1. Gurhe Mungu aliri ahereza emisi abakozi bage bemana b’omu mango ma mira?

 ECHINWA cha Mungu chinazigana kuderha oku balume bemana, nka bantu bagwerhe emisi. Aliko chiro na balala baliri bachiyunva bagwerhe misi minene, barhaliri bachiyunva bagwerhe emisi amango moshi. Omufano, mu mango maguma, Omwami Daudi aliri achiyunva “akomeere nka musozi,” aliko omu mandi mango, aliri achiyunva azambire “n’okugwarha obuba.” (Zb. 30:7) Eroho lichesibwa lyalihere Samsoni emisi erhalukire ey’olugero lw’abantu. Alirhegerere oku buzira emisi erhengerere emwa Mungu, “akabulire emisi n’okuba kuguma n’abandi bantu boshi.” (Amu. 14:5, 6; 16:17) Yehova yiwaliri aha abola balume bemana eyola misi.

2. Bichi byarhumaga entumwa Paulo aderha oku azambire amola mango man’amo ey’anagwerhe emisi? (2 Wakorinto 12:9, 10)

² Entumwa Paulo alimenyere oku naye alikenere emisi erhengerere emwa Yehova. (Osome 2 Wakorinto 12:9, 10.) Kuguma na banene mu rhwewe, Paulo naye aliri alwisa ebibazo by’amagala. (Gal. 4:13, 14) Mango maguma, byalimukomerere kujira ebintu binja. (Ro. 7:18, 19) Na mango maguma, aliri achiyunva agwerhe omulago n’okuchiyunva ayubahire eju y’eby’akamuhikire. (2 Ko. 1:8, 9) Aliko, amango Paulo aliri achiyunva azambire, aliri agwarha emisi. Nka gurhe? Yehova alihere Paulo emisi alikenere y’agenderera kulembera ebigeregezo.

3. Bibazo bihe rhwashubizako mu gunola mwazi?

³ Yehova arhulaganyize oku nerhu arhuha emisi y’okulembera. (1 Pe. 5:10) Aliko, rhurhakalangalira oku arhuha eyola misi buzira kujira chintu chilebe. Omufano, omoteri gunaha omutugari emisi y’okurhenga aha guli. Aliko, shofere akwanene kulabarha oku akseleratere yi guja emunda alonzeze. Konakuguma, Yehova  ali tayari kurhuha emisi rhukenere, aliko rhukwanene kujira chintu chilebe yirhuyunguka n’eyola misi. Bichi Yehova ajirire y’arhuha emisi? Na bichi rhukwanene kujira yi rhugwarha eyola misi? Rhwapata ebishubizo kw’ebyola bibazo omu kuganira oku kuntu Yehova arhabere bantu basharhu baganirirwe omu Biblia, k’okuderha omulebi Yona, Mariya nyina wa Yesu, n’entumwa Paulo. Kandi rhwabona okuntu Yehova agenderere kukomeza abakozi bage zene omu njira zili nk’ezola.

4. Gurhe rhwakagwarha emisi erhengere emwa Yehova?

⁴ Njira nguma rhwakagwarha mw’emisi erhengere emwa Yehova, kuli kumuyegera omu sala. Omu kurhushubiza oku masala merhu, Yehova akarhuhereza “emisi echubukire ey’olugero.” (2 Ko. 4:7) Kandi rhwakagwarha emisi rhukenere omu kusoma Echinwa chage n’okuwaza bwenene oku birhuli rhwasoma. (Zb. 86:11) Oburhumwa Yehova arhuhere omu Biblia “buherhe emisi.” (Ebr. 4:12) Amango wamasalira Yehova n’okusoma Echinwa chage, wagwarha emisi okenere y’ogala kulembera, y’ogenderera kugwarha obusiime, changwa y’oyeneza engabane ekomere. Rhujage rhwalola okuntu Yehova akomezaga omulebi Yona.

