1. Obulonza bwa Yehova zene buli buhe?

 OBULONZA bwa Mungu buli oku emyazi minja y’Obwami bwage ehubiribwe omu gulu lyoshi. (Mk. 13:10; 1 Ti. 2:3, 4) Akala kali kasi ka Yehova, binali by’akamaro okubona oku achishogere Omugala muzigirwa akayerekeze. Rhwakachizera oku bulala Yesu ali arhuyerekeza, akasi k’okuhubiri nji kayenera nk’oku Yehova analonzeze, embere obuzinda buhike.​—Mt. 24:14.

2. Bichi rhwaganirako mu gunola mwazi?

² Mu gunola mwazi, rhwabona gurhe Yesu ali akolesa “omuja mwimana onakengukire” omu kurhuhereza enyigirizo zirhengere omu Chinwa cha Mungu n’okupanga bwinja abanafunzi bage yi bagala kujira akampanye k’okuhubiri karhasaga kubaho omu ngani y’abantu. (Mt. 24:45) Kandi rhwashuba kubona bichi buli muguma werhu akajira yagala kushigikira Yesu n’omuja mwimana.

3. Burhwali buchi Yesu ahaabirwe?

³ Yesu ali ayerekeza akasi k’okuhubiri. Bichi birhuyemezeze ebyo? Kasanzi kageke embere aje embingu, Yesu ajira embuganano n’abanafunzi bage baguma bimana oku musozi gwe Galilaya. Ababwira ntya: “Nahaabirwe oburhwali boshi omu mbingu n’oku gulu.” Lolaga ebinwa ayongeraga: “Bobola, mugende mujire abanafunzi kurhenga omu bantu b’amashanja moshi.” (Mt. 28:18, 19) K’okuderha k’omu bindi bintu Yesu alihaabirwe, halimo n’oburhwali b’okuyerekeza akasi k’okuhubiri.

4. Bulagurhe rhwakachizera oku Yesu achili ayumangira akasi k’oku hubiri?

 ⁴ Yesu aliderhere kw’akasi k’okuhubiri n’okujira abanafunzi kakakolerwe omu “mashanja moshi,” n’oku akabere haguma n’abanafunzi bage “esiku zoshi kugera oku buzinda bw’elila gulu libi.” (Mt. 28:20) Ebyola binwa biyerekene bwinja oku akasi k’okuhubiri kakagenderere kuyerekezwa na Yesu kugera zene.

5. Nka gurhe rhuli rhwarhabala omu kuyenezwa k’obulebi buli mu Zaburi 110:3?

⁵ Yesu arhaliyubahire oku nji haba bakozi bageke oku gulu amango m’obuzinda bw’elila gulu libi lya Shetani. Alimenyere oku ebinwa by’obulebi bili omu Zaburi nji byayenera: “Abantu bawe nji bachihaana oku bulonza omu lusiku l’oburungu bwawe.” (Zb. 110:3) Akaba oli wakola oku kasi k’okuhubiri, oli warhabala Yesu n’omuja mwimana, onali warhabala kuyeneza obola bulebi. Abahubiri bali bagendereza akola kasi aliko bali bahurana ebibazo.

6. Chibazo chihe chiguma abahubiri bw’Obwami bali bahurana zene?

⁶ Chibazo chiguma abahubiri b’Obwami bali bahurana buli bupinzani. Ebigamba by’obwemere, abakulu b’amadini, n’abakulu b’epolitike bali baderha ebinwa binene by’obubeshi oku bilolere akasi kerhu. Akaba abantu b’omu milala yerhu, abantu rhumenyene nabo, n’abarhukola nabo bamarhebekwa n’obola bubeshi, barhushumika mpu yirhuleka kukolera Yehova n’okuleka akasi kerhu k’okuhubiri. Mu bihugo biguma, abashombanyi berhu, bali barhera n’okuyubahisa changwa banafarha bene-berhu na bali-berhu n’okubakabula omu prizo. Rhurhakasomerwa okubona oku abantu bali barhukolera ntyo. Yesu abaga aderhere ntya: “Nji mwashombwa n’amashanja moshi eju y’ezino lyani.” (Mt. 24:9) Okubona oku abantu bali barhukolera ntyo, echola chiyerekene oku Yehova arhuyemerere. (Mt. 5:11, 12) Shetani yeli walerha obola bupinzani. Aliko Yesu agwerhe emisi bwenene kulusha Shetani! Kugerera oburhabale bwa Yesu, emyazi minja eli yahikira abantu b’amashanja moshi. Bichi birhuyemezeze echola?

