Naburhwaga omu Siku 22, Mwezi gwe 12, 1929, omu Noville, vilaje ngeke eli mu ferme mwenda hofi ne Bastogne, omu Ardennes belges. Nchiyibuka bintu binene nabonaga omu ferme nyono n’abazere bani amango nali chili mwana. Nyono na mudorho wani Raymond, rhwagendaga rhwakama enka zerhu n’efune buli lusiku n’okurhabala oku kasi k’okushalula. Omu vilaje yerhu abantu boshi bagendaga bakola haguma omu kurhabalana.

Abazere bani, Emile na Alice, baliri Batolika bakomere. Bagendaga baja omu Misa buli Lwamungu. Aliko, omu mwaka gwa 1939, bapainiya b’omu Angletere bayinja omu vilaje yerhu, babwira darha achiyandikise yayinja apata egazeti Consolation (zene Amuka!). Ahohanaho darha abona okw’eby’eyola gazeti ederhere bili by’obukweri n’echola charhuma ahwanza kusoma Ebiblia. Amango aleka kulema aja oku Misa, abaturanyi berhu baliri bera bage, bamubera banzi. Baliri baseza darha abere omu Katolika, banamusonganya okubilolere eyola simikiro.

Byalimbabeze bwenene okubona darha yahurana akola kahidiko. Echola charhuma nahema Yehova oburhabale omu sala lirhengere oku murhima lili oku murhondero gw’enola nganiro. Nali yunvirhe busime bunene amango obola bupinzani bw’abaturanyi berhu bwaliri bwahwa kubuyabuya. Echola chalirhumire nachizera oku Yehova ali “Munviriza w’esala.”

Amango Allemagne yali rhegekerwe n’Abanazi erhera echihugo che Belgique omu Siku 10 Mwezi gwa 5, 1940, byarhuma bantu banene babunga. Omulala gwerhu gwa libirhira eside ye France.  Amango rhwaliri rhwabalama, hali amango rhwaliri rhwaba omu buhanya aharhwabuganire abasoda be Allemagne n’abe France yi balwira.

Amango rhugaluka ewa ferme yerhu, rhwabugana bayibire bintu binene omu bintu byerhu. Embwa yerhu yaliyirikirwe Bobbie, yonyine ye yaliriho omu kurhukaribisa. Ebyola byoshi byalirhumire nachibaza ntya: ‘Bulagurhe evita n’amalibuko bibaho?’

Mw’agola mango, entagulo ya Mwene-werhu Emile Schrantz, a mushamuka na painiya mwimana, yalirhuhebere omurhima bwenene. Alikoleseze Ebiblia omu kufasiriya bwinja bulagurhe haba amalibuko, ashubiza n’okubindi bibazo byani oku bilolere akalamo. Najira obwira bukomere haguma na Yehova napata n’obwizere okw’aba Mungu w’obuzigire.

Chiro n’enyuma evita lihwe, omulala gwerhu gwaliri gwazigana kujira enganiro haguma na bene-berhu b’Abahamirizi. Omu Mwezi gwa 8, 1943, Mwene-werhu José-Nicolas Minet alambagirira eferme yerhu y’arhugezeza ejambo. Abaza ntya: “Bande balonzeze ku batizwa?” Darha, muyomba nani rhwaheba efune elugulu. Rhwabatizwa omu lwinji lugeke lwaliri hofi n’eferme yerhu.

Omu Mwezi gwe 12, 1944 Allemagne yahwanzisa echirhero chizibuzibu ch’obuzinda omu mango m’Evita lya Kabiri ly’Egulu Lyoshi omu bihugo by’emazikiro m’Ebulaya chiyirikirwe Ivita lya Bulge. Rhwalilamire hofi n’ahabaliri balwira rhwanabera omu nju buzira kuhuluka mwezi muguma ntya. Lusiku luguma, naliri nahereza enyama ebilyo, bashurha ebombe oku ferme yerhu yayosa edepo. Omusoda we Amerique ahwanza kuderha n’omulenge gunene, “Mulyame ahashi!” Nalibirha nalyama ahashi, anyambisa esapo yage omu kundaga.

Enyuma w’evita, rhwaliri rhwazigana ganira na bene-berhu na bali-berhu baliri omu chibaga che Liège, hofi ku bilometre 90 ntya enoro w’emunda rhwaliri. Okw’ebihe yi byanagera, rhwalikolere echigusho chigeke omu Bastogne. Nahwanza kukola omu biro by’okulipisa ebitansi napata n’orozo l’okusoma amasomo malolere eby’esheriya. Enyuma waho, nahwanza kukola nka notere omu biro bya leta. Omu Mwaka gwa 1951 rhwajira embuganano  y’omuzunguluko ngeke omu Bastogne. Hofi bantu egana baliri kw’eyola mbuganano, kuhebamo na painiya w’omwete mwali-werhu, Elly Reuter. Alilambagire bilometre 50 oku kinga y’ahika kw’eyola mbuganano. Buzira kulegama rhwazigirana n’okurhola omuhigo g’okushabana. Elly ali amapata envitasiyo y’okuja kusoma Amasomo m’Egileyadi omu États-Unis. Ayandikira ebiro bikulu omukufasiriya bulagurhe arhayemera eyola envitasiyo. Mwene-werhu Knorr, waliri ayerekeza abantu ba Yehova amushubiza oku yewe n’eba bakajire kusoma amola masomo lusiku luguma. Rhwashabana omu Mwezi gwa 2, 1953.

