1. Nk’oku olwandiko lwa Waebrania 12:1 luderhere, bichi rhukwanene kujira yirhuhika oku mustari g’obuzinda g’omulindi gwerhu gw’akalamo?

 EBIBLIA ehuzenye akalamo kerhu rhwabo nka Bakristu n’omulindi. Balala bali balibirha n’okuhika oku mustari g’obuzinda g’omulindi, njibahabwa oluhembo lw’akalamo k’esiku n’amango. (2 Ti. 4:7, 8) Rhukwanene kujira okwerhu koshi yirhugenderera kulibirha, ahanene bulala, kulusha mira rhuli hofi n’omustari g’obuzinda g’omulindi gwerhu. Entumwa Paulo, wamalaga bwinja omulindi gwage gw’akalamo, aliyerekene bichi byamurhabalaga y’alibirha bwinja m’ogola mulindi kuhika oku buzinda. Arhuhanwire oku “rhukabulire hale buli muzigo . . . rhunaje rhwalibirha omu kulembera omulindi gwaheberwe embere zerhu.”—Osome Waebrania 12:1.

2. “Okukabulira hale buli muzigo,” k’okuderha gurhe?

² Amango entumwa Paulo ayandika oku rhukwanene “kukabulira hale buli muzigo,” k’alishondere kuderha oku nta gwindi muzigo Omukristu akwanene kuheka? Nanga, arhali ntyo kw’alonzaga kuderha. Aliko alonzaga kuderha oku rhukwanene kukabula buli muzigo gurhagwerhe kamaro. Omuzigo guli nk’ogola gwakarhuma rhurhalibirha juba-juba n’okurhuma rhwaluha. Yirhugala kulibirha omu kulembera, rhukwanene kurhegera juba-juba akaba rhuhekere omuzigo guli nk’ogola gwakarhuma rhurhagenderera kulibirha n’okugukabulira hale ahohan’aho. Aliko mw’akola kasanzi kan’akola, rhukwanene kuheka omuzigo rhukwanene kuheka. Nka rhurhajirire ntyo, rhurhakayorha oku mustari gw’abali omu mulindi. (2 Ti. 2:5) Mizigo ehe rhukwanene kuheka?

3. a) Nk’oku olwandiko lwa Wagalatia 6:5 luderhere, bichi rhukwanene kuheka? b) Bichi rhwaganirako mu gunola mwazi, na bulagurhe?

³ Osome Wagalatia 6:5. Paulo ayerekene chintu chilebe rhukwanene  kuheka. Ayandika oku “buli muguma nj’aheka omuzigo gwage yenyine.” Ahala Paulo aliri aderha oku bintu Mungu ahemere buli muguma werhu ajirage, rhwabo nka bakozi bage, ntaye wakajira ebyola bintu ahaliherhu. Mu gunola mwazi, rhwaganira oku bilolere okuheka “omuzigo gwerhu rhwenyine” kuheberwe mu bichi na nka gurhe rhwakaguheka. Kandi, rhwamenya emizigo erhagwerhe kamaro rhwakaba rhuhekere n’okumenya nka gurhe rhwakayikabulira hale. Okuheka omuzigo gwerhu rhwenyine n’okukabulira hale omuzigo gurhagwerhe echigumalire, kwarhurhabala rhuche omulindi gwerhu gw’akalamo rhunagumale bwinja.

4. Bulagurhe birhakomere bwenene okuyeneza echilagane rhwajiraga ch’okukolera Yehova esiku n’amango? (Olole n’efoto.)

⁴ Echilagane rhwajirire ch’okukolera Yehova esiku n’amango. Amango rhuhaana akalamo kerhu emwa Yehova, rhwalimulaganyize oku rhwamuharamya n’okujira obulonza bwage. Rhukwanene kuyeneza echola chilagane cherhu. Okuyeneza echola chilagane chili chintu ch’akamaro bwenene, aliko gurhali muzigo. Rhwakaderha ntyo, bulala Yehova arhulemaga yirhujira obulonza bwage. (Ufu. 4:11) Arhulemere n’enyorha y’okumumenya n’oku muharamya,  anarhulema oku shusho lyage. Bobola, rhwakagala kumuyegera n’okugwarha obusiime b’okujira obulonza bwage. (Zb. 40:8) Kandi, amango moshi rhulirhwajira obulonza bwa Mungu n’okuyiganya Omugala, “rhwayunva rhwamahumuka.”—Mt. 11:28-30.

