mwezi gwa 2, 2015
