1-2. Bulangalire buchi bukulu Abakristu b’okuli bagwerhe?

OBULANGALIRE buli bw’akamaro bwenene. Obulangalire bwa bantu baguma buba buyumangire omu kugwarha obunyumpa bwinja, kugwarha abana bagwerhe amagala menja, changwa kufuma obulwala bukomere. Nerhu nka Bakristu rhwakalangalira okugwarha ebintu bili nk’ebyola. Aliko obulangalire bwinja kulusha obola, buli bulangalire rhugwerhe bw’akalamo k’esiku n’amango nji rhwalama haguma n’abazigirwa berhu bafire omu siku zayinjire.

² Entumwa Paulo yaliderhere ntya: “Ingwerhe obulangalire emwa Mungu . . . oku nji haba obufuke bw’ab’okunali n’abarhali b’okunali.” (Mdo. 24:15) Paulo arhaliri murhanzi kuganirira eju y’obulangalire b’obufuke. Omushosi w’echisisi Yubu, naye alibushambereko. Alilangalire oku Mungu akamuyibukire n’oku akamufulire.​—Yob. 14:7-10, 12-15.

3. Bulagurhe rhwakayunguka na 1 Wakorinto sura 15?

³ “Obufuke bw’abafire” chili chigabi “ch’omusinji,” changwa “lwigirizo l’omusinji,” lw’enyigirizo zoshi z’Abakristu. (Ebr. 6:1, 2) Ebi Paulo aderhaga eju y’obufuke, bibonekene omu 1 Wakorinto sura 15. Eby’ayandikaga byalikwanene kuheba Abakristu ba burhanzi omurhima bwenene. N’eyola sura yakarhuheba omurhima n’okukomeza obulangalire bwerhu oku nji haba obufuke.

4. Bulagurhe rhwakayemera oku kweri abazigirwa berhu bafire, nji bafuka?

⁴ Obufuke bwa Yesu Kristu bukomeze obulangalire bwerhu oku bazigirwa berhu bafire. Obufuke chaliri chigabi “ch’emyazi minja” Paulo abwiraga abantu be Korinto. (1 Ko. 15:1, 2) Aj’aderha oku nk’Omukristu arhayemerere obufuke,  obwemere bwage ntacho bumalire. (1 Ko. 15:17) Obufuke bwa Yesu eli mpanvu erhumire rhwaderha oku nji haba obufuke.

5-6. Bichi ebinwa bili omu 1 Wakorinto 15:3, 4 birhuyigirize?

⁵ Amango Paulo ahwanza kuganirira eju y’obufuke, aderha bintu basharhu. Byebinola: 1) “Kristu afaga eju y’ebyaha byerhu.” 2) “Ahambwa.” 3) “Anafuka omu lusiku lwa kasharhu nk’oku Amandiko mayerekene.”​—Osome 1 Wakorinto 15:3, 4.

⁶ Bichi okufa, okuhambwa n’okufuka kwa Yesu kurhuyigirize? Omulebi Isaya alilebere oku Masiya “akachibirwe omu chihugo ch’abazene n’okuhambwa haguma n’ababi.” Aliko hali echindi chintu chakarhengerere. Isaya ashuba kuderha oku Masiya akahekere “echaha cha bantu banene.” Yesu ajiraga ntyo amango ahana akalamo kage nka nchungu. (Isa. 53:8, 9, 12; Mt. 20:28; Ro. 5:8) Bobola olufu, okuhambwa n’okufuka kwa Yesu kurhuhere empanvu zinja z’okulangalira oku rhwakachunguka kurhenga omu chaha n’olufu n’okushuba kulama haguma n’abazigirwa berhu bafire.

7-8. Bichi byarhabalaga Abakristu bayemere oku Yesu afukire?

⁷ Yi rhuyemera oku nji haba obufuke, rhukwanene kurhanga kuyemera oku Yesu alifukire. Bulagurhe rhwakayemera oku kweri Yehova alifulire Yesu?

