1-2. a) Bulagurhe abahya bakalangalira Yehova? (Zaburi 37:3, 4) b) Bichi rhwaganirako mu gunola mwazi?

K’OLI HOFI kushaba changwa kushabwa, changwa oli muhya? Akaba ntyo ku bili, nta ngangane, ogwerhe enyorha y’okulama haguma n’omuntu ozigire bwenene. Kweri, akalamo k’obuhya karhaba kayorehere buli mango, n’abahya bagwerhe emihigo y’akamaro bakwanene kurhola. Ebi wajira amango wamahurana ebibazo n’emihigo warhola yayerekana mwishingo gungana gurhe mwembi mwagwarha mu myaka minene eli mbere. Mukalangalira Yehova, mwarhola emihigo y’obwengehe, obuhya bwenyu bwasera bwenene, mwagwarha na mwishingo gunene. Mukagambwa kukolesa empanulo za Mungu, nkagaba mwahurana ebibazo byakarhuma mwabula omwishingo omu buhya bwenyu.​—Osome Zaburi 37:3, 4.

² Chiro akaba gunola mwazi gwashambala bwenene oku bilolere abahya, gwaganirira oku bibazo abantu bashabene boshi bakahurana. Gwashambala oku birhwakayiga kugerera emifano y’abalume na bakazi baguma bimana baganirirwe omu Biblia barhulekere. Eyola mifano eganirirwe omu Biblia yarhuyigiriza bintu binene rhwakakolesa mu hali zilebe z’akalamo kerhu, n’omu buhya. Kandi rhwabona bichi rhwakayiga kugerera eby’abantu bashabene ba mu zinola siku bagereremo byakarhuyigiriza.

3-4. Bibazo bihe abahya bakahurana?

³ Bahya baguma balamire nk’oku bantu banene balamire zene. Omufano, abazere n’abandi bantu b’omulala bakahidika abahya mpu baburhe abana juba-juba. Changwa abera barhagwerhe  omuhigo gubi n’abantu b’omulala banaheba abahya omurhima bagule enju na bintu binene bihyahya by’okuyilimbisa.

⁴ Akaba barhakengukire, abahya bakarhola emihigo yakarhuma barhola madeni manene. Nkabaga echola chakaja charhuma omulume n’omukazi bakola bwenene yi bajuha amola madeni. Bakahwanza kukola bwenene, n’echola chanarhuma barhachigwarha kasanzi kanene k’okujira efunzo lya muntu yenyine lye Biblia, okujira obuharamye b’omu mulala, n’okuja oku mahubiri. Bakanahwanza chiro kugosa oku mbuganano eju y’okukola enyuma y’esa z’akasi mpu yi bagwarha furanga zinene changwa mpu yi balanga akasi kabo. Amango bamajira ntyo, barhakachigala kukola binene omu kasi ka Yehova.

5. Bichi omufano gwa Klaus na Marisa gwakuyigirize?

⁵ Hali mifano minene eyerekene oku, amango rhubwene k’okugwarha bintu binene by’omubiri ch’echintu ch’akamaro bwenene omu kalamo, rhurhapata omwishingo. Waza oku ebi Klaus na Marisa bayigaga oku bilolere echola. * Amango bashabana, bombi baliri bakola bwenene mpu yi bagwarha furhanga zinene na bintu binene. Aliko bavunika omurhima, barhanagwarhaga obusime. Klaus aderhere ntya: “Rhwaligwerhe bintu binene kulusha ebi rhwalikenere, aliko nta muhigo chiro n’omuguma gw’ekiroho rhwaligwerhe. Okuderha okuli, akalamo karhali yorohere rhwanaligwerhe milago minene.” Nkabaga nawe wachibwenere k’okuseza obwenge bwerhu omu kugwarha ebintu by’omubiri kurhakulerhera omwishingo. Akaba ntyo ku bili, orhavunikaga omurhima. Okushambala oku mifano minja y’abandi kwakurhabala ohindamule eby’okerene kuhindamula. Rhurhange rhushambale oku by’omufano gw’Omwani Yehoshafati gw’akayigiriza abalume bashabire.

6. Nk’oku empanulo eli omu Mezali 3:5, 6 ederhere, gurhe Yehoshafati alijirire amango omuhule gw’abasoda guyinja kulwisa olubaga lwage?

