1. Rhegeko lihe lili wazi Yesu alihere abanafunzi bage? (Olole efoto eli oku chiganda.)

OMU budufu embere Yesu afe, aha abanafunzi bage erhegeko lili wazi. Ababwira ntya: “Nk’oku nabazigire, nenyu muzigirane buli muguma n’owindi.” Ashuba yongera ntya: “N’ahola, boshi nji bamenya oku muli banafunzi bani—nka muherhe obuzigire ahakagarhi kenyu mwenyine oku mwenyine.”—Yohana 13:34, 35.

2. Bulagurhe bili by’akamaro okuzigirana buli muguma n’owindi?

² Yesu aliderhere oku abakristu b’okuli bakabonekene wazi, akaba baherhe obuzigire kuguma naye. Ebyola binwa byalibere by’okuli omu miaka egana y’oburhanzi, binagenderere kuba by’okuli mu manola mango. Che chirhumire bili by’akamaro bwenene okuzigirana chiro akaba hali ebibazo!

3. Bichi rhwayiga m’ogula mwazi?

³ Okurhashinganana kw’abantu Kunarhuma byarhukomerera kuzigirana buli muguma n’owindi. Chiro akaba ntyo, rhukwanene rhugenderere kuchihangana kuyiganya Yesu. M’ogula mwazi, rhwayiga gurhe obuzigire bwakarhurhabala rhube bantu b’omurhula, barhagwerhe kabolo, banakaribisa abageni. Ok’oli wayiga ogula mwazi, ochibaze: ‘Bichi nakayiga ku bene-berhu na bali-berhu baligenderere kuyerekana obuzigire buli muguma n’owindi chiro akaba ebibazo?’

4. Nk’oku Matayo 5:23, 24 ederhere, bulagurhe rhukwanene kujira omurhula na mwene-werhu rhuherhe echibazo naye?

⁴ Yesu alirhuyigirize bulagurhe okujira omurhula na mwene-werhu orhuherhe kw’echibazo kuli kw’engenzi. (Osome Matayo 5:23, 24.) Akaziza oku akaba rhulonzeze kusimisa  Mungu, rhukwanene kugenderera kugwarha obuguma bukwirire na bene-berhu. Yehova anasima amango rhwamajira okwerhu koshi omu kujira omurhula na bene-berhu. Arhakayemera obuharamye bwerhu, nkarhugenderere kubikira mwene-werhu omujinya n’okufunda kujira omurhula naye.—1 Yohana 4:20.

5. Bichi byarhumaga byakomerera mwene-werhu muguma kujira omurhula?

⁵ Hali ahabyakagera rhwanabona oku bikomere okujira omurhula. Bula gurhe? Waza oku byaberaga Mark. * Alichiyunvirhe kubi amango mwene-werhu muguma aliri amukangula n’okumuderha kubi oku bandi omu chibaga. Gurhe Mark alijirire? Achiyibukire ebyabaga; “nava nakaliha bwenene n’okumurhonganya.” Buzinda, Mark achiganya eby’ajirire aja apima kuhema obonjo n’okujira omurhula n’oyo mwene-werhu. Aliko, mwene-werhu alahira byoshi Mark ajiraga omu kulonza omurhula. Oku burhanzi Mark awaza mpu, ‘bula gurhe inshibage nachinanika kuye n’obo arhalonzeze kujira omurhula?’ Aliko, omwimangizi w’omuzunguluko amuhira omurhima arhalekaga. Gurhe Mark alijirire?

6. a) Bichi Mark alijirire omu kugenderera kulonza omurhula? b) Gurhe Mark alikoleseze Wakolosai 3:13, 14?

