1. Nk’oku olwandiko lwa Malaki 3:16 luderhere, chitabu chihe Yehova ali ayandika na bichi bilimo?

 HAMAGERA ebihumbi by’emyaka eyi Yehova ali ayandika echitabu chirhali kuguma n’ebindi. Echola chitabu chili mw’amazino, kurhangira oku zino lya Abeli, Muhamirizi murhanzi mwimana. * (Lu. 11:50, 51) Kurhenga amola mango, Yehova ayongerere amandi mazino mw’echola chitabu, na kugera zene, chikala chigwerhe amamiliyoni m’amazino. Ebiblia eyirikire echola chitabu “chitabu ch’okuchiyibusya, chitabu ch’akalamo, chitabu ch’omuzingo ch’akalamo.” Mu gunola mwazi, rhwachiyirika “chitabu ch’akalamo.”​—Osome Malaki 3:16; Ufu. 3:5; 17:8.

2. Bande amazino mabo mayandikirwe omu chitabu ch’akalamo, na bichi rhwakajira y’amazino merhu mayandikwa mw’echola chitabu?

² Echola chitabu chirhali kuguma n’ebindi byoshi, chili mw’amazino ma balala boshi banaharamya Yehova n’okumuyubaha changwa kumukenga bwenene, kandi banasima ezino lyage. Nji bagwarha orozo l’okubona akalamo k’esiku n’amango. Nerhu, amazino merhu makayandikwa mw’echola chitabu amango rhwamagwarha obwira bukomere haguma na Yehova kugerera enterekero y’echungu y’Omugala Yesu Kristu. (Yoh. 3:16, 36) Rhweshi rhulonzeze amazino merhu mayandikwe mw’echola chitabu, rhube rhugwerhe obulangalire b’okujilama embingu changwa oku gulu!

3-4. a) Ka nji rhwagwarha akalamo k’esiku n’amango akaba amazino merhu mayandikirwe zene omu chitabu ch’akalamo? Fasiriya. b) Bichi rhwaganirako mu gunola mwazi n’omu gukulikireho?

 ³ K’okuderha oku boshi amazino mabo mayandikirwe mw’echola chitabu nji bagwarha akalamo k’esiku n’amago si? Echishubizo kw’echola chibazo chili omu binwa Yehova abwiraga Musa bili omu Kutoka 32:33. Yehova aderha ntya: “Olala wanjirire echaha yinashanda omu chitabu chani.” K’okuderha oku, amazino mali mw’echola chitabu zene makashandwa, kuli nka kulala Yehova arhangire kuyandika amazino merhu n’ekreyo. (Ufu. 3:5, mahugulo m’eshishi.) Rhukwanene kujira okwerhu koshi y’amazino merhu mabera mw’echola chitabu kugera amango mayandikwamo loshi n’obwino.

⁴ Echola chakarhuma rhwachibaza bibazo biguma. Omufano, Bichi Ebiblia ederhere oku bilolere balala amazino mabo mayandikirwe mw’echola chitabu ch’akalamo na balala amazino mabo marhayandikirwe mo? Mango chi abantu amazino mabo mali mw’echola chitabu nji bagwarha akalamo k’esiku n’amango? Gurhe si oku bilolere balala bafaga barhanagwarhaga orozo l’okumenya Yehova? Ka byakahashikana amazino mabo mayandikwe mw’echola chitabu? Gunola mwazi n’ogukulikireho, yashubiza kw’ebyola bibazo.

MAZINO MA BANDE MALI MW’ECHOLA CHITABU?

5-6. a) Nk’oku Wafilipi 4:3 ederhere, mazino ma bande mayandikirwe omu chitabu ch’akalamo? b) Mangochi amazino mabo njimayandikwa loshi omu chitabu ch’akalamo?

