MWAZI G’OKUYIGA 46
Okuntu Yehova Anarhurhabala Rhulembere n’Omwishingo
“Yehova ali alingiriza omu kulembera y’abayereka olukogo, kandi nj’ayumanga y’abayunvira obonjo.”—ISA. 30:18.
OLWIMPO 3 Nguvu Yangu, Tumaini Yangu, Ninakutegemea
OKU BUGEKE a
1-2. a) Bibazo bihe rhwaganirako? b) Bichi biyerekene oku Yehova agwerhe enyorha nene y’okurhurhabala?
YEHOVA akarhurhabala yirhulembera ebibazo byerhu n’okugwarha omwishingo omu kasi kerhu rhuli rhwamukolera. Mu njira zihe ali arhurhabalamo? Nka gurhe rhwakayunguka bwenene kugerera oburhabale Yehova ali arhuha? Binola bibazo byashubizwa mu gunola mwazi. Aliko, embere rhubiganireko, leka rhurhange rhulole kw’echila chindi chibazo: Ka kweri Yehova agwerhe nyorha nene y’okurhurhabala?
2 Echinwa entumwa Paulo akoleseze omu maruba mage ayandikiraga Abaebraniya, chakarhurhabala rhubone echishubizo. Paulo ayandikire ntya: “Yehova ali Murhabazi wani; intayubaha gurhe omuntu akanjira?” (Ebr. 13:6) Ebitabu bihaanire amafasiriyo oku Biblia biderhere oku echinwa “murhabazi,” chikolesezwe m’ogula mustari, mayerekene omuntu oli walibirha y’aja kurhabala omuntu mulebe oli walakirira oburhabale. Chapa omu bwenge, olole Yehova ali alibirha aje rhabala muntu mulebe oli omu milago. Kweri amola mafasiriyo mayerekene oku Yehova agwerhe enyorha nene y’okurhurhabala. Amango Yehova amarhurhabala, rhwanagala kulembera ebibazo byerhu n’omwishingo.
3. Njira zihe esharhu Yehova anakolesa y’arhurhabala rhulembere eyi rhunagwerhe omwishingo?
3 Njira zihe ziguma Yehova anarhurhabalamo yirhulembera ebibazo byerhu n’omwishingo? Omu kushubiza, leka rhusome chigabi chiguma omu chitabu cha Isaya. Bulagurhe? Bulala binene omu by’omulebi Isaya alebaga, byakakoleswa oku bakozi ba Mungu zene. Kandi, kanene Isaya ali akolesa ebinwa biyunvikene bwinja amango aliri aderha oku bilolere Yehova. Isaya sura 30 eli mu mifano miguma. Mw’eyila sura, Isaya akoleseze emifano minja bwenene omu kuyerekana okuntu Yehova anarhabala abantu bage. Ayandikire gurhe Yehova anarhurhabala 1) omu kurhurhega amarhwiri bwinja-bwinja n’okushubiza oku masala merhu, 2) omu kurhuha obwerekezi, na 3) omu kurhuha emigisho zene n’omu mango mayinjire. Lekaga rhuganire kw’ezila njira esharhu Yehova anarhurhabalamo.
YEHOVA ANARHUYUNVIRIZA
4. a) Bichi Yehova aderhaga oku bilolere Abayahudi b’omu siku za Isaya, na bichi alilekere birhengerere? b) Bulangalire buhe Yehova alihere abola bemana? (Isaya 30:18, 19)
4 Oku murhondero gw’esura ya 30 gw’echitabu cha Isaya, Yehova ayirikire Abayahudi oku bali ‘bana bazibu, banayongera echaha oku chindi.’ Ayongerere omu kuderha ntya: “Bali lubaga lw’ebigamba, . . . Banalahira kuyunviriza esheriya ya Yehova.” (Isa. 30:1, 9) Bulala abantu balilahire kuyunva, Isaya ababwira oku Yehova akabalekerere balibuzwe. (Isa. 30:5, 17; Yer. 25:8-11) N’echola che charhengereraga amango Abababiloni babaheka buhungiro e Babiloni. Aliko mw’abola Bayahudi, halirimo baguma baliri bemana, na Isaya alibagwerhere oburhumwa b’obulangalire, ababwira oku lusiku luguma Yehova akabagalwire bashube kulama omu Izraeli. (Osome Isaya 30:18, 19.) Nantyo kubyanabaga. Yehova abayokola omu kubakula omu Babiloni. Aliko, haligerere myaka minene embere Yehova abagalule omu Izraeli. Ebinwa “Yehova ali alingiriza omu kulembera y’akuyereka olukogo,” biyerekene oku hakagerere bisanzi bilebe embere ayokole abemana bage n’okubakula omu Babiloni. Kweri, Abaizraeli balimalire myaka 70 omu buhungiro e Babiloni embere baguma mubo bagaluke omu Yerusalemu. (Isa. 10:21; Yer. 29:10) Amango Abaizraeli baliri bashwekwa omu Babiloni, baliri balaka bulala baligwerhe mugayo gunene, aliko amango bagaluka omu chihugo chabo ch’akaburhano, baliri barhoza emiziga y’obusiime.
