1. Bichi buli muguma werhu akwanene ajire?

WAKASIMA olibirhe omu mulindi oyinji ku gurhayorohere, amango ochiyunvirhe olwere, changwa ochokere si? Byakashoboka oku nanga. Aliko entumwa Paulo, yaderha oku abakristu b’okuli boshi bali omu mulindi. (Ebr. 12:1) Akaba rhulonzeze rhupate oluhembo Yehova arhurheganyize, buli muguma werhu, abe musole changwa mushaja, abe aherhe emisi changwa aluhire, akwanene alembere kugera oku buzinda.​—Mt. 24:13.

2. Nk’oku biyandikirwe omu lwandiko lwa 2 Timoteo 4:7, 8, charhumaga Paulo agwarha obuhuru b’okuderha ntyo?

² Paulo aliyunvirhe obuhuru b’okuderha, bulala aligalire “kulibirha omulindi kugera oku buzinda.” (Osome 2 Timoteo 4:7, 8.) Aliko si, bichi Paulo aliri aderhera kanuni?

3. Mulindi guhe Paulo aliri aderha ko?

³ Hali amango Paulo aliri akolesa ebyaliri byajirika omu masharha maliri majirwa omu Grece ya mira, yi ayigiriza amahano m’akamaro. (1 Ko. 9:25-27; 2 Ti. 2:5) Mango manene, aliri akolesa okuntu banalibirha omu mulindi omu kushushanya amalibirha m’akalamo k’echikristu. (1 Ko. 9:24; Gal. 2:2; Flp. 2:16) Eyi omuntu achihana emwa Yehova n’okubatizwa, aho han’ahola anahwanza ogola “mulindi”. (1 Pe. 3:21) Anarhaluka omusitari g’obuzinda amango Yehova amamuyemerera amuha oluhembo lw’akalamo k’esiku n’amango.​—Mt. 25:31-34, 46; 2 Ti. 4:8.

4. Bichi rhwabona mu gunola mwazi?

⁴ Ngahe okulibirha omulindi gulehere bwenene oku magulu bibuganene n’okulama akalamo k’echikristu? Bibuganene ku bintu binene. Leka rhulole bisharhu mu byo. Ech’oburhanzi, rhukwanene kukulikira amakanuni m’amalibirha; echa kabiri,  rhukwanene kuseza obwenge oku musitari g’obuzinda; n’echa kasharhu, rhukwanene rhuhime ebibazo rhwayinja rhwabugana omu njira.

5. Malibirha mahe rhukwanene kukulikira, na bulagurhe?

⁵ Y’omuntu akwanana kuhabwa oluhembo omu mulindi nya mulindi, abali balibirha bakwanene bakulikire amakanuni abapangaga ogola mulindi bahirireho. Konako, akaba rhusimire rhupate oluhembo lw’akalamo k’esiku n’amango, birhuhemere rhukulikire okuntu amalibirha m’echikristu makwanene majirwe, changwa enjira y’akalamo k’echikristu. (Mdo. 20:24; 1 Pe. 2:21) Aliko, Shetani n’abanakulikira olwiganyo lwage, barhasimire rhukakulikira enjira y’akalamo k’echikristu; si balonzeze “rhugenderere kulibirha haguma nabo.” (1 Pe. 4:4) Banabonerera amalibirha m’akalamo rhunakulikira, n’okuchishinga oku enjira bali bakulikira ye nyinja kulusha, n’oku eyerekeze oku buhuru. Aliko eyola mishingo eli ya bubeshi.​—2 Pe. 2:19.

6. Bichi omufano gwa Brian gukuyigirize?

⁶ Olala yeshi oli walibirha haguma na balala bali bashumikwa n’elila gulu lya Shetani, arhalegama kurhegera oku gasi enjira bachishogere erhayerekeze oku buhuru, si eyerekeze ewa kubajira baja ba Shetani, n’enyifinjo zabo bonyine. (Ro. 6:16) Waza oku mufano gwa Brian. Abazere bage baliri bamuheba omurhima akulikire amalibirha m’akalamo k’echikristu; aliko agerere omu mango m’olubiruko, ahwanza kuchibaza akaba kweri eyola njira yakamulerhera obusime. Brian achishoga kulibirha haguma n’abalilamire omu kukulikira amahano ma Shetani. Aderhere ntya: “Siku zigeke ntya tu, narhegera oku obola bulumbirwe mpu buhuru bwakangezeze oku bugali. Enyuma w’esiku, nahwanza kunywa erumba, okurhamira bwenene n’okuba mumaguza. Myaka migeke yakulikiragaho, nagenderera kuhwanza nanywa amafumu m’okulalusa makomere bwenene, kugera oku chihe ch’okuba muja w’ebili nk’ebyola. . . . Nahwanza kuchuruza amafumu m’okulalusa y’ingala kugendereza ezola ngeso zani.” Buzinda, Brian achishoga okulama omu kukulikiza amakanuni ma Yehova. Ahindamula enjira y’akalamo n’okubatizwa omu 2 001. Zene aherhe obusime b’okuli bulala akulikire enjira y’akalamo k’echikristu. *

