MWAZI G’OKUYIGA 24
OLWIMPO 24 Yinja oku Musozi gwa Yehova
Obere Mugeni wa Yehova Esiku n’Amango!
“Yehova we, inde wakaba mugeni omu hema lyawe?”—ZB. 15:1.
EBIRHWAYIGA
Rhwamenya bichi rhwakajira yi rhugenderera kubera bera ba Yehova, kandi rhwabona bichi alonzeze rhujirire bera bage.
1. Nka gurhe Zaburi ye 15:1-5 yakarhurhabala?
OMU mwazi guhwere rhwaliyigire oku balala bahanire akalamo kabo emwa Yehova, banagenderere kugwarha obwira bukomere haguma naye, bakaba bageni omu hema lyage. Aliko si, bichi rhukwanene kujira yirhuba bageni bage? Zaburi ye 15 yashubiza kw’echola chibazo. (Osome Zaburi 15:1-5.) Eyola zaburi erhubwirire bichi rhukwanene kujira yi rhuba bera ba hofi ba Mungu.
2. Bichi byakaba eyi byebyashunikaga omwandisi we zaburi Daudi aderhe oku bilolere ehema lya Yehova?
2 Zaburi ye 15 ehwanzize omu kuderha ntya: “Yehova we, inde wakaba mugeni omu hema lyawe? Inde wakabera oku musozi gwawe guchesibwa?” (Zb. 15:1) Amango omwandisi we zaburi Daudi aderhaga oku bilolere “ehema” lya Yehova, nkabaga aliri awaza oku bilolere etabernakulo yaliri e Gibeoni mu mango malebe. N’amango aderha oku bilolere “omusozi guchesibwa” gwa Mungu, nkabaga aliri aderha oku bilolere omusozi Sayuni omu Yerusalemu. Omusozi Sayuni gwaliri ku bilometre binene engambo z’eside ye Gibeoni. Eyola munda yi Daudi ayumbakaga ehema, ahira mw’esanduku y’endagano kugera amango ehekalu lyayumbakagwa.—2 Sa. 6:17.
3. Bulagurhe rhukwanene kuyunva bwinja Zaburi ye 15? (Olole n’efoto.)
3 Kweri, banene omu Baizraeli barhaliyemererwe bakole oku tabernakulo. Na bageke bonyine babaliri baja omu hema ah’esanduku y’endagano yaliri. Aliko abakozi bemana boshi ba Yehova bakabere bageni omu hema lyage ly’omufano, omu kuba n’okubera bera bage. Rhweshi ye nyorha yerhu eyo. E Zaburi ye 15, eyerekene ngeso zilebe rhukwanene kukuza n’okuyerekana yi rhubera bera ba Yehova.
Abaizraeli b’omu siku za Daudi bakagalire kuchapa omu bwenge okuntu omuntu anaba mugeni omu hema lya Yehova (Olole echifungu cha 3)
OLAMBAGIRE BUZIRA MAGOSA ONAKOLE EBINJA
4. Nka gurhe rhumenyere k’okubatizwa arhali ch’echintu chonyine Yehova arhuhemere rhujire? (Isaya 48:1)
4 Zaburi 15:2, hayerekene ok’omuntu waba mwira wa Yehova ali “olala onalambagira buzira magosa n’okukola ebinja.” Echinwa “kulambagira” ‘n’okukola’ bili bintu rhukwanene kugenderera kujira buli mango. Aliko si kweri, rhwakagala kugenderera kulambagira buzira magosa? Nechi. Chiro akaba oku nta muntu oli mushinganyanya, Yehova akarhubona oku rhuli ‘rhwalambagira buzira magosa,’ nka rhujirire okwerhu koshi yi rhumukenga. Amango rhwamahana akalamo kerhu emwa Mungu n’okubatizwa eyi rhwamarhondera olugenzi haguma na Yehova. Omufano, omu mango ma mira, omuntu okuba Muizraeli, arhali chechaliyerekene oku hoshaho ali mugeni wa Yehova. Baguma baliri bamuhamagala aliko arhali “omu bukweri n’omu kunali.” (Osome Isaya 48:1.) Yi bayerekana oku kweri balonzeze kuba bageni ba Yehova, Abaizraeli balikwanene kuyiga amarhegeko ma Yehova n’okumakulikira. Intyo k’onoko, yi rhuba bakozi ba Yehova bayemererwe zene, hali ebindi bintu rhukwanene kugenderera kujira, olekere okubatizwa n’okuba Bahamirizi ba Yehova. Rhukwanene kugenderera “kujira ebili binja changwa ebili sawa.” Ebyola biheberwe mu bichi na bichi?