⁸ Haliri bantu banene balichibwenere n’okuhamiriza oku Yesu afukire. (1 Ko. 15:5-7) Omuhamirizi murhanzi Paulo aderhaga, yaliri ntumwa Petro (Kefa). Echigusho ch’abanafunzi chaliyemezeze oku Petro aliriho oku Yesu afuka. (Lu. 24:33, 34) Kandi, “entumwa,” zalibwene Yesu enyuma z’obufuke bwage. Lero Kristu “aj’arhengerera bene-berhu 500 chaligumira,” nkabaga oku mbuganano nkulu y’obusime omu Galilaya eganirirwe omu Matayo 28:16-20. Kandi Yesu “alirhengerere Yakobo,” waliri mudorho-wage, orhaliyemerere burhanzi oku Yesu ali Masiya. (Yoh. 7:5) Amango Yakobo abona oku Yesu afukire, aj’ayemera. Bisimisize okubona oku omu myaka ya 55 N.K.Y. ntya, amango Paulo ayandikaga amala maruba, haliri bantu banene balihamirize oku obufuke bwabereho, che chirhumire omuntu wakaganganire oku Yesu afukire, akajire baza abachiboneraga balichiliho.

9. Nk’oku olwandiko lwa Matendo 9:3-5 luderhere, bulagurhe Paulo naye akahamirize obufuke bwa Yesu?

⁹ Buzinda Yesu arhengerera Paulo bwage-bwage. (1 Ko. 15:8) Paulo (Sauli) aliri omu njira eyi ali ayerekeza Edamasko amango ayunva omulenge gwa Yesu wafukire n’okubona echibonekezi chage omu mbingu. (Osome Matendo 9:3-5.) Ebi Paulo naye achiboneraga, byaja byashuba kuyemeza oku kweri Yesu afukire.​—Mdo. 26:12-15.

10. Bichi Paulo alijirire enyuma y’okuyemera oku Yesu afukire?

¹⁰ Bantu baguma bakasimisizwe n’ebi Paulo y’aderha bulala embere Yesu amurhengerere, aliri alibuza Abakristu. Enyuma z’okumala kuyemera oku Yesu afukire, Paulo achihangana bwenene kuyemeza abandi obola bukweri. Alilembere okushurhwa, okuhebwa omu pirizo, n’okuzika amango aliri ahubiri oku Yesu afukire n’okushuba kulama. (1 Ko. 15:9-11; 2 Ko. 11:23-27) Paulo alimenyere oku Yesu alifukire, analiri tayari kufa eju y’okuhamiriza obola bwemere bwage. K’obola buhamirizi bw’Abakristu ba burhanzi, burharhuyemezeze oku Yesu alifukire si? Ka burhanakomeze obwemere bwawe omu bulangalire b’obufuke?

11. Bulagurhe bantu baguma omu Korinto bagwarhaga amawazo mabi eju y’obufuke?

¹¹ Bantu baguma ba Bagiriki omu vile ye Korinto, baligwerhe amawazo mabi eju y’obufuke, na baguma mubo baliri baderha ntya: “Harhakaba obufuke bw’abafire.” Bulagurhe? (1 Ko. 15:12) Bafilozofe b’omu yindi vile ye Bugiriki k’okuderha evile ye Atene, barhaliyemerere chiro n’akatyu oku Yesu alifukire. Nantyo, bantu baguma b’omu Korinto bakaba eyi baligwerhe amawazo mali nk’amola. (Mdo. 17:18, 31, 32) Abandi bakaba eyi baliri bawaza ok’obufuke burhaliri bufuke nya bufuke. Balema bawaza oku omuntu “anafa” omu chaha aliko anashuba kugalukira “akalamo” amango amaba Mukristu. Ebe mpanvu ehe yarhumaga abola bantu barhayemera obufuke, obwemere bwabo ntacho bwalimalire. Akaba Mungu arhafulaga Yesu, k’okuderha oku nta nchungu yalilipirwe, n’ebyaha byabo birhababalirwaga. Bobola balala boshi barhaliyemerere obufuke, barhaliherhe obulangalire b’okuli.​—1 Ko. 15:13-19; Ebr. 9:12, 14.

12. Nk’oku olwandiko lwa 1 Petro 3:18, 22 luyerekene, nka gurhe obufuke bwa Yesu burhali kuguma n’obw’abandi bantu bafukaga embere?

