1. Eyi rhwayunva echinwa “okuli,” bichi binarhuyorha omu bwenge?

“GURHE wamenyaga okuli?” “Waburhirwaga mo si?” “Kasanzi kangana gurhe wamamala omu kuli?” Nkabaga wachigerere kubazwa ebibazo bili nk’ebyola, changwa nkabaga nawe wachigerere kubibaza abandi. Eyi rhwayunva echinwa “okuli,” bichi binarhuyorha omu bwenge? Ahanene, rhunachikolesa omu kuyerekana obuyemere bwerhu, enjira yerhu y’okuharamya, n’emilamire yerhu. Abantu bali “omu kuli” bamenyere ebi Ebiblia eyigirize, banalamire nk’oku amakanuni mali mo maderhere. Che chirhumire, bali huru kurhenga omu bubeshi bw’amadini, banagwerhe obusime omu kalamo chiro akaba oku balamire omu gulu lya Shetani.​—Yoh. 8:32.

2. Nk’oku olwandiko lwa Yohana 13:34, 35 luderhere, byakaba eyi bichi binazigana kurhuma omuntu ayinja omu kuli?

² Ahanene, bichi byakulerhaga omu kuli? Nkabaga kwakaba kuchigendesa bwinja kw’abantu ba Yehova. (1 Pe. 2:12) Changwa nkabaga buli buzigire baliri bayerekana ahakagarhi kabo. Banene banagera oku mbuganano ob’oburhanzi, banachibonera obola buzigire n’okugenderera kubuyibuka kulusha buli chintu chaderhwaga oku mbuganano. Echola chirhakasomeza bulala Yesu aliderhere oku abanafunzi bage bakamenyikene kugerera obuzigire bayerekana buli muguma n’owindi. (Osome Yohana 13:34, 35.) Aliko hali bintu binene bihemere rhujire y’obwemere bwerhu bukomera.

3. Bichi byakarhengerera nk’obwemere bwerhu mu Mungu bufire chakuyumangira oku buzigire bene-berhu na bali-berhu banayerekana?

³ Obwemere bwerhu bukwanene kuyumangira ku binene olekere obuzigire bw’abantu ba Mungu bonyine. Bulagurhe? Rhuwaze nk’omwemezi, akaba mushamuka changwa painiya wamajira  echaha chikomere. Changwa gurhe byakaba nka mwene-werhu changwa mwali-werhu amakugayisa? Changwa nkabaga hajire owaba chigamba ch’obwemere, n’okuhwanza kuyemeza oku rhurhali rhwaharamya omu kuli. Nk’ebili nk’ebyola byamarhengerera, wasirhala n’okuleka kukolera Yehova si? Obukweri buli oku: Akaba ofire chakugwarha obwemere mu Mungu eju y’eby’abandi banajira, s’arhali mp’okuba ogwerhe obwira bukomere haguma naye, obwemere bwawe burhaba eyi bukomere. Okuntu wakaba oli wachiyunva eju ya Yehova n’abantu bage, kwakakurhabala kukuza obwemere bwawe mu njira nguma. Aliko bishubire kuba by’akamaro bwenene okuyiga Ebiblia oku kahunda, okuyunva ebi oli wayiga n’okulonzereza emyazi; n’ahola wanachizera oku oli wayiga okuli eju ya Yehova. Okwanene kuchiyemeza wenyine oku Ebiblia egwerhe okuli eju ya Yehova.​—Ro. 12:2.

4. Nk’oku biyerekenwe omu Matayo 13:3-6, 20, 21, nka gurhe ebibazo binahoza obwemere bwa baguma?

⁴ Yesu aliderhere oku baguma bakayemerere okuli “oku bushagaluke,” s’aliko obwemere bwabo bwakaholere amango ebibazo byamarhengerera. (Osome Matayo 13:3-6, 20, 21.) Nkabaga bakabere barhamenyere oku balala bakulikira Yesu bahurana ebibazo. (Mt. 16:24) Changwa bakaba eyi baliri bawaza ok’okuba Mukristu kuli kulama akalamo karhali mu bibazo; k’okuderha oku kuli kulama omu migisho konyine si nta bigeregezo. S’aliko, ntako ebibazo byakabulwa omu gulu lili zene. Ehali yakahindamuka, n’echola chanarhuma hagera ebisanzi obusime rhwaligwerhe bwageha.​—Zb. 6:6; Mez. 9:11.

5. Gurhe abanene mu bene-berhu na bali-berhu banayerekana ku bachizerere oku bali omu kuli?

⁵ Abanene mu bene-berhu na bali-berhu banayerekana oku bachizerere oku bali omu kuli. Nka gurhe? Obuyemere bwabo burhahola chiro n’amango owabo mukristu amabagayisa, changwa amango amarhondera kujira ebirhakwanene oku mukristu. (Zb. 119:165) Mu buli chibazo, obwemere bwabo bunagenderera kugwarha emisi, si burhahola. (Yak. 1:2-4) Nka gurhe wakakuza obwemere bugwerhe emisi nk’obola?

