MWAZI G’OKUYIGA 10
Obuzigire n’Okugwarha Eshukurani ku Yehova Byakushunika Obatizwe
“Bichi bimbuzize kubatizwa?”—MDO. 8:36.
WIMBO 37 Kumtumikia Yehova Kwa Nafsi Yote
OKU BUGEKE *
1-2. Nk’oku biyerekenwe omu Matendo 8:27-31, 35-38, bichi bya shunikaga mukulu muguma we Etiyopiya abatizwe?
OLONZEZE obatizwe nka mwanafunzi wa Kristu si? Obuzigire n’eshukurani, byashunikire bantu banene bachishoge okujira ntyo. Rhola omufano gw’omukulu waliri wakolera Omugoli w’Etiyopiya.
2 Oyola Muetiyopiya abatizwa aho hanahola, oku anamala kuyiga omu mandiko kuntyo ku akwanene ajire. (Osome Matendo 8:27-31, 35-38.) Bichi byamushunikaga kujira ntyo? Bibonekene oku alisimisizwe n’Echinwa cha Mungu, bulala aliri agenda asomera olwandiko lw’omu chitabu cha Isaya omu chitugari. N’amango Filipo aganira naye, oyola mulume ashuba kusimiswa bwenene n’ebi Yesu amujirire. Aliko si, bichi oyola Mukulu ashimbaga Eyerusalemu? Bulala abaga akuzize obuzigire bwage ku Yehova. Bichi birhuyemezeze ntyo? Abaga y’akala aja kuharamya Yehova omu Yerusalemu. Bibonekene ok’oyola mulume ali alekene n’edini lyage ly’akaburhano n’oku anabaga achihirire haguma n’eshanja liguma lyalichihanire emwa Mungu w’okuli. Obola buzigire ku Yehova b’onobola b’obwamushunikaga kurhola eyindi ntambu y’akamaro; ey’okubatizwa n’okuba mwanafunzi wa Kristu.—Mt. 28:19.
3. Bichi byakabuza omuntu kubatizwa? (Olole echisanduku “ Bichi Bili Omu Murhima Gwawe?”)
3 Obuzigire ku Yehova bwakakushunika obatizwe. Aliko kandi, obuzigire bwakakubuza okujira ntyo. Nka gurhe? Olole mifano miguma. Wakaba ey’onazigira bwenene abantu b’omulala gwawe changwa bera bawe barhali bemezi, nkabaga wanayubaha ok’okabatizwa, bakugaya. (Mt. 10:37) Changwa kandi, wakaba y’onasima engeso oyinji ku Mungu ashomba, n’okubona nka bikomere okuzileka. (Zb. 97:10) Nkabaga kandi, wakaba wakulaga ey’onajira esiku zikulu z’amadini m’obubeshi. Wakaba y’onasima bwenene eyi wayibuka ebi mwaliri mwajira kw’ezola siku zikulu. Bibe ey’intyo ku bili changwa nanga, wakabona oku bikomere okulekana n’engeso zinagayisa Yehova. (1 Ko. 10:20, 21) Che chirhumire okwanene kuchibaza: “Bichi changwa inde inansima bwenene?”
OMUNTU RHUKWANENE RHUZIGIRE BWENENE
4. Bichi by’oburhanzi bikwanene bikushunike obatizwe?
4 Oherhe bintu binene bikwirire onasima bwenene. Omufano, embere ohwanze kuyiga haguma n’Abahamirizi ba Yehova, wakaba eyiwaliri wakenga Ebibliya bwenene. Hali n’okuntu eyi walikola oherhe obuzigire ku Yesu. Na ntyo, bulala wamenyere Abahamirizi ba Yehova, wakaba ey’olonzeze kuba ahakagarhi kabo. S’aliko arhali k’okuderha ok’okusima ebyola k’okwakakushunika ochihane emwa Yehova n’okubatizwa. Ech’oburhanzi chakakushunika ojire ntyo, buli buzigire bwawe ku Yehova Mungu. Amango osimire Yehova bwenene kulusha byoshi, orhakayemera echintu changwa omuntu n’omuguma akubuza kumukolera. Okuzigira Yehova kwakushunika obatizwe n’okukurhabala ogenderere kubera mwimana embere zage enyuma y’okubatizwa kwawe.
