1. Bichi Yehova arhuhebere omurhima rhujirage?

OBUZIGIRE bwimana buli bw’akamaro ku Yehova. (Ho. 6:6) Alonzeze nerhu bakozi bage rhubone oku eyola ngeso eli y’akamaro bwenene. Kugerera omulebi wage Mika, Yehova arhuhebere omurhima “rhuzigire obuzigire bwimana.” (Mik. 6:8, amahugulo m’eshishi.) Aliko embere rhujire ntyo bihemere rhumenye obuzigire bwimana bili bichi.

2. Obuzigire bwimana bili bichi?

² Obuzigire bwimana bili bichi? Echinwa “obuzigire bwimana” chibonekene kali 230 omu Tafsiri ya Ulimwengu Mupya. Bili bichi? Nk’oku echigabi “Maana ya Maneno ya Biblia” chili mw’eyola Biblia chiderhere oku, amango omuntu agwerhe obuzigire bwimana anazigira owindi muntu bwenene n’okugenderera kubera ahaburhambi bwage oku bwimana. Bunazigana kukoleswa omu kuyerekana obuzigire bwa Mungu oku bantu, aliko n’abantu nabo banabuyerekana ku buli muguma n’owindi.” Yehova ye mufano gwinja bwenene omu kuyerekana obuzigire buli nk’obola. Mu gunola mwazi, rhwashambala okuntu Yehova anayereka abantu obuzigire bwimana. Omu mwazi gukulikire, rhwashambala okuntu rhwabo nka bakozi ba Mungu rhwakayiganya Yehova omu kuyerekana obuzigire bwimana ku buli muguma n’owindi.

3. Bichi Yehova abwiraga Musa oku bimulolere?

³ Harhalegamaga Abaizraeli bamalire kurhenga e Misri, Yehova abwira Musa bintu bilebe oku bilolere ezino lyage n’engeso zage. Aderha ntya: “Yehova, Yehova, Mungu w’olukogo n’obonjo, orhagwarha burhe juba-juba, onagwerhe buzigire bunene  bwimana n’okuli, onayerekana obuzigire bwimana oku bihumbi, onababalira egosa, okugoma n’echaha.” (Kut. 34:6, 7) Kugerera eby’ola binwa binja bwenene, Yehova abwira Musa chintu chilebe ch’akamaro oku bilolere obuzigire bwage bwimana. Che chintu chih’echo?

4-5. a) Nka gurhe Yehova anachimenyesa? b) Bibazo bihe rhwashambalako?

⁴ Yehova arhachimenyeseze ku rhwabo nka Mungu ojira obuzigire bwimana konyine, s’aliko ali Mungu “oyunjulirene buzigire bwimana.” Eby’ola binwa bibonekene omu Biblia kandi kali ndarhu. (Hes. 14:18; Ne. 9:17; Zb. 86:15; 103:8; Yoe 2:13; Yoh. 4:2) Buli mango echola chiba chiderhere Yehova yenyine, s’arhali abantu haba n’akatyu. Okubona oku buli mango Yehova anachimenyesa kugerera eyola njira omu Biblia, kurhakarhusomeza. Nta ngangane obuzigire bwimana buli bw’akamaro emwage. *Che charhumaga Omwami Daudi aderha ntya omu kusomerwa: “Yehova wee, obuzigire bwawe bwimana buhikire kugera omu mbingu . . . Obuzigire bwawe bwimana buli bw’akamaro bwenene, Mungu wee! Abana b’abantu banalibirhira omu mbehema y’ebyubi byawe.” (Zb. 36:5, 7) Kuguma na Daudi, ka nerhu rhubwene oku obuzigire bwimana bwa Mungu buli bw’akamaro emwerhu?

⁵ Yirhuyunva bwinja obuzigire bwimana bili bichi, rhwashubiza ku binola bibazo bibiri: Bande Yehova anayereka obuzigire bwimana? Na nka gurhe rhwakayunguka amango Yehova amarhuyereka obuzigire bwimana?

6. Bande Yehova anayereka obuzigire bwimana?

⁶ Bande Yehova anayereka obuzigire bwimana? Ebiblia eyerekene oku rhwakasima bintu binene, ‘nk’obuhinzi,’ “edivayi n’amavurha,” “obuhane,” “obumenyi,” “obwengehe” n’ebindi n’ebindi. (2 Ny. 26:10; Mez. 12:1; 21:17; 29:3) Aliko obuzigire bwimana burhayerekanwa oku bintu; si buyerekanwa oku bantu bonyine. Aliko kandi, arhali buli yeshi yi Yehova ayereka obuzigire bwimana. Anabuyereka balala bagwerhe obwira bukomere haguma naye. Mungu werhu ali mwimana oku bera bage. Agwerhe omuhigo gwinja bwenene kubayerekera, arhakanaf’alekere kubazigira.