7. Bichi oli wabona biyerekene k’obulebi buli omu Ufunuo 14:6, 7 buli bwayenera?

⁷ Echindi chibazo rhunahurana nacho amango rhuli rhwahubiri, kuli kubona oku abantu bali baganira ndimi zinene. Yesu alibishulire entumwa Yowane oku omu siku zerhu, emyazi minja yakahimire achola chibazo. (Osome Ufunuo 14:6, 7.) Nka gurhe? Rhuli rhwahereza bantu banene nk’okubyakanagalikana orozo l’okuyunviriza emyazi minja y’Obwami. Zene, abantu oku gulu lyoshi, bakasoma emyazi eyumangiire oku Biblia eli oku site yerhu ye Enternete jw.org bulala egwerhe emyazi mu ndimi zirhalukire 1 000! Ebaraza Lirhambwire lyayemerere oku echitabu rhuli rhwakolesa bwenene omu kujira abanafunzi, k’okuderha, Siimira Akalamo Esiku n’Amango!, chitafsiribwe mu ndimi zirhalukire 700! Kandi enyigirizo ziyumangiire oku Biblia zili zarheganyizwa ba bihuli kugerera amavideo, n’ebitabu by’empumi bili byarheganywa omu mandiko me braille. Rhuli rhwabona okuntu amalebi me Biblia mali mayenera. Abantu “kurhenga omu ndimi zoshi z’amashanja” bali bayiga kuderha “olulimi luchere” l’okuli kwe Biblia. (Zek. 8:23; Sef. 3:9) Ebyo byoshi bili byayenezwa kugerera obwimangizi buserere bwa Yesu Kristu.

8. Bichi bili byarhengerera zene kugerera akasi kerhu k’okuhubiri?

⁸ Bantu barhalukire 8 000 000 omu bihugo 240, bali omu lubaga lwa Yehova,  n’ebihumbi by’abantu bali babatizwa buli mwaka! Aliko ech’akamaro kulusha oluganjo, zili ngeso ze Chikristu, k’okuderha, “oborhere buhyahya,” abola banafunzi bali bayerekana. (Kol. 3:8-10) Banene balekene n’ebijiro by’obumaguza, obubandi, akabolo, n’okusiima bwenene echihugo chabo. Obulebi buli mu Isaya 2:4 buli bwayenera; ‘barhachili bayiga kulwa evita haba n’akatyu.’ Bulala rhuli rhwajira okwerhu koshi omu kuyambala oborhere buhyahya, rhuli rhwarhabala abandi bantu bayinje omu lubaga lwa Mungu, n’okuyerekena oku rhuli rhwakulikira omwimangazi werhu Yesu Kristu. (Yoh. 13:35; 1 Pet. 2:12) Bulagurhe ebyola bili byarhengerera? Bulala Yesu ali arhuhereza oburhabale rhukenere.

9. Nk’oku olwandiko lwa Matayo 24:45-47 luderhere, bichi Yesu alilebere byakarhengerere omu chihe chizinda?

⁹ Osome Matayo 24:45-47. Yesu alilebere oku omu chihe ch’obuzinda, akashimikire “omuja mwimana onakengukire” ayinje arhuha ebilyo by’ekiroho, k’okuderha, enyigirizo ziyumangire oku Chinwa cha Mungu. Bobuno rhumenyere k’oyola muja akwanene akole bwenene zene. Obola bona bukweri rhuli rhwachibonera. Yesu ali akolesa echigusho chigeke ch’abalume bashigwa, omu kurheganyiza abantu ba Mungu na balala basimisizwe ebilyo by’ekiroho “omu kasanzi kakwanene.” Abola balume barhachibona nka bali ba wahila b’obwemere bw’abandi. (2 Ko. 1:24) S’ahubwe, bamenyere oku Yesu Kristu “ali murongozi na komanda” w’abantu bage.​—Isa. 55:4.