¹² Paulo naye bwage-bwage aliyemerere oku “Kristu alifukire kurhenga omu bafu.” Obola bufuke bwaliri bwinja bwenene kulusha obufuke bw’abafukaga oku gulu embere, bulala balishubire kufa. Paulo aliderhere oku Yesu aliri “malehe marhanzi ma balala bahondoberere omu lufu.” Mu njira nchi Yesu aliri murhanzi? Aliri muntu murhanzi kufuka nka chilemwa ch’eroho, na murhanzi kufuka n’okuja embingu.​—1 Ko. 15:20; Mdo. 26:23; osome 1 Petro 3:18, 22.

13. Bichi Paulo aderhaga birhumire Adamu aba eyi arhali kuguma na Yesu?

¹³ Nka gurhe olufu lwa muntu muguma lwakalerhera amamiliyoni m’abantu akalamo? Paulo ahanire echishubizo chili wazi kw’echola chibazo. Afasiriye etofauti eli ahakagarhi k’ebintu byahikiraga abantu eju y’ebi Adamu ajiraga, n’obushobozi rhugwerhe kugerera enterekero ya Kristu. Oku bilolere Adamu, Paulo aliyandikire ntya: “Olufu lwayinjaga kugerera omuntu.” Amango Adamu ajiraga echaha, achilerhera obuhanya yewe yenyine n’abantu b’omulala gwage. Rhugenderere kuhurana n’ebyago bibi eju y’okurhakenga kwage. Aliko bulala Mungu afulire Omugala, rhugwerhe obushobozi b’okupata akalamo kenja omu siku zayinjire! “Obufuke bw’abafire nabo bwalerhwa kugerera omuntu,” k’okuderha Yesu. Paulo ayongera ntya: “Nka kulala kugerera Adamu, abantu boshi banafa, konakuguma kugerera Kristu, abantu boshi nji bashuba kulama.”​—1 Ko. 15:21, 22.

14. Adamu nj’anafuka si? Ofasiriye.

¹⁴ Bichi Paulo alonzaga kuderha amango aderha oku “kugerera Adamu abantu boshi banafa”? Paulo aliri aganirira eju y’abantu boshi bashokwere echaha n’okurhashinganana kugerera Adamu, banali omu buja b’olufu. (Ro. 5:12) Adamu arhali ahakarhi ka balala “nji bashuba kulama.” Adamu arhayungukaga n’enchungu ya Kristu bulala aliri muntu oshinganene wachishogaga kurhakenga Mungu. Ebyahikire Adamu bifarhene n’ebilingire abantu “Mwene omuntu” nj’achibira olubanja nka “mpene” k’okuderha “lufu lw’esiku n’amango.”​—Mt. 25:31-33, 46; Ebr. 5:9.

15. “Boshi nji bashuba kulama,” baheberwe mu bande na bande?

¹⁵ Paulo aderhaga oku “muli Kristu boshi  nji bashuba kulama.” (1 Ko. 15:22) Paulo ayandikaga amaruba mage oku Bakristu bashigwa balilamire omu vile ye Korinto bakafukire n’okuja kulama embingu. Abola Bakristu “balichesezwe omu buguma na Kristu Yesu, bahamagalwaga yi baba bachesibwa.” Paulo ashuba kuderha eju ya “balala bahondomberere omu lufu omu buguma haguma na kristu.” (1 Ko. 1:2; 15:18; 2 Ko. 5:17) Omu mandi maruba mage mayerekezwe n’eroho lichesibwa, Paulo ayandikaga oku balala “baheberwe haguma na [Yesu] omu mufano g’olufu lwage,” nji “bahebwa haguma naye omu mufano g’obufuke bwage.” (Ro. 6:3-5) Yesu afulwaga ey’ali chilemwa ch’eroho, anaja embingu. Bobola ebyola bi nji byahikira abantu boshi bali “omu buguma haguma na Kristu,” k’okuderha Abakristu bashigwa boshi.

16. Bichi Paulo alonzaga kuderha amango ayirika Yesu “malehe marhanzi”?

¹⁶ Paulo ayandikaga oku Kristu afukaga nka “malehe marhanzi ma balala bahondomberere omu lufu.” Oyibuke oku abandi bantu nka Lazaro, balifukire oku gulu, aliko Yesu yiwaliri murhanzi kufuka nka chilemwa ch’eroho, n’okugwarha akalamo k’esiku n’amango. Alikwanene kuhuzanywa n’amalehe marhanzi Abaizraeli baliri bahana nka ntulo emwa Mungu. Kandi, omu kuyirika Yesu “malehe marhanzi,” Paulo aliyerekene oku hali abandi bantu bakafulirwe enyuma za Yesu n’okuja kulama embingu. Entumwa n’abandi bali “omu buguma haguma na Kristu,” bakakulikire Yesu. Bakapatire obufuke buli nk’obu Yesu apataga omu kasanzi kakwanene.