5. Bibazo bihe rhwaganirako?
5 Yesu aliderhere oku rhukwanene rhuzigire Yehova n’omurhima gwerhu goshi, obuguma-guma, obwenge, n’emisi yerhu yoshi. (Mk. 12:30) Gurhe wakachifunza kusima n’okukenga Yehova bwenene? Rhukawaza kangana gurhe Yehova arhuzigira, kwarhurhabala nerhu rhumuzigire. (1 Yo. 4:19) Gurhe kwindi wachiyunva, na bichi bindi wakayunva ojirage nka wamakuza obola buzigire bw’akamaro bwenene? *
6. Nk’oku eandiko lya Waroma 1:20 liyerekene, njira nguma ehe wakayigamo eju ya Yehova?
6 Oyige eju ya Yehova kugerera obulemi bwage. (Osome Waroma 1:20; Ufu. 4:11) Owaze bwenene eju y’emirhi n’enyama Yehova alemere, wabona kangana gurhe ali munya-bwenge. Ochifunze bugeke okuntu omubiri gwawe gwalemerwe omu bulyo busomezwe. (Zb. 139:14) Owaze oku misi engana Yehova apakize omu zuba lyerhu, n’obola ezuba lyerhu lili liguma omu mamiliyoni m’enyenyezi. * (Isa. 40:26) Okajira ntyo, obukenge bwawe ku Yehova bwaluga bwenene-bwenene. Okumenya oku Yehova aba munya-bwenge na munya-misi kuli kw’akamaro. S’aliko y’okomeza obuzigire bwawe n’okukuza obwira bukomere naye, okwanene omumenye bwinja.
7. Y’ozigira Yehova bwenene, Chemezo chihe okwanene kugwarha?
7 Okwanene okuyemera oku anakulagako bwawe-bwawe. Obwene nka bikomere okuyemera ok’omulemi w’embingu n’egulu ayinji ku nawe obaho n’oku anakulagako si? Akaba ntyo, oyibuke ku Yehova “arhali hale na buli muguma werhu.” (Mdo. 17:26-28) “Analolereza omu mirhima yoshi,” anakulaganyize nk’oku Daudi abwiraga omugala Sulemani oku “okamulonza naye aleka omupate.” (1 Ny. 28:9) N’obwindi, echola che chirhumire oli wayiga Ebiblia, nk’oku Yehova anaderhaga mpu “nakuhamagere emunda ndi.” (Yer. 31:3) Ok’oli wagenderera kumenya byoshi Yehova akujirire, ku n’obuzigire omuherheko bwagenderera kuluga.
8. Gurhe wakayerekana ok’oherhe eshukurani oku buzigire Yehova akuherheko?
8 Njira nguma wakayerekanamo ok’oherhe eshukurani, kuli kumuganiza omu sala. Obuzigire bwawe kuye bwakula okalema wamubwira ebikulazize n’okumubwira koko oku byoshi akujirire. Kandi omu kubona gurhe Yehova ali ashubiza oku masala mawe ku n’obwira bwawe haguma naye bwakomera. (Zb. 116:1) Wahika amango wabona oku anakuyunviriza. Aliko, y’oyegera Yehova bwenene, bikuhemere omenye eby’asima, eby’ashomba n’okuntu anajira ebintu biguma-biguma. Kandi bikuhemere omenye bichi alonzeze okolage. Enjira nguma yonyine wakapata m’obo bumenyi kuli kuyiga Echinwa chage, Ebiblia.
Enjira nyinja y’okuyegera Mungu n’okumenya ebi alonzeze rhukolage, kuli kuyiga Ebiblia (Olole echifungo 9) *
9. Gurhe wakayerekana oku onakenga Ebiblia?
9 Oyige okukenga Echinwa cha Mungu, Ebiblia. Ebiblia yonyine y’eherhe obukweri eju ya Yehova n’omuhigo akuherheko. Wakayerekana oku onakenga Ebiblia omu kuisoma buli lusiku, omu kurheganya efunzo lyawe lye Biblia, n’okukolesa ebi oli wayiga. (Zb. 119:97, 99; Yoh. 17:17) Ojira eprograme y’okusoma Ebiblia buli lusiku wenyine si? Akaba kweri ojira eyola programe, onayikenga si?
