1-2. Envitasiyo ehe Yehova ahere abantu bemana banamuharamya?

 NK’OMUNTU akubazize Yehova aba muchi wawe? Gurhe wakamushubiza? Nkabaga wakamushubiza ntya: ‘Yehova aba Mungu wani, aba Darha, anaba mwira wani.’ Hali n’amandi mazino m’echeo oyinji wakakolesa omu kuyerekana Yehova ali nde. Aliko si, onamubona kandi nka muntu wakuhamagere emwage?

² Mwami Daudi alihuzenye obwira bwa Yehova haguma n’abantu bemana banamuharamya, n’obwira buba ahagarhi k’omuntu n’abageni bage. Abaza ntya: “Yehova we, inde wakaba mugeni omu hema lyawe? Inde wakalama oku musozi gwawe guchesibwa?” (Zb. 15:1) Ebila binwa bifuhererwe, birhuyerekere oku rhwakaba bageni ba Yehova; k’okuderha bera-bage. Kweri, eyola eli envitasiyo y’olukengo erhengere emwa Yehova.

YEHOVA ALONZEZE RHUBE BAGENI BAGE

3. Inde waliri mugeni murhanzi wa Yehova, na nka gurhe Yehova n’oyola mugeni wage baliri bachiyunva okubilolere buli muguma n’owabo?

³ Amango Yehova arhaliza kulema chintu, aliri yenyine. Aliko hagera amango alema Omugala w’efula, n’ahola aba nk’owamahamagala omugeni murhanzi omu hema lyage, analigwerhe busime bunene b’okujira ntyo. Ebiblia ederhere oku ‘Yehova alizigiire bwenene oyola Mugala,’ n’oyola mugeni wage murhanzi naye ‘aligwerhe omwishingo amango moshi embere za Yehova.’​—Mez. 8:30.

4. Bande bandi balihikire kuba bageni ba Yehova?

⁴ Enyuma waho Yehova alema bamalayika, nabo baba bageni  bage. Ebiblia eyirikire bamalayika bagala ba Mungu, enayerekene oku banagwarha obusime b’okuba haguma na Yehova. (Yob. 38:7; Da. 7:10) Hagerere myaka minene, ey’abageni ba Yehova baba balala bonyine balamire naye embingu. Buzinda alema abantu oku gulu yi nabo baba bageni bage. Baguma mw’abola bageni bage haliri Enoke, Nowa, Abrahamu na Yobu. Ebiblia eyerekene oku baliri bera ba Yehova bulala balimukengere.​—Mwa. 5:24; 6:9; Yob. 29:4; Isa. 41:8.

5. Bichi obulebi buli omu Ezekieli 37:26, 27 burhuyigirize?

⁵ Mu myaka minene, Yehova agenderere kuhamagala bera-bage babe bageni bage. (Osome Ezekieli 37:26, 27.) Omufano, obulebi bwa Ezekieli burhubwirire oku Mungu alonzeze abakozi bage banamuharamya bagwarhe obwira bukomere haguma naye. Alaganyize okw’ajira “endagano y’omurhula haguma nabo.” Obola bulebi buyerekene akasanzi amango balala bagwerhe obulangalire b’okulama embingu n’abaherhe obulangalire b’okulama esiku n’amango oku gulu, nji bahebwa omu buguma omu hema lyage ly’omufano nka “chishumba chiguma.” (Yoh. 10:16) Akola kasanzi kakano rhulamiremo!

RHUBE RHULI NGAHE, MUNGU ANARHUSHISHIKALA

6. Nka gurhe omuntu anaba mugeni omu hema lya Yehova, na ngahe elyola hema lyage lyakabonekana?

⁶ Omu mango ma mira, ehema yaliri fasi omuntu akahumukira, n’okuchilanga oku nvula changwa oku zuba. Omuntu bakakaribisize omu hema, akalangalire oku nyine ehema amushishikala. Amango rhwamahana akalamo kerhu emwa Yehova, rhwanaba bageni omu hema lyage ly’omufano. (Zb. 61:4) Rhunasimira bilyo binene by’ekiroho, n’obwira haguma n’abandi nabo babere bageni omu hema lya Yehova ly’omufano. Abantu b’omu bihugo byoshi bakaba bageni omu hema lya Yehova. Nkabaga wachigerere kubalamira omu chindi chihugo y’oja oku mbuganano eminuzize, wabuganana n’abandi bantu baherhe obusime bulala bali omu hema lya Mungu. Wakabugana elyola hema buli hoshi hali abakozi ba Mungu bamukengere n’okumuharamya.​—Ufu. 21:3.

