1. Bichi binarhabala abakozi ba Yehova bagenderere kumuharamya chiro akaba yi bahurana ebibazo bikomere?

 EBIBLIA ederhere oku rhulamire omu “bihe bidarhi bikomere” bwenene. (2 Ti. 3:1) Abakozi ba Yehova yibahurana ebibazo abandi nabo bali bahurana mu linola gulu libi lya Shetani. Aliko kandi yirhwalibuzwa bulala rhuli rhwakolera Yehova. Bichi binarhurhabala rhugenderere kukolera Yehova chiro akaba yirhwahurana n’ebyola bibazo? Mpanvu nguma y’akamaro eli okuntu rhunabona Yehova anarhurhabala n’okumenya okw’ali “Mungu olamire.”​—Yer. 10:10; 2 Ti. 1:12.

2. Bichi rhumenyere oku bilolere Yehova byakarhukomeza?

² Yehova anabona ebibazo byoshi rhuli rhwahurana, n’amango moshi aba alonzeze kurhurhabala. (2 Ny. 16:9; Zb. 23:4) Amango rhwamayibuka oku Mungu werhu ab’arhulagireko n’oku buli mango aba tayari kurhurhabala, rhwakagwarha emisi y’okulembera buli chigeregezo choshi. Rhuganire gurhe mwami Daudi abonaga okw’ebyola buli bukweri.

3. Bichi Daudi alilonzeze kuderha amango aderha oku “Yehova alamire?”

³ Daudi aliyinji Yehova analimulangalire. Amango abanzi bage baliri bamuhiga, kuhebamo na Mwami Sauli, Daudi asalira Yehova amurhabale. (Zb. 18:6) Amango Yehova ashubiza oku sala lyage n’okumuyokola, Daudi aderha ntya: “Yehova alamire!” (Zb. 18:46) Bichi Daudi alilonzeze kuderha? Chitabu chiguma chiyerekene oku Daudi aliyemerere oku Yehova ali Mungu w’okuli onarhabala abakozi bage amango moshi. Nechi, Daudi alimenyere oku Mungu wage aliri abona byoshi byaliri byamuhikira, n’okw’analiri tayari kumurhabala. Echola chahereza Daudi emisi y’okugenderera kukolera Yehova n’okumusingiza.​—Zb. 18:28, 29, 49.

4. Nka gurhe okumenya oku Yehova ali Mungu olamire kunarhulerhera enyungu?

 ⁴ Okuchizera oku Yehova ali Mungu olamire kwakarhurhabala rhumukolere n’obushiru. Rhwagwarha emisi y’okulembera ebigeregezo n’obushiru b’okugenderera kukola binene omu kasi kage. Kandi rhwahigirira kugenderera kubera hofi na Yehova.

MUNGU OLAMIRE AKUKOMEZA

5. Bichi byakarhukomeza amango rhuli rhwahura n’ebigeregezo? (Wafilipi 4:13)

⁵ Rhwakagala kulembera buli chigeregezo, chibe chikomere changwa nanga, amango rhuyibukire oku Yehova ab’alamire n’okw’aliho yarhurhabala. Akarhurhabala kuhima buli chigeregezo, bulala nta chibazo chigwerhe emisi kulusha Mungu werhu. Ali Mugala-byoshi kandi akarhuha emisi y’okulembera. (Osome Wafilipi 4:13.) Rhugwerhe empamvu zoshi z’okulwisa ebigeregezo buzira buba. Okuntu rhwachiboneraga oburhabale bwa Yehova amango rhwaliri rhwahurana echigeregezo chiyorohere, kwakarhuma rhwachizera oku nj’arhurhabala amango rhwahurana echigeregezo chikomere.

6. Bichi byahikiraga Daudi amango aliri musole byarhumaga akomeza obulangalire bwage mu Yehova?

⁶ Rhuganire ku bintu bibiri Daudi achiboneraga byarhumaga akomeza obulangalire bwage mu Yehova. Amango Daudi aliri mungeri mudorho, echishengera na simba buli chiguma chaheka entama omu ntama z’eshe. Mw’ebyola bihe byombi Daudi aligwasize emisi y’okukulikira ebyola binyalubala anayokola ezola ntama. Aliko Daudi arhawazaga okw’ajiraga ebyola byoshi oku misi yage yenyine. Alimenyere bwinja oku Yehova yiwamuhaga emisi y’okujira ntyo. (1 Sa. 17:34-37) Daudi arhakayibirire haban’akatyu ebyola achiboneraga. Okukengera kw’ebyola byoshi, kwalimuhere obwizere oku Mungu olamire akamuhere n’emisi omu mango mayinjire.

