1. Bichi rhuchizerere, na bulagurhe?

 AMANGO oli wabona okuntu ebintu bili omu gulu zene, ka byakakukomerera okuyemera oku ebibazo byoshi nji byahwa omu mango mayinjire? Abantu b’omu mulala barhachizigirene bwenene nk’oku byaliri mira. Abantu bali bagenderera kuba bakali kulusha, n’okuchikaziza. Banene babwene oku bibakomerere kuchizera abali barhegeka. Aliko, ebila byoshi birhuyemezeze oku ebintu bili hofi kukwira. Bulagurhe? Bulala abantu bali bajira bwinja-bwinja ebye Biblia yabaga yalebere oku bilolere “esiku z’obuzinda.” (2 Ti. 3:1-5) Nta muntu munihirwa wakalahira k’obula bulebi burhali bwayenera zene, n’okuyenera kwabo biyerekene oku Yesu ali arhegeka nka Mwami w’Obwami bwa Mungu. Aliko bunola buli buguma omu malebi manene maderhere oku bilolere Obwami. Okuwaza oku mandi malebi machizindire yenera omu myaka ya hano hofi kwakomeza obwemere bwerhu.

2. Bichi rhwaganirako mu gunola mwazi na bulagurhe? (Olole efoto eli oku chiganda.)

² Mu gunola mwazi rhwaganira 1) oku bulebi bwarhurhabala rhumenye mangochi obo Bwami bwashimikwaga, 2) amalebi marhurhabere rhumenye oku Yesu abere Mwami w’Obwami bwa Mungu, na 3) rhumenye okuntu abanzi bw’Obwami bwa Mungu nji balimbulwa. Nka kulala omuntu akayinja ashomeka orhuchira rhw’efoto bachagulangire, anazinda anayeneza efoto nzibu-zibu ebonekene bwinja, okuhira haguma amalebi rhukala shambalako kwarhurhabala rhumenye  ngahe rhukala rhuli oku kalendriye ka Yehova k’okuyeneza emihigo yage.

3. Bwizere buchi obulebi buli omu Danieli 7:13, 14 burhuhere oku bilolere Obwami bwa Mungu?

³ Obulebi buli mu Danieli 7:13, 14 burhurhabere rhuchizere oku Yesu Kristu nj’aba Mwami mwinja w’Obwami bwa Mungu. Abantu ba buli shanja nji bagwarha obusime b’okumukolera na ntaye wemugombole haba n’akatyu oku burhegesi bwage. Obwindi bulebi buli omu chitabu cha Danieli bwalilebere oku Yesu akahaabirwe Obwami oku buzinda bwa bihe mushanvu by’obulebi. Ka byakahashikana okumenya mangochi Yesu abaga Mwami?

4. Fasiriya nka gurhe olwandiko lwa Danieli 4:10-17 lurhurhabere rhumenye omwaka Yesu akabere mwami. (Olole n’amahugulo m’eshishi.)

⁴ Osome Danieli 4:10-17. Ebyola “bihe mushanvu” chili chihe cha myaka 2 520. Echo chihe charhonderaga omu mwaka gwa 607 M.K.Y. (Embere yo Kuburhwa kwa Yesu) amango Abababiloni bakula omwami wa buzinda oku chirhi ch’obwami cha Yehova e Yerusalemu. Echo chihe chahwaga omu mwaka gwa 1914 N.K.Y. (Enyuma yo Kuburhwa kwa Yesu), amango Yehova ashimikaga Yesu, “oherhe ehaki y’okurhegeka eyumangire oku sheria,” nka Mwami w’Obwami bwa Mungu. b​—Eze. 21:25-27.

5. Mu njira ehe rhwakayunguka n’obulebi buderhere oku bilolere “bihe mushanvu”?

⁵ Okumenya obula bulebi kuherhe nyungu nchi? Okuyunva obulebi buderhere oku bilolere “bihe mushanvu,” kwarhuhereza obwizere oku Yehova nj’ayeneza ebilagane byage omu kasanzi kakwanene. Yehova abaga achishogere akasanzi akashimikire Yesu nka Mwami, n’amango akola kasanzi kahika amushimika. Echola chirhuyerekere oku nj’ayeneza amandi malebi moshi oku kasanzi ahebereho. Nechi, olusiku lwa Yehova “nji lurhacherehwa.”​—Hab. 2:3.

