1. Bulagurhe byakarhukomerera kukenga?

 HALI amango onachiyunva oku bikukomerere kukenga si? Intyo kubyaliberere Mwami Daudi, bobola asalira Mungu ntya: “Ontabale ngwarhe enyorha y’okuba tayari kukukenga.” (Zb. 51:12) Daudi alizigiire Yehova. Aliko chiro akaba ntyo, kuguma nerhu, naye birhaliri byamuyorohera kukenga mango maguma. Bulagurhe? Ech’oburhanzi, rhwashokwere engeso y’okurhakenga. Echa kabiri, Shetani anarhushumika buli mango, yirhuba bigamba kuguma naye. (2 Ko. 11:3) Echa kasharhu, rhuzungulukirwe n’abantu bagwerhe engeso y’okurhakenga, k’okuderha, “eroho lili lyakola zene omu bana b’ebigamba.” (Efe. 2:2) Rhurhakwanene kulwisa engeso y’okujira echaha konyine, aliko kandi rhukwanene kulwisa akahidiko ka Ibilisi n’egulu lyage bali barhulerhera yirhurhakenga. Rhukwanene kujira okwerhu koshi yirhukenga Yehova na balala ahere oburhwali.

2. Okuba “tayari kukenga” k’okuderha gurhe? (Yakobo 3:17)

² Osome Yakobo 3:17. Omwandisi Yakobo warongozwaga n’eroho lichesibwa aderhere oku, abantu bagwerhe obwengehe baba “tayari kukenga.” Waza bichi ebyola biderhere. Rhukwanene kugwarha enyorha n’obulonza b’okukenga balala Yehova ahere burhwali bulebe. Kweri, Yehova arharhuhemere rhukenge omuntu orhuhemere rhuvune amarhegeko mage.—Mdo. 4:18-20.

3. Bulagurhe bili by’akamaro emwa Yehova oku rhukenge abali barhuyerekeza?

³ Rhwakachiyunva oku biyorohere bwenene okukenga Yehova kulusha kukenga omuntu. Yehova yewe, anarhuhereza buli mango obwerekezi bushinganene. (Zb. 19:7) Aliko, abantu bagwerhe oburhwali bowe, barhali bashinganyanya. Chiro akaba ntyo, Darha w’embingu ahere abazere, abarhegesi, n’abashamuka  b’echibaga burhwali bulebe. (Mez. 6:20; 1 Te. 5:12; 1 Pe. 2:13, 14) Amango rhwamabakenga, rhunaba eyi kweri rhuli rhwakenga Yehova. Lekaga rhulole gurhe rhwakakenga abantu Yehova ahere oburhwali, chiro akaba oku mango maguma rhunabona oku birhukomerere kuyemera obwerekezi bwabo changwa kubukulikira.

4. Bulagurhe bana banene barhakenga abazere babo?

⁴ Emisole ezungulukirwe n’eyindi misole “erhakenga abazere.” (2 Ti. 3:1, 2) Bichi birhuma banene mubo barhakenga? Baguma banawaza oku abazere babo bali ndyalya. Abazere baba balangalire oku abana babo bajira ebintu bowe banagambwa kujira. Abandi banawaza oku bunola linola gulu lyahindamukire, empanulo z’abazere babo zirhakabarhabala, changwa zivire zakabya. Akaba nawe oli musole, nawe onachiyunva ntyo si? Banene banabona oku bikomere kukenga erhegeko lya Yehova liderhere: “Mukenge abazere benyu omu buguma na Waliha, bulala echila chili ch’okunali.” (Efe. 6:1) Bichi byakakurhabala ojire ntyo?