5. Bichi byakakurhabala oyeneze echilagane chawe ch’okukolera Yehova akalamo kawe koshi? (1 Yohana 5:3)

⁵ Nka gurhe wakaheka ogola muzigo? Bintu bibiri byakakurhabala. Ech’oburhanzi, ogenderere kukomeza obuzigire bwawe ku Yehova. Wakajira ntyo omu kukengera bwenene oku bintu binja akujirire n’oku migisho akubikiire. Ok’obuzigire bwawe ku Mungu buli bwagenderera kukula, kubyanakuyorohera kugenderera kumukenga. (Osome 1 Yohana 5:3.) Echakabiri, oyiganye Yesu Kristu. Aligalire kujira obulonza bwa Mungu bulala aliri asalira Yehova amurhabale anagenderera kuseza obwenge bwage oku migisho nj’agwarha. (Ebr. 5:7; 12:2) Kuguma na Yesu, rhusalire Yehova arhuhe emisi y’okugenderera kuseza omu bwenge obulangalire bwerhu bw’okulama esiku n’amango. Ok’obuzigire bwawe ku Mungu buli bwakula n’okuyiganya Omugala, wagala kuyeneza echilagane chawe ch’okukolera Yehova esiku n’amango.

6. Bulagurhe rhukwanene kuyeneza ebirhuhemerwe kukola omu mulala? (Olole n’efoto.)

⁶ Ebirhuhemerwe kukola omu mulala. Omu mulindi gwerhu gw’akalamo, rhukwanene kuzigira bwenene Yehova na Yesu kulusha okuntu rhunagizira abantu b’omulala gwerhu. (Mt. 10:37) Aliko echola chirhaderhere oku rhurhakwanene kuyeneza engabane zerhu z’omu mulala, wamenya nka zili zarhubuza kusimiisa Yehova na Kristu. Aliko, yi Mungu na Kristu barhuyemera, birhuhemere rhuyeneze ebi rhukwanene kukola omu mulala gwerhu. (1 Ti. 5:4, 8) Rhukajira ntyo, rhwagwarha obusiime bwenene. Yehova amenyere oku emilala yakagwarha obusiime, amango omulume n’omukazi bali bakolerana buli muguma n’owindi n’obuzigire n’obukenge, amango abazere bazigiire n’okuyigiriza abana babo, n’amango abana nabo bali bakenga abazere babo.—Efe. 5:33; 6:1, 4.

7. Nka gurhe wakayeneza ebi Yehova akuhemere okole omu mulala?

⁷ Nka gurhe wakaheka ogola muzigo? Obe mulume, obe mukazi, changwa mwana, rhweshi rhukwanene kukolesa amakanuni me Biblia. Orhajiraga konyine eby’obwene oku bili binja changwa eby’abantu b’aholamire banazigana kujira, changwa eby’abantu basomere binene oku bilolere emilala baderhere oku ojirage. (Mez. 24:3, 4) Okolese bwinja ebitabu byerhu biyumangire oku Biblia. Ebyola bitabu bigwerhe amahano menja makakurhabala okolese bwinja amakanuni me Biblia. Omufano, emyazi y’enkulikirane “Musaada kwa Familia” (Oburhabale oku Milala), egwerhe emyazi ederhere oku bilolere ebibazo omulume n’omukazi, abazere, n’emisole eli omu myaka y’olubiruko bali bahurana zene. b Ojage wahigirira kukolesa eby’Ebiblia ederhere, chiro akaba abandi bantu b’omu mulala gwawe barhalibajira ntyo. Okajira ntyo, omulala gwawe gwagwarha enyungu, kandi nji mwasiimira emigisho.—1 Pe. 3:1, 2.