7. Nk’oku Matayo 7:13, 14 eyerekene, mabarabara mahe mabiri machirwe embere zerhu?

⁷ Kweri, okuchishoga kukulikira enjira y’okuli kuli kwinja bwenene! Shetani alonzeze rhuleke kulibirha omu barabara ligeke “liyerekeze oku kalamo” rhuje omu barabara ligalihire abantu banene ba linola gulu bali bageramo. Elyola barabara lili mu bantu banene linayanguhire okuligeramo. Aliko “liyerekeze  ewa kuharabiswa.” (Osome Matayo 7:13, 14.) Yirhubera omu barabara ly’okuli buzira kuhugiswa n’abarhali balibirha mulyo, rhukwanene rhulangalire Yehova n’okumuyunviriza.

8. Nk’oli alibirha amasirhala, gurhe anajira?

⁸ Abali balibirha omu mulindi gulehere, banagenderera kuseza amasu embere zabo omu barabara yi barhasirhala. Aliko, oku buhanya hali oku omuntu akarhegwa n’owabo ali alibirha naye, changwa anashikamira omu rhushimu rhwakaba omu barabara. Nka bamachikuba, banayimanga juba-juba n’okugenderera kulibirha. Barhaseza obwenge oku byabakubaga, s’ahubwe oku musitari g’obuzinda n’oluhembo banihire okupata.

9. Amango rhwamasirhala, bichi rhukwanene kujira?

⁹ Omu mulindi gwerhu, hali oku rhwakasirhala kanene, rhwanagoma omu birhuli rhwaderha changwa rhwajira. Changwa kandi owerhu rhuli rhwalibirha naye anajira egosa lirhubabeze. Rhurhakwanene kusomerwa. Rhweshi rhurhashinganene, yirhwanalibirha rhweshi omu barabara lifunderere liganire oku kalamo. Che chirhumire rhurhakafunda “kusirhalanako” mango maguma-maguma. Paulo aliyemerere oku nechi hali amango buli muguma werhu “akagwarha echafa n’owabo.” (Kol. 3:13) Aliko ahali h’okuseza obwenge oku byarhusirheze, muleke rhuhanze rhwaseza obwenge oku luhembo luli embere zerhu. Nka rhwamasirhala, rhuhanze rhwayimanga n’okugenderera kulibirha. Nka rhuyorhene oburhe n’omugayo, rhurhakagera oku musitari g’obuzinda n’okupata oluhembo. N’echindi, hali oku rhwakaba bisirhazo oku bandi bali bachihangana kulibirha mw’elila barabara lifunderere liganire oku kalamo.

10. Gurhe rhwakachilanga rhurhaba “chintu ch’okusirhaza” oku bandi?

¹⁰ Eyindi njira rhwakayaka m’okuba “chintu ch’okusirhaza” oku berhu rhuli rhwalibirha nabo, kuli kugendera oku bibasimisize nka byakashobokana ahali h’okuhanzika oku birhusimire byonyine. (Ro. 14:13, 19-21; 1 Ko. 8:9, 13) Omu kujira ntyo, rhurhali kuguma n’abali balibirha omu mulindi nya mulindi. Baba eyi bali balwisa ababo bali balibirha nabo, na buli yeshi oli walibirha eyi ali achilwirako yenyine ye habwage oluhembo. Abola banalibirha baba eyi bali bawaza oku bibalolere hoshaho. N’eju y’echola hali oku bakanalonza bashunike ababo  eburhambi yi babarhaluka. Tofauti n’okola, rhwewe rhurhali rhwalwisanya buli muguma n’owindi. (Gal. 5:26; 6:4) Omuhigo gwerhu kuli kurhabala bantu banene nk’oku byakashobokana koshi balibirhe kugera oku musitari g’obuzinda n’okuhabwa oluhembo lw’akalamo haguma nerhu. Che chirhumire rhunachihangana kukolesa empanulo ya Paulo yayerekezwaga n’eroho ederhere oku “rhugenderere kulola, arhali enyungu yerhu rhwenyine, si n’enyungu y’abandi.”​—Flp. 2:4.

11. Bichi abanalibirha banaseza k’obwenge, na bichi birhuma?

¹¹ Olekere okulola embere zabo omu barabara, abali balibirha omu mulindi nya mulindi banaseza obwenge oku musitari g’obuzinda. Chiro akaba oku barhakabona ogola musitari n’amesho mabo, bakawaza gurhe bakaba bali bagurhaluka n’okukamarha oluhembo. Banagenderera kuyorha badugurhire amango bali bachapa oluhembo omu bwenge.