7. Bulagurhe rhwakaderha okw’abemana bafire bachili bageni omu hema lya Yehova? (Olole n’efoto.)

⁷ Gurhe si oku bilolere abemana bafire? Rhwakaderha oku nabo bachili bageni omu hema lya Yehova si? Nechi. Bulagurhe rhwakaderha ntyo? Bulala Yehova achibayibukire  bwinja-bwinja. Ku yewe bali nk’abazene. Yesu alifasiriye ntya: “Abafire nji bafuka, chiro na Musa aliyerekene ntyo omu ngani y’echishaka ch’emishaki, omu kuyirika Yehova ‘Mungu wa Abrahamu, Mungu wa Isaka, Mungu wa Yakobo.’ Arhali Mungu w’abafire, aliko ali Mungu w’abazene, bulala emwage, boshi bazene.”​—Lu. 20:37, 38.

BUNGUKE BUHE RHULI RHWAPATA NA BICHI RHUKWANENE KUJIRA?

8. Nka gurhe abageni ba Yehova banayunguka n’okuba omu hema lyage?

⁸ Kuguma nk’okw’ehema nya hema hakaba hantu h’okuchibisha envula changwa ezuba, ehema lya Yehova linalanga abageni bage ku buli chintu choshi chakahanyagaza obwira bwabo haguma naye, n’okubaha obulangalire b’okuli bw’amango mayinjire. Nka rhuberere hofi-hofi na Yehova, Shetani arhakagala kujira echintu n’echiguma chakarhulimbula esiku n’amango. (Zb. 31:23; 1 Yo. 3:8) Omu gulu lihyahya, Yehova nj’arhagenderera kulanga bera bage oku bintu byakabajira kubi ekiroho konyine, si nj’abalanga chiro n’oku lufu.​—Ufu. 21:4.

9. Bichi Yehova alonzeze abageni bage bajirage?

⁹ Kweri luli lukengo lunene bwenene okuba bageni omu hema lya Yehova, okugwarha obwira bukomere haguma naye bwakanagenderera esiku n’amango. Bichi rhukwanene kujira akaba rhulonzeze kubera bageni bage? Akaba muntu mulebe achigerere kukuhamagala obe mugeni wage, kweri walilonzeze ojire ebimusimisize. Omufano, nkaba alisimire okule ebirato embere oje omu nju, nawe wanava wabihogola okubulonza. Intyo k’onoko, rhulonzeze kumenya bichi Yehova ahemere balala balonzeze kugenderera kubera bageni omu hema lyage. Obuzigire bwerhu ku Yehova bunarhushunika rhujire okwerhu koshi rhugalire “yi rhumusimisa loshi.” (Kol. 1:10) Bulala rhubwene ku kweri Yehova ali mwira werhu, rhunamenyere okw’ali Mungu werhu, anali Darha; rhukwanene kumukenga. (Zb. 25:14) Rhurhakwanene kuyibagira echola, n’amango moshi rhukwanene kumukenga bwenene. Okumukenga ntyo kwarhurhabala rhuyake buli njira yoshi yakarhuma rhwamugoseza. Rhulonzeze esiku zoshi rhulambagire n’olugero haguma na Mungu werhu.​—Mik. 6:8.

YEHOVA ALIKOLEERE ABAIZRAELI BUZIRA KABOLO

10-11. Nka gurhe Yehova alikoleere Abaizraeli omu rungu lye Sinai, na nka gurhe ebyola biyerekene okw’arhajira kabolo?

¹⁰ Yehova anakolera bera-bage buzira kabolo. (Ro. 2:11) Rhwakachibonera ntyo, omu kumenya gurhe akoleraga Abaizraeli omu rungu lye Sinai.

¹¹ Amango amala kuyokola olubaga lwage kurhenga omu buja e Misri, Yehova ashimika abadahwa b’okukola oku tabernakulo. Ashimika Abalawi bayinje bakola amandi-mandi makasi oku tabernakulo. Ka balala baliri bakola oku tabernakulo changwa abalilamire ahaburhambi bwayo, babaliri bapata migisho minene kulusha abandi? Nanga chiro! Yehova arhajira kabolo.

12. Nka gurhe okuntu Yehova akoleraga Abaizraeli omu rungu kuyerekene okw’arhajira kabolo? (Kutoka 40:38) (Olole n’efoto.)

