Baguma omu Balawi barhaliri badahwa baliherhe amandi makasi m’okukola, baguma mubo baliri bakola nka bapolisi b’ehekalu. Abola baliri bayerekezwa na kapiteni w’ehekalu. Omwandisi w’omuyahudi Philo ayerekene amakasi m’abola bapolisi; aderhare ntya: “Baguma mw’abola [Balawi] baliheberwe oku milyango ah’abantu baliri bayingirira omu hekalu. Abandi baliheberweho nka balanzi b’ahachesibwa. Baliri balanga yi nta muntu orhayemererwe oyerekezage ahachesibwa, chiro n’omu kurhamenya. Baguma baliri bagombolana ebudufu n’ezuba omu kujira ezamu ly’oku hekalu.”

Abakulu b’Esanendrine balikwanene babwire abola bapolisi babe haguma nabo. Bibonekene oku echola chonyine ch’echigusho ch’Abayahudi abakulu b’Eroma baliyemerere bagwarhe entwaro.

Nk’oku omusomi w’Ebiblia Joachim Jeremias ayerekene, “amango abapolisi bayinjaga kufarha Yesu, ababaza mpu bulagurhe babulaga kumufarha amango moshi aliri ayigiza omu hekalu (Mt. 26:55), Yesu arhakababazize echola chibazo, nka barhaliri bapolisi b’ehekalu.” Oyola mwandisi yon’oyola awazize oku abapolisi barhumwaga kufarha Yesu siku zigeke embere wahola, nabo baliri bapolisi b’ehekalu. (Yoh. 7:32, 45, 46) Enyuma y’ahola, abakulu b’abola bapolisi haguma na bakapitene babo barhumwa bagende balerhe abanafunzi ba Yesu embere y’Esanendrine, binaboneke oku abapolisi b’ehekalu babafukuzaga entumwa Paulo omu hekalu.​—Mdo. 4:1-3; 5:17-27; 21:27-30.