MWAZI G’OKUYIGA 39
Amango Omuzigirwa Wawe Amaleka Kukolera Yehova
“Kangana gurhe . . . bamubabeze.”—ZB. 78:40.
OLWIMPO 102 “Mwasaidie Walio Dhaifu”
OKU BUGEKE *
1. Nka gurhe omuntu anachiyunva amango muntu mulebe omu mulala gwage amachibwa omu chibaga?
KA HACHIGERERE kuba omuzigirwa wawe wachibirwe omu chibaga? Echola chakavuna omurhima bwenene! Mwali-werhu muguma oyirikirwe Hilda, aderhere ntya: “Amango bani afa enyuma ya myaka 41 y’obuhya, naliyunvirhe oku che chintu chibabeze bwenene omu kalamo kani. * Aliko amango mugala wani aleka kukolera Yehova, aleka mukage, n’abana babo, byaliri byakubabaza, byambabaza bwenene.”
Yehova anabona omugayo gunene ogwerhe amango omuzigirwa wawe amaleka kumukolera (Olole echifungu cha 2-3) *
2-3. Nk’oku olwandiko lwa Zaburi 78:40, 41 luyerekene, nka gurhe Yehova anachiyunva amango abakozi bage bamaleka kumukolera?
2 Waza nka gurhe Yehova alivunike omurhima amango baguma b’omu mulala gwage gwa bamalayika baleka kumukolera! (Yud. 6) Kandi waza nka gurhe aligayire amango Abaizraeli alizigiire baliri bachihenula kuye mu mango manene. (Osome Zaburi 78:40, 41.) Ochizere oku Darha w’obuzigire w’embingu anachiyunva ababere amango omuzigirwa wawe amaleka kumukolera. Anayunva akahinda ogwerhe. Olukogo lwage lwakuheba omurhima n’okukuha oburhabale okenere.
3 Mu gunola mwazi, rhwabona bichi rhwakajira yi rhugwarha oburhabale bwa Yehova amango muzigirwa werhu muguma amaleka kumukolera. Rhwashuba kubona nka gurhe rhwakarhabala abandi omu chibaga bahime echola chibazo. Rhurhange rhulole mawazo machi mabi rhwakachilangako.
OMENYE WACHIKABULA KW’AMAGOSA
4. Gurhe bazere banene banachiyunva amango omwana wabo amaleka Yehova?
4 Amango mugala-wawe changwa mwali-wawe amaleka kukolera Yehova, biyunvikene oku bazere boshi oku bakachibaza akaba hali ebi bakajirire yi barhabala omwana wabo agenderere kukolera Yehova. Amango mugala wage achibwa omu chibaga, mwene-werhu muguma oyirikirwe Luke, aderha ntya: “Naliri nawaza oku amagosa mali mani. Naliri nagwarha ebilorho bibi eju y’echola. Mango maguma n’omurhima gwaliri gwanduma.” Elizabeth, naye waligwerhe omugala wachibwaga omu chibaga naye alihurene echibazo chili nk’echola, aderhere ntya: “Magosa mahe nakolere nyono nka nyina? Nkabaga ntaliyigirize mugala wani bintu binene y’azigira Yehova.”
5. Amango muntu mulebe amaleka Yehova, lili gosa lyande?
5 Birhuhemere rhuyibuke oku Yehova ahere buli muguma werhu, oluhembo l’obuhuru b’okuchishoga. Echola chiyerekene oku rhwakachishoga rhwenyine akaba rhwamukenga changwa nanga. Bana baguma barhagwerhe abazere bali mufano gwinja, aliko bachishogere kukolera Yehova n’okugenderera kuba bimana embere zage. Abandi bagwerhe abazere bakolere okwabo koshi omu kugenderera kubayigiriza kuzigira Yehova, aliko buzinda baleka kumukolera. Che chirhumire buli muguma werhu akwanene kuchishoga akaba akolera Yehova. (Yos. 24:15) Bobola, abazere bagwerhe omugayo bulala omwana wabo alekere kukolera Yehova, barhakwanene kuwaza oku lili gosa lyabo!
6. Nka gurhe balala bachili badorho changwa emisole bakachiyunva amango abazere bamaleka kukolera Mungu?
6 Mango maguma, omuzere akaleka kukolera Yehova n’okujahika omulala gwage. (Zb. 27:10) Ebyola byakavuna omurhima bwenene abana bakengere abazere babo n’okubabona oku bali mufano gwinja bakakulikira. Esther, ow’eshe achibwaga omu chibaga, aderhere ntya: “Naliri nalaka bwenene bulala nalimenyere oku arhalichigenderere omu kuli. Alichishogere yenyine oku arhachilonzeze kolera Yehova. Nzigire darha, bobo, amango achibwa omu chibaga, nayinja nayubaha akaba achigenderera kulama akalamo kage kenja. Nalema najanjabala.”
