1. Gurhe rhuchiyunvirhe bulala Yehova arhuyemerere rhuyinje rhwasalira emwage?

 OMULEMI w’embingu n’egulu, arhuhere oluhembo lw’akamaro bwenene. Arhuyemerere rhuyinje rhwasalira emwage. Wazaga lero: Rhwakabwira Yehova byoshi bili omu murhima gwerhu omu kasanzi koshi-koshi n’omu lulimi loshi-loshi, buzira kurhanga kumuhema akasanzi k’okuganira naye. Rhwakamusalira eyi rhunali omu bitaro changwa rhushwekerwe omu prizo, eyi rhunachizerere ku Darha w’obuzigire arhuyunva. Rhugwerhe eshukurani nene k’olola luhembo.

2. Nka gurhe Omwami Daudi aliyerekene okw’agwerhe shukurani nene oku lukengo l’okusalira?

² Mwami Daudi alisimisizwe n’olukengo aligwerhe l’okusalira. Ayimpira Yehova ntya: “Mani esala lyani libe nka buvumba burheganyizwe embere zawe.” (Zb. 141:1, 2) Omu siku za Daudi, obuvumba buchesibwa bwaliri bwakoleswa omu mparamyo y’okuli, abadahwa baliri baburheganya na bwirhonzi bunene. (Kut. 30:34, 35) Daudi alilonzeze ayinje awaza oku bwirhonzi oku by’akaderhere amango aliri asalira emwa Yehova nka kulala baliri barheganya obuvumba buchesibwa nabo baliri bajira ntyo oku bwirhonzi. Nerhu echola chi rhukenere bwenene. Rhulonzeze amasala merhu masimise Yehova.

3. Gurhe rhukwanene kuchifarha amango yirhwasalira Yehova, na bulagurhe?

³ Amango rhuli rhwasalira emwa Yehova, rhurhakwanene kuyinja rhwamurhola nka muzala werhu. Si rhukwanene kumusalira na bukenge bunene. Waza oku bibonekezi bisomeze Isaya, Ezekieli, Daniyeli, na Yohana babonaga. Buli chibonekezi chirhaliri kuguma n’echabo, aliko byoshi hali aha bibuganene. Byoshi byaliyerekene Yehova nka Mwami ogwerhe echubahiro. Isaya “alibwene Yehova ayikere okuchirhi ch’obwami chizamwirwe chinalungerere bwenene.” (Isa. 6: 1-3) Ezekieli alibwene Yehova ayikere oku chitugari chage ch’embingu, chizungulukirwe n’echintu “chiyangere bwenene . . . chili nka mungeeri gw’envula.” (Eze. 1:26-28) Daniyeli alibwene “Omushaja we Siku” ayambere ebishuli by’omweru, n’ebirimi by’omuliro byaliri byarhenga oku chirhi chage ch’obwami. (Da. 7:9, 10) Yohana analibwene echirhi cha Yehova ch’obwami chizungukirwe n’echintu chili nka mungeeri gw’envula gw’erangi lye emerodi ly’olushogo ekwirire. (Ufu. 4:2-4) Amango rhwamawaza oku bukuze Yehova agwerhe burhakahuzanywa chiro n’echindi chintu, rhwanayibuka olukengo lunene rhugwerhe l’okumuyegera omu sala, n’akamaro k’okujira ntyo na bukenge bunene bwenene. Aliko si, bichi rhukwanene kuderha omu masala merhu?

4. Bichi ebinwa by’omurhondero by’esala ly’omufano lili mu Matayo 6:9, 10 byakarhuyigiriza?

⁴ Osome Matayo 6:9, 10. Omu Mahubiri mage m’oku Musozi, Yesu aliyigirize abanafunzi bage gurhe bakayinja basalira omu njira esimisize Mungu. Amalire kuderha mpu “intya kumukwanene kusalira,” Yesu aderha oku bintu by’akamaro bwenene bifarhene n’omuhigo gwa Yehova: k’okudera; okucheswa kw’ezino lyage, okuyinja k’Obwami, obu nji bwalimbula abanzi boshi ba Mungu; n’ebintu binja nj’ajirira abantu n’egulu omu mango mayinjire. Amango rhwamahira ebila bintu omu masala merhu, rhwanayerekana ok’obulonza bwa Mungu bo bw’akamaro emwerhu.

