1. Bibazo bihe rhwakachibaza?

K’ONACHIYUNVA olagire bwenene amango wamawaza oku bintu byarhengerera hanola hofi-hofi, nk’okulimbulwa kw’amadini m’obubeshi, echirhero cha Gogu wa Bagogu, n’evita ly’Armagedoni? Ka wahikire kuchibaza, ‘Amango ebyola byoshi biyubahisize byarhengerera, nji nagala kugenderera kubera mwimana si?’ Akaba hali amango wachibazize ebyola bibazo, okuganira oku binwa Yesu aderhaga omu lwandiko luyumangire ku gunola mwazi kwakurhabala bwenene. Yesu alibwirire abanafunzi bage ntya: “Emirhima yenyu emenye yagwarha omulago. Muyerekane obwemere.” (Yoh. 14:1) Obwemere bukomere bwarhurhabala rhurhulere chiro ebintu bili gurhe byarhengerera amango mayinjire.

2. Nka gurhe rhwakakomeza obwemere bwerhu, na bichi rhwaganirako mu gunola mwazi?

² Amango rhwamawaza oku birhunajira amango obwemere bwerhu bwamageregezwa zene, rhwamenya ebi rhwakajira yi rhukomeza bwenene obwemere bwerhu. Amango rhwamawaza kw’echola, rhwamenya bigabi bihe by’obwemere bwerhu rhukwanene kukomeza. Buli mango rhwamagala kulembera chigeregezo chilebe, obwemere bwerhu bwanakomera bwenene. Echola charhurhabala rhulembere ebigeregezo bili embere zerhu. Mu gunola mwazi, rhwashambala ku hali ene zaliyerekene oku abanafunzi ba Yesu balikenere obwemere bukomere. Enyuma w’aho, rhwaja rhwashambala okuntu rhwakahima ebibazo bili nk’ebyola, na nka gurhe obwemere bwakarhurhabala kuchirheganya oku byayinjire.

3. Nka gurhe olwandiko lwa Matayo 6:30, 33 luyerekene, bichi Yesu arhurhabere rhumenye oku bilolere obwemere?

³ Amarhwe m’emilala manazigana kulonzeza abakazi n’abana babo, akalyo, emyambaro, n’ahantu h’okulama. Aliko mango maguma binabakomerera kuyeneza ebyola bintu. Bene-berhu na bali-berhu baguma bahezeze amakasi mabo aliko chiro akaba ntyo bali bachihangana kupata akandi kasi. Abandi balekere akasi Omukristu arhakwanene kukola. Mw’ezola hali zoshi, birhuhemere rhugwarhe obwemere bukomere oku Yehova ajira okuntu koshi rhupate eby’omulala gwerhu gukenere. Yesu alishambere bwinja-bwinja kw’echola omu Mahubiri mage m’oku Musozi. (Osome Matayo 6:30, 33.) Amango rhwamachizera loshi oku Yehova arharhujahika, rhwaseza obwenge boshi oku kasi ka Yehova, k’okuderha, enyungu z’Obwami. N’amango rhwamabona oku Yehova ali arhurhabala omu kurhuha eby’omubiri rhukenere, rhwamuyegera bwenene, n’echola chakomeza obwemere bwerhu.

4-5. Bichi byarhabalaga mulala muguma amango gwaliri gwachiyunva gulagire eju y’okubula ebigukenere?

⁴ Rhushambale oku bantu ba mulala muguma g’omu Venezuela bachiboneraga oburhabale bwa Yehova, amango balilagirire bwenene okuntu bapata ebintu by’omubiri bakenere yi bagenderera kulama. Mu mango maguma, omulala gwa Castro gwakazagaza kupata efuranga zitosheze omu kukola akasi k’omu mashwa. Buzinda, echigusho ch’ebishambo bigwerhe entwaro charhola eshwa lyabo n’okubalibirhako. Eshe Miguel, aderhere ntya: “Zene, rhukola rhuli rhwahinga omu hichira hityu hy’eshwa ly’okuyasa, muntu muguma arhuhere. Buli lusiku nampema Yehova arhuhe ebirhukenere m’olola lusiku.” Akalamo g’ogola mulala karhayorohere, aliko balangalire bwenene obuhashe bwa Darha w’obuzigire b’okubayenezeza ebi bakenere buli lusiku, bobola abantu b’omulala gwa Castro banaja oku kahunda oku mbuganano n’oku mahubiri. Akasi kabo emwa Yehova ka k’akamaro bwenene omu kalamo, na Yehova anabaha ebi bakenere.