5. Bichi omulebi Yona alikenere y’agwarha emisi?

⁵ Omulebi Yona alikenere kugwarha obushiru. Aliyubahire kuja emunda Yehova amurhumaga. Bobola aja omu chombo ch’emunda barhamurhumaga. Eju y’echola, yewe n’abantu boshi baliri mw’echola chombo baliri hofi kufa eju y’echihusi chinene. Amango abakozi b’omu chombo bamukabula omu nyanja, olufi luzibu-zibu lwamumira. Yona aliri omu nda y’olola lufi ahantu hayubahisize. Nk’oku owazize, gurhe Yona alichiyunvirhe? Oku burhanzi nkabaga, Yona aliwazize oku akola kufa. Nkabaga kandi aliri achiyunva oku Yehova amulekerere. Yona akwanene kuba ey’alichiyunvirhe agwerhe mulago gunene.

6. Nk’oku olwandiko lwa Yona 2:1, 2, 7 luderhere, bichi byahaga Yona emisi amango aliri omu nda y’efi?

⁶ Gurhe Yona alijirire y’apata emisi amango aliri yenyine omu nda y’eyola fi? Ech’oburhanzi alijirire, asalira Yehova. (Osome Yona 2:1, 2, 7.) Chiro akaba oku arhalikengere Yehova, Yona ahungama ey’anagwerhe obwemere oku Yehova ashubiza esala lyage. Kandi Yona aliwazize bwenene oku Mandiko abaga asomere mira. Bulagurhe rhwakaderha ntyo? Esala lyage liyandikirwe omu Yona sura 2, ekoleseze binwa binene byen’ebyo n’emistari ebonekene omu Zaburi. (Omufano, ohuzanye Yona 2:2, 5 na Zaburi 69:1; 86:7.) Bibonekene oku Yona alimenyere bwinja amola mandiko. Amola mandiko malihere Yona obwizere oku Yehova akamurhabere. Yehova aliyokwere Yona, na buzinda aliri tayari kukola akasi Yehova amuhaga.—Yon. 2:10–3:4.

7-8. Nka gurhe mwene-werhu w’omu chihugo che Taiwan agwarhaga emisi amango m’ebigeregezo byage?

⁷ Omufano gwa Yona gwakarhurhabala amango rhuli rhwahurana ebibazo bilengene. Omufano, mwene-werhu Zhiming b w’omu chihugo che Taiwan, aligwerhe echibazo ch’amagala chikomere bwenene. Oku bwindi, abantu b’omu mulala gwage baliri bamukolera kubi bwenene. Eju y’obwemere bwage, apata emisi erhengere emwa Yehova kugerera esala n’efunzo lyage-lyage. Aderhere ntya: “Mango maguma, amango ebibazo byaliri byarhengerera, naliri nachiyunva ngwerhe omulago n’okuchiyunva nka ntakagala kurhulera yinjira efunzo lyani-lyani.” Aliko alilangalire Yehova okw’amurhabala. Aderhere ntya: “Nanarhanga salira Yehova, naho nanaja naheba ekutere omu marhwiri n’okuyunviriza enyimpo zerhu z’Obwami. Mango maguma naliri naziyimpa n’omulenge gw’eshishi kuhika aha narhulera. Na buzinda nanaja nahwanza kuyiga.”

⁸ Mwene-werhu Zhiming alipatire emisi y’okulembera ebibazo byage, kugerera eby’aliri ayiga omu funzo lyage-lyage. Omufano, amango  ahwanza kuchiyunva bwinja enyuma y’okuberwa eju y’obulwala bukomere, munganga amubwira oku bulala eshagama yage ekala eli ngeke, byahema bamuhebe mw’eshagama. Aliko, obudufu embere bamubere, mwene-werhu Zhiming abaga asomere oku bilolere mwali-werhu muguma baberaga eju y’obulwala buli nk’obola. Eshagama yage yaligehere bwenene kulusha eya Zhiming. Oyola mwali-werhu arhayemeraga bamuheba mw’eshagama, aliko alifumire. Eyola ngani yalirhabere Zhiming agenderere kubera mwimana.