7. Nka gurhe Yehova ayerekene okw’azigire abantu boshi?

⁷ Yehova anayereka abantu boshi obuzigire. Yesu alibwirire omulume waliyirikirwe Nikodemu ntya: “Mungu azigire egulu [abantu boshi] bwenene, charhuma ahaana Omugala w’echinege yi buli yeshi wayerekana obwemere muye arhalimbulwaga, sy’apate akalamo k’esiku n’amango.”​—Yoh. 3:1, 16; Mt. 5:44, 45.

8-9. a) Bulagurhe Yehova anayereka abakozi bage obuzigire bwimana? b) Bichi rhukali shambalako?

 ⁸ Nk’oku rhwashambalaga oku burhanzi, Yehova anayerekana obuzigire bwimana ku balala bonyine ayemerere babe bera bage; k’okuderha, abakozi bage. Echola chibonekene kugerera ebi Mwami Daudi n’omulebi Daniyeli baderhaga. Omufano, Daudi aliderhere ntya: “Ogenderere kuyerekana obuzigire bwawe bwimana ku balala bakumenyere.” “Obuzigire bwimana bwa Yehova buli bwakugenderera esiku n’amango ku balala bamuyubahire.” Na Daniyeli aderha ntya: “Yehova Mungu w’okuli wee, [ola] oyerekana obuzigire bwimana ku balala bamuzigire banakulikire amarhegeko mage.” (Zb. 36:10; 103:17; Da. 9:4) Nk’oku ebila binwa bifuhererwe biyerekene, Yehova anayereka abakozi bage obuzigire bwimana, bulala bamumenyere, bamuyubahire, bamuzigiire, banakulikire amarhegeko mage. Yehova anayerekana obuzigire bwage bwimana oku bantu bage bonyine; k’okuderha balala banamuharamya omu njira y’okuli.

⁹ Embere rhuhwanze kukolera Yehova, rhwaliyungukire n’obuzigire Yehova ayerekene oku bantu boshi. (Zb. 104:14) Aliko kandi, rhwewe nka bakozi bage, rhunashuba yunguka n’obuzigire bwage bwimana. Bobola Yehova anihize abakozi bage ntya: “Obuzigire bwani bwimana burhakabarhengako chiro.” (Isa. 54:10) Nk’oku Daudi naye anaderhaga mpu: “Yehova akolera abemana bage omu njira yago-yago.” (Zb. 4:3) Bichi okola kwakarhushunika rhujire? Omwandisi w’ezaburi aderhere ntya: “Buli yeshi oli mwengehe asuzuma ebila bintu n’okuwaza bwenene oku bijiro bya Yehova by’obuzigire bwimana.” (Zb. 107:43) Elila hano linja lirhengere emwa Yehova. Rhukalija rhwashambala ku njira esharhu Yehova anayerekana m’obuzigire bwage bwimana, n’enyungu rhunapata amango amarhuyereka obola buzigire.

10. Nka gurhe okumenya oku obuzigire bwimana bwa Yehova buli bw’esiku n’amango kunarhurhabala? (Zaburi 31:7)

¹⁰ Obuzigire bwimana bwa Mungu buli bw’esiku n’amango. Echila chibagi ch’akamaro ch’obuzigire bwimana chiyerekenwe kali 26 omu chitabu cha Zaburi 136. Omustari  g’oburhanzi guderhere ntya: “Mubwire Yehova koko bulala ali mwinja; obuzigire bwage bwimana buli bw’esiku n’amango.” (Zb. 136:1) Omu mistari ya 2 kuhika oku ya 26, muli ebinwa “bulala obuzigire bwage bwimana buli bw’esiku n’amango.” Amango rhwamasoma eyola zaburi, rhwanasomezwa na njira zinene Yehova anayerekanamo obuzigire bwage bwimana buzira kuleka. Ebinwa bigalukirwe kanene, “bulala obuzigire bwage buli bw’esiku n’amango,” birhurhabere rhuchizere oku obuzigire bwa Mungu oku bantu bage burhakahindamuka. Echola chihebere omurhima bwenene okumenya oku Yehova arhaleka juba-juba okuzigira abakozi bage! S’ahubwe, amango amahwanza kuzigira oli wamukolera, arhamujahika, ahanene omu mango m’ebibazo. Okuntu rhupata enyungu: Amango rhwamamenya oku Yehova achishwekere ku rhwabo, rhwanagwarha omwishingo n’emisi rhukenere yi rhuhima ebibazo n’okugenderera kulambagira omu njira eyerekeze oku kalamo.​—Osome Zaburi 31:7.

