MWAZI G’OKUYIGA 18
OLWIMPO 1 Engeso za Yehova
Rhulangalire Obubabale “b’Omuzuzi w’Egulu Lyoshi”!
“Omuzuzi w’egulu lyoshi arhajira eby’okunali si?”—MWA. 18:25.
EBIRHWAYIGA
Rhwamenya binene oku bilolere obubabale bwa Yehova n’ehaki yage oku bilolere obufuuke bw’abantu barhali banya-kunali.
1. Chintu chihe chihebere omurhima Yehova aliyigirize Abrahamu?
YALIRI nganiro Abrahamu arhakafire ayibagire haba n’akatyu. Kugerera malayika, Mungu abwira Abrahamu okw’aliri hofi kulimbula evile ye Sodoma ne Gomora. Ogola mwazi gwalihangayisize bwenene oyola mulume mwimana. Abaza Yehova ntya: “Kweri si walimbula abanya-kunali haguma n’abantu babi? . . . Omuzuzi (Omuchi w’Emanja) w’egulu lyoshi arhajira eby’okunali si?” Omu kulembera Yehova aliyigirize mwira wage muzigirwa echintu ch’akamaro chakarhuheba omurhima rhweshi: Mungu arhakafa alimbwire abanya-kunali.—Mwa. 18:23-33.
2. Gurhe rhwakachizera okw’amango Yehova amachira abantu olubanja buli mango anajira ebinja n’okuyerekana obubabale?
2 Nka gurhe rhwakachizera okw’amango Yehova amachira abantu olubanja buli mango anajira eby’okunali n’okuyerekana obonjo? Bulala rhumenyere oku “Yehova anabona omu mirhima” y’abantu. (1 Sa. 16:7) Kweri, aba amenyere “omurhima gwa buli muntu.” (1 Fa. 8:39; 1 Ny. 28:9) Obola buli bukweri busomeze. Yehova ali mwengehe kurhulusha, bobola, buli mango rhurhakamenya bulagurhe anarhola esimikiro zilebe. Entumwa Paulo aliderhere ntya oku bilolere Yehova Mungu: “Intaye wakayunva bwinja emanja zage!”—Ro. 11:33.
3-4. Bibazo bihe rhwakagwarha mango maguma, na bichi rhwaganirako mu gunola mwazi? (Yohana 5:28, 29)
3 Aliko, chiro akaba oku rhumenyere oku Yehova anajira ebikwanene, rhwakachibaza ebibazo bili kuguma n’ebi Abrahamu aligwerhe. Chiro na mango maguma rhwakachibaza ntya: ‘Ka byakashoboka abantu Yehova alimbulaga omu Sodoma ne Gomora bashube kulama? Byakashobokana si oku bantu baguma mubo “nji bafuka omu . . . bufuuke bw’abarhali banya-kunali”?’—Mdo. 24:15.
4 Lekaga rhulole ebirhuba rhumenyere oku bilolere obufuuke. Rhuchizindire kuhaabwa amafasiriyo mahyahya oku bilolere “obufuuke bw’akalamo” “n’obufuuke b’okuchirwa olubanja.” a (Osome Yohana 5:28, 29.) Amola mafasiriyo marhumire rhwahindamula loshi okuntu rhwaliyinji. Rhwaganira kw’agola mafasiriyo mu gunola mwazi n’omu gw’akulikiraho. Oku bilolere emanja za Yehova z’okunali, rhwayiga oku birhurhamenyere na buzinda rhwayiga oku birhumenyere.
EBI RHURHAMENYERE
5. Bichi rhwagendaga rhwaderha mira oku bilolere abantu Yehova alimbulanga be Sodoma ne Gomora?
5 Omu mango magerere, ebitabu byerhu byaliri byaderhera oku bilolere ebyahikira aba Yehova achirire olubanja oku barhali banya-kunali. Rhwabaga rhwaderhere oku balala Yehova achirire olubanja, nka balala alimbulaga omu Sodoma ne Gomara oku barhakafuuka. Aliko enyuma y’okuyiga bwinja-bwinja n’okusalira eju y’echola, bibonekene oku rhurhakaderha ok’obola buli bukweri. Bulagurhe?
