Paulo aderhere ntya omu lwandiko lwa 1 Wakorinto 15:8: “Buzinda nani ambonekera nk’a muntu waburhirwe arhanayeze emyezi.” Mira, rhwaliri rhwafasiriya oku Paulo aliri aderhera oku by’achiboneraga omu chibonekezi cha Yesu ey’ali omu bukuze bw’embingu. Kwaliri nka ahaabirwe olukengo l’okuburhwa, changwa kufuuka, n’okulama nka chilemwa ch’eroho, myaka minene embere w’obufuuke buli nk’obola buhwanze. Aliko enyuma y’okuyiga bwenene oku binwa by’ogola mustari, rhwabona oku birhuhemere rhuhindamule okuntu rhwaliri rhwaguyunva.

Kweri bibonekene oku hanola Paulo aliri aganira oku byarhengereraga amango ahindamuka n’okuba Mukristu. Aliko si bichi alonzaga kuderha amango aderha oku “aburhwagwa arhanayeneze emyezi”? Byakaderhwa mu njira zinene.

Okuntu Paulo abaga Mukristu kwaliri kw’aho h’anaho kunayubahisize. Ahanene omwana orhayeneze emyezi anaburhwa aho h’anaho. Oku bilolere Sauli (wahikiraga kumenyikana oku zino lya Paulo) aliri abalama kuja e Damasko ajilibuza Abakristu eyomunda, arhalimenyere oku akabwene echibonekezi cha Yesu wafuukire. Okuba Mukristu kwa Paulo kurhamusomezaga yewe yenyine s’aliko kwalisomeze n’Abakristu balilamire mw’eyola vile alikola ja kulibuza. Kandi, ebyola byahikiriga Paulo byaliyubahisize bwenene byanarhuma arhachigala kubona mu kasanzi kalebe.​—Matendo 9:1-9, 17-19.

Ajirwaga Mukristu omu kasanzi “karhakwanene.” Echinwa cha mira che Chigiriki chitafsiribwe “muntu waburhirwe arhayeneze emyezi” chakashuba kutafsiribwa “muntu waburhirwe omu kasanzi karhakwanene.” La Bible Jerusalem (Ebiblia ye Yerusalemu) ederhere ntya: “Kuli nk’anaburhwagwa amango nta muntu walilangalire ntyo.” Amango Paulo abaga Mukristu, Yesu abaga agalukire embingu. Abantu Paulo ashambereko omu mistari ya burhanzi, bowe balibwene oku Yesu afuuka n’okuja embingu, aliko yewe arhabonaga kw’ebyola. (1 Ko. 15:4-8) Kugerera echibonekezi chirhalilangalirwe, Yesu alihere Paulo orozo l’okumubona enyuma y’okufuuka kwage chiro akaba oku akola “karhaliri k’akasanzi kakwanene.”

Aliyerekene obwirhohye amango aliri aderha oku bimulolere. Nk’oku basomi baguma baderhere, ebinwa Paulo akolesaga ahala aliri achiderhako kubi. Akabaga ntyo kubili, Paulo aliri aderha oku arhalikwanene olukengo ahabwagwa l’okuba ntumwa. Naho, agenderera kuderha ntya: “Nyono nye mudorho omu ntumwa, ntanakwanene kuyirikwa ntumwa, bulala naliri nalibuza echibaga cha Mungu. Aliko kugerera olukogo lwa Mungu lurhakwanenwe, nkala ndi oku nandi.”​—1 Ko. 15:9, 10.

Bobola, bibonekene oku Paulo aliri alonza kuderha oku byamuhikiraga amango Yesu amubonekeraga han’aho omu kuntu arhaliwazize, n’okuba Mukristu omu mango arhaliwazize, changwa bulala arhalikwanene kuhabwa echibonekezi chisomeze ntyo. Koshi-koshi byakaba bili, Paulo alibwene bwinja-bwinja oku echola chibonekezi chili ch’akamaro bwenene emwage. Buzira ngangane echola chalimuyemezeze oku Yesu alifuukire kurhenga omu bafire. Birhakarhusomeza okubona oku aliri azigana kugalukira echola chibonekezi arhalilangalire amango aliri ahubiri abandi oku bilolere okufuuka kwa Yesu.​—Mdo. 22:6-11; 26:13-18.