10. Chintu chihe chiguma chili omu birhumire Ebiblia yaba y’akamaro bwenene?
10 Chintu chiguma omu bintu birhumire Ebiblia yaba y’akamaro bwenene, kuli okuba egwerhe engani zirhengerere oku bantu balichibonere ku Yesu n’amasu mabo bonyine. Chonyine chitabu ch’okuli chihundwire ebi Yesu akujirire. Ok’oli wagenderera kuyiga ebinwa n’ebijiro bya Yesu, wasima ogwarhe obwira bukomere haguma naye.
11. Gurhe wakayiga kuzigira Yehova?
11 Oyige kuzigira Yesu, n’obwira bwawe ku Yehova bwakula. Bula gurhe? Bulala Yesu aligwerhe engeso z’Eshe mene-mene. (Yoh. 14:9) Che chirhumire, ok’oli wagenderera kuchifunza eju ya Yesu, kuwanagenderera kumenyerera Yehova n’okumusima bwenene. Obe nkawawaza oku lukogo Yesu aliri ayereka abantu balibonererwe, okwenge bali bakene, balwala, barhanachigalire. Shub’obe nka wawaza oku mpanulo zinja akuhere wakakolesa omu kalamo kawe ka buli lusiku, na gurhe akalamo kawe kakakwira nk’okoleseze ezola mpanulo.—Mt. 5:1-11; 7:24-27.
12. Amango wamayiga eju ya Yesu, bichi byakakushunika kukola?
12 Obuzigire bwawe ku Yesu bwashuba kukomera okawaza bwenene okuntu achihanire nka nterekero y’ebyaha byerhu bibabalirwa. (Mt. 20:28) Ey’oyunva bwinja gurhe Yesu ayemeraga afe eju yawe, wakayunva bikuhirire omurhima ohungame, n’okulonza obubabale bwa Yehova. (Mdo. 3:19, 20; 1 Yo. 1:9) N’okuwagenderera kusima Yesu na Yehova, kuwanayunva osimire kuba haguma n’abandi banabasima.
13. Bichi Yehova akuhere?
13 Oyige kusima omulala gwa Yehova. Abantu b’omulala gwawe barhali bemezi na bera bawe ba mira bakaba barhayunvirhe nka gurhe wakalonza kuchihana emwa Yehova. Hali oku bakanakupinga. Yehova akurhabala omu kukuha omulala gw’ekiroho. Okachishwekera k’ogola mulala gw’ekiroho, wapata obuzigire n’oburhabale okenere. (Mk. 10:29, 30; Ebr. 10:24, 25) Enyuma w’esiku, abantu b’omulala gwawe bakahwanza kuharamya Yehova haguma nawe, n’okukenga amakanuni mage omu kalamo kabo.—1 Pe. 2:12.
14. Nk’oku biyerekenwe omu 1 Yohana 5:3, bichi wavumbwire oku bilolere amakanuni ma Yehova?
14 Oyige kukenga amakanuni ma Yehova n’okumakolesa. Embere omenye Yehova, wakaba eyi waliri wachihirira h’amawe makanuni, s’aliko bunola yiwabona oku amakanuni ma Yehova ma menja. (Zb. 1:1-3; osome 1 Yohana 5:3.) Owaze oku mpanulo Ebiblia ehere abalume, abakazi, abazere n’abana. (Efe. 5:22–6:4) Omu kukolesa amola makanuni, wabwene gurhe akalamo k’omulala gwawe kakwirire si? Omu kukenga empanulo za Yehova zilolere eby’okuchishoga abera omu bulyo buyengehere, obwene gurhe engeso zawe zakwirire si? Wabere muntu oherhe obusime bunene kulusha embere si? (Mez. 13:20; 1 Ko. 15:33) Hali okuntu ey’echishubizo ch’ebyola bibazo ali nechi.
15. Gurhe wakajira akaba okenere omusada g’okugala kukolesa amakanuni me Biblia?
15 Hali okuwakabona oku bikomere okukolesa amakanuni me Biblia oli wayiga bunola. Echola che chirhumire Yehova ali akolesa olubaga lwage omu kukuha ebitabu, orhutabu, amagazeti, amavideo gaherhe emyazi ye Biblia, byakakurhabala ogale kumenya ebinja n’ebibi. (Ebr. 5:13, 14) Amango oli wayiga n’okusoma ebyola byoshi, wabona gurhe birhabere bwenene n’ahola wayunva osimire okuba omu lubaga lwa Yehova.