11. Nk’oku Zaburi 86:5 eyerekene, bichi binashunika Yehova ababalire abantu?

¹¹ Obuzigire bwimana bwa Mungu bunarhuma ababalira. Amango Yehova amabona omuntu wakolere echaha amahungama, n’okuleka kugenderera kukola ebintu bibi, obuzigire bwage bwimana bunarhuma amubabalira. Omwandisi we zaburi Daudi aliderhere ntya oku bilolere Yehova: “Arharhukoleraga nk’oku ebyaha byerhu bihemere, changwa kurhulipa nk’oku amagosa merhu mahemere.” (Zb. 103:8-11) Daudi alichibwenere nka gurhe omuntu akachiyunva munya-magosa n’okugwarha omugayo amango ezamiri yage eli yamubabaza. Aliko kandi analiyigire oku Yehova “ali tayari kubabalira.” Bichi binashunika Yehova ababalire abantu? Echishubizo chili omu Zaburi 86:5. (Osome.) Nechi, nk’oku Daudi aderhaga omu sala, Yehova anababalira bulala agwerhe buzigire bunene bwimana ku balala banamuhema obubabale.

12-13. Akaba rhulirhwachiyunva banya-magosa n’omugayo eju y’ebyaha byerhu bya mira, bichi byakarhurhabala?

¹² Amango rhwajira echaha, kurhali kubi, chiro kunali kwinja okuyunva rhugayire eju y’ebi rhwajirire. Okola kwakarhurhabala rhuhune obubabale rhunahindamuke. Aliko bakozi baguma banagenderera kuchiyunva banya-magosa, eju y’ebyaha bajiraga mira. Bachili  bachiyunva oku Yehova arhababaliraga chiro n’akatyu, chiro akaba oku bahemere obubabale banalekere kujira ebintu bibi. Akaba ntyo k’oli wachiyunva, okumenya oku Mungu alitayari kukuyereka obuzigire bwimana kwakurhabala oleke kuchiyunva ntyo.

¹³ Okuntu rhupata enyungu: Chiro akaba oku rhurhashinganene, rhwakagwarha omwishingo g’okukolera Yehova n’ezamiri echere. Echola chigalikene kugerera “eshagama y’Omugala Yesu erhuchesa kurhenga omu byaha byerhu byoshi.” (1 Yo. 1:7) Amango rhwamavunika omurhima eju y’amagosa merhu, rhuyibuke oku Yehova ali tayari bwenene kubabalira omunya-byaha wahungamire. Hala okuntu Daudi ahuzanyaga obuzigire bwa Yehova n’obubabale. Aliyandikire ntya: “Oku embingu zili enyanya bwenene kulusha egulu, intyo k’obuzigire bwimana bwage buli bunene ku balala banamuyubaha. Nk’oku emunda ezuba lizukira hali hale n’emunda linazikira, intyo kwanahira amagosa merhu hale nerhu.” (Zb. 103:11, 12) Kweri, Yehova ali tayari “kubabalira bwenene.”​—Isa. 55:7.

14. Nka gurhe Daudi aliyerekene okuntu obuzigire bwimana bwa Mungu bunarhulanga?

¹⁴ Obuzigire bwimana bwa Mungu bunarhulanga ekiroho. Mango maguma Daudi aderha ntya omu sala: “Oli hantu hani h’okuchibisha; wandanga oku mugayo. Wanzunguluka n’empundu z’obuchunguke. . . . Omuntu olangalire Yehova azungulukirwe n’obuzigire bwage bwimana.” (Zb. 32:7, 10) Nka kulala abantu balilamire omu vile ya mira balilangirwe n’ebibambazi bizungulukire evile, intyo kw’ebijiro bya Yehova by’obuzigire bwimana birhuzungulukire omu kurhulanga oku chintu choshi-choshi chakahanyagaza obwira bwerhu haguma naye. Kandi, obuzigire bwimana bwa Yehova bunamushunika arhukululire emwage.​—Yer. 31:3.

