1. Nka gurhe rhumenyere oku Yehova alonzeze kurhuyegera?

 YEHOVA arhuhamagere rhumuyegere. (Yak. 4:8) Alonzeze abe Mungu werhu, Darha, na Mwira werhu. Anashubiza oku masala merhu, kandi anarhurhabala omu bihe bikomere. Anashuba kolesa olubaga lwage omu kurhuyigiriza anarhulange. Aliko si, bichi rhukwanene kujira yirhuyegera Yehova?

2. Nka gurhe rhwakayegera Yehova?

² Rhwakayegera Yehova amango rhuli rhwamusalira, amango rhuli rhwasoma Echinwa chage, n’okuchikengerako. Oku rhunali rhwajira ntyo, rhwanayunva rhuyunjwire obuzigire n’okuyunva rhuchishingiire yewe. Rhwashunikwa kumuha obukenge n’obukuuze akwanene. (Ufu. 4:11) Oku rhwagenderera kumenya Yehova bwenene, kurhwanagenderera kumulangalira bwenene haguma n’olubaga lwage ahebereho yilurhurhabala.

3. Nka gurhe Ibilisi ali achihangana kurhukula ku Yehova, aliko bichi byarhurhabala yirhurhaleka haba n’akatyu Mungu werhu n’olubaga lwage? (Zaburi 31:13, 14)

³ Aliko, Ibilisi ali achihangana kurhukula ku Yehova, ahanene, amango rhuli rhwahurana ebibazo. Mayeri mahe Shetani anakolesa? Anachihangana kubuyabuya y’avuna obwizere bwerhu ku Yehova n’oku lubaga lwage. Aliko, rhwakagala kulwisa amola mayeri mage. Amango obwemere bwerhu bukomere, obulangalire bwerhu mu Yehova burhashaganyika, rhurhaleka Mungu werhu n’olubaga lwage.​—Osome Zaburi 31:13, 14.

4. Bichi rhwaganirako mu gunola mwazi?

⁴ Mu gunola mwazi, rhwaganira ku bigeregezo bisharhu byakarhengerera embuga w’echibaga; buli chiguma chakahanyagaza obulangalire bwerhu ku Yehova n’oku lubaga lwage. Gurhe  ebyola bigeregezo byakarhukula ku Yehova? Gurhe rhwakalwisa amayeri ma Shetani?

5. Nka gurhe ebigeregezo byakahanyagaza obunihire bwerhu ku Yehova n’oku lubaga lwage?

⁵ Mu binola bihe, rhuli rhwahurana bigeregezo kamama, nk’obupinzani b’omu mulala changwa kuheza akasi kerhu. Nka gurhe ebyola bigeregezo byakahanyagaza obunihire bwerhu oku lubaga lwa Yehova n’okurhukula kuye? Amango rhwamalembera ebibazo mu mango manene, rhwakagera amango rhwachiyunva rhurhachigwerhe bunihire eyi rhwanavunikire omurhima. Shetani y’akolesa ebila bisanzi y’arhuma rhwachiyunva oku Yehova arharhuzigiire. Ibilisi alonzeze rhuwaze oku Yehova n’olubaga lwage bobali barhulerhera amalibuko. Ebintu bili nk’ebyola byalihikiire Baizraeli baguma baliri omu Misri. Burhanzi, baliyemerere oku Yehova yiwashimikire Musa na Haruni yi babayokola omu buja. (Kut. 4:29-31) Aliko enyuma amango Farao arhuma akalamo kabo kakomera bwenene, barhondera kulundumira Musa na Haruni eju y’ebibazo bali bahurana n’okubabwira ntya: “Mwarhumire Farao n’abakozi bage barhusuzagura, mwahebere engorho omu fune zabo mpu yibarhuyirha.” (Kut. 5:19-21) Balundumira bwenene abakozi bemana ba Yehova. Bigayisize bwenene! Akaba ogenderere kulembera ebibazo mu mango manene, nka gurhe obunihire bwawe ku Yehova n’olubaga lwage bwakagenderera kukomera?