10. Chitabu chihe omu biyerekenwe ahala chakurhabere orhondere kukolera Yehova?

¹⁰ Kurhenga omu mwaka gwa 1919, omuja mwimana arheganyize ebitabu bya buli lubero omu kurhabala abasimizwe bapate orozo, l’okuyiga okuli kwe Biblia. Omu mwaka gwa 1921, omuja mwimana arheganya echitabu La  Harpe de Dieu (Olunanga lwa Mungu), omu kurhabala abasimisizwe bayige enyigirizo z’omusingi ze Biblia. Okw’ebisanzi byaliri byahindamuka, ebindi bitabu byarheganywa. Chitabu chihe chakurhabalaga ohikire kumenya n’okuzigira Darha w’embingu? Ka chitabu “Que Dieu soit reconnu pour vrai ! ” (Mungu Amenyikane oku Ali w’Okuli), Kweli Iongozayo Kwenye Uzima wa Milele (Okuli Kuyerekeze oku Kalamo k’Esiku n’Amango), Unaweza Kuishi Milele Katika Dunia Paradiso (Wakalama Esiku n’Amango omu Gulu Nji Lyaba Paradizo), Ujuzi Uongozao Kwenye Uhai Udumuo Milele (Obumenyi Buyerekeze oku Kalamo k’Esiku n’Amango), Biblia Inafundisha Nini Kabisa (Bichi Ebiblia Eyigirize Kanuni?), Bichi Ebiblia Erhuyigirize?, changwa ka chitabu cherhu chihyahya, Siimira Akalamo Esiku n’Amango! Ebi bitabu byoshi byalirheganyizwe yi birhurhabala kujira abanafunzi, kweri na buli chitabu chalikenerwe omu mango chakulwaga.

11. Bulagurhe bili by’akamaro rhuyige binene oku bilolere Yehova ne Biblia?

¹¹ Arhali abahyahya bonyine babakenere obumenyi bunene oku bilolere Yehova ne Biblia. Rhweshi rhubukenere. Entumwa Paulo aliyandikire ntya: “Ebilyo bikomere bili by’abantu bakala bakulu.” Paulo ayongera oku, amango rhuli rhwakolesa ebi rhwayigire omu Biblia, echola charhurhabala “rhugerereze rhumenye ebinja n’ebibi.” (Ebr. 5:14) Byakarhukomerera zene kukenga amakanuni ma Yehova, bulala zene bantu banene bali bajira ebintu bikozeze eshonyi bwenene. Aliko Yesu ali ajira okwage koshi omu kurhuyigiriza ebintu byakarhurhabala rhukomeze obwemere bwerhu. Eshoko y’ezola nyigirizo, eli Biblia, k’okuderha Echinwa cha Mungu chafuherwaga. Yesu ali ayerekeza omuja mwimana arheganye ebyola bilyo, n’okurhuhereza byo.

12. Kuguma na Yesu, nka gurhe rhuli rhwakengesa ezino lya Mungu?

¹² Kuguma na Yesu, rhuli rhwahereza ezino lya Mungu obukuuze likwanene. (Yoh. 17:6, 26) Omufano, omu mwaka gwa 1931 rhwarhola ezino ly’Abahamirizi ba Yehova lirhengere omu Mandiko, omu kujira ntyo rhwayerekana kangana gurhe ezino lya Mungu lili ly’akamaro ku rhwabo n’okurhushondere kumenyikana oku zino lya Darha w’embingu. (Isa. 43:10-12) Kandi kurhenga omu Mwezi gwe 10 g’ogola mwaka,  ezino lya Mungu lyahwanza kuboneka oku chiganda ch’embere cha buli Munara g’Omulanzi. Oku bwindi, e Tafsiri ya Ulimwengu Mupya yagalwire ezino lya Mungu oku nafasi yalyo omu Chinwa chage. Rhurhali haba akatyu kuguma na balala bachiyirika Bakristu bakulire ezino lya Mungu omu tafsiri zinene ze Biblia zabo!

13. Bichi bikuyemezeze oku Yesu ali akolesa zene “omuja mwimana onakengukire?” (Yohana 6:68)

¹³ Kugerera “omuja mwimana onakengukire,” Yesu ahwanzisize olubaga lusomeze hano oku gulu, yi lugendereza emparamyo echere. Gurhe ochiyunvirhe oku bilolere olola lubaga? Nkabaga oli wachiyunva kuguma n’entumwa Petro, wabwiraga Yesu ntya: “Emwande rhwaja? Ogwerhe ebinwa by’akalamo k’esiku n’amango.” (Yoh. 6:68) Ngahe buli muguma werhu akabere nk’arhajaga omu lubaga lwa Yehova? Kugerera olula lubaga, Kristu ajira okuntu koshi rhugwarhe buli chintu rhukenere yi rhugala kubera bemana emwa Yehova. Anali arhukomeeza okuntu rhwakakola bwinja akasi kerhu k’okuhubiri. Kandi, ali arhurhabala rhuyambale “oborhere buhyahya,” yirhugala kusimisa Yehova.​—Efe. 4:24.

