1. Bichi Yehova ajirire buli muguma werhu?

YEHOVA akulwire buli muguma werhu emunda ali. (Yoh. 6:44) Waza k’okuderha gurhe okola. Oku Yehova aliri asuzuma amamilioni m’abantu oku gulu, alibwene echintu ch’akamaro omu murhima gwawe, k’okuderha oku wakamuzigira. (1 Ny. 28:9) Yehova akumenyere, anakuyunva, anakuzigiire. Echola chihebere omurhima bwenene!

2. Nka gurhe Yesu arhurhabalaga kuyunva bwinja kangana gurhe Yehova alagire ku buli muguma werhu?

² Yehova akulagireko bwenene, analagire ku bene-benyu na bali-benyu ba Bakristu. Yi rhugala kuyunva echola bwinja, Yesu alihuzenye Yehova n’omungeri. Nka ntama 1 yamataruka omu chishumba cha ntama 100, bichi omungeri akajira? “Aleka 99 oku misozi n’okuja kulonza eyola yaherere.” Amango omungeri amabona eyola ntama yaheraga, arhayiyunvira oburhe. Achishinga. Bichi birhuyigirize? Buli ntama eli y’akamaro embere za Yehova. Yesu aliderhere ntya: “Darha oli omu mbingu arhalonzeze haba n’omuguma mw’abala badorho asherere.”​—Mt. 18:12-14.

3. Bichi rhwaganirako mu gunola mwazi?

³ Rhurhasimire haba n’ehityu rhukaba ntangiriro ya buli chintu chibi chakavuna bene-berhu na bali-berhu omurhima. Gurhe rhwakajira yi rhurhagayisa abandi? Na bichi rhwakajira akaba hali oyurhugayisize? Rhwashubiza kw’ebyola bibazo mu gunola mwazi. Aliko leka rhurhange rhuganire bwenene oku bilolere “abala badorho” baganirirwe mu Matayo sura 18.

4. “Abala badorho” bali bande?

⁴ “Abala badorho” bali banafunzi ba Yesu ba buli chingano. Boshi bali “nka bana” bulala bali tayari kuyigirizwa na Yesu. (Mt. 18:3) Baheberwe mw’abantu barhengere omu maeneo n’emicho bilengene banagwerhe oborhere bwabo-bwabo, aliko boshi bagwerhe obwemere mu Kristu. Naye azigiirebo bwenene.​—Mt. 18:6; Yoh. 1:12.

5. Gurhe Yehova anachiyunva amango omuntu amakwaza changwa agayise muguma w’omu bantu bage?

⁵ “Abola badorho” boshi bali b’akamaro embere za Yehova. Yi rhuyunva bwinja okuntu anababona, waza oku kuntu rhubona abana. Rhunababona oku bali b’akamaro. Rhunasima kubalanga bulala barhagwerhe misi, barhamenyere binene, barhanagwerhe bwengehe kuguma n’abakulu. Kweri rhurhasima omuntu akagayisa owindi; ahanene rhunayunva burhe bunene amango omuntu amagayisa omwana. Konakuguma Yehova alonzeze arhulange. Anagaya chiro n’okuyunva oburhe amango hamajira omuntu warhuma muguma w’omu bantu bage asibuka changwa agaye!​—Isa. 63:9; Mk. 9:42.

6. Nk’oku olwandiko lwa 1 Wakorinto 1:26-29 luderhere, nka gurhe egulu linabona abanafunzi ba Yesu?

⁶ Mu yindi njira nchi abanafunzi ba Yesu bali nka “badorho”? Bande si egulu libona nka b’akamaro? Abachire, abamenyikene bwenene, n’abakulu. Aliko abanafunzi ba Yesu banazigana kubonekana nka bantu ba ntya-ntya. Che chirhuma abantu banababona nka “badorho” barhagwerhe echi bamalire. (Osome 1 Wakorinto 1:26-29.) Aliko arhali ntyo ku Yehova yewe anababona.