7. Bichi Daudi alisezeze k’obwenge, na nka gurhe okujira ntyo kwalimurhabere agale kulwisa Goliyati?

⁷ Enyuma waho, Daudi ey’achili murhabana orhaza kuyeneza myaka 20, alambagirira enkambi y’abasoda be Izraeli. Amenya okw’abasoda bayubahire bulala Mufilistini muguma muzibu-zibu onalehere bwenene waliyirikirwe Goliyati, “aliri ahambarira abasoda be Izraeli.” (1 Sa. 17:10, 11) Abola basoda bayubaha bwenene bulala balisezeze obwenge bwabo oku bule n’obuzibu-zibu bwa Goliyati, n’oku myazi aliri ababwira. (1 Sa. 17:24, 25) Aliko, Daudi yewe arhali ebyola byalichisezezeko. Daudi alimenyere okw’amango Goliyati aliri abonerera abasoda be Izraeli, aliri adukanga “Mungu olamire.” (1 Sa. 17:26) Daudi aliri awaza ku Yehova. Daudi alichizerere oku Mungu wamurhabalaga amango aliri mungeri, ashuba kumurhabala na mw’eyola hali. Omu kulangalira oburhabale bwa Mungu, Daudi alwisa Goliyati na kweri amuhima!​—1 Sa. 17:45-51.

8. Bichi byakarhurhabala rhukomeze obulangalire bwerhu mu Yehova amango rhuli rhwahurana ebigeregezo? (Olole n’efoto.)

⁸ Nerhu rhwakalwisa ebibazo eyi rhunagwerhe obusime nka rhuyibukire oku Mungu olamire ali tayari kurhurhabala. (Zb. 118:6) Rwakakomeza obwizere bwerhu oku Yehova arhurhabala, omu kuyibuka ebyajiraga omu mango ma mira. Osome engani ze Biblia zakuyibusya gurhe Yehova ayokolaga abakozi bage. (Isa. 37:17, 33-37) Wakawaza n’oku raporo zili oku jw.org ziyerekene gurhe Yehova arhabere bene-berhu na bali-berhu ba mu manola mango. Kandi oyinje wayibuka amango moshi Yehova akurhaberemo. Nkabaga wakabona oku Yehova arhasaga kukujirira echintu chisomeze bwenene  chili nka kukuyokola ku simba changwa nyalukala. Obukweri buli oku Yehova akujirire bintu binene omu kalamo kawe! Yehova akuhamagere obe mwira wage. (Yoh. 6:44) Chiro na zene akaba rhuchili omu kuli, kuli kugerera oburhabale bwage. Bobola, oheme Yehova akurhabale oyibuke amango ashubizaga oku masala mawe omu kasanzi kakwanene omu kukuhereza kweri ebi wanalikenere, changwa akushishikala omu hali ekomere. Okuwaza kw’ebyola byoshi kwakomeza obwemere bwawe oku Yehova agenderera kukurhabala.

9. Gurhe rhukwanene kubona ebigeregezo byerhu? (Mezali 27:11)

⁹ Okubona Yehova nka muntu olamire, kwarhurhabala rhubone bwinja ebigeregezo byerhu. Amango rhuli rhwahurana ebigeregezo, bihemere rhuchiseze oku bintu by’akamaro. Shetani aderhere okw’amango rhwamahurana ebibazo rhwakaleka Yehova. Bobola, okuntu rhunajira amango yirhwahurana ebigeregezo, kunarhuma Yehova achiyunva bwinja changwa kubi. (Yob. 1:10, 11; osome Mezali 27:11.) Aliko, amango rhuli rhwagenderera kulembera ebibazo byerhu, rhwanayerekana oku rhuherhe obuzigire ku Yehova n’okuyerekana oku Shetani ali mubeshi. Nkabaga eguvernema y’aholamire eherhe yapinga abakozi ba Mungu, changwa oli wahurana n’echibazo ch’okubula efuranga. Nkabaga abantu oli wahubiri barhaherhe basimiswa n’emyazi minja, changwa oli walibuka omu yindi-yindi njira. Akaba ntyo kubili, oyibuke okw’ehali oli wageramo zili zakuhereza orozo l’okusimisa omurhima gwa Yehova. Kandi oyibuke okw’arhaleka haban’akatyu ogeregezwe kulusha okuntu wakagala kulembera. (1 Ko. 10:13) Akuhereza emisi y’okulembera.