9. Amango wamachiyunva ogwerhe emilago eju y’ebibazo, bichi wakajira? (Olole n’amafoto.)

⁹ Amango oli omu bibazo, ka wachigerere kuchiyunva bikukomerere bwenene kusalira emwa Yehova? Changwa si onachiyunva oluhire bwenene omu kuntu arhakagala kuyiga? Oyibuke oku Yehova amenyere bwinja-bwinja okuntu oli wachiyunva. Bobola, chiro amango wamasalira esala liyufuhire, wakachizera oku Yehova akuha kweri eby’okenere. (Efe. 3:20) Akaba bikukomerere kusoma n’okuyiga bulala olwere, oluhire, changwa oli wachiyunva olagire bwenene, wakayunviriza earejistrema y’obusomi bwe Biblia, changwa bwa biguma omu bitabu byerhu. Wakayunviriza ziguma omu nyimpo zerhu changwa wakalola amavideo oku jw.org. Yehova alonzeze kukuha emisi, kandi ajira ntyo amango oli wamusalira, naho wanaja walonza ebishubizo oku sala lyawe omu Biblia, n’ebindi bintu byoshi anarhuhereza.

10. Nka gurhe bene-berhu na bali-berhu b’Abakristu banarhukomeza?

¹⁰ Yehova akakolesa bene-berhu na bali-berhu yi barhukomeza. Bakaba “shoko y’echirhulirizo” amango oli wahurana echigeregezo changwa oli walwisa y’oyeneza engabane ekomere. (Kol. 4:10, 11) Kweri rhuba rhukenere abera omu “mango m’omulago.” (Mez. 17:17) Amango rhwamachiyunva rhuzambire, bene-berhu na bali-berhu bakarhuha ebi rhukenere, bakarhurhuliriza, n’okurhuheba omurhima yirhugenderera kukolera Yehova oku bwimana. Rhuganire gurhe Maria nyina wa Yesu apataga emisi erhengerere oku bandi.

11. Bulagurhe Mariya alikenere emisi?

¹¹ Maria alikenere emisi y’ajira obulonza bwa Yehova. Ba nka wawaza gurhe Maria alichiyunvirhe  agwerhe omulago, amango malayika Gabriyeli amubwira oku aheka obukule chiro akaba abaga arhaza kushabwa. Arhalimenyere binene oku bilolere okuntu akalemba abage-bage bana. Aliko alikwanene kushishikala omurhabana wakabere Masiya. Abaga ey’arhasaga kujira echijiro ch’obuhya analikwanene kubwira Yusufu oku ali bukule. Ebyola byakamukomerere bwenene kubibwira Yusufu.—Lu. 1:26-33.

12. Nk’oku olwandiko lwa Luka 1:39-45 luyerekene, nka gurhe Mariya ahabwaga emisi alikenere?

¹² Gurhe Mariya apataga emisi alikenere y’ayeneza engabane erhaliri kuguma n’ezindi chiro enakomere? Alilangalire oburhabale bw’abandi. Omufano, alibwirire Gabriyeli amuhe myazi minene oku bilolere eyola ngabane. (Lu. 1:34) Harhalegamaga, abalamira omu “chihugo ch’emisozi” che Yuda omu kulambagirira Elizabeti omuntu w’omu mulala gwage. Lwaliri lugenzi lwinja bwenene. Elizabeti abwira Mariya koko, n’eroho lya Yehova lyamuyerekeza aganire oku bulebi bulolere mugala wa Mariya waburhwa. (Osome Luka 1:39-45.) Mariya aderha oku Yehova “akolere n’emisi y’okuboko kwage.” (Lu. 1:46-51) Kugerera Gabriyeli na Elizabeti, Yehova akomeza Mariya.

13. Bichi byarhengereraga amango mwali-werhu muguma w’omu chihugo che Bolivie ahema oburhabale bwa bene-berhu na bali-berhu?