7. Gurhe Yehova alonzeze rhuyinjage rhwabona bene-berhu na bali-berhu?

⁷ Yehova azigiire abakozi bage boshi, babe bamamukolera myaka minene changwa bali bahyahya omu kuli. Bene-berhu na bali-berhu boshi bali b’akamaro embere za Yehova, che chirhumire nerhu rhukwanene kubabona oku bali b’akamaro. Bihemere “rhugwarhe obuzigire oku chinya-buguma choshi cha bene-berhu,” arhali mpu baguma mubo bonyine. (1 Pe. 2:17) Rhukwanene kuba tayari kujira buli choshi rhwakagala omu kubalanga n’okubalagako. Amango rhwamamenya oku hali omuntu rhwagayisize, rhurhakwanene kuba nka ntacho rhwajirire n’okuhwanza kuwaza ok’oyola muntu anagayira busha n’okw’anakwanene arhubabalire. Bulagurhe bantu baguma banagaya? Nkabaga eju y’okuntu bakulaga, bene-berhu baguma banabona nka ntacho bamalire. Abandi bali bahyahya omu kuli; barhanaza kumenya oku bakwanene kubabalira abandi amango bamajira amagosa. Koshi-koshi byakaba bili, rhukwanene kujira okwerhu koshi rhwakagala omu kuyunvikana n’abandi. Aliko kandi, omuntu ozigana kugayira busha naye akwanene kumenya okw’eyola erhali ngeso nyinja, anakwanene ayilwise. Akwanene kujira ntyo y’arhulera oku murhima y’analama bwinja haguma n’abandi.

8. Borhere buhe abantu baligwerhe omu siku za Yesu bwalihumire n’oku banafunzi bage?

⁸ Bichi byarhumaga Yesu aderha ku “abala badorho”? Abanafunzi bage balimubazize chinola chibazo: “Kanuni, inde ye mukulu bwenene omu Bwami bw’embingu?” (Mt. 18:1) Bayahudi banene ba mw’ezola siku baliri basima abandi bayinje bababona oku bali b’akamaro bwenene. Musomi muguma aderhere ntya: “Okugwarha olukengo n’okumenyikana bwenene by’ebintu baliri babona oku bili by’akamaro loshi omu kalamo kabo.”

9. Bichi abanafunzi ba Yesu balikwanene kujira?

⁹ Yesu alimenyere okw’abanafunzi bage  bakachihanganire bwenene yi bakula omu mirhima yabo engeso y’obuchilwira yaliyenere omu Bayahudi. Alibwirirebo ntya: “Omukulu bwenene mu mwewe abe nka mudorho bwenene, n’oyumangiire abe nk’oli wakolera abandi.” (Lu. 22:26) Rhunachigendesa “nka bana badorho” amango rhuli ‘rhwabona okw’abandi barhulushire.’ (Flp. 2:3) Oku rhuli rhwagenderera kugwarha obola borhere, ku rhurhanayinja rhwagayisa abandi juba-juba.

10. Hano lihe lya Paulo rhukwanene kufarha bwinja oku murhima?

¹⁰ Bene-berhu na bali-berhu barhulushire mu njira nguma changwa eyindi. Byakayoroha okubona echola amango rhusezeze obwenge oku ngeso zabo zinja. Rhukwanene kufarha bwinja oku murhima linola hano entumwa Paulo ahaga Abanyakorinto: “Nde okujirire tofauti n’abandi? Kweri, bichi ogwerhe orhahabwaga? Bobola, akaba kweri ech’ogwerhe wachihabwaga, gurhe wakachivuga nk’orhachihabwaga?” (1 Ko. 4:7) Che chirhumire rhurhahiira rhukalonza mpu abandi bayinje barhusingiza changwa mpu rhuchibone nka rhulushire abandi. Omufano, bene-berhu bayinji kugeza amajambo bwinja changwa bali-berhu bagala kurhonderesa bwinja amafunzo me Biblia, buli mango bakwanene kuha Yehova erenge ku byoshi bali bagala kukola.

