1. Bichi rhuba rhumenyere na bichi rhwakachizera?

 RHUBA rhumenyere oku hali bantu baguma bakarhupinga amango rhuli rhwahubiri. Obola bupinzani nji bwaluga omu mango mayinjire. (Da. 11:44; 2 Ti. 3:12; Ufu. 16:21) Kugera bunola, rhuchizerere oku Yehova nj’arhuha oburhabale rhukenere. Bulagurhe? Bulala buli mango Yehova arhabere abakozi bage bayeneze engabane zabo, chiro akaba ebibazo bali bahurana. Omufano, leka rhulole bintu biguma byahikiraga omulebi Ezekieli waliri ahubiri Abayahudi baliri buhungiro omu Babiloni.

2. Bichi Yehova aliderhere oku bantu b’omu eneo Ezekieli aliri ahubiri, na bichi rhwaganirako mu gunola mwazi? (Ezekieli 2:3-6)

² Bantu banyabachi Ezekieli aliri ahubiri omu eneo yage? Yehova aliderhere oku bali bantu “barhagwerhe bukenge,” “bagwerhe omurhima gukomere,” banali “bigamba.” Baliri babi nka migera eyi banali nka hinyamaguru (nakulu w’enjoka) bakahanyagaza akalamo k’abantu. Kanene Yehova aliri abwira Ezekieli: “Orhayubahaga”! (Osome Ezekieli 2:3-6.) Ezekieli aligalire kukola bwinja akasi k’okuhubiri alihabirwe bulala 1) alirhumirwe na Yehova, 2) alihabirwe emisi kugerera eroho lichesibwa lya Mungu, na 3) ebinwa bya Mungu byalikomeze obwemere bwage. Nka gurhe ebila bintu bisharhu byalirhabere Ezekieli? Na nka gurhe nerhu byakarhurhabala zene?

3. Binwa bihe bikwanene kuba eyi byalikomeze Ezekieli, na nka gurhe Yehova alimuyemezeze oku amurhabala?

³ Yehova abwira Ezekieli ntya: “Inkurhumire.” (Eze. 2:3, 4)  Ebyola binwa bikwanene kuba eyi byalihebere Ezekieli emisi. Bulagurhe? Bulala bikwanene kuba eyi Ezekieli aliyibukire ebinwa bili nk’ebyola Yehova abwiraga Musa na Isaya amango achishogabo mpu babe balebi bage. (Kut. 3:10; Isa. 6:8) Ezekieli naye alimenyere nka gurhe Yehova alirhabere abola balebi babiri kukola bwinja engabane erhaliyorohere. Amango Yehova abwira Ezekieli obwakabiri ntya: “Inkurhumire,” oyola mulebi aligwerhe empanvu nyinja z’okuchizera oburhabale bwa Yehova. Omu kuyongera, ebila binwa rhwabishimana kanene omu chitabu cha Ezekieli: “Yehova aganira nani ambwira.” (Eze. 3:16) Kandi aliyandikire kanene ntya: “Yehova aganira nani n’okumbwira.” (Eze. 6:1) Kweri, Ezekieli alimenyere bwinja oku arhumirwe na Yehova. Oku bwindi, eshe wa Ezekieli aliri mudahwa, akwanene kuba ey’alibwirire Ezekieli oku buli mango Yehova anabwira abalebi bage oku abarhabala. Omufano, Yehova alibwirire Isaka, Yakobo na Yeremiya mpu: “Indi haguma nawe.”​—Mwa. 26:24; 28:15; Yer. 1:8.

4. Binwa bihe bihebere omurhima bikwanene kuba eyi byalihebere Ezekieli emisi?

⁴ Nka gurhe Abaizraeli bakajirire amango bakayunvirhe amahubiri ma Ezekieli? Yehova aderha ntya: “Olubaga lwe Izraeli lwalahira kukunyuviriza, bulala barhalonzeze kunyunviriza.” (Eze. 3:7) Amango abantu balahira kuyunviriza Ezekieli, baliri balahira kuyunviriza Yehova naye. Ebyola binwa byalirhumire Ezekieli achizera oku chiro akaba abantu balahire kumuyunviriza, arhali byebiderhere oku afundire kukola engabane yage nka mulebi. Kandi Yehova abwira Ezekieli oku abantu “nji bamenya oku omulebi aliri ahagarhi kabo.” (Eze. 2:5; 33:33) Nta ngangane, ebyola binwa bihebere omurhima byalihere Ezekieli emisi alikenere y’ayeneza akasi kage k’okuhubiri.