5. Ka Yehova anarhuyunviriza amango rhwamasalira oku bilolere ebintu rhukenere?

⁵ Omu chigabi chikulikireho ch’elyola sala, Yesu aliyerekene oku kurhali kubi okusalira oku bilolere ebintu rhukenere. Rhwakahuna Yehova arhuhe akalyo k’olusiku, arhubabalire oku byaha byerhu, arhulange oku mashumi n’ebigeregezo, anarhuyokole changwa arhulikuuze k’olala mubi. (Mt. 6:11-13) Amango rhwamahema Yehova ebyola bintu, rhwanamuyereka oku rhukenere oburhabale bwage n’oku rhulonzeze rhumusimise.

6. K’ebintu biderherwe omu sala ly’omufano byonyine birhukwanene kuheba omu masala merhu? Fasiriya.

⁶ Yesu arhalilonzeze abanafunzi bage bayinje bagalukira chinwa oku chindi ebinwa bili omu sala ly’omufano. Omu mandi masala  Yesu ajiraga, aliderhere oku bintu byalimulazize amola mango. (Mt. 26:39, 42; Yoh. 17:1-26) Kuguma na Yesu, nerhu rhwakasalira oku bilolere echintu choshi-choshi chirhulazize. Amango birhuhemere rhurhole ensimikiro (emishogo), rhwakahema obwengehe n’obumenyi omu sala. (Zb. 119:33, 34) Amango rhwamahaabwa engabane ekomeere, rhwakahema Yehova arhurhabale rhumenye gurhe rhwakayikola bwinja. (Mez. 2:6) Abazere bakaheba abana babo omu sala, abana nabo bakaheba abazere babo omu sala, na rhweshi rhwakaheba abanafunzi berhu be Biblia omu masala merhu na balala boshi rhunahubiri. Aliko amango rhuli rhwasalira, rhurhakwanene kuhema Yehova oburhabale konyine.

7. Bulagurhe rhukwanene kukuuza Yehova omu masala merhu?

⁷ Rhukwanene rhuyibuke kukuuza Yehova omu masala merhu. Nta windi okwanene kuhaabwa obukuuze, olekere Mungu werhu. Ali “mwinja anali tayari kubabalira.” Kandi ali “w’olukogo n’obonjo, orhayunva burhe juba-juba, anayunjulirene obuzigire bwimana n’obwimana.” (Zb. 86:5, 15) Kweri rhugwerhe empanvu zinja z’okukuuza Yehova oku bilolere engeso zage n’oku by’anakola.

8. Bintu bihe biguma rhwakabwira ku Yehova koko? (Zaburi 104:12-15, 24)

⁸ Olekere okukuuza Yehova omu masala merhu, rhukwanene rhumubwire koko oku bintu binja bwenene anarhuha. Omufano, rhwakamubwira koko amango rhwamabona erangi ly’amauwa makwirire bwenene, oku bilolere embero zinene z’ebilyo bilokere, n’obusime b’okugwarha abera b’oku murhima. Darha w’obuzigire arhuhaga ebyola, n’ebindi byoshi, yi rhugwarha obusime. (Osome Zaburi 104:12-15, 24.) Ech’akamaro bwenene, rhunabwira Yehova koko oku nyigirizo zoshi ali arhuhereza z’okukomeza obwemere bwerhu, n’oku bilolere obulangalire bwinja bwenene rhugwerhe bw’amango mayinjire.

9. Bichi byakarhurhabala rhuyibuke kubwira Yehova koko? (1 Watesalonike 5:17, 18)

⁹ Byakarhuyorohera okuyibirira kubwira Yehova koko oku bintu byoshi arhujirire. Bichi byakakurhabala orhayibiriraga? Wakayandika ebintu wahemere Yehova omu sala, na buzinda wanaja walola  nka gurhe ashubize oku masala mawe. Wanaja waderha esala ly’okumubwira koko k’obola burhabale akuhere. (Osome 1 Watesalonike 5:17, 18.) Wazaga kw’echila: Rhunagwarha obusime n’okuchiyunva rhuzigiirwe amango abandi bamarhubwira koko. Konakuguma, amango rhwamayibuka kubwira Yehova koko oku masala merhu ashubizeko, kunasimisa omurhima gwage. (Kol. 3:15) Aliko si, ka hali eyindi mpanvu y’akamaro yakarhuma rhwabwira Mungu koko?