15. Nka gurhe obuzigire bwimana bwa Yehova buli nka malibirhiro na nkingi yerhu?

¹⁵ Daudi alishubire kukolesa echindi chintu omu kuyerekana okuntu Mungu analanga abantu bage. Ayandika ntya: “Mungu ali malibirhiro mani, Mungu ananyereka obuzigire bwimana.” Daudi ashubire derha ntya oku bilolere Yehova: “Ali buzigire bwani bwimana na nkingi yani, mpenzi yani n’olala nandibirhira yi mpata obulanzi.” (Zb. 59:17; 144:2) Bulagurhe Daudi ahuzanyaga Yehova n’amalibirhiro n’enkingi? Chiro rhwakaba rhulamire hoshi-hoshi oku gulu, amango rhugenderere kumukolera, Yehova arhuhereza ebirhukenere yi rhulanga obwira bwerhu bw’akamaro haguma naye. Obwizere buli nk’obola buli omu Zaburi ya 91. Omwandisi w’eyola zaburi aliderhere ntya: “Nabwira Yehova: ‘Oli malibirhiro na nkingi yani.’”(Zb. 91:1-3, 9, 14) Musa alikoleseze echinwa chili nk’echola oku bilolere amalibirhiro. (Zb. 90:1, amahugulo m’eshishi.) Oku bwindi, oku buzinda bw’akalamo kage, Musa aderha ebindi binwa binja bihebere omurhima. Ayandika ntya: “Mungu ali malibirhiro kurhenga mira, amaboko mage m’esiku n’amango mali eshishi zawe.” (Kum. 33:27) Ebinwa “amaboko mage m’esiku n’amango mali eshishi zawe” bichi birhubwirire oku bilolere Yehova?

16. Nka gurhe Yehova anarhurhabala? (Zaburi 136:23)

¹⁶ Amango rhwamagwarha obulangalire oku Yehova arhulanga, rhwachiyunva rhurhulerere. Aliko mango maguma rhwakachiyunva rhuvunikire omurhima n’okugenderera kuchiyunva ntyo. Omu mango mali nk’amola bichi Yehova arhujirira? (Osome Zaburi 136:23.) Aheba amaboko mage eshishi zerhu, n’okurhuyumanza kubuyabuya, n’okurhurhabala rhumenye rhwagenderera kuchiyunva rhuvunike omurhima. (Zb. 28:9; 94:18) Okuntu rhwakapata enyungu: Okumenya oku buli mango rhwakalangalira oburhabale bwa Mungu, echola chanarhurhabala  rhuyibuke oku guli mugisho. Ech’oburhanzi, chiro rhwakaba rhulamire ngahe, rhumenyere oku Yehova arhulanga. Echakabiri, Darha w’embingu w’obuzigire arhulagireko bwenene.

17. Bichi rhukwanene kulangalira eju y’obuzigire bwa Mungu bwimana? (Zaburi 33:18-22)

¹⁷ Nk’okurhwabwene, amango rhulirhwahurana ebigeregezo, rhwakachizera oku Yehova arhulwirako omu kurhuhereza oburhabale rhukenere yi rhugenderera kubera bimana emwage. (2 Ko. 4:7-9) Omulebi Yeremia aliderhere ntya: “Buli buzigire bwimana bwa Yehova bwarhumaga rhurhahwa, bulala olukogo lwage lurhahwa chiro n’akatyu.” (Omb. 3:22) Rhwakachizera oku Yehova agenderera kurhuyereka obuzigire bwimana bulala e Biblia erhubwirire oku, “amasu ma Yehova manalolereza balala bamuyubaha, balala bali balingiriza obuzigire bwage bwimana.”​—Osome Zaburi 33:18-22.

18-19. a) Bichi rhukwanene kugenderera kuyibuka? b) Bichi rhwaganirako omu mwazi gwayinjire?

¹⁸ Bichi rhulonzeze kuyibuka? Embere rhuhwanze kukolera Yehova, rhwayungukire n’obuzigire anayereka abantu boshi. Aliko rhwabo rhuli bakozi bage, rhunayunguka n’obugizire bwage bwimana. Bulala Yehova anashunikwa n’obuzigire, anarhuhobera omu maboko mage m’obulanzi. Buli mango agenderera kurhuheba eburhambi bwage, kandi, ayeneza ebilagane byage binja. Alonzeze rhugwarhe akalamo kenja! (Zb. 46:1, 2, 7) Che chirhumire, chiro rhwahurana n’echibazo chili gurhe, Yehova arhuhereza emisi rhukenere yi rhugenderera kubera bimana emwage.

¹⁹ Rhwabwene okuntu Yehova anayereka abakozi bage obuzigire bwimana. Naye alonzeze rhuyerekane obuzigire bwimana ku buli muguma n’owindi. Nka gurhe rhwakajira ntyo? Omwazi gukulikireho gwashubiza echola chibazo.