6. Bichi rhwayigire kugerera omulebi Habakuki oku bilolere okuntu rhwakalembera ebibazo byerhu? (Habakuki 3:17-19)

⁶ Obwire Yehova byoshi bikuli oku omurhima omu sala, onalangalire oburhabale bwage. Omulebi Habakuki, alihurene bibazo binene bikomere. Byakashobokana oku mango maguma Habakuki aliri achibaza akaba kweri Yehova anamushishikala. Naho, aj’abwira Yehova byoshi bimuli oku murhima kugerera esala. Aderha ntya: “Yehova wee, kuhika mangochi nagenderera kulakira oburhabale, aliko orhali wanyunva? . . . Bulagurhe walekerere akahidiko?” (Hab. 1:2, 3) Yehova alishubize esala ly’oyola mukozi wage mwimana. (Hab. 2:2, 3) Habakuki amalire kukengeera bwenene oku kuntu Yehova aliyokwere olubaga lwage, ashuba kugwarha omwishingo. Achizera oku Yehova amushishikala n’oku akamurhabere alembere buli chigeregezo. (Osome Habakuki 3:17-19.) Somo lihe rhwamayiga? Amango oli wahurana ebigeregezo, osalire Yehova onamubwire gurhe oli wachiyunva. Naho, oheme oburhabale. Amango wamajira ntyo, wachizera oku Yehova akuha emisi okenere y’ogala kulembera. Naho, amango wachibonera oburhabale bwage, obwemere bwawe bwakomera bwenene.

7. Bichi abantu b’omu mulala gwa Shirley baliri bachihangana kulonza ayemere, na bichi byamurhabere y’arhaheza obwemere bwage ku Yehova?

⁷ Ogenderere kujira ebintu byakurhabala ogenderere kuyorha hofi na Yehova. Ebyola byebyalirhabere mwali-werhu muguma oyirikirwe Shirley, olamire omu chihugo che Papouasie Nouvelle Guinée, amango aliri ahurana ebigeregezo. b Omulala gwa Shirley gwalikenere, na mango maguma baliri bachihangana yi bapata ebilyo bitosheze. Mulume muguma w’omu mulala gwa Shirley aliri achihangana y’ahanyagaza obwira bwage haguma na Yehova. Amubwira ntya: “Waderhere oku eroho lichesibwa lya Mungu lyelyakurhabala, aliko si, ngahe obola burhabale buli? Omulala guchili omu bukene. Oli waheza ebisanzi byawe oku busha mp’oli wahubiri.” Shirley aderhere ntya: “Nachibaza ntya: ‘Kweri si Yehova ali arhushishikala changwa nanga?’ Naho nasalira Yehova han’ahola, na namubwira byoshi byaliri  omu bwenge bwani. Ntalekaga kusoma Ebiblia n’ebitabu byerhu na nagenderera kuhubiri n’okuja oku mbuganano.” Buzira kulegama Shirley ahwanza kubona oku Yehova aliri ashishikala omulala gwage. Omulala gwage gurhayirhwaga n’enzara, kandi gwaligwerhe n’obusime. Shirley aderhere ntya: “Naliri nabona oku Yehova ali ashubiza amasala mani.” (1 Ti. 6:6-8) Okagendereza eprograme yawe y’eby’ekiroho, nawe orhaleka ebibazo changwa engangane byakucha ku Yehova.

8. Bichi byakahikira bene-berhu bagwerhe engabane omu lubaga lwa Yehova?

⁸ Kugerera ebikoleso by’okuyeneza emyazi, n’esite z’Enternete z’okuganira na bantu banene, abanzi berhu banayeneza hoshi emyazi y’obubeshi changwa y’okuhabula oku bilolere bene-berhu bagwerhe engabane omu lubaga lwa Yehova. (Zb. 31:13) Baguma bafarhirwe n’okushobekwa oku bakolere amagosa makomere. Abakristu b’omu myaka 100 ya burhanzi nabo baliri bahurana n’echibazo chili nk’echola amango entumwa Paulo ashobekwa n’okushwekwa. Nka gurhe baliri bajira?

9. Nka gurhe Bakristu baguma balijirire amango entumwa Paulo aliri omu pirizo?

⁹ Bakristu baguma b’omu myaka 100 ya burhanzi balilekere kurhabala entumwa Paulo amango alishwekerwe e Roma. (2 Ti. 1:8, 15) Bulagurhe? Ka baliyunvirhire Paulo eshonyi bulala abantu baliri bamubona nka nyankola-maligo? (2 Ti. 2:8, 9) Changwa si baliyubahire oku nabo bakalibuzwa? Babe baligwerhe empanvu nyinja changwa nanga, waza okuntu Paulo akwanene kuba ey’aliri achiyunva. Abaga alembere bibazo binene na chiro abaga ahebere akalamo kage omu buhanya eju yabo. (Mdo. 20:18-21; 2 Ko. 1:8) Rhurhabaga chiro kuguma n’abantu balahiraga kurhabala Paulo amango alikenere oburhabale! Bichi rhukwanene kuyibuka amango bene-berhu bagwerhe engabane bali balibuzwa?