6. Mifano ehe miguma eyerekene emanja za Yehova oku bilolere abantu barhali banya-kunali, na bichi rhurhamenyere?
6 Rhuganire ku bibazo bilebe byarhengerere. Hali ngani zinene ze Biblia ziderhere okuntu Yehova achiraga olubanja abantu barhali banya-kunali. Omufano, Yehova alilimbwire abantu boshi olekere Nowa n’omulala gwage. Yehova alikoleseze Abaizraeli yibalimbula mashanja mushanvu malilamire omu Chihugo Chilaganano. Kandi alikoleseze malayika muguma y’ayirha bantu 185 000 by’abasoda be Ashuru mu budufu buguma. (Mwa. 7:23; Kum. 7:1-3; Isa. 37:36, 37) Mw’ezola hali si, ka hali ahe Biblia erhubwirire bwinja bwinja oku Yehova achishogere kulimbula loshi loshi, buli muntu mw’abola n’okw’arhakabafuula? Nanga, arhali ku bili. Bulagurhe rhwakaderha ntyo?
7 Bichi rhurhamenyere oku bilolere abantu Mungu alimbulaga amango m’Echihonzi changwa balala balimbulwaga amango Abaizraeli bafarhaga echihugo che Kanaani? (Olole efoto chiganda.)
7 Omu mifano rhwamaganirako, rhurhamenyere nka gurhe Yehova aliri achira olubanja buli muntu mw’abola; kandi rhurhamenyere akaba buli muntu mw’abola bafaga, alipatire orozo l’okuyiga oku bilolere Yehova n’okuhungama. Amango Ebiblia eli y’aderha oku mango m’Echihonzi, enaderha oku Nowa aliri “muhubiri w’okunali.” (2 Pe. 2:5) Aliko erhaderhere okw’amango aliri ayumbaka esafina nzibu-zibu analiri achihangana kuhubiri buli muntu waliri oku gulu. Intyo konoko, rhurhamenyere akaba abantu boshi babi balilamire omu chihugo che Kanaani balipatire orozo l’okuyiga oku bilolere Yehova n’okuhindamula olugenzi lwabo.
Nowa n’omulala gwage bali bayumbaka esafina nzibu-zibu. Rhurhamenyere akaba Nowa n’omulala gwage balipatire akasanzi k’okuhubiri buli muntu yeshi oku gulu embere Envula y’Echihonzi ehike (Olole echifungo cha 7)
8. Bichi rhurhamenyere oku bilolere abantu balilamire omu Sodoma ne Gomora?
8 Gurhe si oku bilolere abantu Yehova alimbulaga omu Sodoma ne Gomora? Omunya-kunali oyirikirwe Loti alilamire haguma n’abola bantu. Aliko si rhwakamenya akaba Loti alihubirire bantu banene mubo? Nanga. Baliri bantu babi, aliko si, buli muntu alimenyere echinja n’echibi? Bibonekene oku arhali ntyo ku byaliri, aliko oyibuke okw’echigusho ch’abalume ba mw’eyola vile balilonzeze kufarhira emisi abageni ba Loti. Ebiblia ederhere oku mw’echola chigusho ch’abantu mwaliri “abarhabana kuhika oku bashaja.” (Mwa. 19:4; 2 Pe. 2:7) Rhwakaderha si kweri, oku Yehova Mungu w’obonjo achishogere oku ntaye n’omuguma mw’abola bantu nji wafuuka si? Nanga rhurhakaderha ntyo. Buli bukweri oku Yehova alibwirire Abrahamu oku nta banya-kunali ekumi bali mw’eyola vile. (Mwa. 18:32) Bolola, barhaliri banya-kunali, na Yehova aligwerhe ehaki y’okubalimbula eju y’ebijiro byabo. Aliko si kweri, rhwakaderha oku ntaye n’omuguma mubo si “nji wafuuka . . . omu bufuuke bw’abarhali banya-kunali”? Nanga, rhurhakaderha ntyo!
9. Bichi rhurhamenyere oku bilolere Sulemani?
9 Hali ezindi ngani ze Biblia ziderhere okw’abantu baliri banya-kunali balihindamukire barhachiba banya-kunali. Omufano, Omwami Sulemani. Alimenyere bwinja bwinja Yehova ali nde, analimenyere gurhe akwanene kumuharamya na Yehova ali mugishire bwenene; aliko buzinda, Sulemani arhondera kuharamya bamungu b’obubeshi. N’echola charhuma Yehova agwarha mugayo gunene bwenene, n’eshanja lyoshi lye Izraeli lyalibuzwa bwenene omu magana me myaka eju y’ebyaha bya Sulemani. Ebiblia ederhere okw’amango Sulemani afa “bamuhamba haguma na bashekuliza” kuhebamo n’abalume bemana nka Mwami Daudi. (1 Fa. 11:5-9, 43; 2 Fa. 23:13) Aliko si, bulala Ebiblia efire chakukolesa olola luderho, k’okuderha oku Yehova nj’afuula Sulemani? Nanga arhali ntyo kwe Biblia ederhere. Aliko baguma bakawaza oku Sulemani nj’afuuka bulala Ebiblia ederhere oku “owafire anaba eyakulirwe echaha chage.” (Ro. 6:7) Aliko echola chirhaderhere oku balala boshi bafire nji bafuuka. Olekere n’ebyo, arhali mpu bulala omuntu afire bye biyerekene okw’agwerhe ehaki y’okushuba kulama. Obufuuke eli mpaano erhengere emwa Darha w’obuzigire. Nj’afuula balala alonzeze kuhereza orozo l’okumukolera esiku n’amango. (Yob. 14:13, 14; Yoh. 6:44) Sulemani nj’ahabwa empaano eli nk’eyola si? Yehova yenyine y’emenyere echishubizo si rhwabo nanga. Aliko rhumenyere oku Yehova nj’ajira ebikwanene.