5. Nk’oku olwandiko lwa Isaya 44:8 luderhere, bichi byarhulerhera obushiru?

⁵ Nerhu rhugwerhe obushiru bulala rhumenyere oku Yehova arhurhumire rhuje kuhubiri. Arhuhere olukengo omu kurhuhamagala “bahamirizi” bage. (Isa. 43:10) Olola luli lukengo lunene! Kuguma n’oku Yehova abwiraga Ezekieli: “Orhayubahaga,” nerhu Yehova arhubwirire oku: “Rhumenye rhwajanjabala.” Bulagurhe nta mpanvu rhugwerhe z’okuyubaha abali barhulwisa? Kuguma na Ezekieli, nerhu rhwarhumirwe na Yehova rhunagwerhe oburhabale bwage.​—Osome Isaya 44:8.

6. a) Nka gurhe Yehova arhulaganyize oku arhurhabala? b) Bichi birhumire rhwachiyunva rhuheberwe omurhima?

⁶ Yehova alaganyize oku arhurhabala. Omufano, embere Yehova aderhe mpu: “Muli Bahamirizi bani,” aliderhere ntya: “Amango wagera omu menji, nji naba haguma nawe, n’amango wagera omu nyinji zizibuzibu, zirhakakuzisya. Amango wagera omu muliro, orhakahya, changwa echirimi ch’omuliro mpu chikuyose.” (Isa. 43:2) Amango rhuli rhwahubiri, mango maguma rhwakahurana na bibazo binene ebi rhwakahuzanya n’echihonzi, n’ebigeregezo bikomere ebi rhwakahuzanya n’omuliro. Aliko Yehova arhurhabala rhugenderere kuhubiri. (Isa. 41:13) Kuguma n’omu siku za Ezekieli, bantu banene zene bali balahira oburhumwa. Aliko arhali mpu bulala rhurhali rhwahubiri bwinja. Rhunachiyunva rhuheberwe omurhima bulala rhumenyere oku Yehova anachishingira rhwabo amango rhuli rhwagenderera kuhaana oburhumwa bwage oku bwimana. Entumwa Paulo aderhere ntya: “Buli muguma nj’ahaabwa oluhembo nk’okwanakolere.” (1 Ko. 3:8; 4:1, 2) Mwali-werhu muguma wamamala myaka minene ey’ali painiya aderhere ntya: “Binanderhera omwishingo okumenya oku Yehova nj’arhuhemba oku misi rhuli rhwakolesa.”

7. Nka gurhe Ezekieli alichiyunvirhe amango awaza oku bilolere echibonekezi alibwene? (Olole efoto eli oku chiganda.)

⁷ Ezekieli alibwene emisi y’eroho lya Mungu yakola. Ebi Ezekieli alibwene omu chibonekezi byalimurhabere amenye oku eroho lya Mungu lyaliri lyarhabala bamalayika bagwerhe emisi bwenene, lyanaliri lyarhuma amapine mazibuzibu m’echitugari che mbingu malambagira. (Eze. 1:20, 21) Bichi Ezekieli alijirire? Aliyandikire ebyarhengereraga. “Amango nchibona nafukama n’okugeza amalanga ahashi.” Ezekieli asomerwa bwenene av’abunda kuhika ahashi. (Eze. 1:28) Enyuma w’ahola, amango Ezekieli awaza kwʼechola chibonekezi chisomeze, bikwanene kuba eyi byalikomeze obwemere bwage oku, kugerera oburhabale bw’eroho lya Mungu akakolere bwinja akasi kage k’okuhubiri.

8-9. a) Bichi byahikiraga Ezekieli amango Yehova amubwira “ayumange”? b) Nka gurhe Yehova alihere Ezekieli misi minene omu eneo yage erhaliyorohere?