⁵ Omu mango baligwerhe ebibazo, Miguel na mukage, Yurai, baseza obwenge oku kuntu Yehova abashishikere. Mango maguma, Yehova akoleseze ababo Bahamirizi omu kubahereza ebintu by’omubiri bakenere, changwa omu kumurhabala apate akasi. Amandi mango, Yehova aliri akolesa ebiro by’omurhabi omu kubaha ebi bakenere. Nta lusiku chiro Yehova alibalekerere. Echola charhumire bachibonera okuntu obwemere bw’abantu b’omulala gwabo bwakomera bwenene. Enyuma y’okushambala ku njira nguma bachibweneremo gurhe Yehova abarhabalaga, omunyere wabo mukulu, Yoselin, aderhere ntya: “Bihebere omurhima bwenene okuchibonera bwinja-bwinja efune ya Yehova. Ali mwira wani, nanchizerere oku antabala buli mango.” Ayongerere ntya: “Ebibazo omulala gwerhu gwa malembera, bili byarhurheganya oku bibazo by’amango mayinjire.”

6. Nka gurhe wakakomeza obwemere bwawe amango ogwerhe ebibazo by’okubula efuranga?

 ⁶ K’oli wahurana echibazo ch’okupata efuranga? Akaba ntyo ku bili, echola chili chibazo chikomere ogwerhe. Aliko, wakachigenderera kukolesa akola kasanzi omu kukomeza obwemere bwawe. Osalire emwa Yehova onasome ebinwa bya Yesu bili omu Matayo 6:25-34 onabikengereko bwenene. Waza oku mifano ya zene eyerekene oku Yehova anahereza balala basezeze akalamo kabo omu kasi kage ebi bakenere. (1 Ko. 15:58) Okujira ntyo kwakomeza obwizere bwawe oku bulala Isho w’embingu arhabere abandi baligwerhe ebibazo bili nk’ebyawe, nawe akurhabala. Ayinji eby’okenere, anayinji okuntu akuhereza byo. Ok’onali wachibonera okuntu Yehova ali akurhabala omu kalamo kawe, k’obwemere bwawe bwakomera yi nj’ogala kuhima ebibazo bikomere amango mayinjire.​—Hab. 3:17, 18.

7. Nk’oku olwandiko lwa Matayo 8:23-26 luderhere, nka gurhe “echiyaga chikalihire” chageregezaga obwemere bw’abanafunzi?

⁷ Amango Yesu n’abanafunzi bage babuganana n’echiyaga oku nyanja, Yesu akolesa ak’ola kasanzi omu kubarhabala bamenye oku bibahemere bakomeze obwemere bwabo. (Osome Matayo 8:23-26.) Omuyaga gwakaliha bwenene kuhika amango omulaba gwabumbya obwarho bwabo amenji, aliko Yesu alilyamire n’obuholo. Amango abanafunzi bage baliyubahire bwenene bamuzusya n’okumubwira abayokole, Waliha ababaza ntya oku bwirhonzi: “Bulagurhe muyubahire bwenene, mwe bantu bagwerhe bwemere bugeke?” Abola banafunzi baligwerhe obuba balikwanene barhegere oku Yehova agwerhe obuhashe bunene b’okulanga Yesu n’abaliri nabo k’obola buhanya. Bichi echola chakarhuyigiriza? Obwemere bukomere bwakarhurhabala rhulembere “echiyaga chikalihire” changwa chindi chibazo choshi-choshi chikalihire nka chiyaga.

8-9. Bichi byageregezaga obwemere bwa Anel, na bichi byamurhabalaga?

