M’ogola mwazi, rhwaliyigire oku hali chintu chiguma ch’akamaro bwenene chilolere abantu boshi n’abamalayika boshi: kuli kucheswa kw’ezino likulu lya Yehova. Aliko, echibazo chilolere oburhwali bukulu bwa Yehova b’okurhambula, k’okuderha, okuntu Yehova anarhambula k’okwinja bwenene, kufarhene n’okucheswa kw’ezino lya Yehova. Kandi, akaba omuntu ayerekana obushwekerezi bwage emwa Mungu changwa nanga, echola nacho chifarhene n’echintu ch’akamaro bwenene, k’okuderha, okucheswa kw’ezino lya Yehova.

Bulagurhe, rhuderhere n’omukazo oku echibazo chikulu chiyumangire oku zino lya Yehova n’okuchesibwa kwalyo? Lekaga rhuganire ku mpanvu esharhu.

Ey’oburhanzi, Shetani alishobekere ezino lya Yehova, changwa erenge lyage omu bustani ye Edeni. Echibazo Shetani abazaga Eva chalishondere kuderha oku Yehova ali Mungu orhahaana n’oku obwerekezi boshi ahaga Adamu na Eva burhali kwanene. Naho Shetani aderha ebi Yehova arhaderhaga. Kweri aliri aderha oku Mungu ali mubeshi. Naho akomera ezino lya Yehova. Av’aba “Ibilisi,” k’okuderha “mukomezi.” (Yoh. 8:44) Bulala Eva aliyemerere obubeshi bwa Shetani, arhachigendereraga kukenga Mungu, n’echola chaliyerekene oku arhalisiimire Mungu akaba murhegesi wage. (Mwa. 3:1-6) Kugera buno, Shetani agenderere kushobeka ezino lya Mungu, n’okuyeneza obubeshi oku bilolere oborhere bwa Yehova. Balala banayemera obubeshi buli nk’obola, binabayorohera bwenene kurhakenga Yehova. Bobola abantu ba Yehova babwene oku, okushobeka ezino lya Yehova kuli kulikolera kubi bwenene. Echola ch’echibazo chikulu bwenene chirhumire amalibuko n’obubi byava byaluguka oku gulu.

Echa kabiri, y’ebilemwa byoshi nji biyunguka, Yehova ahigirire kuderhera ezino lyage, kulichesa omu kulikulira ebisobe byoshi baliheseze. Echola chili chintu ch’akamaro bwenene loshi emwa Yehova. Che chirhumire aderha ntya: “Kweri nachesa ezino lyani likulu.” (Eze. 36:23) Yesu naye aliyerekene echintu ch’akamaro bwenene rhukwanene kuheba omu masala merhu rhweshi nka bakozi bemana ba Yehova, amango aderha ntya: “Ezino lyawe lichesibwe.” (Mt. 6:9) Ebiblia ederhere bwenene kandi oku kamaro k’okuchesa ezino lya Yehova. Lekaga rhuganire oku mifano miguma: “Muhereze Yehova obukuuze ezino lyage likwanene.” (1 Ny. 16:29; Zb. 96:8) “Muyimpire erenge ezino lyage ligwerhe obukuuze.” (Zb. 66:2) “Nakuuza ezino lyawe esiku n’amango.” (Zb. 86:12) Liguma omu mango omulenge gwa Yehova yenyine gurhenga embingu, mali mango Yesu aliri omu hekalu e Yerusalemu, amango aderha ntya: “Darha, ochese ezino lyawe.” Yehova ashubiza ntya: “Nalicheseze kandi nashuba kulichesa.”—Yoh. 12:28. a

Echa kasharhu, buli mango omuhigo gwa Yehova guba guhuzenywe n’ezino lyage, changwa erenge lyage. Waza oku kachiro k’ezino lya Yehova enyuma w’echigeregezo ch’obuzinda, oku buzinda w’Oburhegesi bwa Myaka Chihumbi bwa Yesu Kristu bichi nji byakulikiraho. Gurhe ba malaika boshi n’abantu boshi nji bachiyunva eju y’ezino lya Yehova agola mango?  Yirhugala kushubiza kw’echila chibazo rhukwanene kuyibuka ebila bintu bibiri bifarhene: obushwekerezi bw’abantu n’oburhwali bukulu bwa Mungu b’okurhambula. Ka abantu nji bayerekana oku bali bemana nji bagenderera kuhurana echibazo ch’okuyorha bali beshwekerezi? Nanga. Nji baba bali bashinganyanya eyi banageregezwe bwenene. Nji bagwarha akalamo k’esiku n’amango. K’oburhwali bukulu bwa Yehova b’okurhambula nji bwachigenderera kulerha obuhaka chiro n’akavulindi omu bilemwa byage bigwerhe obwenge? Nanga. Nji harhachiba empanvu y’okuyerekana oku, okuntu Yehova anarhegeka k’okwinja loshi. Boshi omu mbingu n’okugulu nji bachiheba haguma n’okuyemera oku oburhegesi bwa Yehova b’obokuli. Aliko si, agola mango ezino lya Yehova nji lyachiba ligwerhe akamaro bwenene oku bantu bage?

Mw’amola mango, buli yeshi nji aba amenyere obukweri oku bilolere ezino lya Yehova, n’ezino lyage nji lyaba lyachesezwe loshi. Aliko, ezino lya Yehova nji lyagenderera kuba chintu ch’akamaro bwenene loshi oku bakozi bage bemana omu mbingu n’okugulu. Bulagurhe? Bulala nji babona gurhe Yehova ali agenderera kukola ebintu bisomeze. Waza kw’echila: Bulala, oku bwirhohye Yesu nji agalulira Yehova oburhegesi boshi, Mungu nji “aba byoshi ku buli muntu.” (1 Ko. 15:28) Enyuma w’echola, abantu oku gulu nji basiimira “obuhuru bw’obukuuze bw’abana ba Mungu.” (Ro. 8:21) Kandi Yehova nji ayeneza omuhigo gwage g’okugwarha omulala muguma gugwerhe obuguma gw’abana bage b’okugulu nab’omu mbingu.—Efe. 1:10.

Ebyola bintu byoshi bimala kurhengerera, gurhe omulala gwa Yehova gw’embingu nog’okugulu nji gwachiyunva? Kweri, nji rhwaba rhuchigwerhe nyorha nene y’okugenderera kukuuza ezino linja bwenene lya Yehova. Omwandisi w’ezaburi Daudi alifuhererwe ayandike ntya: “Yehova Mungu akuzibwe . . . Ezino lyage ligwerhe obukuze lihabwe erenge esiku n’amango.” (Zb. 72:18, 19) Nji rhwagenderera esiku n’amango kugwarha empanvu zihyahya zinasimisize z’okujira ntyo.

Ezino lya Yehova liderhere oku bintu byoshi bimulolere. Amango rhwamawaza oku bilolere ezino lya Yehova rhwanawaza oku buzigire bwage. (1 Yoh. 4:8) Nji rhwayibuka buli mango obuzigire Yehova arhuyerekere amango arhulema n’amango ahanaga enchungu. Kandi nji rhwayibuka buli mango oku, okuntu anarhegeka kuli k’okunali n’obuzigire. Aliko nji rhwagenderera kubona gurhe Yehova anarhuyereka obuzigire esiku n’amango. Esiku n’amango, nji rhwayunva rhushunikirwe kumuyegera yewe nka Darha kandi nji rhwayimpa enyimpo z’okusingiza ezino lyage ligwerhe obukuuze.—Zb. 73:28.