7. Nka gurhe Yehova anachiyunva eju y’omwana omuzere wage achibirwe omu chibaga?
7 Mwe bana, akaba muguma omu bazere benyu achibirwe omu chibaga, emirhima yerhu ebabere eju y’echola! Muchizere oku Yehova amenyere bwinja amalumwa menyu. Abazigire bulala muli mwagenderera kumukolera oku bwimana, nerhu bene-benyu na bali-benyu b’omu chibaga, rhuchishingiire mwabo. Muyibuke oku, arhali mwemwarhumaga abazere benyu bachishoga ntyo. Nk’oku rhwabonaga embere, Yehova ahere buli muguma werhu obuhuru b’okuchishoga akaba amukolera changwa nanga. Kandi buli muguma ahaanire akalamo kage emwa Yehova anabatizwa oku bwage, akwanene “aheke yenyine omuzigo gw’eby’achishogere kujira.”—Gal. 6:5, amahugulo m’eshishi.
8. Bichi Abakristu bali bimana bakaba eyi bali bajira omu kurhabala omuzigirwa wabo agalukire Yehova? (Olole echisanduku “ Ogalukire Yehova.”)
8 Amango omuzigirwa wawe amaleka kukolera Yehova, biyunvikene oku wakagenderera kulangalira oku mango maguma nj’agaluka. Bichi wakaba oli wakola ok’onali walindira oku agalukira Yehova? Wakagenderera kukola ok’ogalire koshi omu kukomeza obwemere bwawe. Omu kujira ntyo, waba mufano gwinja oku bandi bantu b’omu mulala na chiro n’oku wachibirwe omu chibaga. Kandi wagwarha emisi okenere y’ogenderera kulwisa akahinda kawe. Bobola bichi wakajira y’ogenderera kulwisa ebibazo byawe?
BICHI WAKAJIRA Y’EHALI YAWE Y’EKIROHO EGENDERERA KUKOMERA?
9. Bichi wakajira y’ogenderera kugwarha obwemere bukomere? (Olole echisanduku “ Amandiko Mahebere Omurhima Amango Omuzigirwa Wawe Amaleka Yehova.”)
9 Ojire okwawe koshi ogalire y’ehali yawe y’ekiroho egenderera kukomera. Bili by’akamaro bwenene ogenderere kuchikomeza woyo n’abandi bantu b’omu mulala. Nka gurhe wakajira ntyo? Wagwarha emisi erhengere emwa Yehova omu kugenderera kusoma Echinwa cha Mungu n’okuchikengerako n’okuchihangana kuhika oku mbuganano ze Chikristu. Joanna, ey’eshe na mwene-wabo balekaga okuli, aderhere ntya: “Nanchiyunva ntulerere amango namasoma engani zili omu Biblia nk’eza Abigaili, Esteri, Yobu, Yusufu, n’eza Yesu. Emifano yabo enampeba omurhima n’okuntabala yi ngwarha amawazo menja. Ezindi nyimpo zerhu zinampeba omurhima nazo”
10. Nka gurhe olwandiko lwa Zaburi 32:6-8 lurhurhabere rhulwise akahinda rhugwerhe?
10 Obwire Yehova buli choshi chikubabeze. Amango wamachiyunva ogayire, omenye waleka kusalira. Ogenderere kuhema Mungu werhu w’obuzigire akurhabale ogenderere kubona ebintu okuntu naye ali abibona kandi ‘akuha oburhegerezi n’okukuyerekeza omu njira okwanene kugeramo.’ (Osome Zaburi 32:6-8.) Kweri, nkabaga byakaba birhukomerere okubwira Yehova okuntu koshi rhuli rhwachiyunva. Aliko Yehova ab’amenyere bwinja amalumwa mawe m’oku murhima. Yehova akuzigire loshi analonzeze ofungule omurhima gwawe emunda ali.—Kut. 34:6; Zb. 62:7, 8.
11. Nk’oku olwandiko lwa Waebrania 12:11 luyerekene, bulagurhe rhukwanene kulangalira obuhane b’obuzigire bwa Yehova? (Olole echisanduku “ Okuchibwa Omu Chibaga, Obuhane b’Obuzigire bwa Yehova Bunarhabala.”)
11 Rhuyemere okuntu abashamuka bachire olushinja. Okuchibwa omu chibaga chili chigabi ch’omupango gwa Yehova. Obuhane bwage b’obuzigire eli njira nyinja y’okurhabala olala walekere kukolera Yehova, enali nyungu oku bandi boshi. (Osome Waebrania 12:11.) Baguma omu chibaga bakaderha oku abashamuka barhachire olushinja bwinja omu kucha omu chibaga muntu mulebe, aliko oyibuke oku abantu bali nk’abola barhazigana kuderha oku bilolere ebintu bibi oyola muntu akolere. Rhurhakamenya kweri gurhe ebintu byoshi byaliri. Bobola kuli kwinja rhuchizere oku abashamuka bachaga olola lushinja, balijirire okwabo koshi yi bakulikira amakanuni m’Amandiko n’okucha olushinja nk’oku Yehova alonzeze.—2 Ny. 19:6.
