• “Nali wazize oku nkagaba bani ajirire obubaraga kanene.”

• “Nali chiyunvirhe nsuzagwirwe, okuyunva ntachimusimisize, na ntacho malire.”

• “Ntalisiimire kubwira muntu mulebe oku bilolere echola. N’analiri nalibuzwa eyi nansirire.”

• “Naliwazize oku Yehova arhandagireko.”

Ebyola binwa biyerekene okuntu omukazi anayunva alibukire bwenene amango eba agwerhe engeso y’okulola epornografi. Nakaba agenderere kugwarha eyola ngeso y’okulola epornografi mu myezi minene changwa mu myaka minene omu bwibisho, eby’ola byakarhuma mukage arhachiyinja amunihira haba n’akatyu. Mukazi muguma aderha ntya: “Nalichiyunvirhe nka ntaba menyere chiro bani. Hali ebindi bintu anambisha si?”

Gunola mwazi gwarheganyizwe oku bilolere omukazi ogwerhe omulume warhogeere mwechila chibazo ch’okulola epornogafi. a Gunola mwazi gwaganira oku makanuni me Biblia makamurhuliriza, n’okumurhabala achizere oku Yehova amuzigire, analonzeze kumurhabala agwarhe murhula gunene, anagenderere kuyorha hofi naye. b

Chiro akaba oku orhakagala kulolereza buli choshi balo ali ajira, aliko hali ebi wakajira y’ogenderera kugwarha omurhula g’omubwenge. Waza kw’eyila myazi ekulikire.

Omenye wachihenulirako amagosa. Omukazi akawaza oku eba ali alola epornografi bulala hali chintu chibi amujirire. Alice c alichiyuvirhe oku arhali mukazi mwinja wakasiimisa eba. Aliri achibaza ntya: Bulagurhe bani asiima kulola oku bandi bakazi ahali hokundolako? Bakazi baguma banachihenulirako amagosa eju yʼokuntu banachirhola omu kuwaza oku bali barhuma ebintu byakomera. Danielle aderhere ntya: Nabona oku ndi mukazi mukali bwenene, waliri ashanda obuhya kugerera obukali bunene.

Akaba nawe ntyo k’oli wachiyunva, orhegere oku Yehova arhakubwene oku wewarhumire balo agwarha ebijiro bili nk’ebyola. Yakobo 1:14 ederhere ntya: “Buli muntu anageregezwa omu kuleka amashumi mage yenyine mamukulule n’enyifinjo zage yenyine.” (Ro. 14:12; Flp. 2:12) Ahali h’okugenderera kubona oku liri  gosa lyawe, Yehova ali abona kangana gurhe oli mwimana emwage.—2 Ny. 16:9.

Nkabaga omukazi akachiyunva oku eba analola epornografi bulala arhavire aba muntu mwinja, aliko obola burhali bukweri. Abantu bagwerhe obumenyi oku bilolere eby’epornografi baderhere oku epornografi enarhuma omuntu agwarha enyorha y’echijiro ch’obuhya omukazi arhakagala kumala.

Oleke okulaga kukabya. Catherine aderhere oku, okubona gurhe eba aliri alola epornografi, kwalimulazize bwenene omu kalamo kage. Mwali-werhu Frances aderhere ntya: “Naliri nayunva ngwerhe omulago amango moshi ntamenyere ngahe bani ali. Naliri nageza olusiku loshi eyi ngwerhe omulago.” Abandi bakazi baderhere oku, banayunva eshonyi amango bali embere za bene-berhu na bali-berhu bakaba bamenyere echola chibazo cha beba. Abandi bayemerere oku banachiyunva bahugirwe bwenene bulala bali bawaza oku ntaye onaba ali ayunva echibazo bali bahurana.

Omu kuderha okuli, buli muntu akachiyunva ntyo. Aliko, nk’oliwageza ebisanzi byoshi eyi oli wawaza kw’ebyola bintu, wakagenderera kuyunva omulago gunene. Ahali h’okujira ntyo, ochihangane kuseza obwenge oku bwira bwawe haguma na Yehova. Okujira ntyo kwakurhabala kulembera.—Zb. 62:2; Efe. 6:10.