11. Bichi Yesu arhuyigirize kugerera omufano g’omwami n’omuja wage?

¹¹ Amango Yesu amala kukengusa abanafunzi bage bamenye bayinja bagayisa abandi, ashambala oku mufano g’omwami n’omuja wage. Oyola mwami alibabalire deni linene bwenene oyola muja wage arhakagalire kujuha. Buzinda, oyola muja yon’oyola agambwa kubabalira deni ligeke bwenene owabo muja alimugwerhe. Enyuma w’ahola, oyola mwami akabula oyola muja orhababalira omu pirizo. Bichi birhuyigirize? Yesu aderha ntya: “Intyo ku Darha w’embingu naye akolera buli muguma mu mwewe akaba arhababalire mwene-wabo n’omurhima goshi.”​—Mt. 18:21-35.

12. Nka gurhe rhwakagayisa abandi nka rhulahire kubabalira?

¹² Eby’oyola muja ajiraga birhamubabazaga yewe yenyine, byalibabeze n’abandi. Ech’oburhanzi, alibabeze owabo muja omu kurhuma “bamuheba omu pirizo kugera amango akalipire edeni lyage.” Echa kabiri, aligayisize abandi baja baliri balola ech’ajirire. Amango abandi “baja babonaga ebyahikire, bayunva bagayire bwenene.” Konakuguma, ebijiro byerhu binahuma n’oku bandi. Akaba omuntu arhugayisize rhukanalahira kumubabalira, bichi byakarhengerera? Ech’oburhanzi, rhwamugayisa bulala rhwalahire kumubabalira, nkabaga rhurhanachimulagireko, rhurhanachimuzigiire. Echa kabiri, rhwavuruga abandi omu chibaga eyi babona oku nta murhula rhugwerhe n’oyola muntu.

13. Bichi ebi mwali-werhu muguma w’omupainiya ageragamo bikuyigirize?

¹³ Amango rhwamababalira bene-berhu na bali-berhu, rhwachiyunva bwinja n’okurhabala abandi nabo bachiyunve bwinja. Mwali-werhu muguma w’omupainiya oyirikirwe Crystal alichibwenere echola. Aligayisizwe na mwali-werhu muguma omu chibaga. Crystal aderhere ntya: “Mango maguma, hali okw’ebinwa byage birhali mu buzigire byaliri byankera. Ntaliri nasima chiro kugenda naye omu mahubiri. Nahwanza kuheza omwete g’okuhubiri n’omwishingo gwani.” Crystal aliri awaza okw’agwerhe empanvu y’okugaya. Aliko arhagendereraga kubikira oyola mwali-werhu omujinya changwa kuchiseza oku kuntu aliri achiyunva. Akolesa oku bwirhohye amahano me Biblia mali omu mwazi “Samehe Kutoka Katika Moyo Wako” guli omu Munara  g’Omulanzi gwa Siku 15 Mwezi gwe 10, 1999. Ababalira mwali-wabo. Crystal aderhere ntya: “Inkala ntegerere oku rhweshi rhukwanene kuchihangana rhuhindamuke, na Yehova ali tayari kurhubabalira buli lusiku. Nayunva nk’omuzigo gulemerere bwenene gwamantenga oku chirhugo. Nashubire gwarha omwishingo gwani.”

14. Nk’oku olwandiko lwa Matayo 18:21, 22 luderhere, chibazo chihe entumwa Petro akaba ey’aligwerhe, na bichi echishubizo cha Yesu chikuyigirize?