⁸ Yehova abwira Ezekieli ntya: “Mwene-omuntu, yumanga nganire nawe.” Amango Yehova abwira Ezekieli oku ayumange, kugerera elyola rhegeko n’emisi y’eroho lya Mungu, Ezekieli alibwene emisi alikenere yakarhumire agala kuyumanga. Ezekieli ayandika ntya: “Eroho lyanjamo lyananyumanza.” (Eze. 2:1, 2) N’enyuma w’ahola, Ezekieli aliri ayerekezwa ‘n’okuboko’ kwa Mungu, k’okuderha, eroho lichesibwa lya Mungu. (Eze. 3:22; 8:1; 33:22; 37:1; 40:1) Eroho lichesibwa lya Mungu lyalihere Ezekieli emisi y’akola bwinja engabane alihabirwe k’okuderha, okuhubiri abantu “bagwerhe amarhwe makomere n’emirhima eli nka mabale” b’omu eneo yage. (Eze. 3:7) Yehova abwira Ezekieli ntya: “Najira esura yawe ekomere kuguma n’esura zabo, nakomeza amalanga mawe makomere kuguma m’amalanga mabo. Nakomeza amalanga mawe kuguma n’ediama makomere bwenene kurhalusya eshanga-buye. Orhabayubahaga  changwa kujanjabala eju y’esura zabo.” (Eze. 3:8, 9) Ali nka Yehova aliri abwira Ezekieli: ‘Omenye waleka obuzibu b’olula lubaga bwakuvuna omurhima. Nakuheba emisi.’

⁹ Enyuma w’ahola, eroho lichesibwa lya Mungu lyaliri lyarhabala Ezekieli omu eneo aliri ahubiri mo. Ezekieli ayandika ntya: “Emisi ya Yehova yalinkolereko bwenene.” Oyola mulebi alimalire eboso lyoshi ey’ali akengeera k’obola burhumwa na ntyo, y’agala kuhubiri ebi naye ali ayunva bwinja. (Eze. 3:14, 15) Naho, Yehova amubwira aje omu lubanda ‘ah’eroho lyamujagako.’ (Eze. 3:23, 24) Ezekieli aliri tayari kuhwanza akasi k’okuhubiri.

10. Burhabale buhe rhukenere yirhukola bwinja akasi kerhu k’okuhubiri na bulagurhe?

¹⁰ Burhabale buhe rhukenere yi rhukola bwinja akasi kerhu k’okuhubiri? Omu kushubiza kw’echola chibazo, owaze oku byahikiraga Ezekieli. Embere ahwanze kuhubiri, eroho lichesibwa lya Mungu lyalimuhere emisi akenere. Kuguma na Ezekieli, nerhu zene rhwakagala kuhubiri amango konyine rhwamahaabwa oburhabale n’eroho lichesibwa lya Mungu. Bulagurhe? Bulala Shetani ali arhulwisa y’ayumanza akasi kerhu k’okuhubiri. (Ufu. 12:17) Bantu banene banawaza oku Shetani agwerhe misi minene, naho oku rhurhakagala kumulwisa. Aliko kugerera akasi kerhu k’okuhubiri, rhunamuhima! (Ufu. 12:9-11) Mu njira ehe? Amango yirhwahubiri rhwanayerekana oku rhurhayubahire Shetani. Buli mango rhuli rhwahubiri, Shetani anababazwa n’okurhwamuhimire. Bichi rhunaja rhwabona bwinja amango rhwamagenderera kuhubiri chiro akaba oku abanzi berhu bali barhupinga. Bibonekene wazi oku Yehova anarhuha emisi kugerera eroho lyage n’oku arhuyemerere.​—Mt. 5:10-12; 1 Pe. 4:14.

