1. Gurhe rhwakamenya akaba rhwakanihira muntu mulebe?

 OMUNIHIRWA anachihangana kuyeneza ebilagane byage n’okuderha okuli. (Zb. 15:4) Abantu baba bamenyere oku bakamulangalira. Rhulonzeze bene-berhu na bali-berhu barhubone ntyo. Bichi rhwakajira yibarhunihira?

2. Nka gurhe rhwakayerekana oku rhuli banihirwa?

² Rhurhakaseza abandi barhunihire. Rhukwanene kuyereka abandi kugerera ebijiro byerhu oku bakarhunihira. Abantu banazigana kuderha ok’okuba munihirwa zili nka furanga. Binahema omuntu akole bwenene y’agwarha efuranga; aliko, omuntu akaziheza juba-juba. Kweri, Yehova yirhukwanene kunihira. Rhwakamulangalira buli mango bulala “buli chintu choshi anajira chiba chakunihirwa.” (Zb. 33:4) Analonzeze rhumuyiganye. (Efe. 5:1) Rhushambalage oku mifano ya bakozi baguma ba Yehova baliyiganyize Eshe w’embingu, banayerekana oku bali banihirwa. Kandi, rhwashambala ku ngeso erhano zakarhurhabala rhube banihirwa.

3-4. Nka gurhe omulebi Danieli aliyerekene oku ali munihirwa, n’echola chikwanene kurhushunika rhuchibaze bibazo bihe?

³ Omulebi Danieli alirhulekere omufano gwinja bwenene oku bilolere okuba munihirwa. Chiro akaba oku Abababiloni bamuhekaga buhungiro, arhalegamaga kuyerekana oku ali muntu abandi bakanihira. Abantu bahikiraga kumunihira bwenene amango, kugerera oburhabale bwa Yehova, afasiriya ebilorho bya Nebukadneza, Mwami we Babiloni. Mango maguma Danieli alikwanene kubwira mwami  oku ebijiro byage byagayisize Yehova. Obola burhumwa burhakasimisize mwami. Byalihemere Danieli agwarhe obushiru b’okumubwira obola burhumwa bulala Nebukadneza aliri mukali bwenene! (Da. 2:12; 4:20-22, 25) Myaka minene enyuma w’ahola, Danieli ashuba yerekana oku ali munihirwa amango afasiriyaga oburhumwa busomeze bwabonekanaga oku chibambazi che nju ya mwami omu Babiloni. (Da. 5:5, 25-29) Enyuma w’ahola, Dariyo w’Omumedi n’abarhwali bage nabo bachibonera oku “eroho lisomeze lyaliri mu” Danieli. Bayemera oku Danieli “aliri munihirwa na nta bolokazi changwa bulyalya aligwerhe.” (Da. 6:3, 4) Nechi, chiro n’abarhegesi ba bapagani barhegeera oku, oyola mulume waliri aharamya Yehova ali wakunihirwa!

⁴ Eyi rhunali rhwayibuka omufano gwa Danieli, rhwakaja rhwachibaza ntya: ‘Gurhe abantu barhali Bahamirizi ba Yehova banambona? Ka menyikene nka muntu onamala akasi bamuhaga na ndi munihirwa?’ Bulagurhe rhukwanene kushubiza kw’ebyola bibazo? Bulala rhunalerhera Yehova erenge amango rhuli banihirwa.

5. Bichi byarhabalaga Hanania abe muntu munihirwa?

⁵ Omu mwaka gwa 455 M.K.Y., Nehemiya amalire kuyumbaka ebibambazi bye Yerusalemu, alonza abalume banihirwa akaha akasi yibalanga bwinja eyola vile. Nehemiya achishoga Hanania abe mukulu wa balala boshi baliri balanga evile ye Yerusalmu. Ebiblia eyerekene oku Hanania “aliri munihirwa loshi mulume waliyubahire Mungu bwenene kulusha  bandi banene.” (Ne. 7:2) Bulala Hanania alizigiire Yehova n’okumuyubaha, echola charhuma ayinja akola bwinja-bwinja engabane yoshi-yoshi aliri ahaabwa. Nerhu, ezola ngeso zakarhurhabala rhube banihirwa omu kasi rhunakolera Mungu.