6. a) Bichi rhuli rhwabona oku gulu biyerekene oku Yesu ali arhegeka omu mbingu? b) Nka gurhe ebila rhuli rhwachibonera biyerekene oku ‘obulebi buli omu Ufunuo 6:2-8 buli b’okuli?

⁶ Yesu aliderhere bintu biguma byakarhengerere oku gulu byakarhabere abanafunzi bage bamenye oku arhondere kurhegeka embingu. Omu byaderhaga hali amavita, enzara n’emisisi. Anashuba leba oku nji haba amalwala m’okuyahukira “hantu haguma oku handi,” omufano, obula bulwala b’okuyahukira bwe Korona (COVID-19) buchizindire rhengerera. Ebyola byoshi by’Ebiblia ehamagere “chimenyiso” ch’okubaho kwa Kristu. (Mt. 24:3, 7; Lu. 21:7, 10, 11) Hagerere myaka erhalukire 60 enyuma y’okufa kwage n’okugaluka embingu, Yesu aha entumwa Yowane echindi chemezo chiyerekene oku ebyola bintu byakarhengerere. (Soma Ufunuo 6:2-8.) Ebila byoshi byarhengerere kurhenga amango Yesu ashimikwa nka Mwami omu 1914.

7. Bulagurhe bintu binene bibi bili byarhengerera oku gulu kurhenga amango Yesu abaga Mwami?

⁷ Nka gurhe egulu lyakaja lyabiha bwenene amango Yesu abaga Mwami? Echitabu cha Ufunuo 6:2 chirhuyerekere echintu ch’akamaro chakaba charhumire. Echintu chirhanzi Yesu ajiraga amalire kushimikwa nka Mwami w’Obwami bwa Mungu, kwaliri kulwa evita. Alwaga evita nande? Alwaga na Shetani n’abazimu bage. Echitabu cha Ufunuo sura 12 chiderhere oku, Shetani ahimwa mw’elyo vita, kandi yewe n’abazimu bage bakabulwa hanola  oku gulu. Echola chalerhere obuhanya oku gulu, bulala Shetani agwerhe burhe bunene, anali arhera abantu.​—Ufu. 12:7-12.

8. Nyungu zichi rhwakagwarha amango rhuli rhwabona ebintu bili byarhengerera, bili byayeneza amalebi malolere Obwami?

⁸ Okumenya obula bulebi kuherhe nyungu nchi? Okubona ebili byarhengerera oku gulu n’okuntu oborhere bw’abantu yi bwahindamuka birhurhabere rhumenye oku Yesu abere Mwami. Ahali h’okugwarha oburhe bulala rhuli rhwabona abantu bali bachikaziza n’okugwarha olushombo lukabizye, rhwanayibuka oku ebijiro byabo bili byayeneza obulebi bwe Biblia. Obwami buli bwa rhegeka! (Zb. 37:1) Rhwakalangalira oku egulu lyagenderera kubiha oku e Harmagedoni eli yayegeera bwenene. (Mk. 13:8; 2 Ti. 3:13) Rhugwerhe eshukrani bwenene bulala Darha w’embingu ali arhurhabala rhumenye bulagurhe bibazo binene bili mw’elila gulu.

9. Nka gurhe olwandiko lwa Danieli 2:28, 31-35 lufasiriye oburhegesi b’obuzinda bw’egulu, na mangochi bwahwanzaga kurhegeka?

⁹ Soma Danieli 2:28, 31-35. Zene yi rhwabona gurhe obula bulebi yi bwayenera. Ebilorho bya Nebukadneza byaliyerekene bichi byakarhengerere “omu chihe chizinda ch’esiku” enyuma y’omurhondero g’oburhegesi bwa Kristu. Ebiblia yabaga yalebere oku abanzi ba Yesu b’oku gulu bakaheberwemo n’oburhegesi bukulu bw’egulu b’obuzinda, bushushanyizwe ‘n’ebishando by’echuma n’ebumba.’ Obo burhegesi bukulu bw’egulu bwarhangire kurhegeka. Bwarhonderaga kurhegeka amango m’Evita Lirhanzi ly’Egulu Lyoshi, amango oburhegesi bwe Angletere ne Etats-Unis bwarhonderaga kukola haguma bwinja-bwinja. Ebilorho Nebukadneza abonaga kandi byalishubire kuyerekana bintu bibiri ntya byaliyerekene  ok’obola burhegesi bw’egulu burhali kuguma n’amandi marhegesi mabaga magerere.