12. Nyungu zihe bantu baguma bapatire omu kukenga omupango gwa Yehova g’okuhaana obuhane?
12 Omu kuyemera okuntu abashamuka bachire olushinja omu kucha omu chibaga omuzigirwa wawe, nkabaga kweri kwamurhabala agalukire Yehova. Elizabeth rhwabaga rhwaderhereko embere, aderhere ntya: “Byalibirhukomerere okurhagwarha chiro chintu n’echiguma rhwabugananako na mugala werhu wabaga akala akulire. Aliko ayusize kugalukira Yehova, ayemera oku byalibikwanene achibwe omu chibaga. Buzinda aderha oku aliyigire bintu binene binja. Nayigire oku obuhane bwa Yehova buli mango buba b’okunali.” Eba oyirikirwe Mark, ayongerere ntya: “Enyuma wa siku zinene, mugala werhu ambwira oku alonzeze agaluke eka bulala rhwalijirire ebi rhwalikwanene kujira. Bobola nsimire okubona Yehova arhurhabere rhuyorhe eyi rhumukengere.”
13. Bichi byakakurhabala olwise amawazo mabihire?
13 Oganire na bera bawe bakayunva nka gurhe oli wachiyunva. Ogeze akasanzi haguma n’Abakristu bakulire ekiroho bakakurhabala ogenderere kugwarha oborhere bwinja. (Mez. 12:25; 17:17) Joanna, rhwaganiragako burhanzi, aderhere ntya: “Omu murhima gwani, nachiyunva ndi nyenyine. Aliko okuganira n’abera nchizerere kwantabere bwenene.” Aliko bichi wakajira nka hali muntu muguma omu chibaga, wamaderha ebintu byakarhuma wachiyunva ogayire bwenene?
14. Bulagurhe rhukwanene “kugenderera kulemberana n’okubabalirana oku bulonza buli muguma n’owindi”?
14 Obe wakulembera bene-benyu na bali-benyu. Orhalingaga oku boshi bakakubwira ebinwa bikwirire. (Yak. 3:2) Rhweshi rhuli bantu barhashinganene, che chirhumire omenye wasomezwa amango muntu mulebe arhamenyere ebi akaderha changwa anaderha ebintu byakakubabaza eyarhanali kw’alishondere kuderha. Oyibuke ehano ly’entumwa Paulo liderhere ntya: “Mugenderere kulemberana n’okubabalirana oku bulonza buli muguma n’owindi chiro akaba omuntu agwerhe empavu y’okulaka-laka eju y’owindi.” (Kol. 3:13) Mwali-werhu muguma ogwerhe omuntu w’omu mulala gwage walichibirwe omu chibaga afasiriye ntya: “Yehova alintabere mbabalire bene-berhu balonzaga kumpeba omurhima omu njira erhalikwanene.” Bichi echibaga chakajira yi chirhabala abantu b’omulala bali bimana?
ECHIBAGA CHAKARHABALA
15. Bichi rhwakajira yi rhurhabala abantu b’omulala omuzigirwa wabo achizindire kuchibwa omu chibaga?
15 Obe mwinja na mwira oku bantu b’omulala bali bimana. Mwali-werhu muguma oyirikirwe Miriam aderhere oku alichiyunvirhe ababere omu kuja oku mbuganano amango musheja wabo ayusaga kuchibwa omu chibaga. Aderhere ntya: “Naliyubahire eju y’eby’abantu bakaderhere. Aliko haliri bene-berhu na bali-berhu banene balibabere eju y’ebyampikiraga, nta na chibi baliri baderha oku bilolere musheja werhu. Balikolere bwenene ntalichiyunvirhe ndi nyenyine omu kahinda kani.” Owindi mwali-werhu aderhere ntya: “Mugala werhu ayusize kuchibwa omu chibaga, bera berhu bazigirwa barhuheba omurhima. Baguma baliri baderha oku barhamenyere bichi bakaderha. Baliri barhoza emiziga haguma nani changwa kuntumira amaruba m’okumpeba omurhima. Ebi bakolaga byalintabere bwenene!”