⁶ Amango Mark agerereza amawazo mage, abona oku abulire obwirhohye, n’oku ali achibona mwinja kulusha abandi. Abona oku bihemere okuhindamula oborhere bwage. (Kol. 3: 8, 9, 12) Oku bwirhohye, ashuba kuja emwa mwene-werhu n’okumuhema amubabalire oku borhere bwage. Mark amuyandikira n’amaruba, maderhere gurhe aliyunvirhe ababere n’oku alisimire bashube babe bera. Ahubwe Mark ashuba kuha oyola mulume ebintu awazize oku akasima. Aliko echigayisize, mwene-werhu agenderera kumubikira omujinya. Chiro akaba ntyo, Mark agenderera kukenga  erhegeko lya Yesu ly’okusima mwene-wabo n’okumubabalira. (Osome Wakolosai 3:13, 14.) Chiro akaba abandi barhayemerere obushiru bwerhu b’okulonza omurhula, obuzigire bwerhu nka bakristu b’okuli bwarhurhabala rhugenderere kubababalira, n’okubasalirira mpaka amango rhwayunvikana nabo.—Mt. 18:21, 22; Gal. 6:9.

7. a) Bichi Yesu alirhukomereze rhujire? b) Chibazo chihe chikomere mwali-werhu muguma ahuranaga nacho?

⁷ Yesu alirhukomereze rhugenderere kukolera abandi nk’oku rhwakasima nerhu barhukolere. Ayongera oku rhurhakwanene okuzigira balala barhuzigira bonyine. (Lu. 6:31-33) Gurhe byakaba nka muguma omu chibaga amakuyaka n’okulahira kukulamusa? Ebyola birhazigana kuhikira abantu ba Mungu juba-juba, s’aliko bye byahikiraga Lara. Aderhere ntya: “Mwali-werhu aliri anyaka, intanalimenyere bulagurhe. Echola chanduma oku murhima bwenene intanachiyunvaga chiro enyorha y’okuja oku mbuganano.” Ahaburhanzi, Lara awaza ntya: ‘Nta chintu chibi najirire, n’abandi omu chibaga baba bamenyere oku oyula mwali-werhu anachigendesa omu kuntu kurhangeze.’

8. Bichi Lara alijirire y’ajira omurhula, na bichi ebyamuhikiraga byakarhuyigiriza?

⁸ Lara alijirire echintu chakalerha omurhula. Alisalirire Yehova anakana okuja kuganira n’oyola mwali-werhu. Baganirira echola chibazo, bahoberana n’okujira omurhula. Ebintu byoshi byashuba kuba bwinja. Lara abalire ntya: “Hagerere esiku, oyola mwali-werhu ashuba kulema anyereka obola borhere bon’obola. Nantyo navunika omurhima.” Oku murhondero, Lara abona oku akapata obusime nk’oyola windi mwali-werhu ahindamwire oborhere bwage. Oku bizinda omu kuwaza, Lara abona oku echintu chinja bihemere ajire, kuli kugenderera kukolera mwali-werhu oku buzigire “n’okumubabalira oku bulonza.” (Efe. 4:32–5:2) Lara ayibuka oku obuzigire bw’Abakristu b’okuli “burhabika oluganjo lw’amabi. Bushukulira byoshi, buyemera byoshi, bulangalira byoshi, bulembera byoshi.” (1 Ko. 13:5, 7) Lara ashuba kugwarha omurhula omu murhima gwage. Mw’akola kasanzi,  mwali-werhu ajira obwira haguma naye. Amango oli wachihangana kujira omurhula haguma na bene-berhu na bali-berhu n’okugenderera kubazigira, wakalangalira oku “Mungu w’obuzigire n’omurhula aba haguma nawe.”​—2 Ko. 13:11.

9. Nk’oku eandiko lya Matendo 10:34, 35 liderhere, bulagurhe birhuhemere rhuleke akabolo?

⁹ Yehova arhaba wa kabolo. (Osome Matendo 10:34, 35.) Nka rhurhaherhe kabolo, rhwanayerekana oku rhuli bana bage. Rhukenga erhegeko ly’okuzigira abaturanyi berhu nk’oku rhuchizigira, rhunarhabala omu kuchunga omurhula ahakagarhi ka bene-berhu ne bali-berhu.​—Ro. 12:9, 10; Yak. 2:8, 9.

10-11. Gurhe mwali-werhu muguma alijirire y’alekana n’amawazo mabi aliherhe?

¹⁰ Birhakayorohera baguma okugenderera kubera buzira kabolo. Rhurhole omufano gw’ebyahikiraga mwali-werhu oyirikirwe Ruth. Amango alichili mudorho, aliherhe echibazo n’omuntu w’omu chindi chihugo. Gurhe ebyola byali mubabeze? Ruth aderhere ntya: “Naligayire buli chintu cha mw’echola chihugo. Nalema nawaza oku abantu boshi bamo, haguma na bene-berhu na bali-berhu, intyo kubaba.” Gurhe Ruth alijirire y’alekane n’amawazo mabi aliherhe?