10. a) Bichi rhubwene zene oku bilolere oburhegesi bw’egulu bwe Angletere ne Etats-Unis nk’ok’obulebi bwa Danieli buderhere? b) Buhanya buhe rhukwanene kuchilangako? (Olole Echisanduku “ Ochilange n’Ebumba!”)

¹⁰ Ech’oburhanzi, oburhegesi bwe Angletere ne Etats-Unis burhali kuguma n’amandi marhegesi m’egulu maganirirwe omu bibonekezi, bulala bowe burhalishushanyizwe ne oro changwa e arja, s’ahubwe bushushanyizwe n’echuma chichangirwe mw’ebumba. Elyo bumba lishushanyize “oluburho l’wabantu,” k’okuderha abagunda changwa abantu ba ntyantya. (Da. 2:43, amahugulo m’eshishi.) Zene rhuli rhwabona bwinja gurhe abantu bagwerhe echinwa amango m’obuchaguzi bw’abarhegesi, amakampanye m’okulwira ehaki z’abantu, amamarshe m’okupinga oburhegesi, emilungano y’okuderhera ehaki z’abakozi; ebyola byoshi bili byarhuma obola burhegesi bukulu bw’egulu burhagala kujira byoshi nk’oku bwalilonzeze.

11. Nka gurhe okurhangira kurhegeka kw’oburhegesi bw’egulu bwe Angletere ne Etats-Unis kukomeze obwizere bwerhu oku rhulamire omu chihe ch’obuzinda?

¹¹ Echakabiri, oburhegesi bwe Angletere ne Etats-Unis bushushanyize ebishando by’echishushanyo chizibu-zibu oburhegesi buzinda bw’egulu bwa lebwaga omu Biblia. Nta bwindi burhegesi bw’abantu nji bwabugombola. Ahubwe, Obwami bwa Mungu nji bwabulimbula oku Harmagedoni haguma n’amandi marhegesi moshi m’abantu. c​—Ufu. 16:13, 14, 16; 19:19, 20.

12. Bindi bichi Danieli alebaga birhuhere oburhulirizi n’obulangalire?

¹² Okumenya obula bulebi kuherhe nyungu nchi? Obulebi bwa Danieli burhuhere ebindi byemezo birhuyerekere oku rhulamire omu chihe ch’obuzinda. Hamagera emyaka erhalukire 2 500, Danieli alebere oku enyuma y’oburhegesi bwe Babiloni, mandi marhegesi mane m’egulu m’akahumire bwenene oku bantu ba Mungu. Oku bwindi, ashuba kuyerekana oku Oburhegesi bw’Egulu bwe Angletere ne Etats-Unis, bwakabere b’obuzinda mw’amola marhegesi. Echola chirhuhere oburhulirizi n’obulangalire oku hano hofi hofi Obwami bwa Mungu bwakula amandi marhegesi moshi m’abantu n’okurhegeka egulu lyoshi.​—Da. 2:44.

13. Bichi “omwami wa munane” na “bami ekumi,” bashamberwe omu Ufunuo 17:9-12, bashushanyize, na nka gurhe obula bulebi buli bwayenera?

¹³ Soma Ufunuo 17:9-12. Bulala Evita Lirhanzi ly’Egulu Lyoshi lyaliharabisize bintu binene omu gulu, harhengerera echintu chayenezaga obwindi bulebi bw’e Biblia oku bilolere esiku z’obuzinda. Abarhegesi b’egulu balonza bajire okuntu omurhula gwakaba omu gulu. Bobola, omu Mwezi gwa 1, 1920, bahwanzisa Omubano gw’Amashanja gwagombolwaga n’Obuguma bw’Amashanja omu Mwezi gwe 10, 1945. Obola buguma bw’amashanja buyirikirwe “mwami wa munane.” Aliko oyo mwami burhali burhegesi bukulu bw’egulu. Agwerhe emisi bulala amarhegesi mamushigikire mamuhere obukulu. Ebiblia eyirikire amola marhegesi “bami ekumi.”

14-15. a) Bichi olwandiko lwa Ufunuo 17:3-5 luyerekene oku bilolere “Babiloni Mukulu”? b) Bichi byarhengerera oku bilolere abantu bali omu madini m’obubeshi?