⁵ Bande amazino mabo mayandikirwe omu chitabu ch’omufano? Omu kushubiza kw’echola chibazo, rhwaganira ku bigusho birhano by’abantu. Mw’ebyola bigusho by’abantu, amazino ma baguma mayandikirwe omu chitabu ch’akalamo n’abandi, marhayandikirwe mo.

 ⁶ Echigusho chirhanzi chijirirwe na balala Mungu achishogere yi baja kurhambula haguma na Yesu omu mbingu. K’amazino mabo mali omu chitabu ch’akalamo? Nechi. Nk’oku ebinwa entumwa Paulo ayandikiraga “ababo bakozi” b’omu Filipi biderhere, amazino m’abashigwa bahamagerwe baje kurhambula haguma na Yesu, mali omu chitabu ch’akalamo. (Osome Wafilipi 4:3.) Aliko, y’amazino mabo magenderera kubera mw’echola chitabu ch’omufano, bakwanene kugenderera kubera bemana. Naho, amango bahirhwa kw’echimanyiso ch’obuzinda, mabe mango m’embere y’okufa kwabo changwa embere y’okuhwanza kw’amalibuko makulu, amazino mabo boshi nji mayandikwa loshi mw’echola chitabu.​—Ufu. 7:3.

7. Bichi rhwamenyere kugerera Ufunuo 7:16, 17 oku bilolere mangochi amazino m’echigusho chinene ch’ezindi ntama nji mayandikwa loshi omu chitabu ch’akalamo?

⁷ Echigusho cha kabiri chijirirwe n’echigusho chinene che zindi ntama. K’amazino mabo mayandikirwe omu chitabu ch’akalamo? Nechi. K’amazino mabo nji magenderera kuba mw’echola chitabu enyuma w’okufuma e Armagedoni? Nechi. (Ufu. 7:14) Yesu aliderhere oku abola bantu bashunshanyizwe n’entama nji bagwarha “akalamo k’esiku n’amango.” (Mt. 25:46) Aliko abola bantu nji bafuma evita lya Armagedoni, nji barhagwarha akalamo k’esiku n’amango aho han’aho. Amazino mabo nji magenderera kuba mayandikirwe n’ekreyo omu chitabu ch’akalamo. Omu Myaka Chihumbi y’Oburhegesi bwa Yesu, Yesu “nj’abalanga n’okubayerekeza oku nshoko z’amenji m’akalamo.” Balala nji bakenga obwerekezi bwa Yesu, n’okuchirwa olubanja buzinda oku bali bemana emwa Yehova, amazino mabo nji mayandikwa loshi omu chitabu ch’akalamo.​—Osome Ufunuo 7:16, 17.

8. Bande amazino mabo marhayandikirwe omu chitabu ch’akalamo na bichi nji byabahikira?

⁸ Echigusho cha kasharhu chijirirwe na balala bashushanyizwe n’empene nji balimbulwa oku Armagedoni. Amazino mabo marhali omu chitabu ch’akalamo. Yesu aliderhere oku, “nji zalimbulwa esiku n’amango.” (Mt. 25:46) Kugerera obwerekezi bw’eroho lya Mungu, entumwa Paulo arhubwira oku “abola bantu nji bachirwa olubanja n’okuhaabwa obuhane b’okulimbulwa esiku n’amango.” (2 Te. 1:9; 2 Pe. 2:9) Rhwakaderha ntyo n’oku bilolere balala kurhenga mira bagomeere oku bulonza eroho lichesibwa. Nabo nji balimbulwa esiku n’amango si barhakalama esiku n’amango. Okuderha okuli nji barhafuuka. (Mt. 12:32; Mk. 3:28, 29; Ebr. 6:4-6) Rhujage rhwashambala ku bigusho bibiri by’abantu nji bafuuka yi balama oku gulu.

BANDE NJI BAFUUKA

9. Nk’oku biyerekenwe omu Matendo 24:15, bigusho bihe bibiri by’abantu nji byafuuka yi balama oku gulu na nka gurhe buli chigusho chirhali kuguma n’echindi?