¹⁴ Rhumenyere oku rhukwanene rhubabalire; che na chintu chinja rhukwanene kujira. Aliko hali oku byakarhukomerera okujira ntyo. Entumwa Petro akaba ey’aliri achiyunva ntyo mango maguma. (Osome Matayo 18:21, 22.) Bichi byakakurhabala? Ech’oburhanzi, okengeere kangana gurhe Yehova akubabalire. (Mt. 18:32, 33) Rhurhakwanene obubabale bwage, aliko anarhubabalira oku busha. (Zb. 103:8-10) Konakuguma “nerhu rhukwanene kuzigirana.” Che chirhumire rhukwanene rhubabalire chiro byaba gurhe. Bene-berhu na bali-berhu bakwanene obubabale bwerhu. (1 Yo. 4:11) Echa kabiri, okengere oku byakarhengerera amango rhwamababalira. Rhwakarhabala omuntu warhugayisaga, rhwaheba obuguma omu chibaga, rhwalanga obwira bwerhu haguma na Yehova n’okuyunva rhuluhukire. (2 Ko. 2:7; Kol. 3:14) Buzinda, osalire olala orhuhemere rhubabalire abandi. Omenye waziga Shetani avuruga omurhula ogwerhe haguma na bene-benyu na bali-benyu. (Efe. 4:26, 27) Rhukenere oburhabale bwa Yehova akaba rhusimire rhuyake omurhego gwa Shetani.

15. Nk’oku olwandiko lwa Wakolosai 3:13 luderhere, bichi rhwakajira akaba rhwagayisizwe n’ebijiro bya mwene-werhu changwa mwali-werhu?

¹⁵ Gurhe si akaba mwene-werhu changwa mwali-werhu ajirire echintu chivire chakugayisa bwenene? Bichi okwanene kujira?  Ochihangane kugendereza omurhula. Osalire Yehova n’omurhima goshi. Omubwire arhabale oyola muntu wakugayisize nawe akurhabale obone engeso zinja agwerhe; engeso zinja zinarhuma Yehova amuzigira. (Lu. 6:28) Akaba ntako wakayibagira ebi mwene-werhu ajirire, olonze gurhe wakashambala naye. Kuli kwinja buli mango okumenya oku mwene-werhu naye arhalilonzeze okw’akugayise. (Mt. 5:23, 24; 1 Ko. 13:7) Amango wamaganira naye, omenye okw’akugwerhe kw’amawazo menja. Gurhe si byakaba akaba yewe arhalonzeze omurhula? ‘Ogenderere kumulembera.’ Orhaluhaga (orharhamaga). (Osome Wakolosai 3:13.) Ech’akamaro bwenene, omenye wabika omujinya, okujira ntyo kwakahanyagaza obwira bwawe na Yehova. Nta chintu oyemerage chakukwaza. Omu kujira ntyo, wayerekana ok’ozigiire Yehova bwenene kulusha echindi chintu choshi.​—Zb. 119:165.

16. Bichi buli muguma werhu akwanene kujira?

¹⁶ Rhusimisizwe n’olukengo l’okukolera Yehova omu buguma eyi rhuli “chishumba chiguma” chilangirwe na “mungeri muguma”! (Yoh. 10:16) Echitabu Tengenezo Yenye Kufanya Mapenzi ya Yehova, sura ye 16 chi. 8, chiderhere: “Y’oyunguka n’obola buguma, ogwerhe akasi k’okurhabala yi bugenderera.” Che chirhumire, bihemere “rhuchikoomeze okubona bene-berhu na bali-berhu nk’oku Yehova anababona.” Rhweshi rhuli “badorho” b’akamaro embere za Yehova. Ka ntyo k’onabona bene-benyu na bali-benyu? Yehova anabona n’okusimiswa na buli chintu onajira omu kubarhabala n’okubashishikala.​—Mt. 10:42.

17. Bichi rhuhigirire kujira?

¹⁷ Rhuzigiire bene-berhu na bali-berhu. Che chirhumire “rhuhigirire okurhaheba echisirhazo chwangwa echikwazo embere za mwene-werhu.” (Ro. 14:13) Rhunabona bene-berhu na bali-berhu oku barhulushire, rhunalonzeze kubabalirabo n’omurhima goshi. Rhurhayemeraga abandi barhuma rhwasibuka. Ahubwe, rhuhigirire “kugenderera kukulikira ebintu by’okulerha omurhula n’ebintu by’okuyumbaka buli muguma n’owindi.”​—Ro. 14:19.