MUNGU OLAMIRE NJ’AKUHEMBA

10. Bichi Mungu olamire nj’ajirira balala bali bamuharamya?

¹⁰ Buli mango Yehova anahemba balala banamuharamya. (Ebr. 11:6) Y’arhuhereza omurhula n’okutosheka zene, n’amango mayinjire nj’arhuhereza akalamo k’esiku n’amango.  Rhwakachizera loshi oku Yehova alonzeze kurhuhemba, n’okw’agwerhe obuhashe b’okujira ntyo. N’obola bwizere bunarhushunika rhugwarhe binene by’okukola kuguma n’oku bwashunikaga abakozi bemana ba Mungu ba mira. Intyo ku Timoteo alijirire.​—Ebr. 6:10-12.

11. Bichi byashunikaga Timoteo akole bwenene omu chibaga? (1 Timoteo 4:10)

¹¹ Osome 1 Timoteo 4:10. Timoteo alihebere obulangalire bwage mu Mungu olamire. Echola checharhumaga akolera Yehova bwenene n’okukolera abandi. Mu njira zihe alijiriremo ntyo? Entumwa Paulo alimuhebere omurhima abe mwalimu mwinja omu mahubiri n’omu chibaga. Paulo alishubire kumubwira abe mufano gwinja ku bene-babo na bali-babo bachili misole n’abashaja. Kandi alihabirwe engabane zikomere ziheberwe m’okuhana amahano mali wazi manayerekene obuzigire ku balala bamakenere. (1 Ti. 4:11-16; 2 Ti. 4:1-5) Mango maguma abantu barhaliri babona akasi Timoteo aliri akola na nta shukrani baliyerekene kw’akola kasi. Aliko yewe alichizerere oku Yehova nj’amuhemba.​—Ro. 2:6, 7.

12. Bichi byakashunika abashamuka be chibaga bayorhe eyibagwerhe binene by’okukola omu kasi kabo? (Olole n’efoto.)

¹² Zene, abashamuka nabo bakwanene kuchizera oku Yehova y’abona anasimisizwe n’akasi kenja bali bakola. Olekere akasi k’okulagira, okuyigiriza n’okuhubiri, bashamuka banene bali barhabala oku makasi m’okuyumbaka, n’oku makasi m’okuhaana oburhabale omu mango m’echinjira. Abandi bashamuka banakola omu Chigusho ch’Okurhangula Abalwala, changwa omu Komite y’Obunvikane n’Ebitaro. Abashamuka bamenyere okwe chibaga chili cha Yehova si chirhali ch’amuntu mulebe. Bobola banakola n’omurhima goshi omu chibaga eyibanachizerere kweri oku Mungu nj’abahemba ku byoshi bali bamukolera.​—Kol. 3:23, 24.

13. Gurhe Yehova anachiyunva oku bilolere ebi buli muntu anamukolera?

 ¹³ Abantu boshi barhakaba bashamuka. Aliko rhweshi rhugwerhe chintu chilebe rhwakaha Yehova. Anayunva asimire amango rhuli rhwamukolera n’emisi yerhu yoshi. Anabona amango rhuli rhwahana enshololo y’okugendereza akasi k’omu gulu lyoshi chiro akaba rhurhagwerhe obuhashe b’okuhana nshololo zinene. Anayunva asimisizwe bwenene amango yirhwaheba okuboko elugulu omu mbuganano yirhuhana ebishubizo chiro akaba rhuli rhwayubaha, n’amango rhwamababalira balala barhugoseze. Chiro n’amango wamabona ok’orhaliwakola binene omu kasi ka Yehova, ochizere okw’asimisizwe n’eby’oli wakola. Akuzigire bwenene nj’anakuhemba eju y’ebyola.​—Lu. 21:1-4.