M’ogola Mwaka gon’ogo, nyono na Elly rhwaja oku mbuganano ya New World Society (Société du Monde Nouveau) yajirirwaga omu Yankee Stadium, New York. Amango naliri eyola munda nabuganana na mwene-werhu muguma, ampa akasi kenja anambwira oku mpamire omu États-Unis. Rhwamalire kuganira na Yehova omu sala, nyono na Elly rhwachishoga kulahira akola kasi n’okugaluka e Belgique yi rhurhabala echigusho chaliri mu bahubiri ekumi ntya. Omu Mwaka gwakulikiragaho rhwagishwa omu kupata omwana w’obusole oyirikirwe, Serge. Echokugayisa, enyuma wa myezi mushanvu, Serge alwala av’anafa. Rhwabwira Yehova omu sala amalumwa manene rhwaliherhe, rhwanagwarha emisi kugerera obwizere b’obulangalire b’okuli b’obufuuke.

Omu Mwezi gwe 10, 1961, napata akasi karhali kakukolwa buli lusiku kakampere orozo lokuba painiya. Aliko, olola lusiku lonolo omurhabi gwe Belgique gwa mpamagala oku telefone. Bambaza akaba indi tayari kukola nka mukozi w’omuzunguluko (oyirikirwe zene mwimangizi w’omuzunguluko). Nabaza ntya: “Rhwakarhanga kukola si nka bapainiya embere rhuyemere eyola ngabane?” Bene-berhu barhuyemerera. Enyuma y’okukola obupainiya mu myezi munane, rhwahwanza kukola akasi k’obwimangizi b’omuzunguluko omu Mwezi gwa 9, 1962.

Rhwamalire myaka ebiri omu kasi k’okuzungulukira ebibaga, barhuhamagala oku Beteli ye Bruxelles. Rhwarhonderaga kukolera ahola omu Mwezi gwe 10, 1964. Eyola ngabane mpyahya yali rhulerhere migisho minene. Musiku zigeke Mwene-werhu Knorr amalire kulambagirira Ebeteli yerhu, banjira mwimangizi w’omusabi. Buzinda, Nyono na Elly rhwahamagalwa kusoma esomo lya 41 lya Masomo m’Egileyadi. Ebinwa Mwene-werhu Knorr aderhaga hagerere myaka 13 byaba by’obukweri! Enyuma y’okupata ediplome yerhu rhwagaluka oku Beteli ye Belgique.

Mu myaka minene nalipatire orozo l’okukolesa amasomo m’esheriya nayigaga omu kuderhera abantu ba Yehova Ebulaya n’ezindi fasi. (Flp. 1:7) Akola kasi kalirhumire nabuganana na bakulu ba bihugo birhalukire 55 emunda amakasi merhu maguma mali lahizwe changwa kulahizwa loshi. Ahali h’okuyinja nabwira abola bakulu okubilolere ebinayeneze omu by’esheriya, naliri nahwanza kuganira nabo omu kuderha ku “ndi muntu wa Mungu.”  Amango moshi naliri nalonza obwerekezi bwa Yehova omu sala, yimenyere “ok’omurhima gwa mwami changwa g’omuzuzi guli nka nindi ya menji omufune za Yehova. Akamuheka hoshi alonzeze.”​—Mez. 21:1.

Chiguma omu bintu byalinsomeze bwenene, eli nganiro najiraga na depite muguma w’Ebulaya. Nali muhemere turu zinene rhuganire naye, oku buzinda ayemera. Aderha ntya: “Oderhe ebi waderha mu miniti 5 yonyine.” Nayinamya erhwe na salira. Oyola depite aba nk’owamagaya, ambanza bichi yinajira. Nayinamula erhwe naderha ntya: “Naliri nabwira Mungu koko bulala oli muguma omu bakozi bage.” Ambanza ntya: “Bichi olonzeze kuderha?” Namusomera olwandiko lwa Waroma 13:4. Bulala aliri Muporo, olola lwandiko lwa musimisa bwenene. Byaba gurhe? Ampereza miniti 30, rhwajira enganiro esimisize bwenene. Aderha okw’anasimiswa n’akasi k’Abahamirizi ba Yehova.

Mu myaka minene abantu ba Yehova bayazize shinja zinene omu Bulaya, oku bilolere oku rhachiheba oku lunda lulebe omu by’epolitike, okushishikala abana, okulipa ebintasi n’ebindi n’ebindi. Nalipatire olukengo lokusamba kw’ezola shinja na nachibonera okuntu Yehova aliri arhurhabala kuziyaza. Abahamirizi ba Yehova bayazize eshinja zirhalukire 140 oku Cour Européenne des Droits de l’Homme (Etribinale y’Ebulaya y’Ehaki z’Abantu)!