16. Nka gurhe echibaga chakagenderera kuheba omurhima n’okurhabala omuntu w’omu mulala gw’owachibirwe omu chibaga?
16 Ogenderere kushishikala obantu b’omu mulala bali bimana. Bakenere rhubazigire n’okubaheba omurhima bunola bulala bibakenere mu manola mango. (Ebr. 10:24, 25) Mango maguma ab’omu mulala g’owachibirwe omu chibaga banabona oku abantu b’omu chibaga barhachibadedesa, wamenya nka nabo bachibirwe omu chibaga. Rhurhalonzeze oku bagwarhe amawazo mali nk’amola! Rhwalema rhwababwira koko abachili misole ab’abazere babo balekere kukolera Yehova. Maria, ey’eba achibwaga omu chibaga analeka omulala gwage aderhere ntya: “Baguma mu bera bani bayinja ahabunga barhuvuyira akalyo n’okuntabala nyige n’abana bani. Baliyunvirhe akahinda ngwerhe banalira haguma nani. Baliri banderhera amango abandi baliri banderha kubi. Balimpebere omurhima bwenene!”—Ro. 12:13, 15.
Bene-berhu na bali-berhu b’omu chibaga bakayereka obuzigire omulala g’omuntu wachibirwe omu chibaga (Olole echifungo che 17) *
17. Bichi abashamuka bakajira omu kuheba omurhima balala bagwerhe akahinda?
17 Bashamuka wee, mukolese akasanzi kakabonekana omu kukomeza obwemere bw’abantu b’omu mulala bali bimana. Mugwerhe akasi k’akamaro k’okurhuliriza balala omuzigirwa wabo alekere kukolera Yehova. (1 Te. 5:14) Obahebe omurhima omu kuganira nabo embere n’enyuma w’embuganano. Obalambagirire emwababo onasalire haguma nabo. Ohubiri haguma nabo changwa mango maguma wanabahamagala oku buharamye b’omulala gwenyu. Abashamuka bakwanene kushishikala balala bagwerhe akahinda n’okubayareka olukogo n’obuzigire bakenere.—1 Te. 2:7, 8.
OGENDERERE KUBA MWIMANA N’OKULANGALIRA YEHOVA
18. Nk’oku olwandiko lwa 2 Petro 3:9 luyerekene, bichi Mungu alonzeze balala balekere kumukolera bajire?
18 Yehova “arhalonzeze haba n’omuguma alibumbulwe s’aliko alonzeze boshi bahikire kuhungama.” (Osome 2 Petro 3:9.) Chiro omuntu akola echaha chikomere, akalamo kage kachili k’akamaro embere za Mungu. Oyibuke oku Yehova alipire beyi linene, k’okuderha, akalamo k’Omugala muzigirwa ku buli muguma werhu. Yehova anasima ajire okuntu koshi y’arhabala balala boshi bamulekere bamugalukire. Alangalire oku bachishoga kujira ntyo nk’oku biyerekenwe omu mufano gwa Yesu g’omwana w’echirara. (Lu. 15:11-32) Banene balekere okuli bayinjire galukira Darha w’obuzigire w’embingu. Na bene-berhu na bali-berhu banachihangana bwenene kushuba kubaha karibu. Elizabeth, rhwashambalagako burhanzi, aliyunvirhe asimire bwenene okubona omugala agalukira Yehova. Aderhere ntya: “Nalisimire bwenene balala baliri barhuheba omurhima rhumenye rhwaheza obwemere bwerhu.”
19. Bulagurhe rhwakagenderera kulangalira Yehova?
19 Rhwakalangalira Yehova esiku zoshi. Obwerekezi bwage bunarhurhabala esiku zoshi. Ali wakuhaana anali Darha w’olukogo na buzigire bunene ku balala banamuzigira n’okumuharamya. Ochizere oku Yehova arhakuleka chiro haba n’ehityu omu mango m’ebibazo. (Ebr. 13:5, 6) Mark rhwaderhagako burhanzi ashambere ntya: “Yehova arhakarhulekerera, esiku zoshi arhurhabala omu mango rhuli rhwalibuka.” Yehova agenderera kukuha “emisi erhalukire eyi wakagwarha.” (2 Ko. 4:7) Nechi, wakagenderera kuba mwimana, n’okulangalira chiro amango omuzigirwa wawe amaleka kukolera Yehova.
OLWIMPO 44 Sala ya Mtu wa Hali ya Chini
^ mus. 5 Rhunayunva rhubabere bwenene amango rhwamabona omuzigirwa werhu amaleka kukolera Yehova! Mu gunola mwazi, rhwabona nka gurhe Mungu werhu anachiyunva amango muntu mulebe amaleka kumukolera. Rhwayiga bichi abantu b’omulala guli m’omuntu walekere kukolera Yehova gwakajira yi gupata echirhulirizo n’okugenderera kukomeza obwemere bwabo. Mu gunola mwazi rhwashuba kubona nka gurhe echibaga chakarhuliriza n’okurhabala ogola mulala.
^ mus. 1 Mazino maguma mu gunola mwazi mahindamwirwe.