11. Nka gurhe eroho lya Mungu lyarhurhabala, na nka gurhe rhwakagenderera kulihaabwa?

¹¹ Bichi bindi rhwakayiga kugerera okuntu Yehova ahaaga Ezekieli emisi alikenere y’ahubiri? Eroho lichesibwa lya Mungu lyakarhuha emisi rhukenere yirhuhima buli chibazo rhwakahurana nacho omu kasi kerhu k’okuhubiri.  (2 Ko. 4:7-9) Bobo si, bichi rhwakajira yirhuchizera oku Mungu ali agenderera kurhuha eroho lyage lichesibwa? Birhuhemere rhugenderere kusalira n’okuchizera oku Yehova ayunviriza amasala merhu. Yesu ayigiriza abanafunzi bage ntya: “Mugenderere kuhema, . . . mugenderere kulonza, . . . mugenderere kukongorha oku mulyango.” Omu kushubiza, Yehova “ahereza eroho lichesibwa kubalala banamuhemalyo.”​—Lu. 11:9, 13; Mdo. 1:14; 2:4.

12. Nk’oku Ezekieli 2:9–3:3 ederhere, ngahe echitabu ch’omuzingo charhengaga na bichi byaliyandikirwemo?

¹² Eroho lya Mungu lyalihere Ezekieli emisi, aliko n’ebinwa bya Mungu nabyo byakomeza obwemere bwage. Omu chibonekezi, Ezekieli abona okuboko kugwerhe echitabu ch’omuzingo. (Osome Ezekieli 2:9–3:3.) Ngahe echola chitabu ch’omuzingo charhengaga? Bichi byaliri mucho? Nka gurhe chakomezaga obwemere bwa Ezekieli? Lekaga rhulole. Echola chitabu ch’omuzingo charhengaga oku chirhi ch’obwami cha Mungu. Kweri byakashobokana oku Yehova alikoleseze muguma mw’abola bamalayika bane Ezekieli abaga abwene omu kumuhereza echola chitabu ch’omuzingo. (Eze. 1:8; 10:7, 20) Echola chitabu ch’omuzingo chaliri mw’ebinwa bya Mungu, k’okuderha, oburhumwa bulehere b’okucha olubanja Ezekieli alikwanene kutangaaza embere z’abola Baizraeli b’ebigamba baliri buhungiro. (Eze. 2:7) Obola burhumwa bwaliyandikirwe omu chitabu ch’omuzingo embere n’enyuma.

13. Gurhe Yehova alibwirire Ezekieli ajire echitabu ch’omuzingo na bulagurhe chalilyoherere?

¹³ Yehova abwira omulebi wage oku alye echola chitabu ch’omuzingo “achiyunjuze esitoma [yage].” Ezekieli akenga analya echola chitabu choshi ch’omuzingo. Bichi echola chigabi ch’echibonekezi chalilonzeze kuderha? Byalihemere Ezekieli ayunve bwinja oburhumwa alikwanene kuhaana. Byalihemere agwarhe obwemere m’obola burhumwa n’echola chakajiire chamushunika agale kuhubiri. Naho, echintu chisomeze charhengerera. Ezekieli ayinja yunva oku echola chitabu ch’omuzingo “chilokere nka buki.” (Eze. 3:3) Bulagurhe? Ezekieli yewe alibwene oku, okurhumwa na Yehova yaliri ngabane elokere changwa esimisize. (Zb. 19:8-11) Aligwerhe eshukurani bulala Yehova alimuyemerere abe mulebi wage.

14. Bichi byarhabalaga Ezekieli abe tayari kuyemera engabane yage?

¹⁴ Enyuma w’ahola, Yehova abwira Ezekieli ntya: “Oyunvirize n’okuheba oku murhima gwawe ebinwa byani byoshi.” (Eze. 3:10) Kugerera obola bwerekezi, Yehova abwira Ezekieli ayinje achihangana kuyibuka ebiyandikirwe mw’echola chitabu ch’omuzingo n’oku bikengerako bwinja bwinja. Amango Ezekieli aliri ajira ntyo, obwemere bwage bwakomera. Kandi okujira ntyo kwamuhereza oburhumwa bukomere ahaana embere z’abantu. (Eze. 3:11) Amango Ezekieli amala kuyunva bwinja n’okuyemera oburhumwa burhengere emwa Mungu, aj’aba tayari kuhwanza kuhubiri n’okugenderera kuhika amango amala akasi kage.​—Huzanya na Zaburi 19:14.