6. Bichi Tikiko alijirire biyerekene oku aliri mwira munihirwa w’entumwa Paulo?

⁶ Rhulole omufano gwa Tikiko, ey’entumwa Paulo alinihire bwenene. Amango Paulo afarhwa n’okushwekerwa omu nju, alinihiire Tikiko anaderha oku aliri “mukozi mwimana.” (Efe. 6:21, 22) Paulo alimunihire arhali mpu bulala aliri ahekera bene-babo amaruba konyine b’omu Efeso n’omu Kolosai, si bulala aliri abaheba omurhima n’okubarhuliriza. Omufano gwa Tikiko gurhuyibwise abalume banihirwa bemana bali bashishikala eby’ekiroho rhukenere zene.​—Kol. 4:7-9.

7. Bichi wakayiga kugerera omufano g’okunihirwa gw’abashamuka n’abagwasi b’akasi b’omu chibaga chawe?

⁷ Zene rhugwerhe busime bunene okubona oku abashamuka n’abagwasi b’akasi bali banihirwa. Banabona oku amakasi bagwerhe omu chibaga mali m’akamaro kuguma nk’oku Danieli, Hanania, na Tikiko baliri bamabona. Omufano, amango rhwamaja oku mbuganano z’ahagarhi k’eboso, rhuba rhumenyere oku engabane zoshi zili oku programe zagera. Kandi, abashamuka banagwarha obusime amango bene-berhu na bali-berhu bahabirwe engabane oku mbuganano bachirheganyize n’okuzigeza! Omufano, amango rhwamahamagala amafunzo merhu me Biblia bahike oku mbuganano zinaba oku buzinda bw’eboso, rhubarhumenyere oku hali muntu mulebe warheganyizwe, y’ageza ejambo ly’abantu boshi. Rhunaba rhunihire oku chibe chitabu, tragite, bronshire yoshi-yoshi rhwakaba rhukenere yi rhukola akasi k’okuhubiri, rhwayibona. Rhuli rhwabwira Yehova koko bulala abola bene-berhu bimana bali barhushishikala bwinja! Aliko si mu njira zihe, rhwakayerekanamo nerhu oku rhuli banihirwa?

8. Nka gurhe rhwakagwarha olugero amango rhuli rhwayereka abandi oku rhubalagireko? (Mezali 11:13)

⁸ Rhuzigiire bene-berhu na bali-berhu, rhunalonza kumenya emyazi yabo. Aliko rhurhakwanene kuchiheba omu byabo. Bakristu baguma b’omu myaka 100 ya burhanzi baliri “baderha-derha abandi kubi n’okuchiheba omu birhabalolere, omu kuderha oku bibarhakwanene kuderhako.” (1 Ti. 5:13) Rhurhakashonda haba n’akatyu rhube kuguma nabo. Rhuderhe oku hali omuntu wamakubwira emyazi yage y’esiri, amakubwira okw’eli siri na ntaye okwanene kuyibwirako. Omufano, mango maguma mwali-werhu akarhubwira echibazo ali ahurana nacho ch’amagala changwa ebindi bibazo agwerhe, aliko amakuhema oku nta windi muntu obibalirage ko. Rhukwanene kukenga ebi arhuhemere. * (Osome Mezali 11:13.) Lekaga rhuganire oku zindi hali z’akamaro zakarhurhabala rhubike esiri.

9. Nka gurhe buli muguma omu mulala akayerekana oku ali munihirwa?

⁹ Obe munihirwa omu mulala. Buli muguma omu mulala ahemerwe okurhaheba esiri embuga y’omulala gwabo. Omufano, omukazi w’Omukristu akaba ey’agwerhe ngeso ndebe eba abwene oku erhamusimisize. K’alema ayibalira abandi n’okurhuma mukage achiyunva akozezwe eshonyi si? Kweri arhajira ntyo! Bulala azigiire mukage, arhakajira chiro echintu chakamuvuna omurhima. (Efe. 5:33) Abachili misole, nabo banasima bakolerwe oku bukenge. Bili by’akamaro amango abazere bamayibuka  echola. Abazere barhakwanene kukoza abana babo eshonyi omu kubwira abandi oku bilolere amagosa mabo. (Kol. 3:21) Abana bakwanene kuba bakubika esiri omu kurhaheba embuga emyazi yakakoza eshonyi changwa kugayisa abandi bantu b’omu mulala. (Kum. 5:16) Amango buli muguma omu mulala amajira okwage koshi y’abika esiri, ebyola byabalerhera obuguma omu mulala.