16. Gurhe Yehova aba apangire olubaga lwage?
16 Oyige okusima n’okugwasa olubaga lwa Yehova. Yehova aba apangire olubaga lwage omu bibaga, n’Omugala Yesu ye biyimangire byoshi. (Efe. 1:22; 5:23) Yesu naye ashimikire echigusho chigeke ch’abalume bashigwa, babayerekezage emipango yoshi y’akasi alonzeze kakolwage zene. Yesu alishushanyize echo chigusho “n’omuja mwimana onakengukire.” Abola balume bakengere akasi kabo k’okukulisa n’okukulanga ekiroho. (Mt. 24:45-47) Enjira nguma omu njira omuja mwimana onakengukire ali akolesa omu kukurhabala, kuli kushimika abashamuka bakwanene nka bangeri bawe. (Isa. 32:1, 2; Ebr. 13:17; 1 Pe. 5:2, 3) Abashamuka basimire bajire okwabo koshi eju yawe, yi bakurhuliriza, n’okukurhabala ogenderere kuyegera Yehova bwenene. S’aliko ech’akamaro bwenene bakakurhabala kujira, kuli kukugwasa kuyigiriza abandi eju ya Yehova.—Efe. 4:11-13.
17. Nk’oku Waroma 10:10, 13, 14 eyerekene, bichi birhuma rhuganira n’abandi eju ya Yehova?
17 Orhabale abandi bayige kuzigira Yehova. Yesu alibwirire abanafunzi bage oku bayigirize abandi eju ya Yehova. (Mt. 28:19, 20) Byakashobokana okukenga elyola rhegeko oku bulonza s’arhali mpu okwenge okwanene kulikenga konyine. S’aliko nk’obuzigire bwawe ku Yehova bwamakula wachiyunva kuguma n’entumwa Petro na Yohana zaderhaga mpu: “Rhurhakaleka kuderha oku bintu rhwabwene n’okuyunva.” (Mdo. 4:20) Hali bintu bigeke byonyine byakalerha obusime kuguma n’okurhabala omuntu kuba mwira wa Yehova. Ba nka wawaza kangana gurhe omuyeneza-injili Filipo alichiyunvirhe amango arhabala Omuetiyopiya kumenya obukweri buli omu mandiko n’okubatizwa! Amango wamayiganya Filipo n’okukenga erhegeko lya Yesu ly’okuhubiri, ahola wanayerekana ok’olonzeze obe muguma w’Abahamirizi ba Yehova. (Osome Waroma 10:10, 13, 14.) Ahola nawe wanabaza kuguma n’olala Muetiyopiya wabazaga mpu: “Bichi bimbuzize kubatizwa?”—Mdo. 8:36.
18. Bichi nji rhwaganirako omu mwazi gukulikireho?
18 Inji waba eyi wamajira entambu y’akamaro bwenene y’akalamo kawe amango wachagula okubatizwa. Bulala evire yaba ntambu y’akamaro bwenene ntyo, bikuhemere owaze bwenene byoshi ekuhemere okolage. Bichi okwanene omenye oku bilolere obubatizo? Bichi bikuhemere ojirage embere n’enyuma y’okubatizwa? Ebyola bibazo nji byashubizwa omu mwazi gukulikireho.
WIMBO 2 Jina Lako Ni Yehova
^ mus. 5 Baguma omu banasima Yehova banagangana n’okuchibaza akaba kweri bali tayari kubatizwa n’okuba Bahamirizi ba Yehova. Akaba ntyo ku nawe onachiyunva, ogu mwazi gwakurhabala oshube owaze ku bintu biguma omu byakamaro bwenene wakajira byakakushunika obatizwe.
^ mus. 5 Abantu barhaba kuguma, che chirhumire hali abakakolesa ezila mpanulo ziyerekenwe mw’ogula mwazi omu bulyo burhavire bwakulikirana nk’oku biyerekenwe munola.
^ mus. 6 Y’obona eyindi mifano eyerekene oku Yehova ali munya-bwenge na munya-misi, olole obutabu: Je Uhai Uliumbwa? na Maulizo Tano Kuhusu Chanzo cha Uhai.
^ mus. 61 AMAFASIRIYO M’EFOTO: Mwali-werhu amaha munyere muguma abuganaga y’ali agula ebintu etragite.