¹² Buli Muizraeli akagwarhire obwira bwa hofi-hofi na Yehova, abe ali akola oku tabernakulo changwa nanga, abe alamire hofi nayo changwa nanga. Omufano, Yehova alijirire okuntu eshanja lyoshi ligende lyabona enkingi y’echichu ch’echisomerene, n’enkingi y’omuliro yaliheberwe enyanya w’etabernakulo. (Osome Kutoka 40:38.) Amango  echola chichu chakajire oku lwindi lunda, chiro na balala balilamire hale n’etabernakulo nabo bakachibwene, banashana ebintu byabo, banakunja amahema mabo, n’okugenda haguma n’abandi. (Kum. 9:15-23) Abantu boshi bakayunvirhe omulenge gunene gwa ngunga ebiri ze arja g’okuyibusa abantu boshi oku bihemere barhondere kugenda. (Hes. 10:2) Okuderha okuli, okulama hofi-hofi n’etabernakulo arhali kokwaliyerekene k’omuntu aherhe obwira bwa hofi-hofi na Yehova. Ahubwe abantu boshi b’omu lubaga luhyahya lwabaga lwakolerwe na Yehova bakabere bageni bage n’okulangalira obwerekezi n’obulanzi bwage. Intyo k’onoko zene, hoshi rhwakaba rhulamire oku gulu, Yehova arhuzigire, anarhushishikala, n’okurhulanga.

NA ZENE YEHOVA ARHAJIRA KABOLO

13. Bulagurhe rhwakaderha oku na zene Yehova arhajira kabolo?

¹³ Baguma omu Bahamirizi ba Yehova zene, balamire hofi n’ebiro byerhu bikulu changwa ebiro by’omurhabi by’Abahamirizi ba Yehova. Abandi banakolera kw’ezola fasi. Bobola, abola bantu bakakola ku makasi manene manajirika kw’ezola fasi n’okuba hofi na balala bali bayerekeza. Baguma banakola nka bemangizi b’emizunguluko, n’abandi omu zindi ngabane ziminuzize z’akasi k’amango moshi. Chiro akaba orhali muguma omu bali bakola kw’ezola ngabane zene, wakachizera ok’ochili mugeni wa Yehova, n’okw’akuzigire nawe. Anaha buli muguma bwage-bwage eby’alagirire. (1 Pe. 5:7) Abantu ba Mungu boshi banapata ebilyo by’ekiroho, obulanzi, n’obwerekezi bakenere.

14. Gwindi mufano guhe guyerekene oku Yehova yewe nka muntu orhuhamagere arhajira kabolo?

¹⁴ Ogwindi mufano guyerekene oku Yehova yewe nka muntu orhuhamagere arhajira kabola, kuli kubona gurhe ajirire yi buli muntu yeshi olamire oku gulu abe ey’akapata Ebiblia. Ebiblia yayandikwaga burhanzi mu ndimi esharhu zonyine: Echiebraniya, Echiaramu, n’Echigiriki. K’okuderha okw’abayinji  ezola ndimi esharhu, bonyine babakagwarha obwira bukomere haguma na Yehova kulusha abarhaziyinji si? Nanga arhali ntyo chiro.​—Mt. 11:25.

15. Bichi biyerekene bwinja-bwinja oku Yehova arhajira kabolo? (Olole n’efoto.)

¹⁵ Yehova arharhuhamagala rhube bera bage mpu bulala rhuherhe amasomo manene changwa mpu bulala rhumenyere endimi Ebiblia yayandikwagamo burhanzi. Ahali h’okuhaana obwengehe bwage oku bantu basomere bonyine, Yehova anabuha abantu boshi b’oku gulu, babe basomere changwa nanga. Echinwa chage chifuhererwe, k’okuderha Ebiblia, chatafsibirwe mu ndimi zinene, nantyo abantu b’oku gulu lyoshi bakayunguka n’enyigirizo zage, n’okuyiga gurhe bakaba bera-bage.​—2 Ti. 3:16, 17.

OGENDERERE KUBERA MUGENI WA YEHOVA

16. Nk’ok’olwandiko lwa Matendo 10:34, 35 luyerekene, nka gurhe rhwakagenderera kubera bageni ba Yehova?

¹⁶ Luli lukengo lunene bwenene oku karibiswa rhwabo nka bageni omu hema lya Yehova ly’omufano. Yehova, yewe nka muntu orhuhamagere, aba mwinja bwenene, ajira obuzigire bunene, kandi anahaana bwenene kulusha buli yeshi obaho. Echindi, arhajira kabolo, anarhukaribisa rhweshi buzira kushiba alola ngahe rhwarhengaga, echihugo cherhu, amasomo, erangi ly’omubiri, obuko, emyaka, changwa akaba rhuli balume changwa bakazi. Aliko chiro akaba ntyo, balala banakenga amakanuni mage bonyine b’anayemera babe bageni bage.​—Osome Matendo 10:34, 35.

17. Ngahe rhwakapata eyindi myazi oku bilolere okuba mugeni omu hema lya Yehova?

¹⁷ Nk’oku biyerekenwe omu Zaburi 15:1, Daudi alibazize ntya: “Yehova we, inde wakaba mugeni omu hema lyawe? Inde wakabera oku musozi gwawe guchesibwa?” Omwandisi we zaburi alifuhererwe y’ashubiza ebyola bibazo. Omu mwazi gukulikireho rhwaganira ku biguma rhwakajira yi rhusimisa Yehova n’okubera bera-bage.