⁶ Balume mushabire wee, ka mango maguma munabona oku engabane zenyu zibalemerere bwenene? Akaba ntyo ku bili, hali ebintu mwakayiga kugerera omufano g’Omwami Yehoshafati. Bulala Yehoshafati aliri mwami, obuholo bw’eshanja lyoshi bwaliri oku rhwe lyage! Gurhe alijirire y’akola bwinja akola kasi k’akamaro bwenene? Yehoshafati alijirire okwage koshi aligalire y’alanga olubaga aliri arhegeka. Akomeza amavile me Yuda anarheganya abasoda bagwerhe emisi barhalukire 1 160 000. (2 Ny. 17:12-19) Enyuma w’aho, Yehoshafati ahurana echibazo chikomere bwenene. Omuhule gw’abasoda b’Abaamoni na Bamoabu, n’abalume b’omu misozi ye Seiri, bamuyubahisa yewe, omulala gwage n’olubaga lwage. (2 Ny. 20:1, 2) Gurhe Yehoshafati alijirire? Ahema Yehova oburhabale n’emisi. Echola chalifarhene n’empanulo  y’obwengehe eli omu Mezali 3:5, 6. (Osome.) Esala ly’obwirhohye lya Yehoshafati libonekene omu 2 Mambo ya Nyakati 20:5-12, liyerekene kangana gurhe alilangalire Eshe we mbingu w’obuzigire. Nka gurhe Yehova alishubize esala lya Yehoshafati?

7. Nka gurhe Yehova ashubizaga esala lya Yehoshafati?

⁷ Yehova aganira na Yehoshafati kugerera Omulawi waliyikirwe Yahazieli. Yehova aderha ntya: “Muyumange ahamuli, mumenye mwachidunda, mubone obuchunguke Yehova abakolera.” (2 Ny. 20:13-17) Eyola erhali njira nyinja y’okulwa entambala! Aliko, arhali em’omuntu y’ezola mpanulo zarhengaga; zarhengaga emwa Yehvova. Bulala Yehoshafati alilangalire Mungu, akenga ezola mpanulo. Amango yewe n’olubaga bajaga kulwisa abanzi, arhali abasoda bayinji kulwa evita bwenene bahiraga embere y’oburungu bwange, s’aliko abayimpaji barhagwerhe entwaro. Yehova ayeneza echilagane chage ahaga Yehoshafati; ahima abosoda b’abanzi.​—2 Ny. 20:18-23.

8. Bichi abalume bakayiga kugerera omufano gwa Yehoshafati?

⁸ Mulume wee, wakayiga omufano gwa Yehoshafati. Ogwerhe akasi k’okushishikala omulala gwawe, che chirhumire onakola bwenene y’olanga n’okurhabala omulala gwawe. Amango wamahurana ebibazo, wakawaza oku wakabihima oku misi yawe wenyine. Aliko omenye walangalira emisi yawe wenyine. S’ahubwe osalire Yehova akurhabale amango oli wenyine. Oku bwindi, osalire n’omurhima goshi haguma na mukawe. Olonze obwerekezi burhengere emwa Yehova omu kuyiga e Biblia n’ebitabu olubaga lwa Mungu lunarhuha onakolese amahano wabwene. Nkabaga abandi barhakayemera emihigo eyumangire oku Biblia warholere, na chiro nkabaga bakakubwira oku wasirehere. Bakaderha oku efuranga n’ebintu zakagula, byalanga bwinja omulala gwawe. Aliko oyibuke omufano gwa Yehoshafati. Alilangalire Yehova anayerekana echola kugerera ebijiro byage. Yehova arhajahikaga oyola mulume mwimana nawe arhakujahika. (Zb. 37:28; Ebr. 13:5) Bichi bindi abashabene bakajira yi bachizera oku bagwerhe obusime omu kalamo kabo haguma?

9. Bichi rhwakaderha oku bilolere omulebi Isaya na mukage?

⁹ Omulebi Isaya na mukage balisezeze akalamo kabo omu kukolera Yehova. Isaya aliri mulebi, na nkabaga mukage naye aligwerhe kasi kalebe omu kuleba, bulala ayirikirwe “mulebi-kazi.” (Isa. 8:1-4) Isaya na mukage balihebere emparamyo ya Yehova oku nafasi y’oburhanzi omu kalamo kabo. Balekere omufano gwinja bwenene ku balala bashabene zene!

10. Nka gurhe okuyiga obulebi bwe Biblia kwakarhabala abashabene bahikire okujira binene nk’okubakanagala omu kasi ka Yehova?

¹⁰ Zene, abashabene bakayiga omufano g’omulebi Isaya na mukage omu kujira okwabo koshi bagalire omu kasi ka Yehova. Bakakomeza obulangalire bwabo mu Yehova omu kuyiga obulebi bwe Biblia haguma n’okulola gurhe bunayenera buli mango. * (Tit. 1:2) Bakawaza oku binabo bakajira omu kuyeneza amalebi me Biblia. Omufano, bakarhabala omu kuyeneza obulebi bwa Yesu buderhere oku emyazi minja yahubiribwa omu gulu lyoshi embere obuzinda buyinje. (Mt. 24:14) Oku abashabene bali bachibonera okuntu  obulebi bwe Biblia buli bwayenera, kubagenderera kukomeza omuhigo gwabo g’okujira binene omu kasi ka Yehova.