6. Bichi obwemere bw’abakristu ba burhanzi bwaliyumangireko?

⁶ Abakristu ba burhanzi balikuzize obwemere bwabo omu bumenyi bw’amandiko baligwerhe n’omu nyigirizo za Yesu Kristu, k’okudeha, “okuli kw’emyazi minja.” (Gal. 2:5) Obola bukweri, bili byoshi rhuyemerere rhwabo nka bakristu, kuheba han’emyazi elolere enterekero y’enchungu ya Yesu n’obufuke bwage. Entumwa Paulo yalichizerere oku ezola nyigirizo zaliri z’okuli. Bulagurhe rhwakaderha ntyo? Bulala aliri ayemeza “omu kukolesa amandi oku byalihemere Kristu alibuke n’okufuka.” (Mdo. 17:2, 3) Abakristu ba burhanzi baliyemerere ezola nyigirizo, banalilangalire okw’eroho lichesibwa lyabarhala bayunve bwinja Echinwa cha Mungu. Baliri balonzereza yi bamenya akaba kweri ezola nyigirizo zalirhengerere omu mandiko. (Mdo. 17:11, 12; Ebr. 5:14) Barhalifire chakukuza obwemere bwabo omu kuntu bali bachiyunva n’omu murhumambo konyine, barhanaliri bakolera Yehova mpu okwenge baligwerhe obusime amango bajaga haguma n’ababo bakristu. Olekere ntyo, obwemere bwabo bwaliyumangire oku “bumenyi b’okuli bwa Mungu.”​—Kol. 1:9, 10.

7. Kamaro kachi obwemere bwerhu omu bukweri bwe Biblia burhuherhere?

⁷ Okuli kw’echinwa cha Mungu kurhakahindamuka. (Zb. 119:160) Omufano, kurhakahindamuka nk’owerhu mukristu amarhugayisa  changwa nk’amajira echaha chikomere. Kurhakanahindamuka amango rhuli rhwahurana ebibazo. Che chirhumire bihemere rhumenye bwinja enyigirizo ze Biblia n’okuyemera oku kweri zili z’okuli. Obwemere bwerhu buyumangire oku bukweri bwe Biblia bwarhuma rhwagala kuyorha rhuserere omu kasanzi k’ebibazo, kuguma n’okw’enanga enayumanza bwinja echombo omu kazanzi k’omulaba gunene. Nka gurhe wakakomeza obwizere bwawe oku kweri oli omu kuli?

8. Nk’oku 2 Timoteo 3:14, 15 ayerekene, gurhe Timoteo ayinjaga kuchizera oku aherhe okuli?

⁸ Timoteo alichizerere oku aliherhe okuli. Gurhe agwarhaga obola bwizere? (Osome 2 Timoteo 3:14, 15.) Nyina na nakulu baliri bamuyigiriza “amandiko machesibwa.” Aliko rhurhakagangana oku naye alikoleseze ebisanzi n’emisi omu kuyiga amola mandiko. Echola charhuma “ayemezwa” oku amola mandiko mamaliherhe okuli. Enyuma w’esiku, Timoteo, nyina na nakulu bayinja kuyiga enyigirizo z’echikristu. Timoteo alishumikirwe n’obuzigire bw’enkulikizi za Yesu, analiherhe omurhumambo g’okurhabala n’okugeza ebisanzi haguma na bene-babo na bali-babo b’ekiroho. (Flp. 2:19, 20) Nantyo, obwemere bwage bwayumbakwa arhali mp’omu kuntu aliri achiyunva eju y’abandi bantu, s’ahubwe oku bintu byaliri byamuyegereza ku Yehova. Nawe, okwanene kuwaza bwenene oku bi wayigire eju ya Yehova omu kusoma Ebiblia.

9. Bukweri buhe busharhu bihemere ochizere?

⁹ Oku murhondero, bikuhemere ochizere bwinja bukweri busharhu b’omusinji: Ob’oburhanzi, okwanene kuchizera oku Yehova ye mulemi wa byoshi. (Kut. 3:14, 15; Ebr. 3:4; Ufu. 4:11) Obwakabiri, Okwanene kuchibonera wenyine oku Ebiblia buli burhumwa bwayerekezwaga na Mungu oku bantu. (2 Ti. 3:16, 17) N’obwakasharhu, okwanene kuchizera oku Yehova aherhe echigusho chipangirwe bwinja ch’abantu chinamuharamya eshishi y’oburhegesi bwa Kristu; n’echola chigusho bali Bahamirizi ba Yehova. (Isa. 43:10-12; Yoh. 14:6; Mdo. 15:14) Okugwarha obola bwizere b’omusinji, kurhali kuderha mp’okala oli kaminuza  omu bumenyi bwe Biblia. Omuhigo gwawe gukwanene kuba g’okugala kukolesa “obuhashe bwawe b’okuwaza” y’okomeza obwizere oku ogwerhe okuli.​—Ro. 12:1.