EBI RHUMENYERE
10. Gurhe Yehova anachiyunva oku bilolere okulimbula abantu? (Ezekieli 33:11) (Olole n’efoto.)
10 Osome Ezekieli 33:11. Yehova arhubwirire mawazo mahe agwerhe oku bilolere okuchira abantu olubanja. Entumwa Petro aliyerekezwe n’eroho lya Mungu agalukire ebinwa by’omulebi Ezekieli, ayandika ntya: “Yehova . . . arhalonzeze oku habe n’omuntu n’omuguma walimbulwa.” (2 Pe. 3:9) Ebyola binwa birhuhebere omurhima, rhumenyere oku Yehova arhakalimbula omuntu esiku n’amango olekere amango agwerhe empanvu z’okujira ntyo. Ali Mungu w’obubabale bunene kandi ali Mungu onayerekana obonjo amango moshi bihemere okujira ntyo.
Amango m’obufuuke bw’abantu barhali banya-kunali, bantu banene nji bapata orhozo l’okuyiga oku bilolere Yehova (Olole echifungo che 10)
11. Bande barhakafuuka na nka gurhe rhumenyere ntyo?
11 Bichi rhumenyere oku bilolere abantu barhakafuuka? Ebiblia ehanire mifano migeke yonyine. b Yesu aliyerekene oku Yuda Iskariote arhakafuuka. c (Mk. 14:21.) Yuda alimenyere oku eby’ajirire birhalipatene n’obulonza bwa Yehova Mungu n’Omugala. Aliko chiro akaba ntyo abijira. (Olole olwandiko lwa Marko 3:29 n’omwazi guli oku jw.org guderhere Zambi Isiyo Samehewa Ni Nini? (Echaha Chirhakababalirwa Che chihe?) Changwa olole Omunara g’Omulanzi gwa Siku 15, Mwezi gwa 7, 2007 bukurasa 17) Intyo konoko ku Yesu aliderhere oku bilolere abakulu b’amadini baliri bamupinga, bakafire buzira bulangalire b’obufuuke. (Mt. 23:33) Kandi Paulo aliderhere okw’ebigamba by’obwemere birhahungamire birhakafuuka.—Ebr. 6:4-8; 10:29.
12. Bichi rhumenyere oku bilolere obubabale bwa Yehova? Lerha emifano.
12 Aliko nk’oku rhwabaga rhwaganirire burhanzi, Yehova ajira bubabale bunene “arhanalonzeze oku habe chiro n’omuntu n’omuguma walimbulwa.” Nka gurhe ayerekanaga obubabale bwage ku bantu balebe balijirire ebyaha bikomere? Mwami Daudi alijirire ebyaha binene bikomere biheberwemo obugonyi n’obunizi. Aliko chiro akaba ntyo, Daudi alihungamire ebyaha byage, na Yehova oku bubabale bwage amubabalira. (2 Sa. 12:1-13) Mwami Manase alijirire bintu bibi binene bwenene hofi akalamo kage koshi. Chiro akaba oku Manase alikolere ebyola byaha byoshi bikomere bwenene, Yehova alimuyunvirhire obonjo anamubabalira ebyaha byage bulala alihungamire. (2 Ny. 33:9-16) Eyola mifano eyerekene oku Yehova anarhubabalira amango moshi abwene oku hali empanvu y’okujira ntyo. Yehova nj’afuula abantu bali nk’abola bulala balimenyere oku bakolere ebyaha bikomere banahungama.
13. a) Bulagurhe Yehova ababaliraga abantu be Ninawi? b) Bichi Yesu aliderhere buzinda oku bilolere abantu be Ninawi?
