MWAZI G’OKUYIGA 40
“Okulerha Banene oku Kunali”
“Balala banalerha bantu banene oku kunali [nji bamoleka] nka nyenyezi esiku n’amango.”—DA. 12:3.
OLWIMPO 151 Yehova Ataita
OKU BUGEKE *
1. Bichi bisimisize nji byarhengerera omu mango m’Oburhegesi bwa Myaka Chihumbi?
NJI LWABA lusiku lusimisize bwenene amango abantu bahwanza kufuuka omu mango m’Oburhegesi bwa Kristu bwa Myaka Chihumbi! Boshi bafisize abazigirwa babo bagwerhe enyorha y’okushuba kubabona. Intyo ku Yehova naye ali achiyunva. (Yob. 14:15) Waza busime bungana gurhe buli yeshi nj’agwarha oku gulu amango buli muzigirwa wage nj’afuuka. Nk’oku rhwabonaga omu mwazi gugerere, “abanya-kunali,” ab’amazino mabo mayandikirwe omu “chitabu ch’akalamo” nji bagwarha “obufuuke bw’akalamo.” (Mdo. 24:15; Yoh. 5:29) Nkabaga abazigirwa berhu nji baba omu banji bafuuka kasanzi kageke enyuma ntya w’evita ly’Armagedoni. * Kandi, balala “barhali banya-kunali” nka balala barhagwarhaga orozo lutosheze l’okumenya Yehova n’okumukolera oku bwimana embere bafe, nji bafuuka yi ‘bachirwa olubanja.’
2-3. a) Nk’oku Isaya 11:9, 10 ederhere, kasi kahe kazibu-zibu bwenene k’okuyigiriza nji kaba omu ngani yoshi y’abantu? b) Bichi rhwaganirako mu gunola mwazi?
2 Nji byahema balala boshi nji bafuuka bayigirizwe. (Isa. 26:9; 61:11) Bobola akasi kazibu-zibu k’okuyigiriza karhasaga kolwa omu ngani yoshi y’abantu nji kakolwa. (Osome Isaya 11:9, 10.) Bulagurhe? Empanvu nguma eli oku abarhali banya-kunali nji bafuuka nji byabahema bayige oku bilolere Obwami bwa Mungu, enterekero ya Yesu y’enchungu, akamaro k’ezino lya Yehova na bulagurhe yenyine ye kwanene kurhegeka. Chiro n’abanya-kunali nabo nji bafuuka nji byahema babayigirize ebi Yehova amenyeseze abantu bage kubuyabuya kubuyabuya oku bilolere omuhigo gwage gulolere egulu. Baguma mw’abola bimana bafaga mira embere Ebiblia emale kuyandikwa. Abarhali banya-kunali n’abanya-kunali boshi nji bagwarha binene by’okuyiga.
3 Mu gunola mwazi, rhwaganira kw’ebila bibazo bikulikire: Nka gurhe akola kasi kazibu-zibu k’okuyigiriza nji kakolwa? Nka gurhe akola kasi nji karhabala abantu bamenye akaba amazino mabo mayandikwa loshi omu chitabu ch’akalamo changwa nanga? Ebishubizo by’ebyola bibazo bili by’akamaro emwerhu zene. Nk’oku rhwabona, malebi maguma masimisize mali omu chitabu cha Danieli n’echa Ufunuo marhurhabala rhuyunve bwinja ebi nji byarhengerera amango abantu bafuuka. Rhujage rhwarhanga kushambala oku bintu bisimisize byalebwaga omu Danieli 12:1, 2.
“ABALYAMIRE OMU OLUCHUCHU . . . NJI BAZUKA”
4-5. Bichi Danieli 12:1 ederhere oku bilolere amango m’obuzinda?
4 Osome Danieli 12:1. Echitabu cha Danieli chirhubishulire ebintu bisimisize nji byarhengerera omu mango m’obuzinda. Omufano, Danieli 12:1 erhubwirire oku Mikaeli, k’okuderha Yesu Kristu, “ayumangiire abantu ba [Mungu].” Echola chigabi ch’obola bulebi chahwanzaga kuyenera amango Yesu ashimikwa nka Mwami w’Obwami bwa Mungu bw’embingu omu mwaka gwa 1914.
5 Aliko, Danieli ashuba bwirwa oku Yesu “akayumangire” omu mango “m’akasanzi k’amalibuko marhasaga kubaho kurhenga ah’eshanja lyoshi-lyoshi lyaberereho kuhika amola mango.” Akola “kasanzi k’amalibuko” mali “malibuko makulu” maganirirwe omu Matayo 24:21. Yesu ayumanga changwa kulwira abantu ba Mungu oku buzinda bw’akola kasanzi k’amalibuko, k’okuderha oku Armagedoni. Echitabu cha Ufunuo chiderhere kw’abola bantu nka chigusho chinene ch’abantu “barhengere omu malibuko makulu.”—Ufu. 7:9, 14.