17. Mango mahe balala bali “omu buguma haguma na Kristu” bakahabirwe oluhembo lwabo l’okuja kulama embingu?

¹⁷ Obufuke b’okuja kulama embingu bwa balala bali “omu buguma haguma na Kristu,” burharhonderaga amango Paulo ayandikiraga Abanya-korinto. Paulo aliyerekene oku bwakarhengerere omu kasanzi kali embere. Ayandikire ntya: “Buli muguma oku lwage; Kristu malehe marhanzi, buzinda balala bali ba Kristu omu mango m’okubaho kwage.” (1 Ko. 15:23; 1 Te. 4:15, 16) Zene rhulamire mw’akola kasanzi kaderhwaga “k’okubaho” kwa Kristu. Entumwa n’abandi Bakristu bashigwa, balikwanene balinge okubaho kwa Kristu yi bahabwa oluhembo lwabo l’okuja embingu n’okuba “omu buguma na [Yesu] omu mufano g’obufuke bwage.”

18. a) Bulagurhe rhwakaderha oku nji haba obwindi bufuke olekere obufuke bw’ab’okuja embingu? b) Nk’oku olwandiko lwa 1 Wakorinto 15:24-26 luderhere, bichi nji byaba omu mbingu?

¹⁸ Aliko si, bichi nji byabera Abakristu bimana barhagwerhe obulangalire b’okuja kulama omu mbingu haguma na Kristu? Nabo bagwerhe obulangalire b’obufuke. Ebiblia ederhere oku Paulo n’abandi b’okuja embingu, bali bafuka “omu bufuke burhanzi bw’abafire.” (Flp. 3:11) Echola chirhayerekene oku hakabere obwindi bufuke enyuma y’obola si? Ebyola bifarhene n’ebi Yubu aderhaga byakarhengerere omu siku zayinja. (Yob. 14:15) “Balala bali ba Kristu amango m’okubaho kwage” nji baba bali haguma na Yesu omu mbingu amango nj’amaliriza amarhegesi moshi, obukulu boshi, n’oburhambo. Chiro “n’omushombanyi muzinda, olufu,” nj’ahindulwa mu busha. Balala boshi bafuka n’okuja embingu, barhakachifa. Aliko si, bichi nji byahikira abandi?​—Osome 1 Wakorinto 15:24-26.

19. Bichi balala bagwerhe obunihire b’okulama oku gulu bakalangalira?

¹⁹ Bichi balala bagwerhe obunihire b’okulama oku gulu bakalangalira? Bagwarha obulangalire buyumangire oku binwa bya Paulo biderhere ntya: “Ingwerhe obulangalire . . . oku nji haba obufuke bw’ab’okunali n’abarhali b’okunali.” (Mdo. 24:15) Okuderha okuli, nta muntu orhali w’okunali wakaja embingu, che chirhumire ebyola binwa biyerekene oku nji haba obufuke oku gulu omu siku zayinjire.

20. Nka gurhe obunihire bwawe omu bulangalire b’obufuke bwamakomezwa?

²⁰ Nta ngangane, “nji haba obufuke”! Balala nji bafuka yi balama oku gulu, nji bagwarha obushobozi b’okulilamako esiku n’amango. Wakayemera oku echola chilagane nji chayenera. Obola bulangalire bwakakurhuliriza amango wamawaza oku bazigirwa bawe bafire. Nji bakafulwa amango Kristu n’abandi nji “barhegeka nka bami . . . mu yaka 1 000.” (Ufu. 20:6) Nawe wakachizera oku nka wamafa embere y’oburhegesi bwa Yesu bwa myaka chihumbi, nji wafuka. Obola “bulangalire burhali bwa kuchika enzoka.” (Ro. 5:5) Bwakakuheba emisi zene n’okushuba kukuyongerera obusime omu kasi ka Mungu. Aliko hali bintu binene rhwakayiga omu 1 Wakorinto sura 15, nk’oku omwazi gukulikire nji gwayerekana.