Yi rhusimisa Yehova, rhukwanene kugwarha obwemere. Aliko, Ebiblia ederhere oku “arhali abantu boshi babajira obwemere.” (2 Te. 3:2) Amango entumwa Paulo aliri aderha oku bilolere echola, aliri ashambala oku “bantu babi baliri bamukolera kubi n’okumulibuza.” Aliko eby’aderhaga okubilolere obwemere bili byayenera oku bandi bantu. Baguma barhalonza kuyemera oku hali Mungu walemaga ebintu byoshi. (Ro. 1:20) Abandi bakaderha oku bagwerhe obwemere mu chintu chilebe changwa mu muntu mulebe ogwerhe obuhashe bunene bwenene. Aliko, ebyola birhatosheze yi rhusimisa Yehova.

Birhuhemere rhugwarhe obwizere oku Yehova abaho n’oku nj’ahemba abagwerhe obwemere bukomere muye. (Ebr. 11:6) Obwemere chili chigabi ch’etunda ly’eroho lichesibwa. Kandi yi rhugwarha eroho lichesibwa birhuhemere rhuliheme Yehova omu sala. (Lu. 11:9, 10, 13) N’eyindi njira y’akamaro rhwakapata mw’eroho lichesibwa lya Mungu kuli kusoma Ebiblia yarongozwaga n’eroho lyage. Naho rhwanaja rhwakengera oku birhwasomere n’okukolesa ebirhwayigire. Omu kujira ntyo, rhwaba eyi rhwayemerere eroho lichesibwa lya Yehova lirhurhabale rhulame akalamo kayerekene oku rhugwerhe obwemere b’okumusimisa.