10. Bichi bihemerwe y’omuntu aba mwira w’okuli? (Mezali 17:17)

¹⁰ Obe munihirwa wa bera bawe. Omu kalamo kerhu, hali amango rhwakachiyunva oku birhuhemere rhubwire mwira werhu w’oku murhima okuntu rhuli rhwachiyunva. Mango maguma, binaba eyi bikomere kujira ntyo. Birhaba biyorohere okubwira muntu mulebe oku bilolere okuntu rhuli rhwachiyunva ndani, eyi rhwakanachiyunva kubi bwenene nka rhwamamenya buzinda oku mwira werhu abwirire abandi ebi rhwamubwiraga. Aliko, rhunagwarha busime bunene bwenene b’okugwarha abera rhwakabwira ebirhuli oku murhima eyi rhumenyere oku nta windi muntu babibwira! Abola bali ‘bera b’okulii.’​—Osome Mezali 17:17.

11. a) Nka gurhe abashamuka na bakabo banayerekana oku bali banihirwa? b) Bichi rhwayigire byarhuhumire oku murhima oku bilolere mushamuka muguma warhenga kuhaana oburhabale oku bilolere ebintu by’esiri omu chibaga n’enyuma w’ahola anaj’aba haguma n’omulala gwage? (Olole efoto.)

¹¹ Obe munihirwa omu chibaga. Abashamuka banabika esiri, baba nka ‘hantu h’okuyakira omuyaga, ahantu h’okuchibisha’ aha bene-babo na bali-babo bakalibirhara. (Isa. 32:2) Rhwakaganira n’abashamuka oku bilolere buli chintu choshi-choshi bulala rhumenyere oku banabika esiri. Rhurhabahidika mpu barhubwire ebintu by’esiri bagwerhe. Oku bwindi, rhunakenga bak’abashamuka berhu bulala barhahinyahinya balonza oku beba bababwire esiri bamenyere oku bandi. Kweri, guli mugisho okubona muka omushamuka arhali aderha emyazi y’esiri elolere bene-babo na bali-babo. Muka omushamuka muguma aderhere ntya: “Ngwerhe obusime okubona  oku bani nta chintu anambwira oku bilolere abakenere oburhabale bw’abashamuka, arhanambwira chiro n’amazino mabo. Kandi ngwerhe obusime bulala bani anabika emyazi y’esiri yi ntashiba nalaga oku birhandolere. N’echola chinarhuma nachiyunva binyorohere kuganira na buli yeshi omu chibaga. Kandi nambwira bani oku bilolere ebibazo byani nyenyine bulala mba munihire oku anabika esiri.” Okuderha okuli, rhweshi rhuba rhulonzeze rhube bantu banihirwa. Ngeso zihe zarhurhabala rhuhikire k’ogola muhigo? Lekaga rhulole erhano muzo.

12. Bulagurhe rhwakaderha oku obuzigire g’omusinji g’okugwarha obunihire? Lerha omufano.

¹² Obuzigire g’omusinji g’okugwarha obunihire. Yesu aliderhere oku marhegeko mabiri makulu bwenene kulusha amandi, kuli kuzigira Yehova n’okuzigira omuturanyi werhu. (Mt. 22:37-39) Rhuzigiire Yehova, bobola rhulonzeze kuyiganya omufano gwage gushinganyanya g’okuba munihirwa. Omufano, obuzigire rhugwerhe ku bene-berhu na bali-berhu bunarhuma rhwabika esiri zabo. Rhurhashondere haba n’akatyu kubishula echintu chakabababaza, chakabakoza eshonyi changwa chakabaluma oku murhima.​—Yoh. 15:12.

13. Mu njira ehe obwirhohye bunarhurhabala rhube banihirwa?

¹³ Obwirhohye bwarhurhabala rhube banihirwa. Omukristu oli mwirhohye arhalonza kuchiyerekana oku bandi oku yebage murhanzi omu kubishula emyazi. (Flp. 2:3) Arhalonza oku abandi bamubone oku hali ebintu by’esiri amenyere arhalikwanene aderheko. Kandi obwirhohye bwarhurhabala rhumenye rhwabwira abantu binwa binene oku kuntu rhwabo rhuli rhwayunva ebintu n’obola ntacho Ebiblia changwa ebitabu byerhu byabiderhereko.