⁸ Waza okuntu obwemere bwa mwali-werhu muguma ochili mulamba oyirikirwe Anel, w’omu Porto Rico bwakomeraga bwenene. Obwemere bwage bwakomera bulala aligalire kulembera ebibazo byaliri byamugeregeza. Echigeregezo chage chaliri ‘chiyaga nya chiyaga chikalihire.’ Echola chigeregezo chahwanzaga omu mwaka gwa 2017 amango Echiyaga Chikalihirike chaliyirikirwe Maria chashandaga enju ya Anel. Kandi, eju y’echola chiyaga, aheza akasi kage. Anel aderhere ntya: “Nalichiyunvirhe ndagire mw’ezola siku z’ebibazo, aliko nalangalira Yehova omu kumusalira ntanalekaga emilago erhume ntajira ebi nalikwanene kujira.”

⁹ Anel aderhere oku n’okukenga nako kwalimurhabere alembere ebibazo byage. Ashambere ntya: “Okukulikira obwerekezi bw’olubaga lwa Yehova kwalintabere ngenderere kurhulera. Nalibwene efune ya Yehova kugerera oburhabale bene-berhu na bali berhu bampaga. Bampeba omurhima n’okumpa ebintu nalikenere  yi ngenderera kulama.” Ayongerere ntya: “Yehova ampereza binene bwenene kulusha ebi nakahemere, n’obwemere bwani bwakomera bwenene.”

10. Bichi wakajira akaba oli wababala eju y’ebibazo bikomere?

¹⁰ K’oli wahurana “echiyaga chikalihire” omu kalamo kawe? Nkabaga chakaba chinjira. Changwa chakaba chiyaga chikalihire ch’omufano, nk’obulwala bukomere bwakuvunire omurhima bwenene orhanamenyere bichi wakajira. Wakachiyunva olagire mango maguma, aliko orhalegaka emilago yawe yakubuza kulangalira Yehova. Omuyegere kugerera esala ly’omurhima goshi. Okomeze obwemere bwawe omu kukengeera okuntu Yehova akurhabere omu mango magerere. (Zb. 77:11, 12) Wakachizera oku arhakakujahika chiro n’akatyu.

11. Bulagurhe rhukwanene kuhigirira kukenga balala bali bayerekeza?

¹¹ Bichi bindi byakakurhabala olembere ebigeregezo? Anel aliderhere oku bilolere obukenge. Ochiyigirize kunihira balala Yehova na Yesu nabo banihire. Mango maguma, balala bashimikirwe nka berekezi, banahana obwerekezi rhwakabona oku burhagwerhe echi bumalire. Aliko, Yehova anagisha abantu bayerekene obukenge. Echinwa chage n’ebi bene-berhu na bali-berhu bimana bagereremo biyerekene ok’okukenga kunayokola akalamo. (Kut. 14:1-4; 2 Ny. 20:17) Okengeere oku mifano eli nk’eyola. Okukengeera ntyo kwakurhabala okomeze enyorha yawe y’okukulikira obwerekezi burhengere oku lubaga lwa Yehova zene n’omu mango mayinjire. (Ebr. 13:17) Okajira ntyo nj’orhagwarha empavu y’okuyubaha amalibuko makulu mali hano hofi-hofi.​—Mez. 3:25.