8. Gurhe esimikiro zerhu zakarhuhumako?

⁸ Engabane rhugwerhe eju y’esikimiro rhunarhola. Yehova arhuhere obuhuru b’okuchishoga, analonzeze rhugwarhe enyungu bulala rhwarholere esimikiro nyinja. Aliko amango rhwamarhola esimikiro zibi, analeka rhuhikirwe n’engaruka zibi z’esimikiro zerhu. (Gal. 6:7, 8) N’echola charhuma rhwayemera engaruka z’esimikiro zibi  rhwarholere, n’ebinwa bibi n’ebijiro by’obukali. Kufarhana n’ebirhwakolere rhwakachiyunva ezamiri yizarhubwira oku rhwakolere amagosa. Aliko okumenya oku ebyola byoshi byarhuhikire bulala rhwenyine rhwerhwarholaga esimiko zibi, kwakarhushunika rhuhungame ebyaha byerhu, rhulekane n’amagosa merhu, kandi rhuchilange kushuba kugalukira amola magosa. Okujira ebintu bili nk’ebyola, kwakarhurhabala rhuyorhe omu mulindi gw’akalamo.

9. Gurhe wakajira akaba warholere esimikiro zibi? (Olole n’efoto.)

⁹ Nka gurhe wakaheka ogola muzigo? Akaba warholere esimikiro zibi, bichi wakajira? Oyibuke oku, orhakahindamula ebyamira. Omenye wakolesa kasanzi kanene omu kulonza kuyerekana oku orhagwerhe gosa, changwa kushwekera abandi kw’amagosa mawe. Ahali h’okujira ntyo, oyemere amagosa mawe, na kurhenga zene ojire okwawe koshi y’ohindamula obola borhere. Akaba oli wachiyunva munyamagosa oku bilolere echintu chibi wakolere, osalire emwa Yehova n’obwirhohye, oyemere amagosa mawe, onamuheme akubabalire. (Zb. 25:11; 51:3, 4) Oheme obonjo kubalala wakaba wagoseze, n’akaba bihemere kujira ntyo, oheme oburhabale oku bashamuka. (Yak. 5:14, 15) Oleke amagosa mawe makuyigirize chintu chilebe, onachilange y’omenya washuba kumagalukira. Amango wamajira ntyo, wakachizera oku Yehova nj’akuyereka olukogo n’oku akuhereza oburhabale okenere.—Zb. 103:8-13.

10. Gurhe amawazo m’okuyunva buli mango olonzeze kukola binene kulusha ebi wakagala, guli muzigo gulemerere? (Wagalatia 6:4)

¹⁰ Amawazo m’okulonza buli mango kukola binene kulusha ebi wakagala. Rhwakachihesa omuzigo gulemerere rhwenyine, amango rhuli rhwagwarha buli mango amawazo m’okulonza kukola bintu binene kulusha ebirhwakagala, omu kuchihuzanya n’abandi. (Osome Wagalatia 6:4.) Nka rhuli rhwachihuzanya n’abandi buli mango, rhwakagwarha obongwa n’akahigirizo. (Gal. 5:26) Akaba rhuli rhwajira okwerhu koshi yirhujira nk’eby’abandi bali bajira chiro akaba oku rhurhakabigala, rhwakachibabaza rhwenyine. Kandi owaze kw’echila, Ebiblia erhubwirire oku byakavuna omurhima amango rhuli rhwalingiriza chintu chilebe. Bobola byakavuna omurhima bwenene okulingiriza chintu chilebe orhakafa wabwene chiro! (Mez. 13:12) Rhukajira ntyo, rhwakaluha juba-juba, n’echola chanarhuma rhurhagenderera omu mulindi gwerhu gw’akalamo.—Mez. 24:10.