14. Nka gurhe oburhegerezi bunarhurhabala rhube banihirwa?

¹⁴ Oburhegerezi bwarhabala Omukristu amenye “amango m’okusira n’amango m’okuderha.” (Muh. 3:7) “Okusira kwa muhya kurhali kubula echakaderha.” Ebyola bili binwa abantu banazigana kuderha. K’okuderha oku, hali amango kuba kwinja omuntu agenderere kusira ahali h’okuderha. Che chirhumire, Mezali 11:12 ehanwire ntya: “Omuntu ogwerhe oburhegerezi b’okuli anabera asirire.” Rhurhole omufano. Mushamuka muguma wagerere mu binene omu kalamo, bamamuhema mpu aje kurhabala ebindi bibaga oku bibazo bali bahurana. Yunvaga eby’owindi mushamuka amuderhagako: “Buli mango anaba merangwe y’arhaheba embuga haba n’akatyu esiri elolere ebindi bibaga.” Bulala oyula mushamuka ali mwengehe bwenene, ababo bashamuka omu chibaga banamukenga. Baba bachizerere oku arhaheba embuga esiri z’ababo.

15. Nka gurhe rhwakalangalirwa amango rhuli banihirwa oku bandi? Lerha omufano.

¹⁵ Okulangalirwa chili chindi chintu rhukenere y’abandi barhunihira. Rhunalangalira omuntu munihirwa bulala rhuyinji oku buli mango anaderha okuli. (Efe. 4:25; Ebr. 13:18) Omufano, rhuderhe ok’olonzeze kuba mwalimu mwinja we Biblia. Naho, wanabwira muntu mulebe ayunvirize ejambo lyawe n’okukuha amahano makakurhabala oyigirize bwinja. Inde onihire wakakuha ehano buzira kukubisha chintu? K’ali olala muntu wakubwira eby’olonzeze kuyunva changwa olala wakubwira okuli n’obukenge? Echishubizo chibonekene wazi. Ebiblia ederhere ntya: “Ehano liba linja kulusha obuzigire bubishirwe. Ebihulu bilerhwa n’omwira biba by’obwimana.” (Mez. 27:5, 6) Chiro akaba oku ehano mwira wawe akuhaga buzira kukubisha chintu lyarhangire kuluma, aliko lyakulerhera enyungu omu kalamo kawe koshi.

16. Nka gurhe Mezali 10:19 eyerekene akamaro k’okugwarha engeso y’okuchigala?

 ¹⁶ Bili by’akamaro bwenene okugwarha engeso y’okuchigala akaba rhulonzeze oku abandi barhunihire. Eyola ngeso yarhurhabala rhulange olulimi lwerhu amango rhuli rhwalonza kuderha siri ndebe abandi barhubwiraga. (Osome Mezali 10:19.) Byakarhukomerera kugwarha eyi ngeso y’okuchigala amango rhuli rhwakolesa erezo sosyo, k’okuderha, nka rhuli ganira na bantu banene oku Enternete. Nka rhurhakengukire, hali okuntu rhwakaheba embuga emyazi y’esiri na bantu banene banayimenya. Amango rhwamashandaza emyazi kugerera Enternete, rhurhakachimenya okuntu abandi bayikolesa na buhanya bungana gurhe byakalerha. Okuchigala, kwashuba kurhurhabala kandi rhubere rhusirire amango abanzi berhu yibalonza kumenya emyazi yakaheba bene-berhu na bali-berhu omu buhanya. Ebyola byakarhengerera amango rhuli rhwabazwa ebibazo embere z’abapolisi omu chihugo akasi kerhu kalahizwe changwa omu chihugo rhurhayemererwe kukoleramo makasi merhu malebe. Rhwakakolesa akanuni kaderhere oku “rhwashweka obunu [bwerhu] ” n’okubulanga omu bihe bili nk’ebyola changwa ebindi. (Zb. 39:1) Rhugenderere kuba banihirwa oku bantu boshi babe bantu b’omu mulala gwerhu, bera berhu na bene-berhu na bali-berhu, changwa oku bandi boshi-boshi. Rhukenere engeso y’okuchigala yi rhuba banihirwa.

17. Nka gurhe rhwakagendereza engeso y’okunihirana omu chibaga cherhu?

¹⁷ Rhugwerhe obusime bulala Yehova arhukululire omu mulala gw’abagwerhe obuzigire banali banihirwa! Rhweshi rhukwanene kujira okwerhu koshi yi bene-berhu na bali-berhu barhunihira. Amango buli muguma werhu ali ajira okwage koshi y’ayerekana obuzigire, obwirhohye, oburhegerezi, okulangalirwa, n’okuchigala, rhwarhabala omu kulerha engeso y’okunihirana omu chibaga cherhu. Rhukwanene kujira okwerhu koshi yirhuyerekana oku rhuli bantu abandi bakanihira. Rhujage rhwayiganya Mungu werhu Yehova n’okugenderera kuyerekana oku rhuli bantu abandi bakanihira.