Kweri Yehova abasimire abantu bashabene bagenderere kugwarha omwishingo n’okusimira obuguma bwabo buli muguma n’owindi. (Mt. 19:4-6) Akaba oli walonza eyiwashabana naye, gurhe wakapata omuntu mwinja washabana naye? Bulala Yehova ye Mulemi werhu, ayinji echakarhugwasa yi rhushambazana bwinja rhugwarhe n’obunyumpa bukwirire. Che chirhumire, okakulikiza amakanuni arhuhere, byoshi byakubera binja. Rhulole maguma mw’amola makanuni.

Ech’oburhanzi, rhukwanene kuba rhumenyere gurhe rhuba: “Omurhima guba gudarhi bwenene kulusha echindi chintu choshi kandi gunali gubi.” (Yer. 17:9) Amango omuntu ali alonza omuntu mwinja bakashabana naye banajire obunyumpa bukwirire, akachiirhuma omu bintu juba-juba n’okugwarha mawazo manene m’obunganyi. Eyi abantu bachishoga eyi bashabana nabo omu kukulikira okuntu yibachiyunva konyine, bizigana kuhwera mu nagoka. (Mez. 28:26) Che chirhumire burhali bwengehe ku bantu babiri bayerekane juba-juba oku basimene n’okurhondera kushambazanya eyi barhanaza menyana bwinja-bwinja.

Olwandiko lwa Mezali 22:3 luderhere: “Omuntu mwengehe anabona obuhanya anachibisha, s’aliko echihwinja chowe chinagenderera embere n’okuhurana ebibazo.” Berhu we, buhanya buhe bwakabaho omu kukolesa esite ze Enternete z’okushambazizanako? Echigayisize, kuli kubona oku bantu banene balikulikize okuntu bali bachiyunva konyine bashabane n’abantu banabona oku Enternete barhanabamenyere, bapatirwe n’engaruka zibi bwenene. Echindi, hali abantu b’endyalya banakolesa e adrese zirhali z’okuli yi babona abantu barhakengukire babalye efuranga. Hali n’amango, abantu bali enyuma y’eyola mipango mibi ntyo abakaderha oku bali Bahamirizi.

Lolaga obwindi buhanya. Hali oluganjo site ziguma z’okushambazizanako zinakolesa, eyi bawazize oku byakagalikana abantu bapatane bwinja. Aliko chiro akaba ntyo, ntacho chiyerekene chiro okw’ebyola banajira binayerekana obukweri. Aliko si chakaba chintu ch’obwenge okuchizera eprograme ze ordinatere abantu bakolaga amango muntu akola kujira echintu ch’akamaro nk’okuchishoga omuntu washabana naye? Nt’amango eprograme ze ordinatere zakolwaga n’abantu zakaba z’akamaro kuguma n’amakanuni me Biblia.​—Mez. 1:7; 3:5-7.

Akanuni kali mu Mezali 14:15 kaderhere ntya: “Omuntu orhayengehere anachizera buli chinwa, aliko omwengehe yewe analolereza buli ntambu yage.” Embere oyemere oku muntu mulebe nj’akubera  mukazi changwa mulume mwinja, bihemere murhange mumenyane naye bwinja. Aliko okubuganana oku Enternete kwakarhuma byabakomerera kumenyena. Chiko akaba oku mwamalire bisanzi binene eyi muli mwarhumirana emyazi, amafoto, n’ezindi mesage, ebyola byakaja byarhuma mwaderha oku mumenyene bwinja? Bantu baguma baliri bawaza mpu lero bapatire abazigirwa babo b’okuli, buzinda banachiganya eyibaja babuganana mesho oku mesho.

Mwandisi muguma we zaburi aliderhere ntya: “Ntachihira haguma n’abantu barhaderha okuli, kandi inachiyasa n’abantu banabisha kurhe bali.” (Zb. 26:4) Bantu banene banabona nka nta chibazo okuhira emyazi yabo y’obubeshi oku adrese ze Enternete z’okushambazizanako yi babonekana oku bakwirire bwenene. Hali oku bakabisha oborhere bwabo b’okuli, changwa banajira okuntu engezo zabo zirhabonekana amango bali barhumirana emyazi oku Enternete. Chiro akaba oku bantu baguma bakayerekana nka bali Bahamirizi ba Yehova, aliko si, banali Bakristu babatizwe? Bali bantu bakulire ekiroho si? Ka banagwerhe obwira bukomere haguma na Yehova si? Banali bantu bakengerwe omu bibaga byabo si? Barhakaba eyibaba bantu barhayerekana olwiganyo lwinja changwa eyi “bera babi” si? (1 Ko. 15:33; 2 Ti. 2:20, 21) K’Amandiko mabahere oruhusa l’okushaba changwa kushabwa? Okwanene omenye eyola myazi, aliko byakukomerera kuyimenya nk’abandi Bahamiziri bamenyere bwinja oyola muntu barhakurhabere. (Mez. 15:22) Omuntu oharamya Yehova arhakwanene kuwaza haba n’akatyu chiro oku ashabana n’omuntu orhali “mwemezi” bulala eyi amaba oku murhambaliko gurhakwanene haguma naye.​—2 Ko. 6:14; 1 Ko. 7:39.

Bulala hali bibazo binene omu kulonza omuntu washabana naye oku site ze Enternete z’okushambazizanako, hali enjira nyinja rhwakalonza mo omuntu rhwasabana naye n’okumenyena bwinja. Gurhe byakashokabana rhupate omuntu mwinja rhwakola naye obunyumpa bukwirire? Amango embuganano z’abantu boshi zirhalahizwe, Abahamiriza ba Yehova bakagala kushimanana n’abandi n’okumenyana nabo bwinja, amango bamaja oku mbuganano z’echibaga, embuganano zikulu n’ezindi-zindi mbuganano.

Amango embuganano zerhu z’abantu boshi zirhali zagaligakana, nka muchinola chihe ch’obulwala b’okuyahukira bwe Korona, rhulirhwakolesa ebikoleso by’echilekektronike omu kujira embuganano zerhu n’ahola byakashobokana okubonana n’abandi Bahamirizi ba Yehova bachili balamba. Wakabona gurhe yibageza ebipindi n’okuhana ebishibizo biyerekene obwemere. (1 Ti. 6:11, 12) Kandi byakashobokana muganire enyuma w’embuganano omu bigusho bigusho bigekegeke. Kugerera embuganano zili nk’ezola n’ebigusho by’Abahamirizi ba Yehova wakabona omuntu osimisizwe naye gurhe y’akolera abandi n’echola chanakuyereka oborhere. (1 Pe. 3:4) Enyuma w’esiku mwakamenyana bwinja mwanabona akaba mugwerhe emehigo n’amakanuni mali kuguma n’akaba mwakapatana.

Amango omuntu ochili mulamba ali alonza eyashabana naye nk’akulikize amakanuni me Biblia, ahola eyi byakashobokana bachibonere obukweri bwa mugani muguma guderhere: “Omuntu wapatire omukazi [changwa omulume] eyapatire echintu chinja, kandi eyapatire olukogo lwa Yehova.”​—Mez. 18:22.