11. Bichi byakarhurhabala rhumenye rhwalingiriza ebintu rhurhakafa rhwabwene chiro?

¹¹ Nka gurhe wakakabulira hale ogola muzigo? Omenye walonza kukola bintu binene birhalukire ebi Yehova akuhemere. Yehova arhakuhemere chiro omuhereze eby’orhakabona. (2 Ko. 8:12) Ochizere oku Yehova arhahuzanya eby’oli wajira n’eby’abandi bali bajira. (Mt. 25:20-23) Omenye oku Yehova asimisizwe n’akasi oli wamukolera n’obuguma-guma bwawe boshi, n’obwimana bwawe boshi, n’okulembera kwawe koshi. Ochirhohye n’okuyemera oku orhakagala kukola byoshi olonzeze kukola zene, eju y’emyaka yawe, amagala mawe, n’ezindi hali. Kuguma na Barzilai, obe tayari kuderha nanga, akaba amagala mawe changwa emyaka yawe, yakarhuma orhagala kuyeneza ngabane ndebe. (2 Sa. 19:35, 36) Kuguma na Musa, oyemere oburhabale, onabwire abandi bakurhabale oku makasi amango obwene oku bikuhemere kujira ntyo. (Kut. 18:21, 22) Akaba oli mwirhohye, byakurhabala omenye walonza kukola eby’orhakagala byakarhuma warhenga oku mustari g’omulindi gwawe kw’akalamo.

12. Ka rhwabo rhwerhukwanene kuheka engaruka z’esimikiro zibi abandi barholere? Fasiriya.

¹² Okuchiyunva oku rhwabo rhwerhwaheka engaruka z’esimikiro zibi abandi barholere. Rhurhakarholera abandi esimikiro; changwa rhurhakagala buli mango kubalanga oku ngaruka  zibi z’esimikiro zibi barholaga. Omufano, mugala wawe changwa mwali wawe, akachishoga kuleka kukolera Yehova. Eyola simikiro yakalerhera abazere kahinda kanene. Aliko abazere banagenderera kuchiyunva oku lili gosa lyabo, eju y’esimikiro zibi abana babo barholere, banaba eyi bali bachihesa omuzigo gulemerere. Yehova arhabahemere oku bowe babahekage ogola muzigo.—Ro. 14:12.

13. Nka gurhe omuzere akalwisa echibazo chilolere esimikiro zibi omwana wage arholaga?

¹³ Nka gurhe wakakabulira hale ogola muzigo? Omenye oku Yehova arhuhere rhweshi obuhuru b’okuchishoga. Analeka buli muntu achishoge yenyine eby’alonzeze kujira. Ebyola biheberwemo akaba olonzeze kumukolera changwa nanga. Yehova amenyere oku oli muzere orhashinganene, alonzeze okole ebi wakagala kujira. Eby’omwana wawe achishogere kujira, kali kasi kage yenyine, si karhali kawe. (Mez. 20:11) Aliko, wakagenderera kuwaza oku wakolere amagosa woyo nka muzere. Akaba ntyo ku bili, obwire Yehova okuntu oli wachiyunva onamuheme obubabale. Amenyere oku orhakagala kuhindamula ebyagerere, mw’akola kasanzi kan’akola, Yehova amenyere oku orhakagala kubuza omwana wawe kushalula eby’ahingaga. Oyibuke oku, amango omwana wawe amachihangana y’agalukira Yehova, nj’ashuba kumuyakira n’obushagaluke.—Lu. 15:18-20.

