Yesu aliri ayigiriza abantu babe n’omurhula haguma n’ababo. Aliko mango maguma abwira entumwa zage ntya: “Murhawazaga oku nayinjaga kulerha omurhula oku gulu; nayinjaga kulerha, arhali murhula, s’aliko engorho. Nayinjaga kulerha akavulindi, ahagarhi k’omurhabana n’eshe, n’omunyere na nyina, n’omwazana kupinga nazala.” (Mt. 10:34, 35) Bichi Yesu alonzaga kuderha?

Yesu arhalilonzeze kulerha akavulindi ahagarhi k’abantu b’omulala ku buli muguma n’owindi, aliko alimenyere oku enyigirizo zage zakalerhere akavulindi mu milala miguma. Bobola, balala balonzeze kuba banafunzi ba Kristu n’okubatizwa bakwanene bamenye oku mango maguma abantu b’omulala gwabo barhasimiswa n’esimikiro barholere. Eba wa muntu changwa mukage changwa abandi bantu b’omulala bakapinga omuntu n’echola charhuma byamukomerera kugenderera kubera mwimana oku nyigirizo za Kristu.

Ebiblia ehebere Abakristu omurhima “babe n’omurhula n’abantu boshi.” (Ro. 12:18) Aliko enyigirizo za Yesu z’akakola nka “ngorho” mu milala miguma. Echola chakarhengerera amango muntu muguma w’omu mulala amayemera enyigirizo za Yesu aliko abandi banazilahira. Omu hali eli ntyo, abola bantu b’omulala banachijira “banzi” b’olala oli wayiga okuli.​—Mt. 10:36.

Abanafunzi ba Kristu balamire n’abantu b’omulala bali omu lindi dini mango maguma bachishogere akaba bajira echintu chakasimisa Yehova na Yesu changwa echakasimisa abantu b’omulala gwabo. Omufano, abantu b’omulala bakachihangana kuseza omuntu ajire esiku zikulu z’amadini. Amango bamashumikwa ntyo bakachishoga inde basimisa. Yesu aderha ntya: “Olala ogwerhe buzigire bunene kw’eshe changwa ku nyina halih’okunzigira arhakwanene emwani.” (Mt. 10:37) Kweri, Yesu arhaliri ayigiriza oku y’omuntu aba mwanafunzi wage arhachikwanene kuzigira abazere nk’oku bihemere. Aliko, aliri abayigiriza okuntu akachishoga ebintu by’akamaro bwenene omu kalamo. Amango abantu b’omulala barhali Bahamirizi ba Yehova bamarhupinga mpu rhurhagendereraga kuharamya Yehova, rhwanagenderera kubazigira, aliko eyi rhunamenyere oku Mungu yi rhukwanene kurhanga kuzigira.

Kweri, okupingwa n’abantu b’omulala kwakarhugayisa bwenene. Aliko, Abanafunzi ba Kristu bakwanene kuyibuka ebila binwa byage: “Olala orhayemerere omurhi gwage gw’amalibuko n’okunkulikira arhakwanene emwani.” (Mt. 10:38) Omu bindi binwa, Abakritsu banabona oku okupingwa n’abantu b’omulala gali malibuko abanafunzi ba Kristu bakwanene kulembera. Aliko balangalire oku, bulala bagwerhe olugenzi lwinja, abantu b’omulala gwabo bakahindamula engeso zabo n’okulonza bayige oburhumwa bwe Biblia.​—1 Pe. 3:1, 2.