12. Bichi Yehova arhuhere oku lukogo lwage?

¹² Omu mulindi rhuli rhwalibirha, Yehova, oku lukogo lwage ahere abantu bage echilagane ch’oluhembo lw’akalamo k’esiku n’amango omu mbingu changwa oku gulu nka bamalire omulindi. Ebiblia ebere yarhulanguza gurhe olola luhembo nji lwaba, omu kuntu rhwakaba rhwawaza gurhe akalamo kerhu nji kakwira. Amango moshi rhugenderere kubika obunihire bwerhu omu bwenge n’omu murhima, ku rhurhakanayemera echintu n’echiguma cha rhusirhaza hoshaho.

13. Bichi rhulushire abali omu malibirha nya malibirha?

¹³ Abaliri balibirha omu masharha m’omu Grece balikwanene balwise ebibazo nk’omuluho n’amalumwa. Aliko boshi balikwanene balangalire ebibayigire n’emisi yabo. Rhuli kuguma nabo bulala nerhu yirhwahabwa enyigirizo zirhuyerekere gurhe rhwakagenderera kulibirha omulindi rhulimo. Aliko rhulushire abali omu malibirha nya malibirha. Rhwewe rhwakahabwa emisi na Yehova, shoko y’emisi erhaherhe lugero. Nka rhulangalire Yehova, alaganyize oku arharhuha enyigirizo zonyine, s’arhuha n’emisi!​—1 Pe. 5:10.

14. Gurhe olwandiko lwa 2 Wakorinto 12:9, 10 lurhurhabere kulwisa ebibazo?

¹⁴ Paulo alilwisize bibazo binene. Olekere oku dukangwa n’okurhindibuzwa n’abandi, hali amango aliri ayunva obuzamba, analiri agugumbana n’echayirikaga mpu “mushaki omu mubiri.” (2 Ko. 12:7) Aliko ahali h’okubona ebyola bibazo byoshi nka mpanvu y’okuleka kukolera Yehova, abirhola oku bimuhere akasanzi k’okulangalira Yehova. (Osome 2 Wakorinto 12:9, 10.) Bulala Paulo alibirholere ntyo, Yehova amurhabala omu milago yage.

15. Nka rhuyiganyize Paulo, bichi rhwakachibonera?

¹⁵ Nerhu rhwakadukangwa changwa rhwanarhindibuzwa oku bwemere bwerhu. Rhwakaba rhuli rhwagugumbukana n’obulwala bukomere changwa rhwanachiyunva rhuhwere. Aliko nka rhuyiganyize Paulo, rhwakarhola ebyola bibazo byoshi oku byakahindamuka bisanzi by’okuchibonera obuzigire n’oburhabale bwa Yehova.

16. Chiro wakaba orhaherhe amagala menja, bichi wakajira?

¹⁶ Olyamire omu kashanjaga, changwa oyikere omu kinga ly’ebilema si? Oyunvirhe amadwi [amavi] yimaluma, changwa orhachili wabona bwinja si? Akaba ntyo, wakaja wagala kulibirha haguma n’abachili misole baherhe n’amagala makwirire si? Nechi kweri, wakagala! Bashaja banene n’ebilema yibalibirha omu barabara liganire oku kalamo. Barhakagala kujira ntyo oku misi yabo bonyine s’ahubwe, banadoma oku misi ya Yehova omu kuyunviriza embuganano z’echikristu chiro ahubwe oku telefone, changwa kugerera amavideo babarholeraga. Nabo banakola oku kasi k’okujira abanafunzi omu kuhubiri ba  dogutere, abanabachunga, n’abantu baherhe obuko nabo.

17. Gurhe Yehova anachiyunva kuyerekera abaherhe emibiri erhachigalire?

¹⁷ Chiro waba orhakagala kujira byoshi wakasimire okolere Yehova, orhahira okavunika omurhima n’okuwaza oku orhachigala kulembera kugera oku buzinda bw’elila gulu. Yehova akusima eju y’obwemere bwawe na byoshi wagereremo wanalembera. Okenere oburhabale bwage zene kulusha amandi mango moshi, arhanakulekerera. (Zb. 9:10) Ahubwe, ahola akuyegera bwenene. Waza oku bi mwali-werhu muguma waliherhe ebibazo by’amalwala aderhere: “Bulala ebibazo by’omubiri gwani yibyagenderera kukula, inambona oku binaba nka byapunguka eyi nabwira abandi oku bukweri bwe Biblia. Aliko imenyere oku hityuli nakajira omu kusimisa Yehova, hinanderhera obusime nani.” Amango wamachiyunva kubi, oyibuke oku orhali wenyine. Owaze oku lwiganyo Paulo alilekere, oyibuke n’ebinwa byage bihumire oku murhima: “inanyunva inchishingire obuzamba, . . . bulala eyi indi muzamba, ahola nanayunva imperhe emisi.”​—2 Ko. 12:10.