5. Okukenga Yehova omu bintu byoshi k’okuderha gurhe?
5 ‘Okulambagira buzira magosa n’okujira ebinja,’ emwa Yehova kurhali kuja oku mbuganona ze chibaga oku Chumbi ly’Obwami oku kahunda konyine.(1 Sa. 15:22) Rhukwanene kujira okwerhu koshi yi rhukenga Yehova omu hali zoshi z’akalamo kerhu, chiro n’amango rhuli rhwenyine. (Mez. 3:6; Muh. 12:13, 14) Rhukwanene kuchihangana kukenga Mungu chiro n’omu bintu bigeke-geke rhwakabona nka birhaherhe kamaro. Okujirantyo kwayerekana oku kweri rhumuzigire, naye anashuba kurhuzigira bwenene.—Yoh. 14:23; 1 Yo. 5:3.
6. Nk’ok’olwandiko lwa Waebrania 6:10-12 luyerekene, bichi bindi bili by’akamaro bwenene kulusha ebijiro byerhu by’obwimana by’amango magerere?
6 Yehova anasimiswa na byoshi rhwamukolere omu mango magerere. Aliko arhali mpu bulala rhwalijirire ebintu bikwirire omu mango magerere, hoshaho rhwagenderera kubera bageni omu hema lya Yehova. Echola ch’echiyerekenwe bwinja-bwinja omu Waebrania 6:10-12. (Osome.) Yehova arhakayibagira ebijiro byerhu binja bya mira. Aliko alonzeze rhugenderere kumukolera n’omurhima gwerhu goshi “kuhika oku buzinda.” Agenderera kubera mwira werhu esiku zoshi “akaba rhurhaluhire.”—Gal. 6:9.
ODERHE OBUKWERI OMU MURHIMA GWAWE
7. Okuderha obukweri omu murhima gwerhu k’okuderha gurhe?
7 Buli muntu yeshi olonzeze kuba mugeni omu hema lya Yehova, akwanene “kuderha obukweri omu murhima gwage.” (Zb. 15:2) Ebyola biderhere binene olekere okurhabesha. Yehova alonzeze rhube banihirwa mu byoshi rhunaderha n’okujira. (Ebr. 13:18) Echola chili chakamaro “bulala Yehova anashomba omuntu onabesha, aliko anajira obwira b’oku murhima n’omunyakunali.”—Mez. 3:32.
8. Bijiro nyabachi rhukwanene kuyaka?
8 Abanaderha obukweri omu mirhima yabo, barhafa chakuyerekana oku bakengere Mungu amango abandi bantu bali bababona, aliko banajira ntyo n’amango bali bowe bonyine. (Isa. 29:13) Banachiyasa kuderha obubeshi. Omuntu onabesha anawaza oku hali amango amakanuni ma Yehova marhaba menja. (Yak. 1:5-8) Akarhondera kuvuna amakanuni ma Yehova omu rhuntu yewe abwene nka rhugeke-geke. Naho nka nta ngaruka zibi apatire zilerherwe n’okurhakenga kwage, akarhondera kukola ebintu bibihire bwenene. Chiro aj’awaza okw’ali akolera Mungu, Yehova arhakayemera obuharamye bwage. (Muh. 8:11) Aliko rhwabo, rhulonzeze rhube banihirwa omu bintu byoshi.
9. Bichi rhwakayiga oku bilolere amango Yesu na Natanaeli babuganana b’oburhanzi? (Olole n’efoto.)
9 Bili by’akamaro bwenene okuba muntu onaderha obukweri omu murhima. Ebyarhengereraga amango Filipo abwira Natanaeli mwene-wabo baje kubuganana na Yesu, biyerekene ntyo bwinja. Chiro akaba oku b’obwaliri burhanzi Yesu abuganana na Natanaeli, Yesu aderha ntya: “Tala Omuizraeli w’okuli orhali mu bubeshi.” (Yoh. 1:47) Okuderha okuli Yesu aliri abona abanafunzi bage boshi oku bali banihirwa, aliko abona oku Natanaeli ali munihirwa omu njira esomeze. Chiro akaba ntyo, kuguma nerhu, Natanaeli arhaliri mushinganyanya. Aliko arhaliri mulyalya s’aliri munihirwa omu bintu byoshi. Yesu alisimire Natanaeli anamusingiza. Kweri rhweshi rhulonzeze Yesu achiyunve ntyo k’onokola oku birhulolere!