5. Bwizere buhe olwandiko lwa Isaya 30:19 burhuhere?
5 Zene, rhwakahebwa omurhima kugerera ebila binwa: “Kweri akuyereka olukogo amango wamulakira n’omulenge gunene omu kumuhema akurhabale.” (Isa. 30:19) Isaya arhurhabere rhuchizere oku Yehova arhurhega amarhwiri bwinja-bwanja amango rhuli rhwamulakirira, kandi nj’ashubiza juba-juba oku masala merhu. Isaya ayongerere ntya: “Akushubiza han’aho amala kuyunva amalira mawe.” Ebila binwa bihebere omurhima birhuyibwise oku Darha agwerhe nyorha nene y’okurhabala boshi bali bamulakirira. Okumenya echila, kurhurhabere rhulembere n’omwishingo.
6. Nka gurhe ebinwa bya Isaya biyerekene oku Yehova anayunviriza bwinja-bwinja amasala ma buli muguma omu bakozi bage?
6 Bichi bindi lunola lwandiko lurhuyigirize oku bilolere amasala merhu? Yehova anayunviriza bwinja-bwinja amasala ma buli muguma werhu. Bulagurhe rhwakaderha ntyo? Chiro akaba oku oburhumwa buli omu sura ya 30 bulolere Abaizraeli boshi nka lubaga, omu mustari gwa 19 Yehova akoleseze echinwa “woyo” chiyerekene oku ali aganira na buli muntu bwage-bwage. Isaya ali yandikire ntya: “Woyo orhakachilaka chiro”; “kweri nj’akuyereka olukogo”; “kweri nj’akushubiza.” Bulala Yehova ali Darha w’obuzigire, arhabwira abana bage bavunikire omurhima mpu, “Mukwanene mukomere kuguma na bene-benyu na bali-benyu.” S’ahubwe, analaga ku buli muguma werhu n’okuyunviriza amasala mage.—Zb. 116:1; Isa. 57:15.
Bichi Isaya ashondaga kuderha amango aderha mpu: “Murhayemeraga [Yehova] ahumuka”? (Olole echifungo cha 7)
7. Nka gurhe Isaya na Yesu barhuyerekere akamaro k’okugenderera kusalira buzira kuhusa?
7 Amango rhwamayegera Mungu werhu n’okumubwira buli chintu choshi chirhulazize, burhanzi Yehova arhanga kurhuha emisi rhukenere yirhugala kulembera eyola hali. N’akaba ebibazo byerhu birhahwere omu bisanzi rhwaliwazizemo, rhwashuba hema Yehova arhuhe emisi rhukenere yirhugala kulembera. Arhubwirire oku rhujire ntyo. Elila ly’ehano liyerekenwe mw’ebila binwa bya Isaya: “Mumenye mwayemera [Yehova] ahumuka.” (Isa. 62:7) Bichi ebyola biderhere? Amasala merhu makwanene kuba ma buzira kuhusa, byanaja byaba nka rhurhalekere Yehova ahumuke. Ebinwa bya Isaya birhuyibwise emifano ya Yesu oku bilolere esala ebonekene omu Luka 11:8-10, 13. Ahola Yesu arhuhebere omurhima rhusalire “burhahusa” kandi “rhugenderere kumuhuna arhuhe” eroho lyage lichesibwa. Kandi rhwakahema Yehova arhuhe obwerekezi rhukenere yirhugala kurhola esimikiro zinja.