10. Nk’oku olwandiko lwa 1 Petro 2:21 luderhere, bulagurhe rhukwanene kubwira Yehova koko bulala alirhumire Yesu oku gulu?

¹⁰ Osome 1 Petro 2:21. Rhukwanene kubwira Yehova koko bulala alirhuhere Omugala muzigirwa arhuyigirize. Amango rhwamayiga oku bilolere Yesu, rhwanamenya binene oku bilolere Yehova, n’okumenya nka gurhe rhwakamusimisa. Nka rhugwarhire obwemere omu nterekero ya Kristu, rhwanagwarha obwira bukomere n’omurhula haguma na Yehova.​—Ro. 5:1.

11. Bulagurhe rhunasalira omu zino lya Yesu?

¹¹ Rhubwirire Yehova koko bulala rhwakamusalira kugerera Omugala. Yehova anakolesa Yesu omu kurhuha ebi rhwahemere. Yehova anayunviriza n’okushubiza oku masala rhwajirire omu zino lya Yesu. Yesu aliderhere: “Choshi-choshi mwahema omu zino lyani, nji nachijira, yi Darha ahaabwa obukuze kugerera Omugala.”​—Yoh. 14:13, 14.

12. Yindi mpanvu ehe yakarhuma rhwabwira Yehova koko bulala arhuhere Omugala?

¹² Yehova anababalira ebyaha byerhu kugerera enterekero y’enchungu ya Yesu. Amandiko mayerekene Yesu nka “mudahwa mukulu oyikere ekulyo kw’echirhi ch’obwami ch’Obukulu omu mbingu.” (Ebr. 8:1) Yesu ali “murhabazi werhu emwa Darha.” (1 Yo. 2:1) Rhugwerhe shukurani nene emwa Yehova bulala arhuhere Omudahwa Mukulu omenyere obuzamba bwerhu, kandi “onarhuderhera”! (Ro. 8:34; Ebr. 4:15) Rhuli bantu barhashinganene, che chirhumire rhurhakagalire kuyegera Yehova omu sala buzira enterekero ya Yesu. Rhurhakabona ebinwa rhwabwira mu Yehova koko okubona arhuhere oluhembo lwinja bwenene; k’okuderha Omugala muzigirwa!

13. Omu budufu b’obuzinda embere Yesu afe, nka gurhe aliyerekene okw’azigire abanafunzi bage?

¹³ Obudufu b’obuzinda embere Yesu afe, alimalire kasanzi kanene ali asalirira abanafunzi bage, ey’ali ahema Eshe “abalange oku mubi.” (Yoh. 17:15) Ebyola biyerekene kangana gurhe Yesu alizigiirebo! Chiro akaba oku Yesu alimenyere okw’akala kulibuzwa bwenene, chirhabuzaga arhashishikala entumwa zage.

14. Nka gurhe rhwakayerekana oku rhuzigiire bene-berhu na bali-berhu?

¹⁴ Rhwakayiganya Yesu omu kurhayinja rhwawaza oku birhulagirire konyine. S’ahubwe, rhwakagenda rhwaheba bene-berhu omu masala merhu ma buli mango. Nkarhwamajira ntyo, eyi rhuli rhwakenga erhegeko lya Yesu ly’okuzigirana, n’okuyereka Yehova kangana gurhe rhuzigiire aberhu bemezi. (Yoh. 13:34) Okusalirira bene-berhu na bali-berhu, kurhali kuheza ebisanzi. Echinwa cha Mungu chirhubwirire oku, “esala ly’okulakirira ly’ow’okunali lijira misi minene.”​—Yak. 5:16.

15. Bulagurhe bene-berhu na bali-berhu bakeneere amasala merhu?

 ¹⁵ Bene-berhu na bali-berhu bakenere amasala merhu bulala bali bahurana bigeregezo binene. Rhwakahema Yehova abarhabale bagale kulembera amalwala, ebinjira, entambala z’abantu b’obuko n’obwindi, obupinzani, changwa ebindi bibazo. Rhwakanaheba omu masala merhu, bene-berhu na bali-berhu bali bakola bwenene omu kurhabala balala bali omu bulagirire. Nkabaga hali n’aba nawe omenyere bwawe-bwawe bali bahurana ebibazo bili nk’ebyo. Orhabwene oku kwakaba kwinja oderhe amazino m’abola bantu omu masala mawe ? Rhunayereka bene-berhu obuzigire bw’akasisi omu kuhema Yehova abarhabale balembere.