Filipo yayereka Yesu mwira wage Natanaeli, omulume orhaliri mubulyalya. Nerhu, rhunabonekana oku rhuli banihirwa barhali mu bulyalya si? (Olole echifungo cha 9)
10. Bulagurhe rhukwanene kuba merangwe oku bilolere ebi rhuli rhwaderha? (Yakobo 1:26)
10 Manene omu marhegeko maderherwe omu Zaburi 15, malolere okuntu rhunakolera abandi. Zaburi 15:3 haderhere ‘k’olulimi l’omuntu oli mugeni omu hema lya Yehova lurhashobekana, arhajirira omuturanyi wage echintu chibi, arhanaharabisiza berabage erenge.” Nka rhuli rhwaderha-derha abandi kubi, okujira ntyo kwakavuna abandi omurhima bwenene, nerhu rhurhakanachiba bageni omu hema lya Yehova.—Osome Yakobo 1:26.
11. Okukomera abandi k’okuderha gurhe, na bichi nji byahikira abanakomera abandi eyi barhanahungama?
11 Omwandisi we zaburi afasiriye bwinja-bwinja okukomerana. Okukomerana k’okuderha gurhe? Ahanene kuba kuderha ebinwa bibi by’obubeshi byakaharabisiza omuntu erenge. Omuntu oli wakomera abandi, arhanalonzeze kuhungama, arhakachigenderera kuba Muhamirizi wa Yehova.—Yer. 17:10.
12-13. Mu hali zihe ziguma rhwakahezeza bera-berhu erenge buzira kumenya? (Olole n’efoto.)
12 Zaburi 15:3 hashubire kurhuyibusya kw’abageni omu hema lya Yehova, barhajirira abaturanyi babo echintu choshi-choshi chibihire, barhanaharabisiza bera-babo erenge. Nka gurhe rhwakaharabisiza bera-berhu erenge?
13 Rhwakaharibisiza muntu mulebe erenge buzira kulonza omu kuderha emyazi erhakwirire oku bimulolere. Omufano: 1) mwali-werhu walekere akasi k’obupainiya, 2) omulume na mukage barhachili bakola oku Beteli, changwa 3) mwene-werhu amaleka kukola nka mushamuka changwa mugwasi w’akasi. Kurhakaba kwinja oku bwira abandi kw’abola bene-berhu na bali-berhu hali echintu chibi bajirire checharhumire engabane zabo zahwa. Hali amango eyi hali empanvu rhurhamenyere zarhumire ebyola byaba. Omugeni omu hema lya Yehova “arhajirira omuturanyi wage echintu chibi, arhanaharabisiza bera bage erenge.”
Biba biyorohere okuderha emyazi erhakwirire eju y’abandi, n’okujira ntyo kwakaba kubakomera (Olole echifungo che 12-13)
OKENGE BALALA BANAYUBAHA YEHOVA
14. Fasiriya okuntu abageni ba Yehova bakalahira “omuntu yeshi-yeshi osuzagwirwe.”
14 Zaburi 15:4 haderhe ok’omuntu oli mwira wa Yehova “analahira omuntu osuzagwirwe.” Nka gurhe rhwakajira ntyo? Bulala rhuli bantu barhashinganene, nta buhashe rhuherhe b’okumenya akaba muntu mulebe ali muntu osuzagwirwe. Bulagurhe? Ahanene rhwakasimiswa na bantu baguma eju y’engeso zabo changwa okuntu babonekene, n’okugaya abandi. Chechirhumire rhukwanene kukabulira balala bonyine Yehova abwene ku basuzagwirwe. (1 Ko. 5:11) Baheberwe mu balala banakola ebintu bibi buzira kuhungama, abarhakenga obwemere bwerhu, changwa balala banalonza kuharabisa obwira bwerhu haguma na Yehova.—Mez. 13:20.
15. Mu njira ehe nguma rhwakayerekana m’olukengo “balala banayubaha Yehova”?
15 Olwandiko lwa Zaburi 15:4 lushubire kurhubwira oku rhuyerekane olukengo ku “balala banayubaha Yehova.” Bobola rhunalonza enjira rhwakayereka mw’abera ba Yehova obwinja n’obukenge. (Ro. 12:10) Nka gurhe? Njira nguma eganirirwe omu Zaburi 15:4, eyerekene k’omugeni omu hema lya Yehova arhakavuna echilagane chage chiro chamulerhera ebibazo.” Okurhakenga ebilagane byerhu kwakagayisa abandi. (Mt. 5:37) Omufano, Yehova alonzeze abageni bage bakenge echilagane chabo ch’obuhya. Yehova anayunva asimire bwenene amango abazere bali bajira okwabo koshi yi bayeneza ebilagane banaha abana babo. Bulala rhuzigire Mungu n’abandi, rhwajira okwerhu koshi yi rhuyeneza ebilagane byerhu.