¹¹ Ruth abona oku bihemere alekane n’amawazo mage mabi. Asoma emyazi n’eripoti oku bilolere echola chihugo omu Chitabu ch’omwaka. Aderhere ntya: “Nachihangana bwenene omu kugwarha amawazo makwirire eju y’abantu ba mw’echola chihugo. Narhondera kubona gurhe bene-berhu na bali-berhu baherhe obushiru omu kasi ka Yehova. Naluha nabona oku nabo bali ahakagarhi k’omulala gwa bene-berhu g’omu gulu lyoshi.” Enyuma ya siku zigeke, Ruth abona oku bihemere abayereke nabo obuzigire. Afasiriye ntya: “Buli mango nakabuganire bene-berhu na bali-berhu ba mw’echola chihugo, naliri nachihangana bwenene kubakolera nka mwira. Naliri naganira nabo n’okubamenya bwinja.” Byaja byaba gurhe? Ruth aderhere ntya: “Hagera akasanzi, amawazo mabi naliherhe mahwa.”

12. Chibazo chihe mwali-werhu oyirikirwe Sarah aligwerhe?

¹² Baguma banagwarha akabolo buzira kumenya. Omufano; Sarah aliri awaza oku nta kabolo aligwerhe, bulala arhaliri abola abantu eju y’erangi lyabo ly’omubiri, efuranga baherhe, changwa oburhwali baherhe omu lubaga. S’aliko aderhere ntya: “Nayinja kumenya oku gasi imba wa kabolo.” Mu njira nchi? Sarah arhengereraga omu mulala gw’abasomi, analisimire kuchiheba haguma n’abantu babasomi kuguma naye. Aluha abwira mwira wage ntya: “Insima kuchiheba haguma n’abera babakiristu basomere. Inanchikula ku balala barhasomaga.” Bibonekene oku Sarah alikwanene ahindamule engeso yage. Nka gurhe?

13. Bichi rhwakayiga kugerera okuntu Sarah ahindamulaga oborhere bwage?

¹³ Omwimangizi w’omuzunguluko alirhabere Sarah agerereze oborhere bwage. Amenyeseze ntya: “Alimbwirire koko oku kasi kani k’obwemezi, ebishubizo byani binja, n’okuntu imenyere amandiko. Nantyo anfasiriya oku bulala obumenyi bwerhu yibwagenderera kukula, bihemere nerhu rhugenderere okuyekena engeso z’echikristu nk’obwirhonzi, olugero, akababaro.” Sarah akolesa amahano omwimangizi w’omuzunguluko amuhaga. Aderhere ntya: “Nabona oku echintu chinja ch’oburhanzi, bihemere rhube bantu benja kandi b’obuzigire.” Ahabuzinda, arhondera kubona bene-berhu na bali-berhu bwinja kulusha embere. Afasiriye ntya: “Nalema nachihanga kumenyerera engeso zabo zisimisize  Yehova.” Nerhu si, gurhe bili emunda rhuli? Rhurhalonzeze rhukawaza oku rhuli b’akamaro kulusha abandi bulala rhuli basomi! Akaba kweri rhuzigira “echinya-buguma cha bene-berhu n’omurhima goshi,” rhwalekana n’akabolo.​—1 Pe. 2:17.

14. Nk’oku eandiko lya Waebrania 13:16 liderhere, gurhe Yehova anachiyunva eyi rhwakaribisa abahisi?

¹⁴ Yehova anasima bwenene eyi rhwakaribisa abageni. (Osome Waebrania 13:16.) Anabona okuchili chigabi ch’obuharamye bwerhu, ahanene amango rhwamarhabala abali omu bulagirire. (Yak. 1:27; 2:14-17) Che chirhumire amandiko marhuhirire omurhima “rhukulikire enjira y’okukaribisa abageni.” (Ro. 12:13) Rhunayerekana oku kweri rhulagire oku bandi, oku rhubasimire n’oku rhulonzeze babe bera berhu, nka rhuli bantu bakaribisa abageni. Yehova anasima bwenene nka rhwamasangira n’abandi akalyo, echintu ch’okunywa changwa okugeza akasanzi kerhu haguma. (1 Pe. 4:8-10) Chiro akaba ntyo, hali ebintu byakarhuma byakomera kukaribisa abageni.