18. Chibazo chihe chabo-chabo bantu baguma bali bahurana?

¹⁸ Baguma omu bali balibirha omu barabara liganire oku kalamo, baherhe echindi chibazo. Yibalwisa ehali zabo-zabo abandi barhakabona changwa barhakamenya. Omufano, yibalwisa okuvunika omurhima changwa banayunva bahwererwe eju y’obuba bw’akalamo. Bulagurhe echola chili chibazo chikomere abola berhu bakozi ba Yehova yibalwisa? Bulala amango omuntu avunikire okuboko, changwa ayikere omu kinga ly’ebilema, buli muntu akabona echibazo y’alwisa n’okubona oku bihemere arhabalwe. Aliko, abali balwisa ebibazo by’obulyo b’okuchiyunva n’ebindi biberere erhwe, bakaba eyi ntacho chiyerekene oku bali balibuka. Omugayo gwabo gunali kuguma n’og’omuntu oherhe echirumbu chivunikire, aliko abantu barhakababera obonjo chiro mpu babarhabale kuguma.

19. Bichi omufano gwa Mefibosheti gwakarhuyigiriza?

¹⁹ Akaba olamire eyi oherhe ebi orhakagala kujira n’okubona oku abandi barhakuyuvirhe, wakagwarha emisi kugerera olwiganyo lwa Mefibosheti. (2 Sa. 4:4) Aliri alwisa echibazo ch’obulema, ashuba kuchirwa olushinja kubi n’Omwami Daudi. Intacho Mefibosheti alijirire y’apata ebyola bibazo. Aliko arhayemeraga ayorhana akahinda; aliri asimira ebinja aherhe omu kalamo, aliherhe eshukurani oku bwinja boshi Daudi abaga amuyerekere omu mango mageraga. (2 Sa. 9:6-10) N’eju y’echola Daudi ajire amuchira olushinja kubi, Mefibosheti achihangana abone ebyagerere n’ebyabere byoshi haguma. Arhayemeraga egosa Daudi  ajiraga lyamushula oburhe. Arhanabikangulaga Yehova. Mefibosheti aseza obwenge oku biyewe akagalire kujira omu kugwasa omwami Yehova ashimikire. (2 Sa. 16:1-4; 19:24-30) Yehova ayandikisize olwiganyo lwinja lwa Mefibosheti omu chinwa chage yi lurhuyigiriza.​—Ro. 15:4.

20. Gurhe emilago yakarhuma baguma bachiyunva, aliko bichi wakachizera?

²⁰ Eju y’okuyunva bababere bwenene, bene-berhu na bali-berhu baguma banayunva bagayire bwenene n’okuchikunjira oku byabo bonyine amango bakaba bali haguma n’abandi. Bakabona nka bikomere okuba ah’abandi bali, aliko banagenderera kuja oku mbuganano n’oku mbuganano zikulu. Banabona oku chili chibazo okuderhesa omuntu barhenji, aliko banachihangana kuderhesa abandi omu mahubiri. Akaba nawe intyo ku bili, omenye bwinja oku orhali wenyine. Banene bali balwisa ebibazo bili nk’ebyawe. Oyibuke oku Yehova anasimiswa n’okuntu onalwisa okwawe koshi. Okuba orhaza kuleka kumukolera, kuyemezeze oku ali akugisha n’okukuha emisi okenere. * (Flp. 4:6, 7; 1 Pe. 5:7) Akaba oli wakolera Yehova chiro akaba yi walembera obulwala changwa ebibazo birhumire orharhulera, wakachizera oku oli wasimisa Yehova.

21. Kugerera oburhabale bwa Yehova, bichi rhweshi rhwagala kujira?

²¹ Chaziga hali ebi omulindi nya mulindi n’omulindi Paulo aderhaga bipishene ko. Omu malibirha nya malibirha m’omu mango Ebiblia yayandikwaga, muntu muguma yenyine waliri wahimana n’okuhabwa oluhembo. Tofauti nantyo, buli yeshi walembera oku bwimana omu njira y’echikristu eganire oku kalamo, ahabwa oluhembo lw’akalamo k’esiku n’amango. (Yoh. 3:16) Echindi, abali balibirha omu mulindi nya mulindi, bakwanene babe eyi baherhe olurhege; akaba arhali ntyo, ntako bakahimana. Omu mulindi gw’akalamo gowe, banene mu rhwewe barhaherhe lurhege, aliko yi bagenderera kulembera. (2 Ko. 4:16) Kugerera oburhabale bwa Yehova, rhweshi rhwalibirha omulidi kugera oku buzinda!