5. Bulagurhe bisimisize okubona gurhe Yesu alikengere abazere bage nk’oku biyerekenwe omu Luka 2:46-52?

⁵ Wakayiga kukenga kugerera omufano gwinja bwenene, k’okuderha Yesu. (1 Pe. 2:21-24) Aliri muntu oshinganene ogwerhe abazere barhashinganene. Aliko Yesu aliri akenga abazere bage amango baliri bajira amagosa n’amango barhaliri bamuyunva bwinja. (Kut. 20:12) Rhulole ebyabaga amango aligwerhe myaka 12. (Osome Luka 2:46-52.) Yesu alijire e Yerusalemu haguma n’abazere bage. Aliko amango baliri bagaluka eka barharhegeraga oku Yesu arhaliri haguma nabo. Yusufu na Mariya balikwanene kulola bwinja-bwinja akaba bali n’abana babo boshi amango barhenga kuharamya. Buzinda amango Yusufu na Mariya babona Yesu, Mariya ahwanza kumubaza bulagurhe aliyorhere e Yerusalemu! Yesu akababwirire oku okola kuli kumubonerera. Ahali h’okujirantyo, ahereza abazere bage echishubizo chiyunvikene chinalimo obukenge. Aliko, Yusufu na Mariya, “barhayunvaga bwinja-bwinja bichi ali ababwira.” Chiro akaba ntyo, Yesu “aligenderere kubakenga.”

6-7. Bichi byakarhabala emisole ekenge abazere babo?

⁶ Misole we, munabona bibakomerere kukega abazere benyu amango bajirire amagosa changwa amango babayunvirhe kubi? Bichi byakabarhabala? Ech’oburhanzi, owaze gurhe Yehova anachiyunva. Ebiblia ederhere oku okakenga abazere bawe, “echola chinasiimisa Waliha.” (Kol. 3:20) Yehova amenyere oku mango maguma abazere benyu barhakabayunva, changwa oku mango maguma banabaheberaho amarhegeko marhayorohere kukenga. Aliko amango muchishogere kumakenga, mwanamusimisa.

⁷ Echa kabiri, waza okuntu abazere bawe banachiyunva. Amango wamakenga abazere bawe, wabasimisa, wanarhuma bakunihira bwenene. (Mez. 23:22-25) Obwira bwenyu nabo, bwakomera bwenene. Mwene-werhu oyirikirwe Alexandre w’omu chihugo che Belgique aderhere ntya: “Amango mpwanza kukenga buli mango ebi abazere bani bampemere njire, obwira bwerhu bwakomera rhwanagwarha n’obusiime.” b Echa kasharhu, okayiga kukenga abazere bawe, nji wapata akalamo kenja omu mango mayinjire. Paulo, olamire omu chihugo che Brezil, aderhere ntya: “Okuyiga kukenga abazere bani, kwantabere nkenge Yehova, nkenge n’abandi bagwerhe oburhwali.” Echinwa cha Mungu, chihanire empanvu y’akamaro y’okukenga  abazere bawe. Chiderhere ntya: “Y’ebintu bikugendera bwinja onalame siku zinene oku gulu.”—Efe. 6:2, 3.

8. Bulagurhe misole minene enachishoga kukenga abazere babo?

⁸ Misole minene, enabona gurhe ebintu binabagendera bwinja amango bamakenga. Mwali-werhu oyirikirwe Luiza, naye olamire omu chihugo che Brezil byalimukomerere kuyemera bulagurhe arhaligwerhe oruhusa l’okukolesa etelefone mu mango maguma. Awaza gurhe banene b’omu myaka yage bajira amatelefone. Aliko buzinda ayinja kurhegeera oku abazere bage baliri bamulanga. Ajire aderha ntya: “Nalimenyere oku, amango namakenga abazere bani, nta kwanene kuchiyunva oku abazere bani bambuzize chintu chilebe bulala amahano mabo manalikenere kweri-kweri.” Mwali-werhu Elizabeth ochili musole olamire omu chihugo che Amerike, achili alwisa yagala kukenga abazere bage. Afasiriye ntya: “Amango ntayunvirhe bwinja-bwinja bulagurhe abazere bani bampebereho amarhegeko malebe, nanashuba kuwaza gurhe amarhegeko mabo mali mandanga.” Mwali-werhu Monica olamire omu chihugo che Armenia, aderhere oku amango moshi aliri akenga abazere bage, aliri apata enyungu zinja kulusha amango arhaliri abakenga.