10. Olekere okumenya okuli konyine, bichi bindi rhukwanene kuba tayari kujira?

¹⁰ Eyi omala kuchizera oku ebi rhwayigire eju ya Mungu, Ebiblia, n’abantu ba Mungu, bikuhemere oje waba tayari kurhabala abandi nabo bachizere obola bukweri. Bulagurhe? Bulala rhwabo nka bakristu rhuherhe akasi k’okuyigiriza okuli ku balala barhuyunviriza. * (1 Ti. 4:16) Okurhuli rhwarhabala abandi bachizere obukweri bwe Biblia, eyi kurhunali rhwakomeza obwemere bwerhu k’obola bukweri.

11. Lwiganyo luhe entumwa Paulo yalilekere amango yaliri yayigiriza abantu, na nka gurhe rhwakamuyiganya?

¹¹ Amango entumwa Paulo yaliri yayigiriza olubaga, yaliri yalonza “abayemeze eju ya Yesu kugerera erhegeko lya Musa n’abalebi.” (Mdo. 28:23) Gurhe rhwakayiganya Paulo amango rhuli rhwayigiriza abandi okuli? Rhurhakwanene kufachakuhanza rhwaderha engani zonyine. Rhukwanene rhurhabale abanafunzi berhu be Biblia kukengera amandiko yi baba hofi-hofi na Yehova. Rhulonzeze bayemere okuli arhali mp’okwenge barhusimire si bulala bachibwenere bonyine oku ebi balibayiga b’obukweri oku bilolere Mungu werhu w’obuzigire.

12-13. Nka gurhe abazere bakarhabala abana babo babere omu kuli?

¹² Mwe bazere, mulonzeze buzira ngangane oku abana benyu bayorhe omu kuli. Mwakabona oku nka baherhe abera benja omu chibaga, bajira amaja-mbere menja m’ekiroho. Che chirhumire, nk’abana benyu bamachizera oku baherhe okuli, hali echindi chintu bakenere olekere okugwarha abera benja. Bakwanene kugwarha obwira bwabo-bwabo bonyine na Mungu n’okuchizera okuli Ebiblia eyigirize.

¹³ Nk’abazere bali bayigiriza abana babo okuli kwe Biblia, bakwanene babe lwiganyo lwinja omu kuba banafunzi benja be Biblia. Bakwanene barhole akasanzi k’okuwaza bwenene oku bi bali bayiga. Ahola banaja bagala kuyigiriza abana babo kujira oko kon’okola. Bakwanene barhabale abana babo bamenye gurhe bakakolesa ebikoleso byerhu by’okulonza emwazi amango bali baongoza amafunzo mabo me Biblia. Omu kujira ntyo, barhabala abana babo basimiswe na Yehova n’enjira ali akolesa omu kuhana ebilyo by’ekiroho; k’okuderha “omuja mwimana onakengukire.” (Mt. 24:45-47) Bazere we, murhafaga chakuyigiriza abana benyu enyigirizo z’omusinji ze Biblia konyine. Mubarhabale bakuze obwemere  bukomere omu kubayigiriza oku bilolere “ebintu bikomere bya Mungu” ebi bakagala kuyunva bwinja kulingana n’emyaka n’obuhashe bwabo.​—1 Kor. 2:10.

14. Bulagurhe rhukwanene kuyiga obulebi bwe Biblia? (Olole echisanduku “ Wakafasiriya Obula Bulebi Si?”)

¹⁴ Obulebi bwe Biblia chili chigabi ch’engenzi che Chinwa cha Mungu chinarhurhabla rhukuze obwemere bukomere mu Yehova. Bulebi buhe bwachigerere kukomeza obwemere bwawe? Nkabaga wamayibuka obulebi bulolere “esiku z’obuzinda.” (2 Ti. 3:1-5; Mt. 24:3, 7) Aliko si, nka gurhe amandi malebi mayenere makakomeza obwemere bwawe? Omufano, wakafasiriya si gurhe obulebi buli omu Danieli sura 2 changwa omu Danieli sura 11 bwayeneraga na gurhe buli bwayenera si? * Nk’obwemere bwawe buyimangire oku Biblia bwenene, obola bwemere bwaba eyi burhakadundwa. Waza oku mufano gwa bene-berhu balilibukire bwenene omu Alemanye amango m’Evita lya Kabiri ly’Egulu Lyoshi. Chiro akaba oku barhalizava bayunva bwinja amalebi baganirire eju y’esiku z’obuzinda, bali gwerhe obwemere bukomere omu Chinwa cha Mungu.