10. Bichi rhukwanene kuyibuka amango bene-berhu bagwerhe engabane bali balibuzwa, na bulagurhe?

¹⁰ Oyibuke bulagurhe rhunalibuzwa na nde onarhuma rhwalibuzwa. 2 Timoteo 3:12 ederhere  ntya: “Balala boshi balonzeze kulama omu bushwekerezi ku Mungu n’obuguma haguma na Yesu Kristu nabo balibuzwa.” Bobo rhurhasomerwa okubona oku Shetani ahanene anahiga bene-berhu bagwerhe engabane amango amarhurhera. Alonzeze abola bene-berhu balekane obwimana bwabo emwa Yehova kandi alonzeze kurhuyubahisa nerhu.​—1 Pe. 5:8.

11. Bichi omufano gwa Onesiforo gwakarhuyigiriza? (2 Timoteo 1:16-18)

¹¹ Ogenderere kurhabala bene-benyu na bali-benyu onachishwekere kubo oku bwimana. (Osome 2 Timoteo 1:16-18.) Mukristu muguma w’omu myaka 100 ya burhanzi oyirikirwe Onesiforo, yewe arhalijirire kuguma n’abandi amango Paulo aliri omu pirizo. “Arhayunviraga [Paulo] eshonyi bulala alishwekerwe m’obugufu omu pirizo.” S’ahubwe Onesiforo alonza Paulo anachihangana kumuha oburhabale alikenere. Omu kujira ntyo, Onesiforo alihebere akalamo kage omu buhanya. Bichi ebyola birhuyigirize? Rhurhakwanene kuleka mpu abantu barhuyubahise changwa barhubuze kurhabala bene-berhu bali balibuzwa. S’aliko, rhubaderhere n’okujira okwerhu koshi yirhubarhabala. (Mez. 17:17) Bakenere oburhabale n’obuzigire bwerhu.

12. Bichi omufano gwa bene-berhu na bali-berhu be Russie gwarhuyigirize?

¹² Waza okuntu bene-berhu na bali-berhu b’omu Russie barhabere bene-babo bazigirwa baliri omu pirizo. Amango baguma baliri basambiswa, bene-berhu na bali-berhu banene baliri bayinja oku tribinale kubashigikira. Bichi ebyola byarhuyigirize? Amango bene-berhu bagwerhe engabane bamashobekwa, bamafarhwa, changwa kulibuzwa, omenye wayubaha. Obahebe omu sala, oshishikale emilala yabo, kandi, onalonze nka gurhe wakabarhabala.​—Mdo. 12:5; 2 Ko. 1:10, 11.

13. Nka gurhe abanarhushekera bakahanyagaza obunihire bwerhu mu Yehova n’olubaga lwage?

¹³ Abantu b’omu mulala gwerhu barhali Bahamirizi ba Yehova changwa aba rhunakola nabo, abarhunasoma haguma nabo bakarhushekera bulala rhunahubiri changwa bulala rhunakulikiza amakanuni ma Yehova. (1 Pe. 4:4) Bakaderha ntya: “Mbasima mwabo, aliko edini lyenyu libashwekere bwenene n’okuchiseza oku bintu bya mira.” Baguma bakarhuderha kubi eju y’okuntu rhunalama haguma n’abantu bachibirwe omu chibaga. Bakarhubaza ntya: “Nka gurhe mwakaja mwaderha oku mujira obuzigire?” Ebinwa bili nk’ebyola byakarhuma rhwagwarha engangane oku bilolere amakanuni ma Yehova. Rhwakahwanza kuchibaza ntya: ‘Ka Yehova ampemere ebi ntakagala kujira? K’olubaga lwage lurhushwekere bwenene? Akaba oli wahurana n’ehali eli nk’eyola, nka gurhe wakangenderera kubera hofi na Yehova n’olubaga lwage?

14. Nka gurhe rhukwanene kujira amango abantu bamarhushekera bulala rhulamire nk’oku amakanuni ma Yehova maderhere? (Zaburi 119:50-52)

¹⁴ Ogenderere kukenga amakanuni ma Yehova. Yobu aliri mulume okengere amakanuni ma Yehova chiro akaba baliri bamushekera amango aliri ajira ntyo. Muguma omu balumbwa mpu bera ba Yubu, alishondere chiro kuseza Yobu ayemere oku Mungu arhaba alagire amango amakenga amakanuni mage changwa nanga. (Yob. 4:17, 18; 22:3) Aliko Yubu alahira kuyemera obola bubeshi. Alimenyere amakanuni ma Yehova oku bilolere ebinja n’ebibi oku mali m’okuli. Anahigirira kumakenga. Arhalilekere abandi bamukula oku bushwekerezi bwage. (Yob. 27:5, 6) Bichi ebyola birhuyigirize? Omenye wayemera enchunaguzi zarhuma wagwarha engangane oku bilolere amakanuni ma Yehova. Waza oku byakuhikiire  wenyine omu kalamo. K’orhachibwenere mango manene oku amakanuni ma Yehova mali m’okuli n’oku maba makulerhera omuntu enyungu omu kalamo? Ohigirire okushigikira olubaga lwa Yehova lunakenga amola makanuni. Che chirhumire, chiro abantu barhushekera gurhe, rhurhakaleka haba n’akatyu kukolera Yehova.​—Osome Zaburi 119:50-52.