9. Gurhe banene banachiyunva oku bilolere okukenga Esheriya?

⁹ Bantu banene baba bayemerere oku rhuba rhukenere oburhegesi bw’abantu, n’oku rhukwanene kukenga amasheriya maguma-maguma maheberweho n’abola “bakulu b’enyanya.” (Ro. 13:1) Aliko nkabaga barhakakenga esheriya barhasimire changwa eyi bawazize oku erhagwerhe kamaro. Rhurhole omufano, oku bilolere okulipa ebitansi. Bantu banene balamire omu chihugo chiguma che Bulaya, banabona oku “kurhali kwinja oku lipa ebitansi akaba obwene oku birhakwanene.” Ch’echirhumire abantu bamw’echola chihugo barhalipa ebitansi byoshi bihemerwe n’abarhegesi.

10. Bulagurhe rhunakenga n’Esheriya rhurhasiimire?

¹⁰ Ebiblia eyemerere oku, amarhegesi m’abantu mali mayerekezwa na Shetani, manalerha amalibuko, aliko hano hofi-hofi malimbulwa. (Zb. 110:5, 6; Muh. 8:9; Lu. 4:5, 6) Kandi erhubwirire oku “buli yeshi onapinga obukulu anaba eyi amapinga omupango gwa Mungu.” Yehova alekerere abarhegesi bagenderere kurhambula y’ebintu biyorha oku mustari, anarhuhemere rhubakenge. Eju y’echola rhukwanene “kuhereza boshi ebi bakwanene kuhabwa,” ebyola biheberwemo kulipa ebitansi, n’okukenga. (Ro. 13:1-7) Rhwakabona oku esheriya ndebe erhakwanene, changwa erhali y’ehaki, enakomere bwenene kuyikenga. Aliko rhunakenga abola bakulu bulala Yehova arhubwirire rhujire ntyo, amango moshi barharhubwirire rhuvune amarhegeko mage.—Mdo. 5:29.

11-12. Gurhe Yusufu na Mariya balijirire y’ibakenga Esheriya nk’oku biyerekenwe omu Luka 2:1-6, na nyungu zihe balipatire? (Olole n’amafoto.)

 ¹¹ Rhwakayiganya omufano gwa Yusufu na Mariya, baliri tayari kukenga oburhegesi bukulu chiro n’amango byalibakomerere kujirantyo. (Osome Luka 2:1-6.) Amango Mariya aligwerhe obukule bwa myezi mwenda ntya, oburhegesi bwabahema yewe na Yusufu bajire chintu chilebe chalibakomerere bwenene. Omukulu w’Oburhegesi bwe Roma, Ogiste, ahebaho erhegeko liderhere oku abantu boshi b’omu burhegesi bwe Roma, baje kuchiyandikisa emunda baburhwaga. Yusufu na Mariya, balikwanene kukola olugenzi l’okuja e Betelehemu, ahantu bakalambagire bilometre 150, bali bashona emisozi n’okuyandagala orhubanda. Olola lugenzi lurhakabayorohere ahanene ku Mariya. Oyola mulume n’omukazi bakaba eyi baliyubahire oku bilolere obulanzi bwa Mariya n’omwana waliri omunda. Gurhe si byakabere nk’enda yamulumiraga omu njira eyi bachili omu lugenzi? Aligwerhe owakabere Masiya omu nda yage. K’echola chakarhumire barhakenga erhegeko ly’oburhegesi?

¹² Chiro akaba oku Yusufu na Mariya baligwerhe empanvu z’okuyubaha, balikengere elyola rhegeko. Yehova alichiyunvirhe asiimire bulala balikengere, anabashishikala. Mariya alihikire Ebetelehemu omu bulanzi anaburha omwana ogwerhe amagala menja n’echola chalirhumire obulebi bw’Ebiblia bwayenera!—Mik. 5:2.