13 Kandi rhumenyere bintu bilebe oku bilolere obubabale bwa Yehova kugerera eby’ajiriraga abantu be Ninawi. Mungu abwira Yona ntya: “Amabi mabo magerere emunda ndi.” Aliko amango bahungama ebyaha byabo Yehova abababalira oku bwinja. Yehova aliyerekene bonjo bunene kulusha obwa Yona. Yona agwarha bisirani binene na Mungu abona okw’amuyibuse okw’abola bantu be Ninawi “barhamenyere chiro echinja n’echibi.” (Yon. 1:1, 2; 3:10; 4:9-11) Buzinda Yesu aliyinjire kukolesa ogola mufano oku bilolere okunali n’obubabale bwa Yehova. Yesu aliderhere okw’abantu be Ninawi bahungamaga ‘bakayumangire amango m’okucha olubanja.’—Mt. 12:41.
14. “Bichi obufuuke b’okuchirwa olubanja” buderhere oku bilolere abantu be Ninawi?
14 Aliko si, okuderha okw’abantu be Ninawi “nji bayumanga amango m’okuchirwa olubanja” k’okuderha gurhe? Yesu aliri aderha oku bilolere “obufuuke b’okuchirwa olubanja” amango mayinjire. (Yoh. 5:29) Aliri aderha oku bilolere Oburhegesi bwage bwa Myaka Chihumbi, amango “abanya-kunali n’ abarhali banya-kunali nji bafuuka.” (Mdo. 24:15) Abarhali banya-kunali nji “bafuuka n’okuchirwa olubanja.” Echola chilolenzeze kuderha okw’amango abola nji bamala kufuuka, Yehova na Yesu nji balola akaba abola bantu bakenga n’okukolesa ebi bayigire. Omuntu we Ninawi nji wafuuka akalahira kuharamya Yehova, arhakamuyemerera agenderere kulama. (Isa. 65:20) Aliko, balala boshi nji bachishoga kuharamya Yehova oku bwimana, nji bapata orozo l’okulama esiku n’amango!—Da. 12:2.
15. a) Bulagurhe rhurhakwanene kuderha oku nta muntu n’omuguma omu balimbulwaga omu Sodoma ne Gomora nji wafuuka? b) Nka gurhe rhwakayunva ebinwa bili omu lwandiko lwa Yuda 7? (Olole echisandaku “ Bichi Yuda Alonzaga Kuderha?”)
15 Amango aliri aderha oku bilolere abantu be Sodoma ne Gomora, Yesu aderhere ok’oku “Lusiku l’Okucha Olubanja,” nji byayorohera abantu be Sodoma ne Gomora kulusha balala bamulahiraga banalahira enyigirizo zage. (Mt. 10:14, 15; 11:23, 24; Lu. 10:12) Bichi Yesu alonzaga kuderha? Ka Yesu aliri akolesa ebinwa by’okununiriza konyine, amango aderha okw’abantu b’omu mango mage baliri babi bwenene kulusha abantu be Sodoma ne Gomora? Oyibuke okw’amango Yesu aderha okw’abantu be Ninawi nji bayumanga amango m’okucha olubanja, kurhaliri kukolesa ebinwa by’okununiriza konyine si bwaliri bukweri. Bibonekene okw’ebi Yesu aderhaga m’amawazo aligwerhe oku bantu be Sodoma ne Gomora. d “Olusiku l’Okucha Olubanja” aliri aderhako ahala, lona luguma n’olw’aderhagako oku bilolere abantu be Ninawi. Kuguma n’abantu be Ninawi, abantu be Sodoma ne Gomora balijirire ebintu bibihire. Aliko abantu be Ninawi bowe balipatire akasanzi k’okuhungama. Kandi oyibuke ebinwa Yesu aderhaga oku bilolere “obufuuke b’okuchirwa olubanja.” Buheberwemo na “balala bajiraga ebintu bibi.” (Yoh. 5:29) Bobola, byakashobokana oku hali obulangalire ku bantu baguma b’omu Sodoma ne Gomora. Byakashobakana kandi okw’abantu baguma mw’abola nji bafuuka. Nkabaga nji rhwapata orozo l’okubayigiriza oku bilolere Yehova na Yesu Kristu!
16. Bichi rhumenyere oku bilolere abantu Yehova nj’achishoga kufuula? (Yeremia 17:10)
16 Osome Yeremia 17:10. M’olula lwandiko rhwasomere, rhwamenyere okuntu Yehova anacha emanja: Buli mango Yehova “anasuzuma omurhima, anagerereza n’amawazo ma ndani bwenene.” Amango achishoga inde nj’afuula, “nj’ahereza buli muguma nk’okw’akolere.” Amango byamahema okw’ajire ntyo, Yehova arhafunda kuhana obuhane akaba ntyo ku byahemere ajire, aliko nj’ababalira akaba bishobokene. Bobola rhurhakwanene kuderha oku muntu mulebe arhakafuuka olekere Ebiblia ebe ederhere ntyo bwinja bwinja!