11. Bichi Prisila na Akila baligalire kujira, na bulagurhe?

¹¹ Omufano gwa Prisila na Akila, mulume n’omukazi ba Bayahudi balilamire omu vile ye Roma, gwakayigiriza abahya bintu bilebe. Baliyunvirhe emyazi minja oku bilolere Yesu, banabaga babere Bakristu. Nta ngangane, balisimisizwe n’akalamo kabo. Aliko akalamo kabo kahindamuka juba-juba amango Omurhegesi we Roma Klodio ahana erhegeko oku Abayahudi boshi barhenge omu Roma. Jaga wawaza gurhe ebyola byakahumire ku Akila na Prisila. Echola chakabahemere baleke ahantu balikomere, balonze ahantu hahyahya h’okulama, banashube hwanza kukola akasi kabo k’okukola amahema. K’ebyola bibazo bihyahya byalirhumire barhagenderera kukolera Yehova nk’oku bakanagala? Nkabaga omenyere echishubizo kw’echola chibazo. Omu hantu habo hahyahya h’okulama omu Korinto, Akila na Prisila bahwanza kurhabala echibaga ch’ahola n’okukola haguma n’entumwa Paulo omu kukomeza bene-babo na bali-babo b’ahola. Enyuma w’aho, bahamira omu zindi vile zalikenere bwenene abahubiri. (Mdo. 18:18-21; Ro. 16:3-5) Baligwerhe binene by’okukola omu kalamo banaligwerhe obusime!

12. Bulagurhe abashabene bakwanene kuchihebera emihigo y’ekiroho?

¹² Zene, abashabene bakayiga omufano gwa Prisila na Akila omu kuheba enyungu z’Obwami oku nafasi y’oburhanzi. Akasanzi kenja kakwanene oku mulume n’omukazi kushambala oku mihigo yabo y’omu kalamo, mali mango barhaza kushabana. Amango omulume n’omukazi bamarhola emihigo y’okukolera Yehova n’okukola haguma bwenene yi bahikira eyola mihigo, bagwarha njira zinene z’okubona okuntu Yehova ali abarhabala omu kalamo kabo. (Muh. 4:9, 12) Rhushambale oku mufano gwa Russell na Elizabeth. Russell aderhere ntya: “Embere rhushabane, rhwaliri rhwashambala ahanene oku bilolere emihigo yerhu y’ekiroho.” Elizabeth aderhere ntya: “Rhwaliri rhwashambala kw’echola,  bulala eyi hakahikire amango rhwarhola mihigo milebe, rhwakachizerere oku rhurharholere emihigo yakarhubuza kuhikira emihigo yerhu y’ekiroho.” Ehali za Russell na Elizabeth zabarhabala bahamire omu Micronesie yi bakolera omu eneo ekenere bwenene abahubiri.

13. Nk’oku olwandiko lwa Zaburi 28:7 luyerekene, bichi byarhengerera amango rhwamalangalira Yehova?

¹³ Kuguma na Russell na Elizabeth, bantu banene bashabene bayoroheze akalamo kabo yi bakolesa kasanzi kanene nk’oku bakanagala omu kasi k’okuhubiri n’okujira abanafunzi. Amango omulume n’omukazi bamachihebera omuhigo g’okukola binene nk’okubakanagala omu kasi ka Yehova n’okukola haguma yibahikira eyola mihigo, ebintu binja byabahikira. Babona nka gurhe Yehova ali abashishikala, obulangalire bwabo muye bwakomera, kandi bagwarha n’obusime b’okuli.​—Osome Zaburi 28:7.

14. Nka gurhe Petro na mukage baliyerekene oku balangalire echilagane cha Yehova chili omu Matayo 6:25, 31-34?

¹⁴ Kandi omufano gw’entumwa Petro na mukage gwakayigiriza abashabene bintu bilebe. Myezi ndarhu kugera ku mwaka muguma enyuma y’okubonana na Yesu ob’oburhanzi, entumwa Petro alikwanene kurhola omuhigo gw’akamaro. Petro aliri akola akasi k’obushana y’agala kushishikala abantu b’omulala gwage. Bobola, amango Yesu ahamagalaga Petro amukulikire amango moshi, Petro alikwanene kuwaza ku mukage amango arholaga omuhigo gwage. (Lu. 5:1-11) Petro achishoga kuherekeza Yesu omu kasi k’okuhubiri. Alirholere omuhigo g’obwengehe! Rhunagwerhe empanvu nyinja zirhumire rhwayemera oku muka Petro aliyemerere omuhigo eba arholaga. Ebiblia eyerekene oku enyuma y’okufuka kwa Yesu, muka Petro aliri abalama naye mu bisanzi biguma. (1 Ko. 9:5) Nta nganane, bulala aliri mukazi mwinja w’Omukristu, Petro alikwanene kuderha n’obuhuru boshi amango ayerekezwaga n’eroho lichesibwa omu kuhanula abalume n’abakazi b’Abakristu. (1 Pe. 3:1-7) Kweri, Petro na mukage balilangalire echilagane cha Yehova ch’okubaha ebi bakenere amango bamaheba Obwami oku nafasi y’oburhanzi omu kalamo kabo.​—Osome Matayo 6:25, 31-34.