12. Nka gurhe olwandiko lwa Luka 18:1-8 luhuzene oku gwarha obwemere n’okulembera okukolerwa kubi?

¹² Yesu alimenyere oku okukolerwa kubi kwakageregeze obwemere bw’abanafunzi bage. Omu kubarhabala balembere, ashambala oku mufano guli omu chitabu cha Luka. Yesu ashambala oku ngani ya mukana muguma wagendereraga kulakirira omuzuzi muguma orhali munya-kunali ache olushinja lwage omu kunali. Alichizerere oku ahikira ahamurhabala akagenderera kumulakirira. Buzinda oyola muzuzi, ayunviriza amalira m’oyola mukazi. Bichi ogola mufano gurhuyigirize? Yehova arhali mulya-lya. Che charhumaga Yesu aderha ntya: “Okuli, ka Mungu arhachizera ok’okunali kwajirirwe ku balala achishogere bali bamulakirira ezuba n’obudufu?” (Osome Luka 18:1-8.) Aj’ayongera ntya: “Amango Omugala w’omuntu ayinja, ka njashigana obwemere buli nk’obula oku gulu?” Amango bali barhukolera kubi, birhuhemere rhuyerekane kugerera okulembera n’okuhanzika oku rhugwerhe obwemere bukomere nka bulala b’olala mukana. Akaba rhugwerhe obwemere buli nk’obola, rhwakachizera oku buyire burhayira, Yehova arhulwirako. Kandi, birhuhemere rhumenye oku esala lijira misi minene. Mango maguma, amasala merhu makashubizwa omu njira rhurhalilangalire.

13. Nka gurhe esala lyarhabalaga bantu ba mulala muguma barhakolerwaga omu kunali?

 ¹³ Ganira oku mufano gwa mwali-werhu muguma oyirikirwe Vero, olamire omu République Démocratique du Congo. Vero, n’eba orhali Muhamirizi wa Yehova, n’omunyere wabo wa myaka 15 babaga balibirhire kurhenga omu vilaje yabo amango barherwa n’echigusho ch’abasoda. Okubanali balambagira, bahika oku mukange, abasoda babayumanza n’okubayubahisa oku babayirha. Amango Vero ahwanza kuyama, omwali ahwanza kumurhuliriza omu kusalira n’omulenge n’okugalukira-galukira ezino lya Yehova omu sala lyage. Amango amala kusalira, komanda w’abola basoda abaza ntya: “Ego munyere, nde wakuyigirizaga kusalira?” Ashubiza ntya: “Mama y’ewanyigirizaga, omu kukolesa omufano gw’esala lili omu Matayo 6:9-13.” Komanda aderha ntya: “Ego munyere, woyo n’abazere bawe mugende n’obuholo, na Yehova Mungu wenyu abalange!”

14. Bichi byakageregeza obwemere bwerhu, na bichi byarhurhabala rhulembere?

¹⁴ Ogola mufano gurhuyigirize oku rhugenderere kubona oku esala lili ly’akamaro bwenene. Gurhe si akaba amasala mawe marhashubizwe juba-juba changwa omu njira esomeze? Kuguma n’olala mukana oganirirwe omu ngani ya Yesu, ogenderere kusalira, n’okuchizera oku Mungu werhu arhakulekerera, n’omu njira ziguma ashubiza oku masala mawe. Ogenderere kuhema Yehova eroho lyage lichesibwa. (Flp. 4:13) Oyibuke oku, hano hofi-hofi akugisha bwenene ey’orhakachiyibuka amalibuko wagereremo. Amango wamalembera ebibazo kugerera oburhabale bwa Yehova, wanagwarha emisi kandi nji wagala kulembera ebigeregezo by’amango mayinjire.​—1 Pe. 1:6, 7.

15. Nk’oku olwandiko lwa Matayo 17:19, 20 luderhere, chibazo chihe abanafunzi ba Yesu bahuranaga?

¹⁵ Yesu aliyigirize abanafunzi bage oku obwemere bwakabarhabere bahime ebibazo. (Osome Matayo 17:19, 20.) Mango maguma, bagambwa kufukuza omuzimu, chiro akaba oku baligalire kujira ntyo amandi mango. Bichi byarhumaga? Yesu afasiriya oku balikenere bwemere bunene. Ababwira oku nka baligwerhe obwemere buyushukire bakagala kuhamisa ebibazo bili nka misozi! Zene, nerhu rhwakagala kuhima ebibazo bibonekene nka rhurhakagala kuhima.