OBERE HOFI NA MUNGU OLAMIRE

14. Gurhe okuyorha hofi na Yehova kunarhurhabala kubera bemana? (Olole n’efoto.)

¹⁴ Akaba rhugwerhe obwira bukomere haguma na Yehova, rhwabona oku birhuyorohere kubera bemana emwage. Omufano gwa Yosefu guyerekene ok’obola buli bukweri. Alilahire kujira echijiro ch’obubaraga. Bulala alimenyere oku kw’aliri kumugoseza Yehova arhanalilonzeze kumugayisa. (Mwa. 39:9) Yi rhugwarha obwira bukomere haguma na Yehova, birhuhemere rhuyinje rhwarhola akasanzi k’okusalira n’okuyiga Echinwa chage. Rhukajira ntyo, obwira bwerhu haguma naye bwakomera. Kuguma na Yosefu, amango rhugwerhe obwira bukomere haguma na Yehova, rhurhalonza kujira chintu chilebe chakamugayisa.​—Yak. 4:8.

15. Bichi ebyahikiraga Abaizraeli omu rungu byakarhuyigiriza? (Waebrania 3:12)

¹⁵ Balala banaleka kulangalira Yehova, obwimana bwabo kuye bwakahera juba-juba. Rhuganire oku byahikiraga Abaizraeli amango baliri omu rungu. Baliyinji oku Yehova abaho, aliko bahwanza kugwarha engangane akaba abashishikala. Banabaza chiro ntya: “Ka Yehova ali ahagarhi kerhu?” (Kut. 17:2, 7) Naho bachijira bigamba ku Mungu. Kweri, rhurhalonzeze  kuyiganya omufano gwabo gubi g’okurhakenga.​—Osome Waebrania 3:12.

16. Bichi byakageregeza obwemere bwerhu?

¹⁶ Egulu lili lyarhuma byarhukomerera bwenene kubera hofi na Yehova. Banene barhayemera amawazo maderhere oku Mungu abaho. Mango manene balala banasuzagura amakanuni ma Mungu banabonekana nka balamire akalamo kakwirire. Amango rhwamabona ebyola, obwemere bwerhu bwakageregezwa. Chiro akaba rhurhakalahira oku Mungu abaho, rhwakahwanza kugwarha engangane akaba arhurhabala. Omwandisi we Zaburi ya 73 naye aliri achibaza ebyola bibazo. Alibwene balala balimuzungulukire barhaliri bakulikira amarhegeko ma Mungu, aliko eyibanagwerhe akalamo kakwirire. Naho arhondera kuchibaza akaba hali obunguke omu kukolera Mungu.​—Zb. 73:11-13.

17. Bichi byarhurhabala rhugenderere kubera hofi na Yehova?

¹⁷ Bichi byajaga byarhabala oyola mwandisi we zaburi ahindamule amawazo mage? Aliwazize bwenene oku binjibyahikira balala banaleka kulangalira Yehova. (Zb. 73:18, 19, 27) Kandi aliwazize oku migisho omuntu anapata amango ali akolera Yehova. (Zb. 73:24) Nerhu rhwakawaza bwenene oku migisho Yehova ali arhuhereza. Owaze gurhe akalamo kawe kakabere nk’orhaliri wakolera Yehova. Nka rhuyibukire bulagurhe kuli kwinja okukolera Yehova, kwarhurhabala rhubere bemana kuye. Kuguma n’omwandisi we zaburi, nerhu rhwakaderha ntya: “Ku nyono okuyegera Mungu k’okwinja emwani.”​—Zb. 73:28.

18. Bulagurhe rhurhakwanene kuyubaha amango mayinjire?

¹⁸ Rhwakahima buli chigeregezo chakarhuhikira mu zinola siku z’obuzinda, bulala “rhuli rhwakolera Mungu olamire onali w’okuli.” (1 Te. 1:9) Mungu werhu anarhulagako na buli mango nj’arhurhabala. Aliyerekene okw’aliri haguma n’abakozi bage ba mira, na zene ali haguma nerhu. Hanola hofi-hofi rhwahurana amalibuko makulu marhengerera hanola oku gulu. Aliko, rhurhakamalwisa oku buhashe bwerhu. Yehova nj’aba haguma nerhu. (Isa. 41:10) Rhweshi “rhujage rhwagwarha obushiru n’okuderha ntya: ‘Yehova ali murhabazi wani; intayubaha.’”​—Ebr. 13:5, 6.