15. Bulagurhe Brizit aliri ashekerwa?

¹⁵ Rhushambale oku bi mwali-werhu muguma olamire omu Inde oyirikirwe Brizit agereremo. Abantu b’omu mulala gwage baliri bamushekera eju y’obwemere bwage. Amalire kubatizwa ntya omu mwaka gwa 1997, eba orhaliri Muhamirizi aheza akasi kage. Echola charhuma arhola esimikiro oku, Brizit, n’abanyere babo bahame baje kulama haguma n’abazere bage balilamire omu yindi vile. Aliko Brizit akahurene chiro n’ebindi bibazo bikomere bwenene. Bulala eba nta kasi alichigwerhe, byalihemere Brizit akole bwenene y’ahahira omulala gwage. Oku bwindi, echibaga chaliri hofi naye chaliri nk’oku bilometre 350. Ech’okugayisa, abantu b’omulala gw’eba bayinja bamupinga eju y’obwemere bwage. Obola bupinzali bwakaliha bwenene n’echola charhuma omulala gwage gwashuba kuhama. Naho, eba ayurukira afa. Enyuma w’ahola, mwali wage waligwerhe myaka 12 yonyine, av’afa n’obulwala bw’akansere. Omu kujira ehali eshube kubiha bwenene, abantu b’omulala bayinja bashobeka Brizit mpu yiwarhumire ebyola byoshi byarhengerera. Bayinja baderha oku nka arhabaga muguma w’omu Bahamirizi ba Yehova, obola buhanya boshi burhakarhengerere. Aliko agenderera kulangalira Yehova n’okubera hofi n’olubaga lwage.

16. Migisho mihe Brizit alipatire bulala alichishwekere ku Yehova n’oku lubaga lwage?

¹⁶ Bulala Brizit alilamire hale bwenene n’echibaga, omwimangizi w’omuzunguluko amuheba omurhima ayinje ahubiri omu eneo yage anayinje aongoza embuganano aha mwage. Burhanzi, alibwene oku ebyola bikomere bwenene. Aliko akulikira amola mahano mwene-werhu amuhaga. Ayinja ashambala emyazi minja haguma n’abandi, ayinja ajira embuganano omu mwage, n’okurheganya akasanzi k’okujira obuharamye b’omulala haguma n’abanyere  bage oku kahunda. Okujira ntyo kwalerha nyungu zihe? Brizit agala hwanzisa mafunzo manene me Biblia na banafunzi bage banene babatizwa. Omu mwaka gwa 2005 aba painiya w’oku kahunda. Agwarha emigisho bulala alilangalire Yehova analiri mwimana oku lubaga lwage. Abanyere bage bali bakolera Yehova oku bwimana kandi, hakala hali bibaga bibiri mw’eyola eneo zene! Brizit achizerere oku Yehova amuhere emisi y’okulembera ebibazo byage analembere okuntu abantu b’omulala gwage baliri bamushekera.

17. Bichi rhukwanene kuhigirira kujira?

¹⁷ Shetani alonzeze rhuwaze oku Yehova arhulekerera amango rhugwerhe ebibazo n’okushigikira olubaga lwa Yehova k’okw’ajira konyine akalamo kerhu kakomera bwenene. Shetani alonzeze rhuchiyunve rhuyubahire amango bene-berhu bagwerhe engabane bamashobekwa, bali balibuzwa, changwa bamashwekwa. Kandi kugerera abantu bali barhushekera, alonzeze rhurhagendereraga kulangalira amakanuni ma Yehova n’olubaga lwage. Aliko, rhumenyere bwinja amayeri mage changwa obulyalya bwage rhurhanarhebekwa. (2 Ko. 2:11) Ohigirire kukabulira obubeshi bwa Shetani, onagenderere kuyorha mwimana emwa Yehova n’olubaga lwage. Oyibuke, Yehova arhakakujahika haba n’akatyu. (Zb. 28:7) Bobola, nta chintu olekage chakucha ku Yehova!​—Ro. 8:35-39.

18. Bichi rhwashambalako omu mwazi gukulikireho?

¹⁸ Mu gunola mwazi, rhwashambere oku bibazo rhwakahurana birhengere oku bantu barhali Bahamirizi ba Yehova. Aliko obulangalire bwerhu emwa Yehova n’olubaga lwage bwakashuba kugeregezwa n’ebibazo birhengerere omu chibaga. Bichi byakarhurhabala rhuhime ebyola bibazo? Rhwaganira kw’echola omu mwazi gukulikireho.