16. Yindi njira ehe rhwakayekana m’olukengo oku bera ba Yehova?
16 Eyindi njira rhwakayerekana m’olukengo oku bera ba Mungu, kuli kukaribisana n’okuhaana. (Ro. 12:13) Ebisanzi rhunageza haguma na bene-berhu na bali-berhu, binarhurhabala kukomeza obwira bwerhu haguma nabo, na haguma na Yehova. Kandi amango rhwamabakaribisa rhwanaba eyi rhuli rhwayiganya Yehova.
ORHASIMAGA EFURANGA KUKABYA
17. Bulagurhe Zaburi ye 15 ederhere oku bilolere efuranga?
17 Zaburi ye 15 ederhere ok’omugeni wa Yehova “arhahoza abandi efuranga omu kulonza enyungu, arhanayemera bituliyo omu kulibuza omuntu orhagwerhe gosa.” (Zb. 15:5) Bulagurhe eyila zaburi ederhere oku bilolere efuranga? Bulala nka rhusimire efuranga bwenene, rhwakazibona nka ze z’akamaro bwenene kulusha Mungu n’abantu. (1 Ti. 6:10) Omu mango ma mira, bantu baguma baliri barhindibuza bene-babo b’abakene, omu kubalipisa enyungu oku furanga babahozaga. N’abazuzi baguma baliri bayemera ebituliyo, banaja bacha olushinja omu kulibuza omuntu orhagwerhe egosa. Yehova anashomba bwenene ebijiro bili nk’ebyola.—Eze. 22:12.
18. Bibazo bihe byakarhurhabala rhumenye gurhe rhunabona efuranga? (Waebrania 13:5)
18 Kuli kwinja bwenene okuwaza oku bilolere okuntu rhunabona efuranga. Ochibaze ntya: Buli mango inanchibugana ndi nawaza oku bilolere efuranga n’ebi nakazigula si? Amango bamampoza efuranga inanfunda kuzigalula juba-juba omu kuwaza oku nyinazo arhaza kuzikenera si? Okugwarha efuranga kunarhuma nachibona nk’andi w’akamaro si? Ka binankomerera okuzihanako? Inambwaza okw’akaba bene-berhu na bali-berhu baherhe efuranga zinene, baziherhe bulala banazisima kulusha Yehova si? Inajira obwira n’abachire bonyine, si ntabujira n’abakene? Bili by’akamaro bwenene okuchibaza ebyola bibazo, bulala rhwapatire olukengo lunene l’okuba bageni ba Yehova. Aliko rhwagenderera kubera bageni ba Yehova, nka rhujirire okwerhu koshi yi rhurhasima efuranga. Rhukajira ntyo, Yehova arhakafa arhulekere!—Osome Waebrania 13:5.
YEHOVA ANAZIGIRA BERA BAGE
19. Bulagurhe Yehova alonzeze rhujire byoshi biderherwe omu Zaburi ye 15?
19 Zaburi ye 15 ehwere omu kuhaana echila chilagane: “Owajira ebila bintu byoshi arhakafa ashaganyizwe.” (Zb. 15:5) Ahala Yehova ayerekene bulagurhe alonzeze rhujire ebintu byoshi biderherwe mw’eyila Zaburi. Alonzeze rhugwarhe obusime. Amango rhuli rhwajira ebi Mungu arhuhemere rhujire, rhunagwarha akalamo kenja naye anarhulanga.—Isa. 48:17.
20. Bichi abageni ba Yehova bakalangalira?
20 Abageni Yehova ayemerere, balangalire amango mayinjire makwirire. Abashigwa bemana, nji bayemererwa kulama mu “fasi zinene” Yesu abarheganyize omu mbingu. (Yoh. 14:2) Abaherhe obulangalire b’okulama oku gulu yi balindira kw’ebilagane biderherwe omu Ufunuo 21:3 byayenera. Kweri, luli lukengo lunene okubona Yehova arhuhere envitasiyo y’okuba bera bage, n’okuba bageni omu hema lyage esiku n’amango!
OLWIMPO 39 Okuchiha Ezino Linja Embere za Mungu