⁹ Ebiblia ederhere oku bigusho bibiri by’abantu nji bafuuka eyi banagwerhe obulangalire b’okulama oku gulu, k’okuderha, “abanya-kunali” na “abarhali banya-kunali.” (Osome Matendo 24:15.) “Abanya-kunali” bali balala bakoleraga Yehova oku bwimana amango balichilamire. Aliko oku lwindi lunda, “abarhali banya-kunali” barhakoleraga Yehova. Kweri ahanene ebijiro byabo birhaliri by’okunali. Bulala ebyola bigusho byombi nji byafuuka, rhwakaja rhwaderhasi oku amazino mabo mayandikirwe omu chitabu ch’akalamo? Yirhushubiza kw’echola chibazo, leka rhurhange rhushambale ku buli chigusho.

10. Bulagurhe “abanya-kunali” nji bafuuka, na ngabane ehe baguma mubo nji bahaabwa? (Onalole mw’enola gazeti “Ebibazo by’Abanasoma Ebitabu Byerhu” oku bilolere aba nji bafuuka yi balama ku linola gulu.)

¹⁰ “Abanya-kunali” bali chigusho cha kane.  Embere bafe, amazino mabo babaga mayandikirwe omu chitabu ch’akalamo. K’amazino mabo malishandirwe mw’echola chitabu amango bafa? Nanga, bulala Yehova “agenderere” kubayibuka. Yehova “arhali Mungu wabafire si ali Mungu wabazene, bulala boshi bazene emwage.” (Lu. 20:38) K’okuderha oku amango abanya- kunali bafuuka yi balama ku linola gulu, nji babugana amazino mabo mayandikirwe omu chitabu ch’akalamo chiro akaba oku marhaza yandikwa mo loshi. (Lu. 14:14) Nta ngangane, baguma mw’abola nji bafuuka nji bahaabwa engabane y’okukola nka “barhwali oku gulu lyoshi.”​—Zb. 45:16.

11. Bichi “abarhali banya-kunali” nji barhanga kuyiga y’amazino mabo mayandikwa omu chitabu ch’akalamo?

¹¹ Buzinda, rhujage rhwashambala oku chigusho cha karhano, “abarhali banya-kunali.” Nkabaga bulala barhalimenyere esheriya za Yehova, barhalamaga akalamo k’okunali embere bafe. Bobola amazino mabo marhayandikwaga omu chitabu ch’akalamo. Aliko Mungu nj’abafuula y’abaha orozo l’okuyandikisa amazino mabo omu chitabu ch’akalamo. Abola bantu “barhali banya-kunali” nji bakenera burhabale bunene. Baguma mu bo balijirire ebyaha bikomere bwenene embere bafe. Bobola nji bakenera kuyigirizwa kulama nk’oku amakanuni m’okunali ma Yehova maderhere. Yi bayigirizwa nka gurhe bakajira ntyo, Obwami bwa Mungu nji bwayerekeza akasi kazibu-zibu bwenene k’okuyigiriza karhasaga kubaho omu ngani y’abantu.

12. a) Bande nji bayigiriza abarhali banya-kunali? b) Na bichi nji byahikira balala nji balahira kukolesa ebi bayigire?

¹² Bande nji bayigiriza abarhali banya-kunali? Echigusho chinene ch’abanya-kunali nji bafuuka. Y’amazino m’abarhali banya-kunali mayandikwa omu chitabu ch’akalamo, nji byabahema bagwarhe obwira bukomere haguma na Yehova banahaane akalamo kabo emwage. Yesu Kristu n’abashigwa nji bayinja balolereza bwinja-bwinja banali embingu, okuntu abarhali banya-kunali bali bachigendesa amango bali bayigirizwa. (Ufu. 20:4)  Buli yeshi nji walahira kuhindamuka kugerera obola burhabale, nj’arhayemererwa kugenderera kulama chiro akaba agwerhe myaka 100. (Isa. 65:20) Yehova na Yesu bagwerhe obuhashe b’okusoma omu mirhima, nji barhanalekerera buli yeshi wakalerha obuhanya omu gulu lihyahya.​—Isa. 11:9; 60:18; 65:25; Yoh. 2:25.

