Amango rhuli rhwasoma Ebiblia, rhwakakolesa ebitabu bilengene omu kulonza emyazi yirhuyunva bwinja ebi rhulirhwasoma. Aliko rhurhaba rhulonzeze kuyiga mpu yirhugwarha obumenyi bw’Ebiblia konyine. Rhulonzeze kumenya binene oku bilolere oborhere bwa Yehova, n’echola charhuma rhwamuzigira bwenene. Yirhugala kujira ntyo rhwakachibaza ntya: ‘Bichi eyila ngani y’Ebiblia enyigirize oku bilolere Yehova?’

Omufano, wakachihangana kumenya binene oku bilolere okuntu Yehova ayerekene obuzigire bwage, obwengehe, okunali, n’obuhashe. Aliko hali ezindi ngeso za Yehova zinja bwenene loshi wakayiga. Ngahe wakabona myazi minene oku bilolere ezola ngeso za Yehova?

Olole oku lisite y’ezindi ngeso zirhalukire 50 zili omu Index des publications des Témoins de Jéhovah, eshishi y’erhwe liderhere “ Jéhovah ” (Yehova), naho oje walola oku ngingo “ Qualités par nom ” (Engeso oku Zino Lyayo). Olonze engeso efarhene n’engani y’Ebiblia oli wasoma. Omu chitabu Musaada wa Kutafuta Habari kwa Ajili ya Mashahidi wa Yehova (Oburhabale oku Bahamirizi ba Yehova b’Okulonza Emyazi), olole eshishi w’omwazi guderhere “Yehova Mungu” naho olole omwazi gugeke gugwerhe erhwe liderhere “Engeso za Yehova.” Naho wanaja waseza obwenge oku ngeso za Yehova zibonekene bwinja-bwinja omu ngani y’Ebiblia oli wasoma.