Wakabona oku byakakurhabala amango wamasoma n’okukengera oku ngani zili omu Biblia, zishambere oku bakazi baligwerhe emilago balihikire kupata echirhulirizo omu kulakirira Yehova omu sala. Yehova arhabakuliraga buli mango ebibazo byabo, aliko alibahereze omurhula. Omufano, Hana aligwerhe “omugayo gunene bwenene” eju y’ehali aliri ahurana nayo. Aliko enyuma “y’okusalira kasanzi kanene embere za Yehova,” agwarha omurhula, chiro akaba arhalizamenya bichi byakajire byaba omu mango mayinjire.—1 Sa. 1:10, 12, 18; 2 Ko. 1:3, 4.

Oheme oburhabale oku bashamuka b’echibaga. Bakaba emwawe nka fasi “y’okuchibisha omuyaga, na fasi y’okuyigama echihusi ch’envula.” (Isa. 32:2, amahugulo m’eshishi.) Nachiro bakabwira mwali-werhu muguma ayinje aganira nawe, olala wakabwira byoshi bikulazize y’opata echirhulirizo okenere.—Mez. 17:17.

Ka wakarhabala balo ahime engeso agwerhe y’okulola epornografi? Nkabaga wakajira ntyo. Ebiblia ederhere oku okuhima omwanzi okomeere oli nk’oyola, babiri bachihebere haguma bakahima omwanzi kulusha oli yenyine. (Muh. 4:9-12) Abasomi bayerekene oku amango omulume n’omukazi bamakola haguma omu kumala echibazo ch’okulola epornografi,  ahanene binalerha enyungu kandi omukazi akashuba hwanza kumunihira.

Nechi, ahanene byarhengana n’okuntu balo naye alonzeze bwenene kulekana n’eyola ngeso y’okulola epornografi. Ka naye alakirire Yehova amuhereze emisi, anahemere abashamuka oburhabale? (2 Ko. 4:7; Yak. 5:14, 15) Ka achihebere emipaka y’akarhuma achilanga echintu choshi-choshi chakarhuma ashuba kulola epornografi, omufano nk’okupunguza ebisanzi n’okuntu anakolesa etelefone changwa e ordinatere? (Mez. 27:12) Ka ali tayari kuyemera oburhabale oli wamuhereza n’okukubwira obukweri boshi? Akaba ntyo kubili, wamurhabala.

Nka gurhe? Rhurhole omufano. Felicia alishabirwe na Ethan, waliri muja w’okulola epornografi gurhenga achili mudorho. Felicia alibwirire eba oku ahwanze amubwira amango amawazo mabi m’okulola epornografi mamashuba kumugaluka omu bwenge. Ethan afasiriye ntya: “Nabwira mukani omu kumufungulira omurhima goshi buzira kumubisha haba n’echintu chiguma. Antabala oku buzigire yingenderera kuhima amashumi, na buli mango aliri ambaza akaba ebintu bili byagenda bwinja. Antabala yintayinja nageza bisanzi binene oku Enternete.” Omu kuderha okuli, Felicia aliri achiyunva kubi okubona Ethan ali alola epornografi. Aderhere ntya: “Aliko, okuntu naliri nachiyunva gwerhe oburhe n’amalumwa naliri nayunva, birhamurhabalaga alekane n’eyola ngeso mbi. Enyuma y’okumala kuganira kw’eby’ola bibazo byage, aba tayari kuntabala y’amalumwa mani mahwa.”

Enganiro eli nk’eyola yakarhabala omulume aleke kulola epornografi, yakanarhabala mukage ashube kuhwanza kumunihira. Amango omulume ali tayari kuganira na mukage oku bilolere obola buzamba bwage, emunda aja na bichi ali ajira, naho byanayorohera mukage amunihire bulala arhachili amubisha echintu n’echiguma.