OBUFUUKE BW’AKALAMO N’OB’OKUCHIRWA OLUBANJA

13-14. a) Gurhe mira rhwaliri rhwayunva ebinwa bya Yesu bili omu Yohana 5:29? b) Bichi rhukenere kumenya oku bilolere ebyola binwa?

¹³ Kandi, Yesu aliderhere oku bilolere balala nji bafuuka oku gulu. Omufano, aliderhere ntya: “Echi chirhabasomezaga, bulala esa yayinjire, balala boshi bali omu shinda z’olwibuko nji bayunva omulenge gwage banahuluka, abajirire ebinja, oku bufuke bw’akalamo, na balala balikomeere kukola amaligo, oku bufuke b’okuchirwa olubanja.” (Yoh. 5:28, 29) Bichi Yesu alonzaga kuderha?

¹⁴ Mira, rhwalimenyere oku ebinwa bya Yesu biderhere oku bilolere ebijiro balala nji bafuuka nji bajira enyuma y’okufuuka kwabo; k’okuderha oku baguma nji bafuuka n’okujira ebijiro binja aliko abandi nji bafuuka n’okujira ebijiro bibi. Aliko, olole oku Yesu arhaderhere oku balala nji barhenga aho han’ahola omu mashinda Mungu ayibukire nji bajira ebintu binja changwa nji bajira ebintu bibi. Yesu akoleseze ebinwa biyerekene amango magerere. Aderhere oku bilolere balala “bajiraga ebintu binja” na balala “balikomeere kukola amaligo.” Echola chiyerekene oku bajiraga ebyola bijiro embere bafe. Ebyola biyunvikene, arhali ntyo si? Kweri, nta muntu nji walekererwa akole amaligo omu gulu lihyahya. Abarhali banya-kunali bakwanene kuba eyi bajiraga amola maligo embere bafe. Bobo si, bichi ebinwa bya Yesu oku bilolere “obufuuke bw’akalamo” na “obufuuke b’okuchirwa olubanja” biderhere?

15. Bande nji bagwarha “obufuuke bw’akalamo” na bulagurhe?

¹⁵ Abanya-kunali bajiraga ebintu binja embere bafe, nji bagwarha “obufuuke bw’akalamo” bulala amazino mabo mabaga mayandikirwe omu chitabu ch’akalamo. K’okuderha oku obufuuke bwa “balala bajiraga ebintu binja” baderherwe omu Yohana 5:29 b’obuguma n’obufuuke ‘bw’abanya-kunali’ bushamberwe omu Matendo 24:15. Amola mafasiriyo mafarhene bwinja n’ebinwa bili omu Waroma 6:7, biderhere ntya: “Owafire ey’amakulirwa echaha chage.” Bobola abola banya-kunali bamalire kufa, Yehova ababalira ebyaha byabo, aliko nj’ayibuka ebijiro by’obwimana bakolaga amango balichilamire. (Ebr. 6:10) Kweri, abola banya-kunali nji bafuuka nji byabahema bagenderere kubera bemana y’amazino mabo mabera omu chitabu ch’akalamo.