15-17. Gurhe okuyiga Ebiblia kwalihebere obwemere bwa bene-berhu emisi amango baliri balibuzwa n’Abanazi?

¹⁵ Amango Abanazi baliri barhegeka omu Alemanye, ebihumbi bya bene-berhu na bali-berhu byalihekerwe omu nkambi y’amalibuko. Hitler na Shefu wa ba SS oyirikirwe Heinrich Himmler, bashomba Abahamirizi ba Yehova. Nk’oku mwali-werhu muguma aderhere, Himmler alibwirire echigusho cha bali-berhu mu nkambi nguma y’amalibuko ntya: “Yehova wenyu akarhegeka omu mbingu, s’aliko hanola oku gulu, rhwabo rhwerhuli rhwarhegeka! Rhwabayereka bande balembera bwenene, akaba mwabo changwa rhwewe!” Bichi byarhabalaga abantu ba Yehova babere bimana.

¹⁶ Abola Banafunzi be Biblia balimenyere oku Obwami bwa Mungu bwahwanzaga kurhegeka omu mwaka gwa 1 914. Barhasomeraga eju y’obola bupinzani baliri bahurana nabo.  Chiro akaba ntyo, abantu ba Mungu balichizerere oku nta burhegesi bw’abantu bwakabuza Mungu kuyeneza omuhigo gwage. Hitler arhakachihere abemezi b’okuli changwa mpu ashimike oburhegesi bulushire Obwami bwa Mungu. Bene-berhu balichizerere oku, bibe birhaaba, oburhegesi bwa Hitler bwalikwanene buhikire obuzinda.

¹⁷ Ebi abola bene-berhu na bali-berhu baliyemerere byaliri by’okuli. Enyuma wa siku zigeke ntya, oburhegesi bw’Abanazi bwahena, na Heinrich Himmler achihiga chiro akaba oku aderhaga mpu “hanola oku gulu, rhwabo rhwerhuli rhwarhegeka.” Emunda alibirhiraga, abugana yi mwene-werhu Lübke balimenyene naye, waliri muguma omu Bahamirizi balishwekerwe. Omu kusomerwa bwenene, Himmler abaza mwene-werhu Lübke ntya: “Nechi wa, Mwanafunzi we Biblia, bichi byaliyinjire kuba?” Mwene-werhu Lübke afasiriya Himmler oku Abahamirizi ba Yehova balimenyere bowe oku oburhegesi bw’Abanazi bwalikwanene kuhena tu, n’oku nabo balikwanene bashwekulwe. Himmler alikomere kushinyulira Abahamirizi ba Yehova; aliko lero alibulire ech’akaderha olola lusiku. Bugeke enyuma w’ahola, achiniga. Bichi ebyola birhuyigirize? Efunzo lyerhu lye Biblia, haguma n’amalebi, byakakomeza obwemere mu Mungu n’okurhurhabala rhuyorhe bimana amango m’amalibuko.​—2 Pe. 1:19-21.

18. Nk’oku biyerekenwe omu Yohana 6:67, 68, bulagurhe bihemere “rhugwarhe obumenyi burhagwerhe magosa n’oburhegerezi bushinganene” Paulo ayandikaga?

¹⁸ Buli muguma werhu akwenene kuyerekana obuzigire; k’okuderha echimenyeso ch’Abakristu b’okuli. Aliko bishubire kurhuhema “rhugwarhe obumenyi n’oburhegerezi bukwanene.” (Flp. 1:9) Oku bwindi, rhwakashumikwa “na buli muhusi gw’enyigirizo kugerera obubeshi bw’abantu,” kuheba han’ebigamba by’obwemere. (Efe. 4:14) Amango banafunzi banene ba burhanzi balekaga kukulikira Yesu, entumwa Petro yayerekana obwemere bwage bukomere omu kuderha oku Yesu aligwerhe “ebinwa by’akalamo k’esiku n’amango.” (Osome Yohana 6:67, 68.) Chiro akaba oku mw’akola kasanzi Petro arhaliza yunva bwinja amafasiriyo moshi m’ebyola binwa, aligenderere kuyorha mwimana bulala alirhegerere okuli eju ya Kristu. Nawe wakakomeza obwizere bwawe omu bye Biblia eyigirize. Nk’ojirire ntyo, obwemere bwawe bwagenderera kugwarha emisi chiro ebibazo byarhengerera, kandi warhabala abandi bakomeze obwemere bwabo.​—2 Yo. 1, 2.