13. Gurhe okurhakenga kwawe kwakahuma ku bene-benyu?

¹³ Amango rhwamakenga abarhegesi b’enyanya, rhwanapata enyungu n’abandi intyo kon’oko. Nka gurhe? Mu njira nguma, rhurhapata obuhane kuguma na balala barhakenga esheriya. (Ro. 13:4) Amango rhwamakenga abarhegesi, oku jirantyo kwanarhuma babona oku Abahamirizi ba Yehova bali bantu bagwerhe obukenge. Omufano, mu myaka milebe egerere omu chihugo che Nigeria, abasoda balijire omu Chumbi ly’Obwami amango embuganano zaliri zakolwa. Baliri balonza abantu baliri bahamuka baliri balahira kulipa ebitansi. Aliko  omusoda mukulu walibayumangire ababwira bahuluke n’okuderha ntya: “Abahamirizi ba Yehova banalipa ebitansi buli mango.” Amango moshi wamakenga amarhegeko, wanaba eyi wamarhabala omu kulanga ezino linja Abahamirizi ba Yehova bagwerhe. N’echola nkabaga nji chakarhabala bene-berhu na bali-berhu.—Mt. 5:16.

14. Bichi byarhabalaga mwali-werhu muguma yaba “tayari kukenga” abarhegesi b’enyanya?

¹⁴ Aliko, hali amango rhwakachiyunva oku rhurhakwanene kukenga abakulu b’enyanya. Mwali-werhu Joanna olamire omu chihugo che Amerike aderhere ntya: “Byalinkomerere bwenene kuba muntu onakenga, bulala bantu baguma b’omulala gwani baliri bakolerwa kubi ahanene n’abakulu.” Aliko Joanna achishoga kujira okwage koshi y’ahindamula okuntu aliri awaza oku bilolere abakulu, intyo kw’analijirire. Burhanzi, aleka kusoma amamesaje oku Enternete maliri marhuma agwarha amawazo mabi oku bilolere abakulu. (Mez. 20:3) Echa kabiri, asalira Yehova amurhabale agale kumulangalira ahali h’okulangalira oburhegesi bw’abantu. (Zb. 9:9, 10) Echa kasharhu, asoma emyazi omu bitabu byerhu ederhere oku bilolere okurhaja oku lunda lulebe omu by’epolitike. (Yoh. 17:16) Zene Joanna aderhere oku, bulala akala akenga abakulu anachiyunva arhulerere bwenene n’okutosheka.

15. Bulagurhe mango maguma byakarhukomerera kukenga obwerekezi burhengerere oku lubaga lwa Yehova?

¹⁵ Yehova arhubwirire oku “rhukenge balala bali bayerekeza” omu chibaga. (Ebr. 13:17) Yesu ali Mungeri werhu, anashinganene, aliko bene-berhu ahebereho yibarhuyerekeza bowe barhashinganene. Nkabaga hali amango byakarhukomerera kubakenga ahanene amango bamarhubwira rhujire bintu bilebe rhurhalonzeze kujira. Mango maguma entumwa Petro aligambirwe kukenga. Amango malayika amubwira oku alye enyama zirhachere ezalilahizwe n’Esheriya ya Musa, Petro alahira, arhali liguma lyonyine si kasharhu koshi! (Mdo. 10:9-16) Bichi byarhumaga alahira? Obola bwerekezi buhya-hya ntacho bwalimubwirire. Nta lusiku alihikire kujira echili nkechola omu kalamo kage koshi. Akaba byalikomerere Petro kujira ebyola malayika oshinganene amubwiraga ajire, byakarhukomerera bwenene kukenga obwerekezi bw’abantu barhashinganene!