Omu mwaka 1990, naliri nakola na Mwene-werhu Philip Brumley, w’oku biro byerhu bikulu, na Mwene-werhu Valter Farneti, we Italie, omu kurhabala bene-berhu na bali-berhu b’omu Cuba bulala makasi merhu malebe malilahizwe. Nayandikira e ambasade ye Cuba eli e Belgique naho rhwabuganana n’omukulu wali shimikirwe, yarhurhabala kw’echola chibazo cherhu. Amango m’embuganano zerhu z’oburhanzi, rhurhalimalire ebibazo by’okurhayunvikana n’oburhegesi byarhumaga balahiza amakasi merhu.

Namalire kuhema Yehova obwerekezi omu sala, nahema oruhusa bananyemerera kurhuma Biblia 5 000 omu Cuba. Ebiblia zagera bwinja bazigabira bene-berhu na bali-berhu, naho rhwabona oku Yehova agishire obushiru bwerhu. Rhwashuba kuhema oruhusa lokurhuma zindi Biblia 27 500. Kandi barhuyemerera. Okurhabala buli mwene-werhu na mwali-werhu agwarhe eyage Biblia, kwali nsimisize bwenene.

Nalambagirire echihugo che Cuba mu mango manene omu kubarhabala kumenya bwinja gurhe bakahwanza basambira akasi kerhu. Mw’ebyola  byoshi, nagalire kujira obwira haguma n’abakulu b’ebihugo.

Omu mwaka gwa 1994 bantu barhalukire 1 000 000 bayirhirwe omu genoside yʼAbadusi omu Rwanda. Echokugayisa baguma mu bene-berhu na bali-berhu baliyirhirwe. Buzira kulegama, bene-berhu baguma bahabwa engabane y’okuja kuhana oburhabale eyola munda.

Amango echigusho cherhu chigera omu kapitale e Kigali, rhwabugana balashire ebiro by’okutafsiri n’ebitabu byoshi. Rhwayunva ngani zinene zigayisize za bene-berhu bashemba-shemberwe n’emipanga. Aliko rhwaliyunvirhe n’engani ziyerekene gurhe bene-berhu na bali-berhu baliyerekene obuzigire. Omufano, rhwalibuganene na mwene-werhu w’Omutusi, ey’omulala gw’Abahamirizi ba Yehova b’Abahutu babishaga omurwina mu siku 28. Amango rhujira embuganano omu Kigali, rhwaheba omurhima n’okurhuliriza bene-berhu na bali-berhu barhalukire 900.

Naho rhwayambuka omupaka rhwaja omu Zaïre (eyirikirwe zene République Démocratique du Congo) kuja kulola bene-berhu na bali-berhu banene balibirhiraga omu nkambi hofi n’evile ye Goma. Rhurhakababwene, nantyo rhwasalira omu kuhema Yehova arhuyerekeze emunda bali. Rhwava rhwabuganana na muntu mulebe, rhwamubaza akaba ayinji Abahamirizi ba Yehova. Ashubiza ntya: “Nechi, nani ndi Muhamirizi. Nasima kubaheka emunda Ekomite y’Okuhana Oburhabale eli.” Rhwamalire kukola embuganano ehebere omurhima haguma n’Ekomite y’Okuhana Oburhabale, rhwabuganana na bene-berhu na bali-berhu 1 600 b’empunzi yi rhubarhuliriza n’okubaheba omurhima. Rhwababwira n’ebinwa bili omu maruba marhengere oku Baraza Lirhambwire. Bene-berhu na bali-berhu bali simire bwenene okuyunva bunola bwizere: “Yi rhwabaheba omu masala merhu. Mumenye oku Yehova arhakaf’abalekerere.” Ebinwa by’Ebaraza Lirhambwire byaliri by’obukweri. Zene, hali Bahamirizi 30 000 omu Rwanda!

Enyuma wa hofi myaka 58 rhushabene, mukani muzigirwa Elly afa omu mwaka gwa 2011. Yehova antulirize amango moshi naliri namubwira omu sala okuntu yinachiyunva. Kandi napatire echirhulirizo omu kuhubiri emyazi minja y’Obwami oku baturanyi bani.

Chiro akaba nkala gwerhe myaka erhalukire 90, buli boso inanja omu mahubiri. Kandi gwerhe obusime b’okurhabala omu Departema Elolere Eby’Esheriya y’Omurhabi gwe Belgique, okubwira abandi ebinagereremo n’okuheba omurhima bene-berhu na bali-berhu bachiri misole b’omu mulala gwe Beteli.

Hamagera hofi myaka 84 insalirire esala ly’oburhanzi emwa Yehova. Gwaliri murhondero g’olungezi lwani lwanyegezaga hofi bwenene na Yehova. Ingwerhe shukrani nene ku Yehova okubona aliri ayunviriza amasala mani omu kalamo kani koshi.​—Zb. 66:19. b