16. Nka gurhe obwemere bwarhabalaga Geydi alembere amango eba ayirhwa?

¹⁶ Waza oku mufano gwa Geydi, mwali-werhu muguma w’omu Guatemala. Eba Edi, ayirhwaga eyi bali bagaluka kurhenga oku mbuganano y’echibaga. Gurhe obwemere bwa Geydi bwamurhabalaga alembere ogola mugayo gunene? Aderhere ntya: “Esala lyalintabere nkabulire Yehova emizigo yani, n’echola chinantabala nchiyunve bwinja. Nambona okuntu Yehova andagireko kugerera omulala gwani na bera bani bomu chibaga. Oku kola binene omu kasi ka Yehova kwapungwize omugayo gwani n’okuntabala yi ntagenderera kulaga bwenene oku by’omusezi. Enyuma y’okugera mw’ebyola, nayigire oku chiro nahurana n’echibazo chili gurhe  omu mango mayinjire, nji nagala kuchihima kugerera oburhabale bwa Yehova, Yesu, n’olubaga lwa Mungu.”

17. Bichi rhwakajira amango rhwamahurana ebibazo bili nka musozi?

¹⁷ K’oli walira bulala omuzigirwa wawe afire? Orhole akasanzi k’okukomeza obwemere bwawe omu bulangalalire b’obufuke omu ngani ze Biblia ziderhere abantu bafukaga. K’ogwerhe omugayo bulala omuntu w’omu mulalala gwawe achibirwe omu chibaga? Oyige emyazi yakarhuma wachizera oku buli mango, Mungu anahana obuhane omu njira nyinja bwenene. Chiro wakaba oli wahurana na chibazo chilebe, okolese akasansi wakapata omu kukomeza obwemere bwawe. Obwire Yehova bwinja-bwinja okuntu oli wachiyunva. Omenye wachihenula oku bandi, aliko obere eburhambi bwa bene-benyu na bali-benyu. (Mez. 18:1) Ojire ebintu byakakurhabala olembere, chiro akaba wakalaka amango wamayibuka ebyakuhikiraga. (Zb. 126:5, 6) Ogenderere kuja oku mbuganano, kuhubiri n’okusoma e Biblia. Ogenderere kuwaza oku bintu binja Yehova akulaganyize oku akuha omu mango mayinjire. Amango oli wabona okuntu Yehova ali akurhabala zene, obwemere bwawe bwashuba kukomera bwenene.

18. Amango wamarhegera oku obwemere bwawe burhavire bwakomera, bichi wakajira?

¹⁸ Akaba ebigeregezo wagereremo mira changwa zene byayerekene oku obwemere bwawe burhavire bwakomera, omenye wavunika omurhima. Obone nk’akola kali kasanzi k’okukomeza obwemere bwawe. Ohune nka kulala entumwa za Yesu nazo zahunaga, zaderha ntya: “Orhuyongerere obwemere.” (Lu. 17:5) Kandi, owaze oku mifano rhwashambereko mu gunola mwazi. Kuguma na Miguel na Yurai, oyibuke amango moshi Yehova akurhabere. Kuguma na mwali wa Vero na Anel, osalire bwenene Yehova, ahanene amango wamahurana echibazo chikomere. Na kuguma na Geydi, orhegere oku Yehova akakuha oburhabale okenere kugerera abantu b’omulala changwa abera. Amango wamaleka Yehova akurhabale olembere ebibazo zene, wachizera bwenene oku nj’akurhabala olembere ebigeregezo byoshi-byoshi wakahurana amango mayinjire.

19. Bichi Yesu alichizerere, nawe bichi wakachizera?

¹⁹ Yesu alirhabere abanafunzi bage bamenye mu njira ehe balikenere bwemere bunene, aliko alichizerere loshi oku kugerera oburhabale bwa Yehova bakagalire kulembera ebigeregezo by’amango mayinjire. (Yoh. 14:1; 16:33) Alichizerere oku obwemere bukomere nji bwarhabala abantu b’echigusho chinene bayokoke amalibuko makulu mayinjire. (Ufu. 7:9, 14) Ka nji waba mubo? Kugerera olukogo lwa Yehova lurhakwanenwe, nji waba mubo, amango wamajira buli chintu wakagala bunola y’okomeza obwemere bwawe!​—Ebr. 10:39.