16. Bulagurhe rhukwanene kusalirira balala bali barhuyerekeza?

¹⁶ Balala bagwerhe engabane z’okuyerekeza omu chibaga banasima bwenene eyi bayunva rhwabaderha omu masala merhu, n’amola masala mabaherhere kachiro kanene. Paulo naye alimenyere echola. Ayandika mpu: “Nani munsalirire, yimpabwa ebinwa, naho yingala kuderha n’obushiru omu kumenyesa abantu esiri nchesibwa y’emyazi minja.” (Efe. 6:19) Zene naho, rhugwerhe bene-berhu banene bali bakola bwenene omu kurhuyerekeza. Rhunayerekana oku rhubazigiire omu kuhema Yehova agishe akasi bali bakola.

17-18. Mango mahe bakarhuhema rhuderhere abandi omu sala, na bichi rhukwanene kuyibuka?

¹⁷ Hali amango banarhuhema rhusalirire abandi. Omufano, mwali-werhu oli waongoza efunzo lye Biblia akahema owindi mwali-werhu wamuherekezaga asalire. Oyola mwali-werhu waherekezaga owabo akaba ey’arhamenyere omwanafunzi bwinja, naho anaba ey’akasima aderhe esala ly’obuzinda. Omu kujira ntyo, byakaja byamuyorohera amenye eby’akaderha omu sala oku bilolere eby’omwanafunzi akenere.

¹⁸ Bakahema mwene-werhu asalire oku mbuganano y’amahubiri changwa oku mbuganano y’echibaga. Mwene-werhu wahabirwe eyola ngabane akwanene ayibuke omuhigo gw’embuganano. Esala lirhakwanene kuba lyakuhanula echibaga changwa  kumenyesa abantu emyazi barhaliyinji. Oku mbuganano zinene z’echibaga, esala n’olwimpo biba bya miniti erhano ntya. Bobola mwene-werhu wasalira arhakwanene kuderha “binwa binene,” ahanene oku murhondero gw’embuganano.​—Mt. 6:7.

19. Bichi byarhurhabala rhube tayari amango olusiku lwa Yehova l’okucha olubanja lwahika?

¹⁹ Birhuhemere rhubone oku esala lili ly’akamaro bwenene omu kalamo kerhu, ahanene oku rhuli rhwayegera olusiku lwa Yehova l’okucha olubanja. Oku bilolere echola, Yesu aliderhere ntya: “Bobola, mugenderere kuba masu, n’okulakirira Mungu amango moshi yinji mugala kufuma ebyola byoshi bikwanene kurhengerera.” (Lu. 21:36) Nechi, rhukayinja rhwasalira oku kahunda, obwemere bwerhu bwakomera, kandi nji rhwaba rhuli tayari amango olusiku lwa Yehova l’okucha olubanja lwahika.

20. Nka gurhe amasala merhu makaba nka mpumulo nyinja y’obuvumba?

²⁰ Bichi rhwaganirireko? Rhunabona oku olukengo rhugwerhe l’okusalira luli lw’akamaro bwenene. Ebintu by’akamaro bwenene rhukwanene kuheba omu sala, bikwanene kuba bifarhene n’omuhigo gwa Yehova. Kandi rhunabwira Yehova koko okubona arhuhere Omugala n’Obwami bwage n’okuheba bene-berhu na bali-berhu omu masala merhu. Kandi, kweri, Yehova alonzeze rhumubwire ebintu by’omubiri rhukenere anarhurhabale rhugenderere kukomera ekiroho. Amango rhwamawaza bwinja-bwinja changwa n’obwirhonzi oku birhwaderha omu masala merhu, rhwanayerekana oku rhusimisizwe n’olola lukengo lwinja bwenene. Ebinwa byerhu byaba nka mpumulo nyinja y’obuvumba emwa Yehova, k’okuderha, “emusimisize.”​—Mez. 15:8.