Nawe owazize oku wakarhabala balo omu njira eli nk’eyola? Akaba ntyo kubiri, mwakasoma n’okuganira ku gunola mwazi haguma. Omuhigo gwage kwaba kuleka kulola epornografi n’okukuhereza empanvu y’okushuba kumunihira. Ahali h’okuyorha ogwerhe oburhe bwisirire oku wakasiimire muganire kw’echola chibazo, akwanene kuchihangana kurhegera kangana gurhe oli wachiyunva n’okuntu bili byakubabaza. Bikuhemere omurhabale omu kuntu ali achihangana kulekana n’eyola ngeso, n’okumuhereza orozo oshube omunihire. Mwembi mwahikira ahamwarhegera bichi binarhuma abantu barhogera omu chibazo ch’okulola epornografi, na nka gurhe echola chibazo chakahimwa. d

Akaba ogwerhe obuba oku woyo na mukawe murhayorha murhulerere amango muli mwashambala  kw’echola chibazo, muheme omushamuka muguma mukomeere abeho amango muli mwaganira mu bisanzi bilebe. Omenye oku chiro akaba mukawe changwa balo ahimire echibazo ch’okulola epornografi, byakahema kasanzi kanene kagere y’oshuba kumunihira. Aliko omenye wavunika omurhima. Orhegere orhuntu rhugeke-geke rhwakashuba kukwiza obwira bwenyu. Ochizere oku byaba ntyo okw’ebisanzi binali byagera akaba mwembi muyerekene okulemberana, obuhya bwenyu bwashuba kukomera.—Muh. 7:8; 1 Ko. 13:4.

Akaba balo ashubire kurhogera omu chibazo ch’okulola epornografi enyuma w’okuhabwa amahano, echola chiyerekene oku arhahungamire si changwa arhakalekana n’eyola ngeso? Nkabaga arhali ntyo. Ahanene akaba akomere kulola epornografi, akalwisa echola chibazo akalamo kage koshi. Akashuba kurhogera mw’echola chibazo ch’okuyilola enyuma w’okuchilanga mu myaka minene. Yachilanga oku byakarhuma arhayeneza ogola muhigo g’okulekana nayo, byakamuhema asimike bwenene amango amola mawazo mabi mamashuba mugalukira, nkabaga byakamuhema agenderere kuchilanga yewe yenyine oku bintu byakashuba kumurhozeza mw’echola chibazo, nkabaga omu kuyorha asimikire chiro akaba awazize oku echibazo chahwere. (Mez. 28:14; Mt. 5:29; 1 Ko. 10:12) Byamuhema agenderere “kujira buhya-hya okuntu anazigana kuwaza” n’okuyiga “kushomba ebibi” biheberwemo epornografi n’ezindi ngeso zirhachere nk’oku chiyungumula. (Efe. 4:23; Zb. 97:10; Ro. 12:9) Ali tayari kuchihangana kuhindamula ebintu ntyo si? Akaba ntyo kubili, akahikira amango alekana loshi n’eyola ngeso. e

Aliko si, gurhe byakaba nka mukawe changwa balo arhali achihangana kuhima echola chibazo ch’okulola epornografi? Omu kuderha okuli, wakachiyunva ovunikire enzoka, okugwarha oburhe n’okulenganywa. Okabulire Yehova emilago yawe, echola chakurhabala ogwarhe omurhula. (1 Pe. 5:7) Ogenderere kuyegera Yehova kugerera efunzo lyawe-lyawe, oku salira n’okukengera bwenene okubiwayigire. Oku onali wajira ntyo, ochizere oku Yehova naye akuyegera. Nk’oku biyerekenwe omu Isaya 57:15, aba haguma n’abalala “bavunyongwerwe banali berhohye,” ashondere kubarhabala bashube bagwarhe obusiime bwabo. Ochihangane kuba Mukristu okwanene. Oheme oburhabale bw’abashamuka. Onachizere oku, omu mango mayinjire balo nji ahindamuka loshi-loshi n’okulekana n’eyola ngeso.—Ro. 2:4; 2 Pe. 3:9.