¹⁴ Soma Ufunuo 17:3-5. Omu bibonekezi birhengere emwa Mungu, entumwa Yowane alibwene embaraga, k’okuderha, “Babiloni Mukulu” oshushanyize amadini moshi m’obubeshi. Nka gurhe ebyola bibonekezi byayenere? Amadini m’obubeshi mamakola myaka minene haguma n’amarhegesi m’egulu n’okumashigikira. Aliko hano hofi-hofi, Yehova aheba omu mirhima y’abarhegesi b’epolitike “ewazo lyage yi baliyeneza.” Byanaja byaba gurhe? Abola barhegesi b’epolitike, k’okuderha, “bami ekumi,” nji barhera  amadini moshi m’obubeshi n’okumalimbula.​—Ufu. 17:1, 2, 16, 17.

¹⁵ Bichi biyerekene k’obuzinda bwa Babiloni Mukulu buli hofi? Yi rhushubiza kw’echola chibazo, kuli kwinja rhwanarhanga kuyibuka oku evile ye Babiloni ya mira yalilangirwe n’amenji m’olwinji luzibuzibu luyirikirwe Efrati. Echitabu cha Ufunuo chihuzenye amamilioni m’abantu bali oku lunda lwa Babiloni ‘n’amenji’ m’obulanzi. (Ufu. 17:15) Aliko kandi chishubire derha oku amola menji ‘makakamizwe’ changwa makayumizwe, omu kuyerekana oku amadini m’obubeshi moshi m’oku gulu makahezeze bantu banene. (Ufu. 16:12) Obula bulebi, buli bwayenera zene bulala bantu banene bali barhenga omu madini m’obubeshi n’okuja lonzeza ahandi-handi oburhabale oku bibazo byabo.

16. Gurhe rhwakayunguka omukuyunva obulebi bulolere okurhengerera k’Obuguma bw’Amashanja n’obuzinda bwa Babiloni Mukulu?

¹⁶ Okumenya obula bulebi kuherhe nyungu nchi? Okuhwanziswa k’Obuguma bw’Amashanja, n’okubona gurhe bantu banene bali barhenga omu madini m’obubeshi, byoshi biyerekene oku  rhulamire omu siku z’obuzinda. Chiro akaba kw’abantu banene bali barhenga mu Babiloni Mukulu, arhali echola ch’echalimbula amadini moshi m’obubeshi. Nk’okurhwabaga rhwabwene, Yehova nj’ahira elyo wazo omu mirhima y’abola “bami ekumi,” k’okuderha, abarhegesi b’epolitike bashigikire Obuguma bw’Amashanja, “yibayeneza ewazo lyage.” Amola mashanja nji mayirukira malimbula Babiloni Mukulu, n’echola nji cha someza abantu omu gulu. d (Ufu. 18:8-10) Okulimbulwa kwa Babiloni Mukulu nji kwashaganya egulu bwenene hali n’okw’echola nji chakalerha ebibazo, aliko abantu ba Mungu bowe bagwerhe mpanvu ebiri ntya nji zarhuma bachishinga. Amadini m’obubeshi mamashomba Mungu myaka minene marhakachibaho chiro, kandi nji rhwaba rhuli hofi kuyokolwa kurhenga mw’elila gulu libi!​—Lu. 21:28.

17-18. a) Nka gurhe rhwakagenderera kukomeza obwemere bwerhu? b) Bichi rhwashambalako omu mwazi gukulikire?

¹⁷ Omulebi Danieli alilebere oku “obumenyi b’okuli” bwakabere “bunene.” Nechi kweri bwanalugire bwenene! Rhwayunvirhe bwinja amalebi malolere echihe rhulamiremo. (Da. 12:4, 9, 10) Amola malebi mali m’okuli loshi, n’echola charhumire rhwakenga Yehova bwenene n’Echinwa chage chafuherwaga, k’okuderha, Ebiblia. (Isa. 46:10; 55:11) Bobola, ogenderere kukomeza obwemere bwawe omu kuyiga bwinja Amandiko n’okurhabala abandi bayemerwe na Yehova banagwarhe obwira haguma naye. Nj’alanga balala bamulangalire n’omurhima goshi n’okubahereza “omurhula gugenderere.”​—Isa. 26:3.

¹⁸ Omu mwazi gukulikireho nji rhwashambala oku malebi malolere echibaga che Chikristu omu siku z’obuzinda. Nk’oku nji rhwabibona, amola malebi mayerekene kandi oku rhulamire omu siku z’obuzinda. Rhwabona ebindi bintu biyerekene oku zene, Omwami werhu, Yesu, ali ayerekeza abanafunzi bage bemana.