15. Bichi omufano gwa Tiago na Esther gurhuyigirize?

¹⁵ Akaba harhaza legama oshabire changwa oshabirwe, nka gurhe wakagenderera kukuza enyorha yawe y’okukola binene omu kasi ka Yehova? Njira nguma kuli kuyiga abandi bashabene bajirire ntyo. Omufano, wakasoma emyazi ekulikerene ederhere “Bachihaanire Bonyine oku Bulonza.” Eyola myazi yalirhabere Tiago na Esther, mulume n’omukazi b’omu Brezile, bagwarhe nyorha enene y’okukolera omu eneo ekenere bwenene abahubiri. Tiago aderhere ntya: “Amango rhwamasoma oku bilolere okuntu Yehova ali arhabala abakozi bage zene, nerhu rhwanalonza kukulikira empanulo za Yehova n’okuchibonera okuntu arhurhabala.” Buzinda, bahamira omu Paraguay, emunda bali bakolera omu kuhubiri abantu baganira olulimi lwe Chiportige kurhangira mwaka gwa 2014. Esther aderhere ntya: “Olwandiko luguma okurhuli babiri rhusima bwenene luli lwa Waefeso 3:20. Mu mango manene, rhwachibwenere obukweri bw’ebyola binwa omu kasi kerhu emwa Yehova.” Mw’amola maruba ayandikiraga Abanya-Efeso, Paulo alilaganyize oku Yehova arhuhereza binene bwenene kulusha ebi rhwamuhemere. Echola chilagane chayenere mango manene!

16. Ngahe abahya bakashondera amahano amango bali bawaza oku bilolere emihigo yabo y’omu kalamo?

 ¹⁶ Zene, abahya bakayunguka kugerera omufano gw’abandi bayigire kulangalira Yehova. Abashabene baguma bamamala myaka minene omu kasi k’amango moshi. Chakarhuma murhabahema amahano akaba nenyu mulonzeze kuhikira eyola mihigo? Eyola eli yindi njira eyerekene oku mulangalire Yehova. (Mez. 22:17, 19) Abashamuka nabo bakarhabala abahya bachihebere emihigo y’ekiroho n’okuyihikira.

17. Bichi byahikiraga Klaus na Marisa, na bichi omufano gwabo gwakarhuyigiriza?

¹⁷ Mango maguma rhwakalonza kujira binene omu kasi ka Yehova, mu njira nguma ntya, aliko akarhuyerekeza rhumukolere omu yindi-yindi njira. Echola chalihikire Klaus na Marisa, rhwashambalagako burhanzi. Hagerere myaka esharhu bashabene, barhenga emwabo n’okuchihana bajikola omu kasi k’okuyumbaka oku beteli ye Finlande. Aliko, bamenyeswa oku barhayemererwa babereyo myezi erhalukire ndarhu. Burhanzi balichiyunvirhe bavunikire omurhima. Aliko buzira kulegama enyuma w’aho, bahamagalwa bajikuyiga olulimi lwe Chiharabu, na zene bagwerhe obusime b’okuhubiri abantu banaganira Echiharabu omu chindi chihugo. Eyi Marisa anawaza oku byarhengereraga, anaderha ntya: “Naliyubahire okujira echintu ntasaga kujira chiro n’akatyu, byanalimpemere ndangalire Yehova loshi. Aliko nambona okuntu Yehova anantabala buli mango omu njira ntaliwazize. Enyuma y’okuchibonera echola, obulangalire bwani mu Yehova bunakomera.” Nk’oku ogula mufano guyerekene, wakachizera oku Yehova akugisha buli mango, nka wamamulangalira loshi.

18. Bichi abahya bakajira yi bagenderera kulangalira Yehova?

¹⁸ Obuhya luli luhembo lurhengere emwa Yehova. (Mt. 19:5, 6) Alonzeze abashabene basiimire olola luhembo. (Mez. 5:18) Bahya, mugerereze okuntu mwakakolesa akalamo kenyu? Ka muli mwajira okwenyu koshi omu kuyereka Yehova oku musimire bwenene empembo abahere? Muganire na Yehova omu sala. Mulonze omu Chinwa chage amakanuni mwakakolesa omu hali yenyu. Munaje mwakulikira amahano abahere. Mwakachizera oku mwagwarha omwishingo n’obusime amango mwamaseza akalamo k’obuhya bwenyu omu kukolera Yehova!