¹³ Kuguma na Mariya, nawe abenyu Bakristu bakakuheba emisi. Mwali-werhu Dasuri, w’omu chihugo che Bolivie, alikenere oburhabale buli nk’obola. Eshe alilwere bwenene n’obola bulwala bwage burhaligwerhe bufumu. Amango aliri omu bitaro, Dasuri alilonzeze kuba haguma n’eshe kanene nk’okw’akanagalire. (1 Ti. 5:4) Ebyola birhaliyorohere amango moshi. Aderhere ntya: “Mango manene naliri nayunva nka ntakagala kugenderera.” Mwali-werhu Dasuri alihemere oburhabale si? Burhanzi arhahemaga oburhabale. Afasiriye ntya: “Ntalilonzeze kuluhya bene-berhu na bali-berhu. Naliri nawaza oku Yehova yiwampereza oburhabale nkenere. Aliko buzinda narhegera oku okuchicha oku bandi kwaliri kuchimalira ebibazo byani nyono nyenyine.” (Mez. 18:1) Dasuri abona oku ayandikire baguma omu bera bage ababwire gurhe ehali emuberere. Aderhere ntya: “Nta binwa nakabona by’okuyerekana kangana gurhe bene-berhu bazigirwa b’Abakristu baliri bampeba omurhima. Baliri banderhera ebilyo oku bitaro n’okunsomera mandiko maguma-maguma m’okumpeba omurhima. Buli busime bunene okumenya oku rhurhaba rhwenyine. Rhweshi rhuli mulala guzibu-zibu gwa Yehova. Kandi bene-berhu na bali-berhu balonzeze kurhurhabala omu kurhuha ebirhukenere, okulira haguma nerhu amango rhuli omu milago n’okurhuheba omurhima yirhugenderera kukolera Yehova haguma nabo.”

14. Bulagurhe rhukwanene kuyemera oburhabale bw’abashamuka b’echibaga?

¹⁴ Njira nguma Yehova anakolesa omu kurhuha emisi, kuli kugerera abashamuka b’echibaga. Zili mpembo Yehova anakolesa omu kurhurhuliriza n’okurhuheba emisi. (Isa. 32:1, 2) Bobola amango ogwerhe omulago, obwire omushamuka w’echibaga okuntu oli wachiyunva. Amango bamakurhabala, omenye wafunda kuyemera obola burhabale. Kugerera abola bashamuka, Yehova akakubeba emisi.

15. Bulangalire buhe Abakristu boshi bali basiimira?

¹⁵ Ebilagane bye Biblia byakarhuha obulangalire n’emisi y’okugenderera kukolera Yehova. (Ro. 4:3, 18-20) Bakristu baguma bagwerhe obulangalire b’okulama esiku n’amango omu mbingu, n’abandi bagwerhe obulangalire b’okulama omu paradizo nyinja bwenene hanola oku gulu. Bulala rhugwerhe obola bulangalire, rhugwerhe emisi y’okulembera ebigeregezo, okuhubiri emyazi minja, n’okukolera bene-berhu na bali-berhu omu chibaga. (1 Te. 1:3) Obulangalire buli nk’obola bwalikomeze Paulo.

16. Bulagurhe entumwa Paulo alikenere emisi?

 ¹⁶ Paulo alikenere emisi. Omu maruba ayandikiraga Abakristu be Korinto, alichihuzenye n’echikoleso ch’ebumba chakabereka juba. Aliri ‘asindagizwa,’ ‘aliri achiyunva ahwererwe,’ ‘alibuzwa,’ ‘n’okubandwa ahashi.’ Chiro n’akalamo kage kaliri kaba omu buhanya. (2 Ko. 4:8-10) Paulo ayandikaga ebyola binwa omu lugenzi lwage lwakasharhu l’obumisyonere. N’enyuma y’okumala kuyandika ebyola binwa, alihurene n’ezindi hali zikomere bwenene. Hofi oku buzinda bolola lugenzi lwage, echigusho ch’ababandi chalimurherere, alifarhirwe, alibwirire azika omu nyanja, analishwekerwe omu pirizo.