15. Yirhugendereza akasi kerhu k’okuhubiri, bichi rhukenere “kuheba oku murhima”?

¹⁵ Yirhugendereza akasi kerhu k’okuhubiri, nerhu rhukwanene kuyemera Echinwa cha Mungu chigenderere kukomeza obwemere bwerhu. Rhukwanene “kuheba oku murhima” byoshi Yehova arhubwirire. Zene, Yehova anaderha nerhu kugerera Echinwa chage chiyandikirwe, Ebiblia. Nka gurhe rhwakachizera oku Echinwa cha Mungu chili chagenderera kuhindamula amawazo merhu okuntu rhunachiyunva, n’ebinarhushunika rhukole chintu chilebe?

16. Gurhe rhukwanene kusoma Echinwa cha Mungu, na nka gurhe rhwakachiheba omu murhima gwerhu?

 ¹⁶ Amango rhwamalya akalyo n’okurhola akasanzi k’okukafumbamiza omu nda, omubiri gwerhu gwanakomera. Amango rhwamayiga Echinwa cha Mungu n’okuchikengerako, obwemere bwerhu bwakomera. Elyola ly’esomo Yehova alonzeze rhuyige okubilolere echitabu ch’omuzingo. Yehova alonzeze “rhuyunjuze omu sitoma [yerhu]” Echinwa chage, k’okuderha, rhuyunve Echinwa chage bwinja bwinja. Rhwakajira ntyo amango yirhwasalira, yirhwasoma, n’okukengera oku birhwasomere. Ech’oburhanzi, rhunasalira omu kurheganya omurhima gwerhu yirhugwarha amawazo ma Mungu. Naho rhwanasoma olwandiko lwe Biblia. Rhwanaja rhwayumanza obusomi, rhwanarhola akasanzi n’okuwaza bwenene oku bilolere ebi rhwasomere. Bichi byakaja byarhengerera? Oku rhunali rhwayunva bwinja Echinwa cha Mungu, intyo ku nacho chakomeza obwemere bwerhu.

17. Bulagurhe okukengera oku bi rhwasomere omu Biblia kuli kw’akamaro?

¹⁷ Bulagurhe kuli kw’akamaro okusoma Ebiblia n’okuyikengerako? Okujira ntyo, kunarhuha emisi rhukenere y’okuhubiri oburhumwa b’Obwami zene n’okumenyesa oburhumwa bukomere b’okucha olubanja nkabaga rhwamenyesa abantu hano hofi-hofi. Kandi, amango rhwamakengera oku ngeso zisimisize za Yehova, obwira bwerhu haguma naye bwanakomera bwenene. Naho, rhwanaja rhwagwarha echintu chilyoherere changwa chisimisize bwenene, k’okuderha omurhula gwa ndani n’okutosheka.​—Zb. 119:103.

18. Bichi abantu b’omu eneo yerhu nji bakwanene bamenye na bulagurhe?

¹⁸ Ezekieli aliri mulebi si rhwabo nanga. Rhuhigirire kugenderera kubwira abantu oburhumwa Yehova ayandikisize omu Chinwa chage kugera amango yenyine aderha oku akasi k’okuhubiri kamahwa. Amango akasanzi k’okucha olubanja kahika, abantu nji barhaderha oku barhayunvaga omukonge changwa Mungu arhabalagagako. (Eze. 3:19; 18:23) S’ahubwe nji bayemera oku, oburhumwa rhwaliri rhwahubiri bwarhengaga emwa Mungu.

19. Bichi byarhuha emisi y’okukola akasi kerhu k’okuhubiri?

¹⁹ Bichi byarhuha emisi y’okukola bwinja bwinja akasi kerhu k’okuhubiri? Ebyola bisharhu byen’ebyola byahebaga Ezekieli emisi. Rhunagenderera kuhubiri bulala rhumenyere oku Yehova yerhurhumire, eroho lichesibwa lya Mungu linarhuheba emisi, n’echinwa chage chinakomeza obwemere bwerhu. Kugerera oburhabale bwa Yehova, rhunakola akasi kerhu k’okuhubiri n’obushiru, n’okulembera “kuhika oku buzinda.”​—Mt. 24:13.