16. Chiro akaba entumwa Paulo alihabirwe obwerekezi alibwene nkabaga oku burhakwanene, gurhe alijirire? (Matendo 21:23, 24, 26)

¹⁶ Entumwa Paulo aliri “tayari kukenga” obwerekezi boshi aliri ahabwa chiro n’amango aliri abona oku arhabuyunvirhe bwinja. Abayahudi babaga babere Bakristu, baliyunvirhe myazi minene y’obubeshi oku bilolere Paulo; oku aliri ahubiri “emyazi y’obugamba oku bilolere Musa” n’oku arhanaliri akenga Esheriya ya Musa. (Mdo. 21:21) Abashamuka b’Abakristu b’omu Yerusalemu babwira Paulo oku alerhe balume 4 oku hekalu, n’okuchichesa nk’oku emigenzo yalihemere. Aliko Paulo alimenyere oku Abakristu barhachili eshishi w’Esheriya ya Musa. Kandi nantacho chibi alijirire. Aliko Paulo akenga juba-juba. Paulo “arhola abola balume olusiku lwakulikiragaho anachichesa haguma nabo nk’oku emigenzo yanalihemere.” (Osome Matendo 21:23, 24, 26.) Bulala Paulo alikengere obwerekezi, arhabala omu kulerha obuguma ahakagarhi ka bene-babo.—Ro. 14:19, 21.

17. Bichi ebi Stephanie agereremo byakarhuyigiriza?

¹⁷ Byalikomerere mwali-werhu oyirikirwe Stephanie, kukenga esimikiro bene-babo b’oku biro by’omurhabi b’omu chihugo chage barholaga. Yewe n’eba balisimire kukolera omu chigusho ch’olwindi lulimi. Aliko, ebiro by’omurhabi byashanda echola chigusho, bamurhuma yewe n’eba omu chibaga ch’olulimi lwabo lw’akaburhano.  Stephanie aderhere ntya: “Nalichiyunvirhe kubi bwenene. Ntaliyemerere oku haliri obulagirire omu lulimi lwerhu lw’akaburhano.” Chiro akaba ntyo, alirholere esimikiro y’okuyemera obola bwerekezi buhyahya. Aderhere ntya: “Enyuma waho narhegera oku eyola simikiro ya bene-berhu yaliri y’obwengehe.” Aderhere ntya: “Omu chibaga cherhu chihya-hya, muli banene bali Bahamirizi bonyine omu milala yabo, bobola rhwayinjire kuba mulala gwabo gw’ekiroho, rhunali rhwabaheba omurhima. Indi nayiga na mwali-werhu ochili muhubiri muhya-hya, na kugera buno, ngwerhe kasanzi kanene k’okujira efunzo lyani-lyani.” Ayongerere ntya: “Ngwerhe ezamiri echere, eyi namenyere oku nalijirire okwani koshi yimba muntu onakenga.”

18. Nyungu zihe rhunapata amango rhwamakenga?

¹⁸ Rhwakayiga kukenga. Yesu “aliyigire kukenga,” arhali mpu omu mango aligwerhe obusiime “si amango aliri alibuka.” (Ebr. 5:8) Kuguma na Yesu, mango manene rhunayiga kukenga chiro n’amango rhuli rhwahurana hali zilebe z’okugeregezwa. Omufano, amango obulwala bw’okuyahukira bwe Korona burhondera, barhubwira oku rhuleke kuja oku mbuganano oku Chumbi ly’Obwami, rhuleke n’amahubiri manju oku nju, byalikukomerere kukenga si? Nechi, okukenga kwawe kwalikulangire, kwalerha obuguma omu chibaga, kwanasiimisa na Yehova. Rhweshi rhukola rhurheganyizwe bwinja-bwinja oku bwerekezi boshi nji rhwahabwa amango m’amalibuko makulu. Okukenga obola bwerekezi nji kwayokola akalamo kerhu!—Yob. 36:11.

19. Bulagurhe olonzeze kuba muntu onakenga?

¹⁹ Rhwayigire oku, okukenga kunalerha emigisho egenderere. Aliko ech’akamaro bwenene, rhunachishoga kukenga Yehova bulala rhumuzigire rhunalonzeze kumusimisa. (1 Yo. 5:3) Intacho rhwakabona rhwaha Yehova ku byoshi arhujirire. (Zb. 116:12) Aliko rhwakamukenga rhunakenge na balala bali barhuyerekeza. Nka rhukengere rhwanayerekana oku rhuli bengehe. Kandi nka rhuyerekene oku rhukengere rhwanasimisa omurhima gwa Yehova.—Mez. 27:11.