6. Bichi nji byarhengerera echigusho chinene chimala kufuma amalibuko makulu? Fasiriya. (Olole mw’enola gazeti “Ebibazo by’Abanasoma Ebitabu Byerhu,” oku bilolere aba nji bafuuka n’okulama hanola oku gulu.)
6 Osome Danieli 12:2. Bichi nji byarhengerera amango echola chigusho chinene nji chafuma amola malibuko? Mira, rhwaliri rhwayigiriza oku Danieli 12:2 ederhere oku bufuuke bwa balala nji baja embingu changwa okuyololoka kw’akasi kerhu k’okuhubiri enyuma y’abanzi berhu kukayimanza omu mwaka gwa 1918. * Aliko, rhukala rhuyunvirhe zene ok’olola lwandiko luderhere oku bilolere obufuuke nji bwaba omu gulu lihyahya lyayinjire. Bulagurhe rhwakaderha ntyo? Echinwa “luchuchu” chishubire kukoleswa omu Yubu 17:16 chinaderhere “Eshinda.” Bulala echinwa “luchuchu” n’echinwa “Shinda,” biderhere chinwa chiguma, Danieli 12:2 ederhere obufuuke nji bwarhengerera enyuma y’esiku zizinda, k’okuderha, enyuma w’evita lya Armagedoni.
7. a) Nka gurhe baguma nji bafuuka yi bagwarha “akalamo k’esiku n’amango”? b) Nka gurhe obola buli “bufuuke bwinja loshi”?
7 Aliko si bichi Danieli 12:2 eshondere kuderha amango ederhere oku baguma nji bafuuka n’okugwarha “akalamo k’esiku n’amango”? K’okuderha oku omu mango ma myaka 1 000, balala nji bafuuka n’okuhikira kumenya, changwa kugenderera kumenya, n’okukenga Yehova na Yesu omu mango ma myaka 1 000 nji bahikira kugwarha akalamo k’esiku n’amango. (Yoh. 17:3) Nji bwaba “bufuuke bwinja loshi” kulusha obufuuke b’omu chihe cha mira. (Ebr. 11:35) Bulagurhe? Bulala abola bantu bafuukaga mira balishubire kufa.
8. Nka gurhe abandi nji bafuuka “yi bakozwa eshonyi n’okusuzagurwa esiku n’amango”?
8 Aliko arhali abantu boshi nji bafuuka banji bayemera enyigirizo za Yehova. Obulebi bwa Danieli buderhere oku baguma nji bafuuka “yi bakozwa eshonyi n’okusuzagurwa esiku n’amango.” Bulala nji bayerekana omurhima g’obugamba, amazino mabo nji marhayandikwa omu chitabu ch’akalamo kandi nji barhanabona akalamo k’esiku n’amango. S’ahubwe, nji “basuzagurwa esiku n’amango” changwa kulimbulwa. Bobola, Danieli 12:2 ederhere oku bilolere ebi nji byahikira buzinda balala boshi nji bafuuka omu kuyumangira oku bijiro nji bakola enyuma y’okufuuka kwabo. * (Ufu. 20:12) Baguma nji bagwarha akalamo k’esiku n’amango; abandi nanga.
“OKULERHA BANENE OKU KUNALI”
9-10. Bichi bindi nji byarhengerera enyuma w’amalibuko makulu, na bande “nji bamoleka nka bumoleke bw’embingu”?
9 Osome Danieli 12:3. Bichi bindi nji byarhengerera enyuma “w’amango m’amalibuko”? Omu kuyongera oku bili omu Danieli 12:2, omustari 3 guderhere oku chintu chiguma nji charhengerera enyuma w’amalibuko makulu .
10 Bande “nji bamoleka nka bumoleke bw’embingu?” Yesu arhuhere echishubizo omu binwa byage bili omu Matayo 13:43: “Amola mango abanya-kunali njibamoleka nka zuba omu Bwami bw’Eshe wabo.” Ahala, ebinwa bya Yesu biyerekene oku aliri aderha oku bilolere “abana b’Obwami,” bene-babo bashigwa, k’okuderha, aba nji bakola haguma naye omu Bwami bw’embingu. (Mt. 13:38) K’okuderha oku Danieli 12:3 ekwanene kuba eli yaderhera oku bashigwa n’oku kasi nji bakola omu mango m’Oburhegesi bwa Myaka Chihumbi.