17. Nk’oku olwandiko lwa 2 Wakorinto 4:16-18 luyerekene, bichi byakomezaga Paulo alembere ebigeregezo?

¹⁷ Paulo alipatire emisi y’okulembera omu kuseza obwenge oku chilagane chage. (Osome 2 Wakorinto 4:16-18.) Abwira Abakristu be Korinto oku chiro n’omubiri gwage “gwashendegerera” gurhe, arhakalekere avunike omurhima. Paulo alisezeze obwenge bwage oku mango mayinjire. Obulangalire bwage bw’akalamo k’esiku n’amango omu mbingu “bwaligenderere kukomera bwenene bwenene loshi,” omu kuntu aliri tayari kulembera echigeregezo choshi-choshi omu kuntu apate oluhembo lwage. Paulo aliri akengera bwenene kw’echola chilagane chage, n’echola charhuma ayinja achiyunva ‘ali muhyahya lusiku oku lwindi.’

18. Nka gurhe obulangalire bw’amango mayinjire bwakomezaga Tihomir n’omulala gwage?

¹⁸ Obulangalire bw’amango mayinjire bwalihebere emisi mwene-werhu Tihomir, w’omu chihugo che Bulgarie. Habaga hamagera myaka migeke, mudorho wage yekala Zdravko afire omu aksida. Eju y’echola Tihomir aliri ayunva mugayo gunene. Omu kulwisa ogola mulago, yewe na mukage n’omugala, banachapa omu bwenge okuntu obufuke nji bwaba. Afasiriye ntya: “Omufano, rhunaganira ngahe nji rhwabuganana na Zdravko, bilyo bihe nji rhwamuvuyira, hanola nj’afuka bande nji rhwahamagala oku fete, na bichi nji rhwamubwira oku bilolere esiku z’obuzinda.” Tihomir aderhere oku, okuseza bwenene obwenge kw’echola chilagane kunakomeza omulala gwage n’okugurhabala gugenderere kulembera,  n’okugenderera kulindira akasanzi Yehova nj’afula mwene-wabo.

19. Bichi wakajira y’okomeza obulangalire bwawe? (Olole n’efoto.)

¹⁹ Nka gurhe wakagenderera kukomeza obwemere bwawe? Omufano, akaba ogwerhe obulangalire b’okulama esiku n’amango oku gulu, wakasoma oku bilolere engani eli omu Biblia ederhere oku Paradizo n’okuyikengerako. (Isa. 25:8; 32:16-18) Owaze gurhe akalamo nji kaba omu gulu lihya-hya. Ba nka wachapa omu bwenge, oli omu gulu lihyahya. Bande wabwenemo? Milenge ehe oli wayunva? Gurhe oli wachiyunva? Y’ogala kuchapa omu bwenge gurhe Eparadizo nji yaba, olole amafoto mali omu bitabu byerhu changwa olole emiziki y’evideo nka: Amango m’Egulu Lihyahya, Iko Karibu Sana, (Egulu Lihyahya Lili Hofi Bwenene) na Wazia ile Siku, (Waza Amango). Nka rhubikire bwinja-bwinja omu bwenge echilagane ch’egulu lihyahya, ebibazo byerhu byaba “by’akasanzi kageke, birhanakomere.” (2 Ko. 4:17) Obulangalire Yehova akuhere bwakakurhabala ogenderere kulembera ebigeregezo.

20. Chiro n’amango rhwamachiyunva rhuluhire, nka gurhe rhwakashuba kugwarha emisi?

²⁰ Chiro n’amango rhwakaba rhuluhire, “kugerera oburhabale bwa Mungu, rhwagwarha emisi.” (Zb. 108:13) Yehova akuhere buli choshi wakaba okenere y’opata emisi erhengerere emwage. Bobola amango okenere emisi y’ogala kuyeneza engabane, kulembera echigeregezo, changwa y’ogenderera kugwarha obusiime bwawe, osalire Yehova onajire efunzo lyawe-lyawe y’opata oburhabale. Oyemere bene-benyu na bali-benyu b’Abakristu bakuhebe omurhima. Ogenderere kuwaza bwenene oku bulangalire bwawe bw’amango mayinjire. Naho, waba ‘okomezwe n’emisi yoshi ya [Mugu] egwerhe obukuuze y’ogala kulembera bwenene n’okulindira n’omwishingo.’—Kol. 1:11.