YEHOVA ANARHUYEREKEZA
8. Omu mango magerere, nka gurhe ebinwa bili omu Isaya 30:20, 21 byaliyenere?
8 Osome Isaya 30:20, 21. Amango abasoda be Babiloni bagorha e Yerusalemu omu chihe cha mwaka muguma n’enusu, abantu bahurana bibazo binene bwenene omu kuntu babikomera n’okuba nka mugati n’amenji emwabo. Aliko nk’oku omustari 20 na 21 guyerekene, Yehova alilaganyize Abayahudi oku bakahungama n’okuhindamula ebijiro byabo, naye, akabayokwere. Isaya ahamagere Yehova oku ali “Mwigiriza [wabo] Mukulu,” analaganyize olubaga oku Yehova akabayigirize okuntu bakamuharamya omu njira ameyemerere. Ebyola binwa byayinjaga yenera amango Abayahudi bagaluka kurhenga omu buhungiro. Yehova aba Mwigiriza wabo Mukulu, na kugerera obwerekezi bwage, abantu bage bagala kushuba kugalula emparamyo echere. Rhugwerhe busime bunene bulala Yehova ye Mwigiriza werhu Mukulu zene.
9. Njira nguma ehe Yehova anarhuha m’obwerekezi?
9 Mu eyila mistari, Isaya aderhere oku rhuli kuguma n’abanafunzi bali bayigirizwa na Yehova mu njira ebiri. Ey’oburhanzi, Isaya aderhere ntya: “Nji wachibonera Omwigiriza Wawe Mukulu n’amasu mawe.” Mu gunola mufano, Isaya aderhere ok’Omwigiriza ayumangire embere z’abanafunzi bage. Luli lukengo emwerhu okubona oku Mungu ali arhuyigiriza zene. Nka gurhe Yehova anarhuyigiriza? Anarhuyigiriza kugerera olubaga lwage. Rhugwerhe eshukurani nene oku bwerekezi buyunvikene rhuli rhwahaabwa kugerera olubaga lwa Yehova! Obwerekezi rhuli rhwahaabwa kugerera embuganano zerhu z’echibaga, n’oku mbuganano zerhu zikulu, kugerera ebitabu byerhu, eprograme za JW Télédiffusion n’ebindi binene, binarhurhabala mu binola bihe bidarhabere, yi rhulembera eyi rhunagwerhe omwishingo.
10. Mu njira ehe rhwakayunvamo “echinwa enyuma [yerhu]”?
10 Isaya ayerekene enjira yakabiri Yehova anarhuyigirizamo, aderhere ntya: “Amarhwiri mawe nji mayunva omulenge enyuma zawe.” Ahala omulebi aderhere oku Yehova ali nka mwalimu oli alambagira enyuma z’abanafunzi bage, n’okubayerekeza omu njira bakwanene kugereramo. Zene, rhunayunva omulenge gwa Mungu enyuma yerhu. Nka gurhe? Ebinwa bya Mungu byafuhererwe byayandikirwe omu Biblia hamagera myaka minene, myaka minene rhurhaza kubaho. K’okuderha, amango rhuli rhwasoma Ebiblia, kuli nka kula rhulirhwayunva omulenge gwa Mungu enyuma werhu.—Isa. 51:4.
11. Yirhulembera n’omwishingo, bichi rhukwanene kujira, na bulagurhe?
11 Nka gurhe rhwakayunguka n’obwerekezi bunene Yehova anarhuha kugerera olubaga lwage n’Echinwa chage? Rhuyibuke oku, Isaya aderhere bintu bibiri. Ech’oburhanzi, “eyila y’enjira.” Echa kabiri, “oyilambagiremo.” (Isa. 30:21) Birhatosheze okumenya konyine “enjira.” Kandi birhuhemere “okuyilambagiramo.” Echinwa cha Yehova n’eby’olubaga lwage lunarhubwira binarhuyigiriza ebi Yehova arhuhemere. Rhunashuba kuyiga okuntu rhwakakolesa ebi rhwayigire. Yi rhugala kulembera n’omwishingo omu kasi ka Yehova, rhukwanene kujira ebyola bintu byombi. Amango monyine rhwamayiga n’okukolesa ebi rhwayigire, m’amango rhwakachizera oku Yehova arhugisha.