14. Bulagurhe okuchiyunva munyamagosa bwenene, guli muzigo rhukwanene kukabulira hale?

¹⁴ Okuchinyunva munyamagosa bwenene. Amango rhwamajira echaha, biyunvikene oku rhwakachiyunva oku rhuli banyamagosa. Yehova arhalonzeze oku rhugenderere kuchiyunva banyamagosa bwenene. Ogola guli muzigo rhukwanene kukabulira hale. Gurhe rhwakamenya akaba rhuli rhwachiyunva banyamagosa bwenene? Akaba rhwahungamire echaha cherhu, n’okuyunva chirhubabeze, n’okurhola esimikiro y’okurhashuba kuchigalukira, rhwakachizera oku Yehova arhubabalire. (Mdo. 3:19) Enyuma y’okujira ebyola byoshi, Yehova arhalonzeze oku rhugenderere kuchiyunva banyamagosa bwenene. Ayinji engaruka zibi z’akarhuhikira amango rhugenderere kuchiyunva banyamagosa. (Zb. 31:10) Nka rhugendereze amola mawazo m’omugayo  marhuchubukire, rhwakaluha rhwanarhenga oku mustari g’omulindi gwerhu gw’akalamo.—2 Ko. 2:7.

15. Bichi byakakurhabala ogale kulwisa amawazo m’okuchiyunva munyamagosa bwenene? (1 Yohana 3:19, 20) (Olole n’efoto.)

¹⁵ Nka gurhe wakakabulira hale ogola muzigo? Amango ogenderere kuchiyunva munyamagosa bwenene, oseze obwenge bwawe oku “bubabale b’okuli” Mungu anarhuhereza. (Zb. 130:4) Amango amababalira balala bahungamire n’omurhima goshi, alaganyize ntya: “Ntakachiyibuka haba n’akatyu ebyaha byabo.” (Yer. 31:34) Echola chiderhere oku Yehova arhakachishuba kuyibuka ebyaha akubabalire wajiraga mira. Bobola, omenye wawaza oku engaruka zili zakuhikira z’ebyaha byawe wajirire, oku ziyerekene oku Mungu arhakubabaliraga. Kandi, omenye wayinja wachihereza obuhane wenyine nkabaga bulala wahezeze ngabane zilebe omu chibaga. Yehova arhagenderera kuwaza oku bilolere ebyaha byawe, nawe orhakwanene kugenderera kujira ntyo.—Osome 1 Yohana 3:19, 20.

16. Rhwabo nka bantu bali omu mulindi, bichi rhukwanene kurhegera?

¹⁶ Oku rhunali rhwashurha omulindi gw’akalamo, rhukwanene “kulibirha omu kuntu rhupate oluhembo.” (1 Ko. 9:24) Rhwakajira ntyo omu kurhegera muzigo guhe rhukwanene kuheka na muzigo guhe rhukwanene kukabulira hale. Mu gunola mwazi, rhwaganirire oku mifano migeke yonyine y’ebintu rhukwanene kuheka n’ebindi rhukwanene kukabulira hale. Aliko hali eyindi mifano rhwakaganirako. Yesu aliderhere oku emirhima yerhu “yakalemererwa n’okulya kuchubusya olugero n’okunywa kukabya, n’emilago y’akalamo.” (Lu. 21:34) Olula lwandiko n’amandi makakurhabala omenye bichi wakahindamula amango oli omu mulindi gwawe gw’akalamo.

17. Bulagurhe rhukwanene kuchizera oku rhwakahika oku mustari g’obuzinda g’omulindi gw’akalamo?

¹⁷ Rhwakachizera oku rhwakahika oku mustari g’obuzinda g’omulindi gw’akalamo, bulala Yehova nj’arhuhereza emisi rhukenere. (Isa. 40:29-31) Bobola, omenye walibirha kubuya-buya! Oyiganye entumwa Paulo, walibirhaga n’emisi yage yoshi y’apata oluhembo lwaliri embere z’age. (Flp. 3:13, 14) Ntaye wakalibirha ahali hawe. Aliko, kugerera oburhabale bwa Yehova, wakamala ogola mulindi bwinja. Yehova akakurhabala oheke omuzigo gwawe, onakabulire hale emizigo erhagwerhe kamaro. (Zb. 68:19) Kugerera oburhabale bwa Yehova, wakagala kulembera omu mulindi gwawe, onagwarhe oluhembo!