16. Bichi “obufuuke b’okuchirwa olubanja” buderhere?

¹⁶ Gurhe si oku bilolere balala bajiraga amaligo embere bafe? Chiro akaba oku ebyaha byabo byabaga byakulirweho amango bafa, barhakoleraga Yehova amango balichilamire. Amazino mabo marhayandikwaga omu chitabu ch’akalamo. Aliko obufuuke bwa “balala balikomeere kukola amaligo” bonabuguma n’obufuuke bwa “abarhali banya-kunali” buganirirwe omu Matendo 24:15. Obufuuke bwabo nji bwaba “bufuuke b’okuchirwa olubanja.” * Abarhali banya-kunali nji bachirwa olubanja omu kuderha oku nji bagererezwa. (Lu. 22:30) Nji byahema akasanzi kagere yi Yesu amenya akaba amazino mabo makwanene kuyandikwa  omu chitabu ch’akalamo. Amazino m’abarhali banya-kunali nji mayandikwa omu chitabu ch’akalamo akaba bahindamwire olugenzi lwabo lwa mira, n’okuhaana akalamo kabo emwa Yehova.

17-18. Bichi balala boshi nji bafuuka yi balama oku gulu nji byabahema bajire, na “bijiro” bihe biderherwe omu Ufunuo 20:12, 13?

¹⁷ Babe baliri banya-kunali changwa nanga, aba nji bafuuka nji bakenera kukenga esheriya zihyahya zili omu bitabu by’emizingo mihyahya nji bya zingulwa mu myaka 1 000. Entumwa Yowane arhubwirire eby’abonaga omu chibonekezi: “Nabona abafire, abakulu n’abadorho, bayumangire embere y’echirhi ch’obwami, n’ebitabu by’emizingo byazingulwa. Aliko echindi chitabu ch’omuzingo chazingulwa; ch’echitabu ch’omuzingo ch’akalamo. Abafire bachirwa olubanja omu kuyumangira oku biyandikirwe mw’eyola mizingo kufarhana n’ebijiro byabo.”​—Ufu. 20:12, 13.

¹⁸ Aba nji bafuuka nji bachirwa olubanja ku bijiro bihe? Oku byaha balikomeere kujira embere bafe si? Nanga! Oyibuke oku balikuliirwe ebyaha byabo bya mira amango bafa. Bobunola, hanola, “ebijiro byabo” birhakaba bilala bajiraga embere bafe. Aliko ebyola bikwanene kuba ebijiro nji bayerekana amango nji bayigirizwa omu gulu lihyahya. Chiro n’abalume bemana nka Nowa, Daudi, Samweli, na Daniyeli nji byabahema bayige oku bilolere Yesu Kristu banayerekane obwemere omu nterekero yage y’enchungu. Akaba abola balume nji byabahema bayige Ebiblia, abarhali banya-kunali bowe, nji byabahema bayige binene!

19. Bichi njibyahikira oku buzinda balala njibakabulira orozo lwinja bwenene nji bahaabwa?

¹⁹ Bichi nji byahikira balala nji bakabulira olola rozo lwinja bwenene Yehova abahere? Ufunuo 20:15 ederhere: “Olala yeshi orhabonekanaga omu chitabu ch’akalamo akabulwa omu nyanja y’omuliro.” Nechi, nji balimbulwa loshi, barhakachibaho esiku n’amango. Bobola kuli kw’akamaro bwenene rhujire okwerhu koshi y’amazino merhu mayandikwa omu chitabu ch’akalamo n’okubera mo!

20. Kasi kahe kasimisize nji kakolwa omu mango m’Oburhegesi bwa Myaka Chihumbi? (Olole efoto eli oku chiganda.)

²⁰ Oburhegesi bwa Myaka Chihumbi nji kaba kasanzi kasimisize! Akasi kazibu-zibu k’okuyigiriza oku gulu nji kajirwa mw’eyola myaka. Aliko kandi nji kaba kasanzi k’okugererezwa kw’ebijiro by’abanya-kunali n’abarhali banya-kunali. (Isa. 26:9; Mdo. 17:31) Nka gurhe akola kasi k’okuyigiriza nji kakolwa? Omwazi gukulikireho gwarhurhabala rhumenye rhunasimiswe n’akola kasi kenja nji kakolwa.