“OMUZUZI W’EGULU LYOSHI” “NJ’AJIRA EBY’OKUNALI”
17. Bichi nji byahikira abantu bafire?
17 Kurhenga amango Adamu na Eva bachiheba oku lunda lwa Shetani n’okugomera Yehova Mungu, amamiliyare m’abantu mafire. “Olufu,” ali mushombanyi mubi bwenene! (1 Ko. 15:26) Bichi nji byahikira abola bantu boshi? Chigusho chigeke ch’abantu 144 000 nji bapata obufuuke bw’akalamo karhakafa embingu. (Ufu. 14:1) Luganjo lunene lw’abalume n’abakazi bemana banazigire Yehova nji bapata “obufuuke . . . bw’abanya-kunali,” n’okulama esiku n’amango oku gulu nka bagenderere kubera bemana omu Burhegesi bwa Kristu bwa Myaka Chihumbi n’amango m’echigeregezo ch’obuzinda. (Da. 12:13; Ebr. 12:1) Kandi, omu mango ma Myaka Chihumbi, “abarhali banya-kunali,” kuhebamo na balala barhachigeraga kukolera Yehova, chiro na balala “baliri bajira ebintu bibi”—nji bahabwa orozo l’okuhindamula enjira zabo n’okuba bakozi ba Yehova Mungu. (Lu. 23:42, 43) Aliko, bantu baguma baliri babi bwenene balichishogere kuba bigamba ku Yehova n’oku mihigo yage, Yehova achishogere oku barhakafuuka chiro.—Lu. 12:4, 5.
18-19. a) Bulagurhe rhukwanene kuchizera emanja za Yehova oku bilolere abafire? (Isaya 55:8, 9) b) Bichi rhwaganiko omu mwazi gwakulikiraho?
18 Rhwakachizera okw’amango moshi Yehova amachira abantu olubanja, buli mango arhola esimikiro y’okuli si? Nechi! Abrahamu alimenyere bwinja oku Yehova ali mushinganyanya, ali mwengehe, agwerhe obubabale, n’okw’anali “Muzuzi w’egulu lyoshi.” Yehova akoomeze Omugala, anamuha engabane y’okuchira buli muntu yeshi olubanja. (Yoh. 5:22) Yehova na Yesu bamenyere byoshi biba omu murhima gwa buli muntu. (Mt. 9:4) Bobola, amango bachira buli muntu olubanja amango moshi nji “bajira eby’okunali”!
19 Rhujage rhwalangalira okw’esimikiro za Yehova zoshi z’ezinja kulusha. Rhunamenyere oku rhurhagwerhe obuhashe b’okuchira abandi olubanja, aliko Yehova y’egwerhe obola buhashe! (Osome Isaya 55:8, 9.) Echola chechirhumire rhwalangalira Yehova n’Omugala oku bacha emanja zoshi. Kandi rhumenyere ok’Omwami Yesu nj’ayiganya ehaki y’Eshe oku bushinganyanya n’obubabale. (Isa. 11:3, 4) Aliko si, bichi rhwakaderha oku bilolere okuntu Yehova na Yesu nji bachira abantu olubanja amango m’amalibuko makulu? Bichi rhurhamenyere na bichi rhumenyere? Omwazi gwakuliraho gwashubiza kw’ebyola bibazo.
OLWIMPO 57 Okuhubiri Abantu ba Buli Lubero
b Oku bilolere Adamu, Eva, na Kaini, olole Omunara g’Omulanzi g’Omwezi gwa 1, 2013, bukurasa 12, amahugulo m’eshishi.
c “Echinwa “omwana w’okulimbulwa” chibonekene omu lwandiko lwa Yohana 17:12 chiyerekene okw’amango Yuda akafire, akalimbwirwe loshi loshi buzira bulangalire b’okufuuka.”
d Amango omuntu ali akolesa oluderho l’omufano l’okununiriza, anaba ey’ali akabya omu by’ali aderha omu kushonda kuseza obwenge ku wazo lilebe, aliko eyarhalonzeze mpu ebinwa byage biyunvikane chinwa oku chinwa. Aliko ebi Yesu aderhaga oku bilolere abantu be Sodoma ne Gomora lurhaliri luderho l’omufano l’okununiriza s’aliko bikwanene kuyunvikana nk’okubinali.