YEHOVA ANARHUGISHA
12. Nk’oku olwandiko lwa Isaya 30:23-26 luderhere, nka gurhe Yehova akagishire abantu bage?
12 Osome Isaya 30:23-26. Nka gurhe obula bulebi bwayeneraga oku Bayahudi bagalukaga omu Izraeli kurhenga buhungiro omu Babiloni? Balibwene migisho minene, k’okuderha, ey’omubiri n’ey’ekiroho. Yehova alihere abantu bage eby’okulya binene. Aliko ech’akamaro, alibahere byoshi bakenere yi bakomeza obwira bwabo haguma naye yibanashuba kumuharamya omu njira ekwanene. Mw’amola mango abantu ba Mungu baliri bachishingira migisho minene, eyi barhalisaga bona aha bakabera. Nk’oku omustari 26 guyerekene Yehova akabahere “mwangaza gunene, ”k’okuderha, alibarhabere bayunve bwinja Echinwa chage. (Isa. 60:2) Emigisho ya Yehova yalirhabere abakozi bage bagenderere kumukolera n’omwishingo n’obuhashe bwabo “eju y’ehali nyinja y’omurhima.”—Isa. 65:14.
13. Nka gurhe obulebi bulolere okugalulwa kw’emparamyo echere buli bwayenera zene?
13 Obulebi bulolere okugalulwa kw’emparamyo echere, ka burhulolere nerhu zene? Nechi loshi! Nka gurhe? Kurhenga omu mwaka gwa 1919 N.K.Y., amamiliyoni m’abantu barhachili omu buja bwa Babiloni Mukulu k’okuderha amadini moshi m’obubeshi. Baheberwe ahantu hakwirire bwenene kulusha Echihugo Chilaganano che Izraeli. Bahekerwe omu paradizo y’ekiroho. (Isa. 51:3; 66:8) Eyola paradizo y’ekiroho byebichi?
14. Eparadizo y’ekiroho bili bichi na bande balamiremo zene? (Olole Amafasiriyo m’Ebinwa.)
14 Kurhenga mwaka gwa 1919 N.K.Y., abashigwa bali basiimira akalamo omu paradizo y’ekiroho. b Oku ebisanzi binali byagera, balala bagwerhe obulangalire b’okulama oku gulu, k’okuderha “ezindi ntama,” nabo baheberwe mw’echola chihugo ch’ekiroho n’okusiimira migisho minene erhengere emwa Yehova.—Yoh. 10:16; Isa. 25:6; 65:13.
15. Ngahe eparadizo y’ekiroho eli?
15 Ngahe echihugo changwa eparadizo y’ekiroho eli zene? Abanaharamya Yehova bali omu maeneo moshi m’egulu. Che chirhumire eparadizo y’ekiroho balamiremo nayo, eli omu gulu lyoshi. Bobola, aha rhwakaba rhulamire hoshi hoshi zene oku gulu, rhwakaba omu paradizo y’ekiroho amango moshi rhuli rhwashigikira bwenene obuharamye b’okuli.
Bichi buli muguma werhu akajira y’ayongera oku bwinja bw’eparadizo y’ekiroho? (Olole echifungo che 16-17)
16. Bichi byakarhurhabala rhugenderere kubona obwinja bw’eparadizo yerhu y’ekiroho?
16 Omu bindi bintu byoshi rhukwanene kujira yirhubera omu paradizo y’ekiroho, rhukwanene kugenderera kugwarha eshukurani ku bene-berhu na bali-berhu b’omu chibaga che Chikristu ch’omu gulu lyoshi. Nka gurhe rhwakajira ntyo? Omu kurhaseza obwenge bwerhu oku buzamba bwa bene-berhu na bali-berhu balamire mw’eyola paradizo. (Yoh. 17:20, 21) Bulagurhe okujira ntyo kuli kwinja bwenene? Wazaga k’ogula mufano. Rhumenyere oku rhwakabugana emirhi ya buli lubero omu muzirhu gusimisize. Konakuguma, omu bibaga byerhu zene, muli abantu ba buli lubero bahuzenywe n’emirhi. (Isa. 44:4; 61:3) Rhukwanene kujira okwerhu koshi yirhugenderera kuseza obwenge oku bwinja “b’ogola muzirhu” si rhurhasezaga obwenge bwerhu oku buzamba bwa buli “murhi,” k’okuderha mwene-werhu changwa mwali-werhu oli ahaburhambi bwerhu. Rhurhakwanene kuleka obuzamba bwerhu changwa obw’abandi omu chibaga burhubuze kubona obwinja b’obuguma bw’echibaga Che Chikristu oku gulu lyoshi.
