Ebibazo by’Abanasoma Ebitabu Byerhu
Ka echinwa “Wabalanga,” chibonekene omu Zaburi ye 12:7, chishondere kuderhera “abali balibuzwa” (omu mustari gwa 5) changwa “ebinwa Yehova aderhere” (omu mustari gwa 6)?
Emistari eli nyanya n’eshishi eyerekene ok’olula lwandiko luderhere okubilolere abantu.
Omu Zaburi 12:1-4, haderhere oku “abemana barhachili ahagarhi k’abantu.” Naho Zaburi 12:5-7, ederhere ntya:
“‘Bulala balala bali balibuzwa yi barhindibuzwa,
Bulala eju y’amalira m’amalumwa m’omukene,
Nayumanga yi njira echinakola, ku Yehova aderhere.
‘Nabayokola kubalala bali babakolera n’akasuzaguro.’
Ebinwa bya Yehova bichere;
Bili nka arja yachesezwe omu furu y’omuliro y’omubudaka, yachesezwe kali mushanvu.
Wabalanga, Yehova wee;
Walanga buli muguma mubo kw’echila chizazi esiku n’amango.”
Omu mustari gwa 5 guderhere bichi Mungu nj’ajira oku bilolere “abali balibuzwa.” Abayokola.
Omustari gwa 6 guyongerere oku “ebinwa bya Yehova bichere,” ‘kuguma n’arja yashukirwe.’ Echola chiyerekene gurhe rhunachiyunva oku bilolere ebinwa bya Yehova.—Zb. 18:30; 119:140.
Lekaga rhuganire oku mustari gukulikire, k’okuderha Zaburi 12:7: “Wabalanga, Yehova wee; walanga buli muguma mubo kw’echila chizazi esiku n’amango.” Echinwa “wabalanga” bande chiderhere?
Bulala omustari gwa 7 guyinjire enyuma y’omustari gwa 6 guderhere oku bilolere “ebinwa bya Yehova,” baguma bakaderha oku “bowe” biderhere ebinwa bya Mungu. Kandi rhumenyere oku Mungu alilangire Ebiblia chiro akaba y’aligwerhe abapinzani banene balishondere okw’erhabagaho, banalilonzeze kuyilimbula.—Isa. 40:8; 1 Pe. 1:25.
Aliko omu kuderha okuli Yehova alangire abantu bashamberwe omu mustari gwa 5. Yehova arhabere anagenderera kurhabala omu kuyokola “balala bali balibuzwa” na “bali basindibuzwa.”—Yob. 36:15; Zb. 6:4; 31:1, 2; 54:7; 145:20.
Bobola, echinwa “wabalanga” chili omu mustari gwa 7 bande chiderhere?
Ebinwa bili mw’eyila zaburi biderhere “wabalanga” bili byaderha okubilolere abantu.
Omu murhondero gwe Zaburi ye 12, Daudi ali aganira oku bilolere abakozi bemana ba Yehova barhebekerwe n’abantu babi. Omustari gukulikireho, guyerekene okuntu Yehova nj’akolera balala banaderha ebintu bibi. Eyola zaburi erhuyemezeze oku rhukwanene kulangalira Mungu y’ajira echakola eju y’abantu bage bulala ebinwa byage bichere.
Bobola omu mustari gwa 7 haderhere oku Yehova “abalanga,” k’okuderha, balala bali balibuzwa n’abantu babi.
Echinwa chitafsiribwe “abalanga” chikolesezwe m’ogula mustari, chibonekene omu makopi ma m’Andiko m’Echiebrania m’okuchizera. Amandiko m’Echigiriki me Septante makoleseze echinwa “rhwabo” kabiri omu mustari gwa 7. Bobola chikwanene kuderha okubilolere abemana bali balibuzwa n’okusindibuzwa. Buzinda, omustari gwa 7 guderhere oku “buli muguma omu” bemana nj’alangwa “kw’echila chizazi,” ch’abantu bali bajira ebintu bikozeze eshoni. (Zb. 12:7, 8) Omu tafsiri y’Amandiko me Chiebrania omu lulimi lwe Chiaramu, omustari gwa 7 guderhere ntya: “Woyo WALIHA, walanga abanya-kunali, wabalanga kw’echila chizazi chibi esiku n’amango.” Eyola tafsiri erhuhere echindi chemezo chiyerekene oku Zaburi 12:7 erhaderhere okubilolere ebinwa bya Mungu.
Eju y’eyola mpanvu, ogula mustari guhere obulangalire “abantu bemana” k’okuderha, oku Mungu nj’anjira echakola.