15-16. a) Chirhuma baguma bagangana kukaribisa abageni? b) Bichi byarhabalaga Edit ahwanze kukaribisa abageni?

¹⁵ Hali oku rhwakagangana kukaribisa abageni eju y’ehali yerhu. Rhola omufano g’omukana muguma oyirikirwe Edit. Embere abe muhamirizi, arhagendaga ava asima kuba haguma n’abandi. Edit agendaga abona nk’abandi babali omu bulyo bukwirire b’okukaribisa abageni.

¹⁶ Amalire kuba muhamirizi, Edit ahindamula obulyo agendaga awaza. Ajira okuntu ahwanze kukaribisa abageni. Aderhere ntya: “Amango Echumbi ly’Obwami lyerhu lihyahya lyaliri lyayumbakwa, mushamuka muguma ambwira eju y’omulume na mukage bakayinjire kurhabala kuyumbaka, ambaza akaba nakabachumbisa (kubaha aha babera) mababoso mabiri. Nayibuka gurhe Yehova agishaga omukana w’Esarefati.” (1 Fa. 17:12-16) Edit ayemera kubachumbisa. Aligishirwe si? Afasiriye ntya: “Maboso mabiri mahindamuka  myezi ebiri. Mw’ezola siku zoshi, rhwakuza obwira bwa hofi-hofi.” Edit ashuba kugishwa n’abandi bera b’omu chibaga. Zene akala ali painiya, tena anasima bwenene okubona abantu anagenda nabo omu kasi k’okuhubiri bayinja kulambagirira ahamwage n’okuhumukiraho. Ashubire kuderha: “Okuhana kunarhuma nachiyunva bwinja! N’omu bukweri, inampata migisho minene bwenene.”​—Ebr. 13:1, 2.

17. Bichi Luke na mukage balihengerere buzinda?

¹⁷ Hali okuntu rhwakaba eyi rhunakaribisa abageni, aliko si, hali ahabihemere rhukwize si? Omufano, Luke na mukage baliri bantu banakaribisa abageni. Baliherhe engeso y’okuhamagala abazere babo, abantu b’obuko bwabo, bera babo na mwimangizi w’omuzunguluko na mukage. Aliko, Luke aderhere, “rhwahengera oku rhwaliri rhwakaribisa abantu berhu ba hofi-hofi bonyine.” Gurhe Luke na mukage baliyinjire kukwiza engeso yabo y’okukaribisa abageni?

18. Gurhe Luke na mukage baliyinjire kukwiza engeso yabo y’okukaribisa abageni?

¹⁸ Luke na mukage bayinja kumenya enjira y’okuli y’okukaribisa abageni, amango bawazaga oku binwa bya Yesu biderhere: “Nka musimire abantu banabasima bonyine, luhembo luhe mwakagwarha?” (Mt. 5:45-47) Babona oku bibahemere bayiganye Yehova, onaha abantu boshi n’omurhima goshi. Nantyo bakana okuhamagala bene-berhu na bali-berhu barhaliri bahamagala embere. Luke aderhere: “Bunola, rhweshi haguma rhunasimira ebyola bisanzi bwenene. Buli muguma anachiyunva aheberwe omurhima n’okuyumbakwa.”

19. Gurhe rhwakayerekana oku rhuli banafunzi ba Yesu, na bichi wakanire oku wakola?

¹⁹ Rwayigire gurhe okugwarha obuzigire b’omurhima goshi buli muguma n’owindi kwakarhurhabala rhube bantu b’omurhula, barhaherhe kabolo, kandi b’okukaribisa abageni. Rhukwanene rhulwise amawazo mabi moshi n’okusima bene-berhu na bali-berhu bwenene n’omurhima goshi. Nka rhujirire ntyo, rhwagwarha obusime n’okuyerekana oku kweri rhuli banafunzi ba Yesu.​—Yoh. 13:17, 35.