Balala 144 000 nji bakola haguma na Yesu Kristu omu buguma omu kuyerekeza akasi nji kakolwa omu chihe cha myaka 1 000 (Olole echifungo che 11)
11-12. Kasi kachi balala 144 000 nji bakola omu myaka 1 000?
11 Nka gurhe abashigwa nji balerha “bantu banene oku kunali”? Abashigwa nji bakola omu buguma haguma na Yesu Kristu omu kuyerekeza akasi k’okuyigiriza, nji kakolwa hanola oku gulu omu myaka 1 000. Abola 144 000 nji barhakola konyine nka bami s’aliko nji bashuba kukola nka badahwa. (Ufu. 1:6; 5:10; 20:6) Bobola, nji barhabala “omu kufuma kw’amashanja,” k’okuderha, okurhabala abantu bashube kuba bashinganyanya kubuyabuya. (Ufu. 22:1, 2; Eze. 47:12) Echola nji chalerhera abashigwa mwishingo gunene!
12 Bande nji baba omu “banene” nji balerhwa oku kunali? Nji bahebwamo balala nji bafuuka na balala nji bayokoka evita lya Armagedoni n’abana boshi nji bakaba baburhirwe omu gulu lihyahya. Omu kuhika oku buzinda bwa myaka 1 000, boshi nji baba balamire oku gulu nji baba bashinganyanya. Mangochi amazino mabo nji maja mayandikwa loshi omu chitabu ch’akalamo?
ECHIGEREGEZO CH’OBUZINDA
13-14. Bichi abantu bashinganyanya boshi b’oku gulu nji bakwanene kuyerekana embere bahaabwe akalamo k’esiku n’amango?
13 Rhukwanene kuyibuka oku, omuntu arhakagwarha akalamo k’esiku n’amango mpu bulala ali mushinganyanya konyine. Waza oku mufano gwa Adamu na Eva. Baliri bashinganyanya, aliko balikwanene kukenga Yehova Mungu embere bagwarhe akalamo k’esiku n’amango. N’ech’okugayisa, barhamukengaga.—Ro. 5:12.
14 Gurhe abantu nji baba bali oku gulu oku buzinda bwa myaka 1 000? Boshi nji baba bakala bali bashinganyanya. K’abola bantu bashinganyanya boshi nji bashigikira loshi Oburhegesi bwa Yehova esiku n’amango? Changwa baguma nji baba kuguma na Adamu na Eva, baliri bashinganyanya aliko barhanagendereraga kubera bimana? Ebyola bibazo bikwanene kushubizwa, aliko si, nka gurhe?
15-16. a) Mangochi abantu boshi nji bahaabwa orozo l’okuyerekana obwimana bwabo emwa Yehova? b) Bichi nji byarhengerera oku buzinda bw’echola chigeregezo?
15 Shetani nj’ashwekwa omu pirizo mu myaka 1 000. Mu amola mango, nj’arhagala kuhabula omuntu yeshi-yeshi. Aliko, oku buzinda bwa myaka 1 000, Shetani nj’ashwekulwa omu pirizo lyage. Mu akola kasanzi, nj’alonza okuntu akageregeza abantu bashinganyanya. Mu amola mango m’echigeregezo, abantu boshi bashinganyanya oku gulu nji bagwarha orozo l’okuyerekana bwinja-bwinja akaba bakengere ezino lya Mungu n’okushigikira Oburhegesi bwage. (Ufu. 20:7-10) Ebi nji bajira amola mango, nji byayerekana akaba amazino mabo makwanene mayandikwe loshi omu chitabu ch’akalamo.
16 Ebiblia erhubwirire oku bantu baguma nji barhaba bimana kuguma na Adamu na Eva, nji barhanashigikira Oburhegesi bwa Yehova. Bichi nji byabahikira? Ufunuo 20:15 erhubwirire ntya: “Buli yeshi orhaliyandikirwe omu chitabu ch’akalamo akabulwa omu nyanja y’omuliro.” Nechi, ebyola bigamba byoshi nji byalimbulwa esiku n’amango. Aliko bantu banene omu bashinganyanya nji bahima echola chigeregezo ch’obuzinda. Amazino mabo nji maja mayandikwa loshi omu chitabu ch’akalamo.
“AMANGO M’OBUZINDA”
17. Bichi malayika abwiraga Danieli nji byarhengerera omu mango merhu? (Danieli 12:4, 8-10)
17 Bisimisize bwenene okuwaza kw’ebyola bintu nji byarhengerera omu mango mayinjire! Aliko, malayika alishubire kubwira Danieli myazi miguma y’akamaro oku bilolere amango merhu, k’okuderha “amango m’obuzinda.” (Osome Danieli 12:4, 8-10; 2 Ti. 3:1-5) Malayika abwira Danieli ntya: “Obumenyi b’okuli nji bwaba bunene bwenene.” Nechi, abantu ba Mungu nji bayunva bwinja bwinja ebinwa by’obulebi bili omu chitabu chage. Malayika ayongera oku mu amola mango “banyankola-maligo [bakajirire] amaligo na nta muguma mu banyankola-maligo [wakayunvirhe].”