14. Nyungu zihe wagwarhire bulala oli omu lugaba lwa Yehova omu mango m’obulwala b’okuyahikira bw’Ekorona?

¹⁴ Yesu anahaana obwerekezi b’obwengehe omu mango m’ebibazo. Obola bwerekezi bwalibonekene wazi oku buli bw’akamaro, amango obula bulwala b’okuyahukira bw’Ekorona (COVID-19) burhondera. Amango bantu banene omu gulu barhalimenyere ngahe bayerekezage, Yesu ajira byoshi omu kuntu rhuhaabwe obwerekezi buli wazi b’okurhulanga. Rhwahebwa omurhima oku rhuyinje  rhwayambala amaske amango rhuli mu bantu banene, n’okuyinja rhwalekerana entambu. Abashamuka b’ebibaga bayibuswa oku bayinje bashambala buli mango na bene-bebo na bali-babo omu chibaga, banamenye bichi bakenere yi bagenderera kuba n’amagala menja n’okubera hofi na Yehova. (Isa. 32:1, 2) Rhwahaabwa obwindi bwerekezi n’okuhebwa omurhima kugerera eripoti ze Baraza Lirhambwire.

15. Bwerekezi buchi rhwalihaabirwe oku bilolere okujira embuganano n’okukola akasi kerhu k’okuhubiri, mw’amala mango m’obulwala b’okuyahukira, na nyugu zichi rhwabwene?

¹⁵ Kandi omu mango m’obulwala b’okuyahikira bw’Ekorona, rhwalishubire kuhaabwa obwerekezi buli wazi oku bilolere okuntu rhwakayinja rhwajira embuganano z’echibaga n’akasi kerhu k’okuhubiri. Buzira kulegama, rhwahwanza kujira embuganano zerhu z’echibaga, n’embuganano zikulu oku Internete kugerera evideokoferanse. Kandi, ahanene rhwahwanza kuhubiri kugerera okuyandika amaruba na kugerera etelefone. Yehova agisha obushiru bwerhu. Mirhabi minene yahaanire eripoti eyerekene oku oluganjo lwabahubiri lwayongezekere. Kweri, banene bachibwenere ebintu bisimisize mw’akola kasanzi.​—Olole echisanduku “ Yehova Anagisha Akasi Kerhu k’Okuhubiri.”

16. Bichi rhwakachizera?

¹⁶ Nkabaga bantu baguma baliwazize oku olubaga lwa Yehova lwalivire lwakabya oku bilolere okuchilanga k’obula bulwala b’okuyahukira. Aliko buli mango byaliri byabonekana oku obwerekezi rhwaliri rhwahaabwa bwaliri bw’akamaro. (Mt. 11:19) N’amango rhwamawaza bwenene okuntu Yesu ali ayerekeza abantu bage n’obuzigire, rhwanachizera oku chiro byoshi byakarhuhikira omu mango mayinjire, Yehova n’Omugala muzigirwa nji baba haguma nerhu.​—Osoma Waebrania 13:5, 6.

17. Gurhe oli wachiyunva bulala Yesu ali akuyerekeza?

¹⁷ Rhugwerhe busime bunene bulala Yesu ali mwimangizi werhu! Rhuli rhwahaabwa nyigirizo zinene zirhengere omu Chinwa cha Mungu. Kandi rhuli omu lubaga luli m’obuguma chiro akaba rhurhengere omu bihugo, emicho, n’endimi zilengene. Rhunali rhwakoomezwa yirhugala kukola bwinja akasi kerhu k’okuhubiri. Buli muguma ali achihangana kuyambala oborhere buhyahya, rhunali rhwayigirizwa nka gurhe rhwakazigirana buli muguma n’owindi. Rhugwerhe mpanvu zinene z’okuchivugira omwimangizi werhu Yesu!