17. Bichi buli muguma akajira y’agendereza obuguma omu chibaga?
17 Bichi buli muguma werhu akajira y’agendereza obuguma bw’echibaga? Omu kuba muntu w’okujira omurhula. (Mt 5:9; Ro. 12:18) Amango moshi rhwarhola entambu y’okugendereza omurhula haguma n’abandi omu chibaga, rhwanayongera obwinja bw’eyola paradizo y’ekiroho. Rhunagenderera kuyibuka oku Yehova akulwire buli yeshi olamire mw’eyola paradizo y’ekiroho omu buharamye buchere. (Yoh. 6:44) Waza okuntu Yehova anaba asiimire bwenene amango amabona rhuli rhwakola okwerhu koshi yi rhukomeza omurhula n’obuguma omu bakozi bage bali b’akachiro bwenene emwage!—Isa. 26:3; Hag. 2:7.
18. Bichi rhukwanene kukengerako buli mango na bulagurhe?
18 Yehova anaha abakozi bage ebintu binja binene, gurhe rhwakayunguka bwenene n’ebyola bintu? Rhwakawaza bwenene oku birhunayiga omu Chinwa cha Mungu n’omu bitabu byerhu biyumangiire oku Biblia. Okola kuyiga n’okukengera kwarhurhabala rhugwarhe engeso z’Echikristu zarhurhabala “rhuzigirane” nka bantu ba mulala muguma n’okuyerekana “obuzigire bw’akasisi buli muguma n’owindi” omu chibaga. (Ro. 12:10) Amango rhuli rhwawaza oku migisho rhugwerhe, rhwanakomeza obwira bwerhu haguma na Yehova. Kandi okukengera oku bintu binja Yehova arhulaganyize oku arhuha omu mango mayinjire, obulangalire bwerhu b’okumukolera esiku n’amango bwanagederera kuba b’okuli. Ebila byoshi byarhurhabala kukolera Yehova n’omwishingo gunene zene.
OHIGIRIRE OKULEMBERA
19. a) Nk’oku olwandiko lwa Isaya 30:18 luderhere, bichi rhwakachizera? b) Bichi byarhurhabala rhulembere n’omwishingo?
19 Yehova “nj’ayumanga” oku lunda lwerhu amango nj’alerha obuzinda bwalinola gulu libi. (Isa. 30:18) Rhuchizerere oku Yehova—“Mungu w’okunali”—nj’alimbula linola gulu lya Shetani omu kasanzi kakwanene. (Isa. 25:9) Rhuli rhwalingiriza omu kulembera haguma na Yehova ok’olola lusiku l’okuchungulwa lwahika. Aliko ok’olola lusiku lwanahika, rhuhigirire kugenderera kusiimiswa n’olola lukengo rhugwerhe l’okusalira, okuyiga n’okukolesa Echinwa cha Mungu, n’okukengeera oku migisho yerhu. Amango yirhwajira ntyo, Yehova arhurhabala rhulembere n’omwishingo omu buharamye rhuli rhwamuhereza.
OLWIMPO 142 Tusiache Tumaini Yetu
a Gunola mwazi gwaganira ku bintu bisharhu Yehova anajira omu kurhabala abanamuharamya balembere ebibazo by’omu kalamo eyi banagwerhe omwishingo. Rhwayiga oku bilolere ezola mbero z’oburhabale omu kuganira ku Isaya sura 30. Oku rhuli rhwashuba kuganira kw’enola sura, rhwashuba kuyibuswa akamaro k’okusalira Yehova, okuyiga Echinwa chage, n’okukengeera oku migisho rhuli rhwabona n’ey’omu mango mayinjire.
b AMAFASIRIYO M’EBINWA: Rhuli omu “paradizo y’ekiroho” amango rhuli rhwaharamya Yehova omu buguma. Mw’eyola hali, Yehova anarhuyigiriza buli chintu choshi rhukenere yirhumenya kumukolera buzira nyigirizo zoshi zoshi z’amadini m’obubeshi, rhunagwerhe akasi kasimisize bwenene k’okuhubiri emyazi minja y’Obwami bwa Mungu. Rhunasiimira obwira bukomere haguma na Yehova kandi rhunalama omu murhula haguma na bene-berhu na bali-berhu bazigirwa banarhurhabala rhulembere ebibazo by’akalamo eyi rhugwerhe omwishingo. Rhunaja omu paradizo y’ekiroho amango rhwamahwanza kuharamya Yehova omu njira ekwanene n’amango rhwamajira okwerhu koshi yirhumuyiganya.