18. Bichi byahikira hanola hofi-hofi banyakola-maligo?
18 Zene, byakabonekana oku ababi barhali bahaabwa obuhane oku bijiro byabo bibi. (Mal. 3:14, 15) Aliko hanola hofi-hofi Yesu achira olubanja balala bashushanyizwe n’empene n’okubakula haguma n’abashushanyizwe n’entama. (Mt. 25:31-33) Banyakola-maligo nji barhafuma amalibuko makulu, inji barhanafuuka mpu balame omu gulu lihyahyaha. Amazino mabo nji marhaba omu “chitabu ch’okuchiyibusya” chishamberwe omu Malaki 3:16.
19. Bichi rhukwanene kujira zene na bulagurhe? (Malaki 3:16-18)
19 Zene, rhukwanene kuyerekana kugerera olugenzi lwerhu oku rhurhali mu banyakola-maligo. (Osome Malaki 3:16-18.) Yehova ali agusha balala abwene nka “buhirhi bwage buminuzize” changwa obuhirhi bwage bw’akamaro. Kweri, rhulonzeze rhube mu bo.
Nji rhwagwarha busime bunene okubona Danieli, abazigirwa berhu, n’abandi banene “bayimanga” yi bahaabwa echigabi chabo omu gulu lihyahya! (Olole echifungo cha 20)
20. Chilagane chihe chizinda Danieli alihabirwe, na bulagurhe oli walingiriza oku nyorha okuyenezwa kw’echola chilagane?
20 Kweri, rhulamire omu chihe chisimisize. Aliko ebintu bisomeze bwenene bili hofi kurhengerera. Hanola hofi-hofi, rhwabona gurhe banyakola-maligo boshi balimbulwa. Enyuma w’ahola, nji rhwabona gurhe echila chilagane Yehova ahaaga Danieli chayenera: “Oku buzinda bw’esiku, nji wayimanga ohaabwe echigabi chawe.” (Da. 12:13) K’oli walingiriza oku nyorha olusiku Danieli n’abazigirwa bawe nji bashuba “kuyumanga”? Akaba ntyo ku bili, ojire okwawe koshi zene y’ogenderera kuba mwimana, kandi wakanachizera oku ezino lyawe nji lyabera liyandikirwe omu chitabu ch’akalamo cha Yehova.
LWIMPO 80 Uonje na Uone Vile Yehova Ni Mwema
^ Gunola mwazi gugwerhe amafasiriyo mahyahya oku bilolere okuntu rhukala rhuyunvirhe ebinwa biderhere akasi kazibu-zibu k’okuyigiriza kaganirirwe omu Danieli 12:2, 3. Rhwaganira oku bilolere mangochi nji kakolwa na bande nji bakakola. Kandi rhwashuba kubona nka gurhe akola kasi k’okuyigiriza nji karheganya balala bagwerhe obulangalire b’okulama oku gulu oku chigeregezo ch’obuzinda oku buzinda b’Oburhegesi bwa Kristu bwa Myaka Chihumbi.
^ Nkabaga abemana bafaga omu siku z’obuzinda ba nji barhanga kufuuka, naho balala bafaga embere zabo banaja bafuuka chizazi oku chindi. Akaba kweri intyo ku nji byaba, buli chizazi nji chagwarha orozo l’okuyegereza ababamenyene nabo. Koshi-koshi nji byakaba, Amandiko maderhere oku “buli muguma omu kasanzi kage” oku bilolere obufuuke bw’aba nji baja embingu, rhwakaderha oku nabanji bafuuka oku gulu nabo, buli muguma nj’afuuka omu kasanzi kage kakwanene.—1 Ko. 14:33; 15:23.
^ Manola mali mafasiriyo mahyahya oku bilolere okuntu rhwagendaga rhwayunva ebili omu sura ye 17 ye chitabu Sikiliza Unabii wa Danieli! (Yunviriza Obulebi bwa Daniyeli) n’omu Munara g’Omulanzi g’omu Lusiku 1, Mwezi gwa 7, 1987, bukurasa 21-25.
^ Aliko ebinwa, “abanya-kunali” na “abarhali banya-kunali” bibonekene omu Matendo 24:15 n’ebinwa “balala baliri bajira ebintu binja” na “balala balikoomere kukola amaligo” bibonekene omu Yohana 5:29 biderhere oku lugenzi balala nji bafuuka baligwerhe embere bafe.
